Apocalipsis 16:1-21
16 Txajũꞌ siete angelesweꞌsxtxi naꞌjĩna sus weꞌweni wẽseꞌth Dxus ũsnijũ:
—Dxus kaahni kastigo seenaꞌsatx siete kopate jiꞌphiꞌkwe txãatx meꞌjwe pkawyaꞌ kiwete jĩteꞌ,
2 Dxus angel nyafxteweꞌsxaꞌ uꞌjçxa txãa kopateweꞌsxaꞌs kiwete pkawku. Açaꞌ txãꞌwẽ yũuteꞌ, nasa jxukaysa eçx seenaꞌ kazxsa vxiteꞌ txãa eçx naꞌwẽy piisani yuuk txãatx neeweꞌwesaweꞌsxtxiꞌs kakwete wãꞌjy seenaꞌ akasa paꞌkh.
3 Dxus angel eꞌsteweꞌsxaꞌ txãa kopateweꞌsxaꞌs martek aw, açaꞌ txãa maraꞌ nasaa ee naꞌwẽçxaçxáak yuu jxuka. Txãꞌwẽ yũuteꞌ, txãa marte ũssa ĩtxĩsa jxuka uutx.
4 Txajũꞌ Dxus angel tekhteweꞌsxaꞌ txãa kopateweꞌsxaꞌs yuꞌwalasu vxiteꞌ yuꞌleꞌçxkuẽsu kxsũuk aw, açaꞌ yuꞌ maꞌwẽsawa jxuka eeçxaçxáatx yuu.
5 Txajũꞌ Dxus angel yuꞌaꞌs thegsaꞌ naꞌjĩna weꞌweniꞌsthu wẽseꞌj: Dxus, nyafxíiwa idxgu yuꞌ saꞌ ãçxwa txãaíiçxáag, Dxus atesa. Txãasag txãꞌwẽ kastigaĩꞌ.
6 Iidx yuweꞌs ptaꞌsxpaꞌga ahçeçxa idx yakh fxiꞌzesaweꞌsxtxi ee pkawtxi, txãa paꞌgag txãꞌwẽ yũusatxiꞌs kaꞌtuwa ee yusuꞌ. Txãaweꞌsxaꞌ kastigoꞌs jxpaꞌgawaꞌj jiꞌph yuhtaꞌ jĩꞌk.
7 Naapkaçxhaꞌ Dxus altaluh naꞌjĩna vxite weꞌweniꞌswa wẽseꞌth:
—Dxus kĩhtewa jxuka ãjãsa idxaꞌ peekxçxáa kastigaĩmée, isag kastigaĩꞌ jĩnik pthũuse.
8 Txajũꞌ Dxus angel pahzteweꞌsxaꞌ txãa kopateweꞌsxaꞌs sektek aw. Txãꞌwẽ yũuteꞌ, sekaꞌ nasatx iiméh wala açxa kweethkahnku txãꞌwẽ yuu.
9 Açaꞌ jxukaysa iiméh seenaꞌ wala çxhavxytxi. Nawa pkalaꞌs nvxihtçxa Dxus tasxte yuꞌ sxawedmeetaꞌ txãꞌsna neeweꞌweyaꞌ. Txãꞌwẽ Dxusna yaakipkaçxte, jweeíiçxáatx txãꞌsna açeweꞌweꞌ txãꞌwẽ seenaꞌ kastigãyyaꞌ ãjãsaꞌs.
10 Txajũꞌ Dxus angel tahçteweꞌsxaꞌ txãa kopateweꞌsxaꞌs eçx seenaꞌ kazx ũukhũukhsa jxkaahna ũsnitek aw, açaꞌ txãa jxkaahna ũsni kiweꞌ çxhiꞌdxteçxáak yuu. Txãꞌwẽ seenaꞌ yuuteꞌ, nasaꞌ ũusçxaniite thuneꞌs yaꞌwaꞌkiꞌtx kastigo txakwe seenaꞌsa paꞌphaꞌga.
