Apocalipsis 17:1-18
17 Txajũꞌ siete angelesweꞌsx naꞌwẽ siete kopa jiꞌphuꞌtx txãateweꞌsx teeçxsaꞌs uythu, açaꞌ adxaꞌs naꞌwẽk weꞌwe:
—Ayte myuh, naꞌwẽ uꞌy kazx yũuna fxiꞌzesa mar kajkwete kaçxçxa uꞌpaꞌ txãꞌsna kastigãywaꞌjaꞌs ptaꞌsxyaꞌwath.
2 Maa kiwete jxkaahsaweꞌsxwa txãa uꞌy yakhçxaçxáatx kazx pkal yũuna fxiꞌzeꞌ, açaꞌ naa kiwete nasaꞌ txãa kazx fxiꞌzewaꞌj yuuçxáanatx piyana ũsuꞌ.
3 Txajũꞌ adxaꞌ Dxus Espiritu aphniith yuu, açaꞌ Dxus angelaꞌ adxaꞌs peꞌjna uꞌkh nasa uꞌpnimée kiwete. Kxteeaꞌ teeçx uꞌy eçx beh seenaꞌ kazxsa kajkwete aꞌjçxa uꞌpteth uy. Açaꞌ txãa eçx seenaꞌ kazxsa kakwete yuꞌ Dxusna açeweꞌwena fxiꞌjnisaçxáa utak jiꞌphuꞌ, saꞌ siete dxikthé diez kaaçxuk jiꞌphuꞌ.
4 Txãa uꞌyaꞌ athni ropa iiméh ew behsak jiꞌphuꞌ, vxyuu beh vxiteꞌ kwet zhiçxkwesa vxiteꞌ perla iiméh paꞌgasa txãꞌwẽsa atxhku iijxũ yuꞌ. Saꞌ kusete yuꞌ vxyuu bee kopa ewmée kazxsaçxaçxáa uta jiꞌphsaꞌsku jiꞌphuꞌ.
5 Saꞌ dxikthete yuꞌ naꞌwẽk fxiꞌjni yuꞌ: Babilonia çxhab kazx jxtuhthesa kazx yũuwaꞌjaꞌs kaapiyaꞌjsa jĩnak fxiꞌjni yuꞌ.
6 Txajũꞌ jiyuth, txãa uꞌyaꞌ tũunik yuꞌ Dxus luuçxweꞌsx ee vxiteꞌ Jesus kaapiyaꞌjniꞌs ptaꞌsxpaꞌga ikhni yuutx txãaweꞌsx ee yakh. Saꞌ uꞌy txãꞌwẽsaꞌs uyçxaꞌ, wala ũukhthu.
7 Txajũꞌ Dxus angelaꞌ naꞌjĩꞌk:
—¿Kĩh yũuçxa ũukhna ũsga? Kaajiyuꞌjyaꞌwath txãa uꞌy maꞌwẽsatewa vxiteꞌ txãa eçx seenaꞌ kazxsa tũꞌsna uꞌjweçaꞌ siete dxikthé jiꞌphçxa diez kaaçxu jiꞌphaꞌ txãꞌsna.
8 Eçx seenaꞌ kazxsaꞌs uygu txãꞌ nyafxíi yuꞌ ũsuꞌk, nawa ãçxhaꞌ meeaꞌ. Txãꞌwẽçxawa kafx iiméh seenaꞌ dxiisajũ kasejena vxituyaꞌ. Açaꞌ naa kiweteweꞌsx jxukaysa txãaweꞌsx yaseꞌs bagaçxteçxáa yuhwa uuwaꞌjmée ĩtxĩ fxiꞌzewaꞌj librute fxiꞌjnimeesa yuꞌ wala yuh ũukhutxna txãa eçx seenaꞌ kazxsa kiꞌ vxyaana txãꞌsna uyçxa.
