Apocalipsis 18:1-24
18 Txãa eꞌsuꞌ Dxus angel cielujũ kĩjaçteth uy seenaꞌ juunaꞌ jxkaahwaꞌjsa, naa kiwete zhiçxkwe eenaꞌ kweethna.
2 Saꞌ naꞌjĩnak sus weꞌwe:
—Babilonia çxhab txakwe çxhãçxhasaçxawa, Dxus kastigoꞌs jxpaꞌgawaꞌthe yãꞌj ũsaꞌ. Saꞌ ãçxhaꞌ eçxthẽꞌj jxkaahni espiritu ewmeesa vxiteꞌ vxiçxakwe kazxsaçxaçxáa ũswaꞌj yuuna paꞌkh.
3 Txãꞌwẽ yũukahníi maa çxhabwa jxukaysa txãa pkal kazxsateçxaçxáatx fxiꞌzena ũsuꞌ. Açaꞌ naa kiwete jxkaahsa jxukaysaweꞌsx pkal kazx yũuwaꞌjaꞌs yuuçxáatx piya. Txãꞌwẽy txweysaweꞌsxwa wala jiꞌphsa yuutx, pkalte fxiꞌzewaꞌjçxáꞌs txweyna jĩꞌk.
4 Txajũꞌ cielujũ naꞌjĩna weꞌweni wẽseꞌth:
—Adx nasa yãꞌjaꞌ txãa çxhabu mkaasehwe, txãa pkalsaweꞌsx yakh ũsyaꞌmée, kxah txãa çxhabte kastigoꞌ iꞌkweꞌsxtxiꞌs kpajkxmeena.
5 Naꞌjĩꞌth naꞌ: txãaweꞌsx pkalaꞌ iiméh seenaꞌ walaniꞌ cielute kãhpkaçx, kxajk Dxusaꞌ txãa çxhabaꞌs kastigãyyaꞌ yajkx txãꞌwẽ kazxsapaꞌga.
6 Txãawa vxitetx maꞌwẽga ewmée yũu txãꞌwẽy ewmée myũuwe kaꞌtuwa. Saꞌ txãawa maꞌwẽga vxitetx juunaꞌ yũu, txãate eꞌz us thaakwe juunaꞌ myũuwe.
7 Pkxuuna makxũusuꞌjwe, txãawa makwega iiwejçx yajkxna pkalte fxiꞌzena ũsuꞌ txãatey ãh. Saꞌ txãꞌ naꞌwẽk yaakiꞌ txajx ũuste: Ayte jxkaahsa naꞌwẽ kaçxçxa uꞌpthu. Nmiꞌ jiꞌphmeesameeth, saꞌ pxthaa yuuna fxiꞌzemeꞌnja sũhnak iiwejçx yaakiꞌ.
8 Txãa paꞌga teeçx enteçxáa kastigo paꞌjatxna naꞌwẽsa: nxuswaꞌj, wẽjẽ, uu en, saꞌ ipxte kabni yuuna. Txãa çxhabaꞌs Dxus çxhãçxhasaꞌ jxuka ivxiituna.
9 Açaꞌ naa kiwete jxkaahsaweꞌsx txãa çxhabte kazx pkal yũuna fxiꞌzesaꞌ wala nxus weꞌwena ũꞌnetxna, txãa çxhavxyni ajaꞌs uyçxa.
10 Saꞌ txãꞌwẽ kastigãyniꞌs ũukhçxa, jxuꞌjuçxáa thegutxna naꞌjĩna:
—Seenaꞌ yuh pxthaa yuuk, Babilonia çxhab txakwe seenaꞌ çxhãçxhasa. Naa dudte jxuka vxitunik yuu jĩtxna.
11 Naa kiwete txweyna fxiꞌzesaweꞌsxwa txãa çxhabaꞌs yajkxçxa wala pxthaa weꞌwena ũꞌnetxna. Txãꞌwẽ yũukahníi ãçxyãꞌjaꞌ peena yuꞌ kim yuhwa weymeetxna makwe tũꞌsna paꞌthewa:
12 vxyuu beh, vxyuu çxihme, kwet zhiçxkwe wala paꞌgasa, tela zhiçxkwesa iiméh paꞌgasa, fxtũu wẽt putasá, marfxil zhiçxkwesa, fxtũu ewsa wala paꞌgasa, bronce yaasesa, hieçxo yaasesa, marmól yaasesa, kĩjkĩhwa txãꞌwẽ zhiçxkwe vxitnisa.