11 Makwe txãꞌwẽ yuutewa, txãaweꞌsx ewmée yũuna fxiꞌzeni yuꞌsaꞌ weh yuhwa ivxiituꞌçmeetaꞌ. Txãꞌwẽ wãꞌjy seenaꞌ akasa paꞌthewa, jweeíiçxáatx cielute Dxusaꞌs açeweꞌweꞌ.
12 Txajũꞌ Dxus angel seisteweꞌsxaꞌ txãa kopateweꞌsxaꞌs Eufxrates yuꞌwalatek aw. Açaꞌ txãꞌwẽ yũuteꞌ, txãa yuꞌwalaꞌ uhdxku jxkaahsaweꞌsx sek kãani juꞌgu yuusa uykhẽwyaꞌ ãjãkahn.
13 Txajũꞌ naꞌwẽsath vxite uy: Eçxthẽꞌj yuwejũ vxiteꞌ eçx seenaꞌ kazxsa Kristoꞌs açeweꞌwesa yuwejũ vxiteꞌ eçx kazxsa Dxus yuwe ptaꞌsxsa naꞌwẽ kĩhwa kaavxyaꞌjaꞌjçxa kaypubaꞌjsa yuwejũ tekh eçxtxi kaseh sap naꞌwẽsa.
14 16:14-16 Txãa eçx sap naꞌwẽsa yuꞌ kĩjkĩhwa seenaꞌsatx kaavxyaꞌjaꞌjyaꞌ ãjãꞌtx, saꞌ txãaweꞌsxaꞌ naa kiwete jxkaahsa jxukaysatx pkhakhyaꞌ uꞌjtx, nmeh ente Dxus txakwe çxhãçxhasa yakh puiiyaꞌ sũhçxa. Saꞌ jxkaahsaweꞌsx jxukaysatx pkhakhtxi hebreo yuwete Armagedón jĩꞌtx teeçx ahte kxtee. Kristo weꞌweçxaꞌ: Yajkxmée ũsiyna, peswée naꞌwẽçxáa paꞌjaꞌnja, açaꞌ txãa ente thaamena ũsyaꞌmée, Dxus yakh txutemée fxiꞌzesaꞌ wala yuh wẽtwẽt neeyũutxna jĩꞌk.
15 —
16 —
17 Txajũꞌ Dxus angel sieteteweꞌsxaꞌ txãa kopateweꞌsxaꞌs ẽesuk pkaw, naapkaçxhaꞌ Dxus ũsni cielujũ naꞌjĩnisak sus weꞌweni pthũuse txajx jxkaahna ũsnijũ:
—Naꞌ Dxus kastigo nmehteweꞌsxaꞌ jĩꞌk.
18 Txajũꞌ kpiꞌsx kwehnena weꞌweni seenaꞌ susku, açaꞌ ehd iiméh seenaꞌ çxhãçxha uꞌkh, naa kiwe yuuiyna bagaçxte yuhwa txãꞌwẽ yuꞌ ehd çxhãçxha uꞌjweçmeeneꞌ.
19 Txãꞌwẽ ehd uꞌphaꞌga naa kiwete çxhab jxuka pçuutx. Açaꞌ çxhab iiméh seenaꞌ walasawa tekh ahsutx upe. Açaꞌ Dxusaꞌ yajkxku Babilonia çxhab walaꞌs jxukate kastigãyyaꞌ, seenaꞌ ewmée yũupaꞌga.
20 Txajũꞌ mar pxãhsu kiwe uꞌpsa vxiteꞌ vxiç wala jxuka vxitutx.
21 Naapkaçxhaꞌ cielujũ kwetuba nasaa kajkwekhẽ ũsxitx seenaꞌ walasa pahz açxoba ãh duhsa. Açaꞌ txãꞌwẽ seenaꞌ yũuteꞌ, nasa yuꞌ jweeíiçxáatx Dxusaꞌs açeweꞌweꞌ, txãꞌwẽ kastigo seenaꞌsaꞌs kaaphaꞌga.