9 Naꞌsaꞌ jiyuwaꞌjsa ũsçxaꞌ, mjiyuwe: Uꞌy kaçxçxa uꞌpaꞌ txãa eçx dxikthé sietesaꞌ siete vxiç walataꞌ.
10 Saꞌ txãa dxiktheíiçxáa siete jxkaahsataꞌ. Txãa jxkaahsaweꞌsxaꞌ tahçsa yuꞌ vxituyãꞌjtx, açaꞌ ãçxhaꞌ seisteweꞌsxaꞌ jxkaahna ũsaꞌ, nawa nmehteweꞌsx sietesa yuꞌ jxkaajxaꞌ takhmeyaꞌ. Nawa txãa nmehteweꞌsxaꞌ jwee yuꞌ txaçxmée jxkaajana.
11 Eçx seenaꞌ kazxsa nyafxíi yuꞌ ũsuꞌk nawa ãçxhaꞌ meeaꞌ txãꞌ jxkaahsa sietesak yuꞌ. Nawa ew jiyute yuꞌ, txãaíiçxáa jxkaahsa oçxoteweꞌsx yuuwaꞌjsaꞌ. Txãa eꞌsu isa jxukate vxituna.
12 Saꞌ diez kaaçxu uygu txãa yuꞌ diez jxkaahsaweꞌsxtaꞌ. Nawa txãaweꞌsxaꞌ jxkaajxaꞌ takhmeytaꞌ. Nawa jxkaahsa yuuwaꞌjaꞌs jxpaꞌgatxna wala txaçxmeekuẽçxáa, eçx seenaꞌ kazxsa yakh jaꞌdaçxah.
13 Txãa diez jxkaahsaweꞌsxaꞌ maꞌwẽ yũuwaꞌjaꞌswa kxazíi jaꞌdaçxah puutx weꞌweçxa ũstaꞌ. Txãasa eçx seenaꞌ kazxsaꞌs kçxhãaçxhaꞌjatxna kxteeçxah jxkaah puꞌçxna.
14 Txãꞌwẽ yũuçxa Piisxakuẽ jĩnisa yakh puiitxna. Nawa Piisxakuẽ jĩnisa yuh pejka knayuuna txãaweꞌsxtxiꞌ, txãa paꞌgatey txãꞌ Maatewa Jxthaakwe Çxhãçxhasaꞌ, saꞌ Maa Jxkaahsatewa Jxthaakwe Jxtuhthesaꞌ. Açaꞌ txãa yakh ũssaꞌ Dxus peeygãhçxa nweꞌwenisataꞌ txãa yakh txutemée fxiꞌzesa.
15 Txajũꞌ Dxus angelaꞌ vxite naꞌwẽsaꞌswa ptaꞌsxku:
—Naꞌwẽ uꞌy kazx pkal yũuna fxiꞌzesa kaçxçxa uꞌpni mar uygu txãꞌ naataꞌ: maa kiwete çxhabwa jxuka, nasa majũweꞌsxwa fxiyfxiyçxah weꞌwesa txãataꞌ.
16 Saꞌ eçx seenaꞌ kazxsa dxikthesu diez kaaçxu uygu txãꞌ jxkaahsa yuuwaꞌjsataꞌ, saꞌ uꞌy kazx pkal yũuna fxiꞌzesaꞌs ahçeçxa sũpxçxáa wãatajatxna. Txãꞌwẽ yũuçxa, kakwete çxiçx yuꞌsaꞌ ũꞌçxa ipxte kabutxna.
17 Txãa uꞌyaꞌs txãꞌwẽ yũuçxa ivxiitukahn, Dxus neꞌ jxthãas. Txãa paꞌga txãa jxkaahsaweꞌsxaꞌ eçx seenaꞌ kazxsaꞌs kçxhãaçxhaꞌj puꞌçxçxa txãꞌwẽ yũutxna, Dxus weꞌweniꞌ kxtey yuukahn.
18 Açaꞌ uꞌy kaçxçxa uꞌpte uygu txãa yuꞌ Babilonia çxhab kazx jxtuhthesaꞌ, naa kiwete jxkaahsa jxukaysatx txãaçxaçxáa jxkaahna ũssa.
