Apocalipsis 14:1-20
14 Txãa eꞌsuꞌ uythu Piisxakuẽ jĩnisa Sion thãꞌj vxiçte yujuçxa ũste. Txãa yakh vxite ũsuꞌtx, ciento kuarenta y kuatro mil nasa, txãaweꞌsx dxikthesu yuꞌ Piisxakuẽ jĩnisa yase vxiteꞌ txajx Tata yaseꞌs jiꞌphsa.
2 Txajũꞌ cielujũ susni pthũusek yuꞌwala kuhsa susni naꞌwẽ vxiteꞌ kpiꞌsx çxhãçxha weꞌweni naꞌwẽ susni, iiméh wala kuhsa txãaweꞌsx arpa tukani naꞌwẽk pthũuseꞌ.
3 Txãa nasaꞌ mem uꞌsesatx memuꞌ, Dxus jxkaahna ũsni vxiteꞌ Dxus vxitni ĩtxĩsa pahzsaweꞌsx vxiteꞌ Dxus luuçxtxi jxkaahsaweꞌsx txãaweꞌsx tasxte. Txãꞌsaꞌ kim yuhwa piyayaꞌ ãjaꞌçmeetaꞌ, naasáa naa kiweteweꞌsx ksxavxyu ewte neeyũusáa ciento kuarenta y kuatro mil txãaweꞌsx yuuçxáatx ãjãꞌ.
4 Txãaweꞌsxaꞌ Dxus yuuçxáana selpiina fxiꞌzesatx yuꞌ, saꞌ txãaweꞌsxaꞌ nasaa ksxavxyu nweꞌwenitx yuu Dxus jĩi vxiteꞌ Piisxakuẽ jĩnisa txãa jĩi yuuwaꞌjsa, nyafxte nweꞌwenisa. Txãasatx Piisxakuẽ jĩnisa ikhni yuuk txãa mtee uꞌthewa txãa yakh jaꞌda uꞌjweꞌ.
5 Saꞌ kĩhçxáa yuhwa ĩsxĩisa yuꞌçmeetaꞌ, saꞌ Dxus jxkaahna ũsnite kĩh pkal yuhwa jiꞌphmée ũstaꞌ.
Dxus angelesweꞌsx tekhsa ptaꞌsxyaꞌ kasehni
6 Txajũꞌ Dxus angel fxuhna uꞌjweçteth uy ẽe walasu. Saꞌ ewte neeyũunisa bagaçxte yuhwa pçuwaꞌjsameꞌs ptaꞌsxwaꞌjaꞌsku jiꞌphuꞌ naa kiweteweꞌsx mtee mteeweꞌsxtxiwa, nasa maꞌwẽsa, fxiyfxiyçxáa weꞌwesa, maa çxhabsuweꞌsxtxiwa jxuka.
7 Saꞌ naꞌjĩnak sus weꞌweꞌ:
—Dxusaꞌs mtuutheꞌjwe ũukhna. Txãꞌwẽmeꞌ jxukaysatx kastigãywaꞌj enaꞌ ãjxãꞌkh. Mneeweꞌwewe cielu, kiwe, mar, yuꞌ, kĩjkĩhnawa jxuka vxit-saꞌs jĩꞌk.
8 Txajũꞌ Dxus angel vxite naꞌjĩnak sus weꞌwe:
—Babilonia çxhab txakwe çxhãçxhasaçxawa, Dxus kastigoꞌs jxpaꞌgawaꞌthe yãꞌj ũsaꞌ. Txãꞌwẽ yuukahníi naa kiwete nasa mteeweꞌsxtxiwa jxukaysa pkal kazxte fxiꞌzewaꞌjaꞌsku kaapiyaꞌj naa paꞌga jĩꞌk.
9 Txajũꞌ Dxus angel tekhteweꞌsxku naꞌjĩna sus weꞌwe:
—Maawa eçx seenaꞌsa vxiteꞌ txãa naꞌwẽy piisani yuuk txãatx neeweꞌweçxa, txajx iisawaꞌjniꞌs kaakiꞌpuꞌjuna dxiꞌpte meeçxawa kusete naꞌ,
10 txãꞌwẽ yũusaꞌ Dxus kastigo seenaꞌ nxussaꞌs jxpaꞌgatxna txãꞌwẽ yũupaꞌga. Saꞌ seenaꞌ yuh kastigãyni yuuna asufxre ipx walate, Dxus angelesweꞌsx vxiteꞌ Piisxakuẽ jĩnisa ikhni yuuk txãaweꞌsx dxiꞌpte.