13 Vxiteꞌ ũꞌnisate wẽt pẽethẽsa, kabte wẽt putasá, wẽt putakahn kakwete sxũsxnisa, vxino, aceite, skuutxh ũꞌwe ewsa. Vxiteꞌ tajkx ktũꞌseꞌjnisa, piisxáa, jiba, kaçxetilxa jiba wezxnisa. Vxiteꞌ nasa txweynisa kĩh yuhnawa yaꞌtxweymeena.
14 Saꞌ txãa çxhabaꞌs naꞌjĩtxna:
—¡Txakwe wala weçxana fxiꞌzeniꞌs jiꞌphméek neeyũu, saꞌ txakwe zhiçxkwe jiꞌphuniꞌswa jxukate ivxiituk! jĩtxna.
15 Txãa çxhabte kĩjkĩhwa txweyçxa wala jiꞌphsa yuusaaweꞌsxaꞌ jxuꞌjuçxáa thegna neeyũutxna kastigãyniꞌs ũukhçxa. Saꞌ wala nxus weꞌwena ũꞌnetxna
16 naꞌjĩna:
—¡Txãa çxhab txakwe walasa seenaꞌ yuh yuuk! Nyafxíi yuꞌ uꞌy naꞌwẽk zhiçxkwe iijxũçxa fxiꞌzeꞌ, ropa iiméh paꞌgasa, vxyuu beh kiꞌpna yuunisa, kwet zhiçxkwesa iiméh paꞌgasaçxaçxáatx txãꞌwẽsatxku iijxũꞌ.
17 Nawa txãa jiꞌphunisa naa dudte jxuka pçuuk jĩtxna. Txãꞌwẽy barko namuweꞌsx, vxiteꞌ kxtee mjĩisaweꞌsx jxukaysa jxuꞌjuçxáa thegna neeyũutxna.
18 Saꞌ txãa çxhab çxhavxyna sxiꞌtasa ajaꞌs uyçxaꞌ, naꞌjĩna sus weꞌwetxna:
—Mtee yuhwa naa çxhab naꞌwẽy walasa yuꞌ meeaꞌ jĩna,
19 nxusweete dxikthekhẽ kiwe yaꞌfxihbna sus ũꞌnena naꞌjĩtxna:
—Seenaꞌ nxusnxus knayku çxhab txakwe walasa txajx jiꞌphuni yakh wala jiꞌphsa vxitku barko jiꞌphsa yuutxiꞌ jxukaysatx. Nawa naa dudte jxuka vxitunik yuu jĩtxna.
20 Nawa cielute ũssaweꞌsx wala yuh mweeçxawe txãa çxhabaꞌs kastigãyniꞌs uyçxa, Jesus jxkaahnisaweꞌsx vxiteꞌ Dxus yuwe ptaꞌsxsaweꞌsx, Dxus yakh fxiꞌzesaweꞌsx jxukaysa. Txãa paꞌgatey Dxusaꞌ txãa çxhabaꞌs kastigãyyãꞌkh, iꞌkweꞌsxtxi ewmée yũupaꞌga jĩnik pthũuse.
21 Txajũꞌ Dxus angel teeçxsaꞌ seenaꞌ wala çxhãçxhasa ũꞌkhni kwet naꞌwẽsaꞌs kiisçxa, markhẽk wãatah naꞌjĩna:
—Babilonia çxhab txakwe walasa txãꞌwẽ wãataaní yuuna, açaꞌ txãꞌsaꞌ bagaçxte yuhwa peena yuꞌ uymeetxna.
22 Açaꞌ txãa çxhab klxiikhunsu tukani músika arpa, kuvxy, trompeta txãꞌwẽsa pthũusemeetxna. Saꞌ txãa çxhabte kĩh mjĩisa yuhwamée yuutxna, saꞌ ũꞌkhniçxáa yuhwa pthũusemeena.
23 Kxtee pkiꞌtaniçxáa yuhwa kweethmeena, saꞌ boda fxiesta vxitna susniwa peena yuꞌ pthũusemeena. Txãa çxhabaꞌ txweyna ũssaweꞌsx wala yuh çxhãçxhasatx jiꞌphuꞌk, saꞌ naa kiweteweꞌsxtxi jxuka kaypubaꞌkh dxijxuuçxa. Nawa ãçxhaꞌ kĩh yuhwa jiꞌphmée yuuna jĩꞌk.
24 Txãꞌwẽ yuukahníi Dxus yuwe ptaꞌsxsaweꞌsx vxiteꞌ Dxus yakh fxiꞌzesaweꞌsx vxiteꞌ naa kiwete mtee mteewa ikhnisaweꞌsx eeaꞌ jxuka txãa çxhabteçxaçxáak ũs yuꞌ.