11 Kastigãyni ipx wala ajaꞌ bagaçxte yuhwa pçumée sxiꞌtana nes yuuna. Açaꞌ kxteeaꞌ en maꞌk yuu kus maꞌk yuu nawa bagaçxte yuhwa jxkaasewaꞌjaꞌs jiꞌphumeetxna, txãꞌwẽ eçx seenaꞌsa vxiteꞌ txãa naꞌwẽy piisani yuuk txãatx neeweꞌweçxa txajx yaseju iisawaꞌjniꞌs kaakiꞌpuꞌphaꞌga.
12 Txãa paꞌga Dxus luuçxaꞌ txajx jxkaahniꞌs kxtey nwẽeseꞌjna Jesus yakh yuuçxáa çxhãçxha fxiꞌzewaꞌjaꞌs jiꞌphuwaꞌj peejxtaꞌ jĩꞌk.
13 Txajũꞌ kiꞌ wẽseꞌth weꞌweni cielujũweꞌsx, txãꞌ adxaꞌs naꞌjĩꞌk:
—Naa skhẽwniijũ Kristoꞌs jxpaꞌgaçxa uusaaweꞌsxaꞌ wala yuh wẽtwẽt fxiꞌzesa yuutxna jĩniꞌs mfxiꞌj jĩteꞌ, Dxus Espiritu pasçxaꞌ: Txãꞌwẽ yujaꞌ, txãaweꞌsxaꞌ jxkaaseetxna Dxusna selpiina pxthaa yuuna fxiꞌzenijũ, saꞌ cielute uyuutxna txãaweꞌsx mjĩiniꞌs jĩꞌk.
Skuutxh uwatx pkhakhni
14 Txajũꞌ thegçxa uythu tãaph çxihme kajkwete nasa yuusáa naꞌwẽsak teeçx kaçxçxa uꞌpuꞌ. Dxikthete vxyuu bee koronak jiꞌphuꞌ, saꞌ kusete yuꞌ skuutxh wakani zeksaꞌsku jiꞌphuꞌ.
15 Cielute Dxus ũsnijũ vxite angel sus weꞌwena kasejk tãaphte kaçxçxa uꞌpsaꞌs naꞌjĩna:
—Skuutxhaꞌs wakaçxa mepkhakh. Txãꞌwẽmeꞌ jxuka thẽꞌkh açaꞌ pkhakhwaꞌj en ãjk jĩteꞌ,
16 tãaphte kaçxçxa uꞌpsaꞌ naa kiwete skuutxhaꞌs wakaçxa jxuka pkhakhku.
17 Txajũꞌ cielute Dxus ũsnijũ vxite angelwa kasejk uwa udeni zeksaꞌs atçxa.
18 Naapkaçxhaꞌ Dxus altaluh vxite angel kasejk txãꞌ ipxaꞌs kaahwaꞌjsak yuꞌ. Saꞌ uwa udenisaꞌs jiꞌphsaꞌs naꞌjĩnak sus weꞌwe:
—Uwaꞌs uhdeçxa mepkhakh. Txãꞌwẽmeꞌ jxuka thẽꞌjni yãꞌj ũstaꞌ naa kiwete jĩteꞌ,
19 Dxus angelaꞌ naa kiwete uwaꞌs jxuka uhdeçxa pkhakhku, saꞌ teeçx ahteçxaçxáak jxuka ãsx kxtee kuꞌsyaꞌ. Txãa yuꞌ Dxus kastigoꞌ naꞌwẽ seenaꞌ yuuwaꞌjsaꞌ jĩnisak yuꞌ.
20 Txãa uwatxiꞌs çxhab ekajk kuꞌsni yuu, açaꞌ eeçxaçxáak uwu jiba fxrenusu kãhpkaçx, tres cientos kilómetro peekuꞌjsu pkaçxku txãꞌwẽ uta.
