Apocalipsis 19:1-21
19 Txãa eꞌsuꞌ cielujũ nasa wala kuhsa sus weꞌweni wẽseꞌth naꞌjĩna:
Kweꞌsx Dxus çxhãçxhasa txãa yuuçxáa ewte nvxiit-saꞌ,
Saꞌ txãa yuuçxáa jxtuhthesaꞌ,
Txãa paꞌga kweꞌsx Dxusaꞌs weçxaaga.
2 Txãasaíik çxhab txãꞌwẽ kazx yũuwaꞌjaꞌsçxáa kaapiyaꞌjsaꞌs kastigãy,
Naa kiwete kazx yũuna suwna ũssaꞌs.
Saꞌ Dxusna selpisaatx ikhpaꞌga kaꞌtuwa Dxusaꞌ kastigãyku jĩꞌtx.
3 Txajũꞌ kiꞌkin weꞌwetx naꞌjĩna:
—Kweꞌsx Dxusaꞌs weçxaaga. Txãa çxhab çxhavxyni ajaꞌ bagaçxte yuhwa pçumée sxiꞌtana nes yuuna jĩꞌçpkaçxhaꞌ,
4 weintikuatro jxkaahsaweꞌsx vxiteꞌ Dxus vxitni ĩtxĩsa pahzsaweꞌsxaꞌ Dxus jxkaahna uꞌpsa tasxte peejxũkweçxa weçxatx naꞌjĩna:
—Txãꞌwẽ yuh ew yuuk. Txãa paꞌga Dxusaꞌs weçxaaga jĩꞌtx.
5 Txãa eꞌsuꞌ Dxus jxkaahna uꞌpnijũ teeçx naꞌjĩna weꞌwenik pthũuse:
Kweꞌsx Dxusaꞌs mtuutheꞌjwe, txãꞌsna selpisaaweꞌsx
Leꞌçxkwesa maꞌk yuu meeçxawa walasa maꞌk yuu nawa txãꞌsçxáana nwẽeseꞌjna jxukaysa jĩꞌk.
Cielute boda fxiesta ãani
6 Txajũꞌ nasa wala kuhsa weꞌweni naꞌwẽsaꞌsthu wẽseꞌj txãa yuꞌ kuh yuꞌ susni naꞌwẽk pthũuseꞌ, vxiteꞌ kpiꞌsx sus weꞌweni naꞌwẽ. Saꞌ naꞌjĩꞌtx:
Dxusaꞌs wala yuh weçxaaga, txãa paꞌgatey kweꞌsx Dxus kĩhtewa jxuka ãjãsa txãꞌ jxkaajxaꞌ takhyãꞌkh.
7 Açaꞌ seenaꞌ wala weçxana txãꞌsaꞌ tuutheꞌjega, txãa paꞌgatey Piisxakuẽ jĩnisa nyuu yuuwaꞌjsaꞌ yaꞌpheuꞌkh,
Açaꞌ boda fxiesta enaꞌ ãjxãꞌkh.
8 Txãa nyuu yuuwaꞌjsaꞌ ropa iiméh zhiçxkwe çxihmesaꞌs kaatheꞌjnik yuu jĩꞌtx. (Txãa ropa ewsa yuꞌ, Dxus dxiꞌpte jxpubamée ew fxiꞌzeni jĩnisaꞌ.)
9 Txajũꞌ Dxus angelaꞌ naꞌjĩnak fxiꞌkhaah:
—Piisxakuẽ jĩnisa boda fxiestate piꞌkxnisaweꞌsx yakhaꞌ wala yuh weçxa yujaꞌ jĩna kfxiꞌjaꞌjçxaꞌ, naꞌjĩnak weꞌwe:
—Naꞌwẽ weꞌwenisaꞌ Dxus kweꞌweꞌjnisa isasataꞌ jĩteꞌ,
10 adxaꞌ Dxus angel tasxte neeweꞌweyaꞌ peejxũkweth. Nawa txãa yuꞌ naꞌjĩꞌk:
—Adxaꞌs peejxũkwenu. Adxaꞌ Dxusna selpisáa idx naꞌwẽysaíiçxáath, iidx yakhthẽꞌjweꞌsxwa maꞌwẽta Jesus kaapiyaꞌjni isasaꞌs jxpubamée ptaꞌsxna pekũjũꞌ txãꞌwẽysath. Açaꞌ Dxusçxáana mneeweꞌwe. Naꞌwẽ kĩhwa yũuna jĩna kaavxyaꞌjaꞌth txãa yuꞌ Jesus maꞌwẽsatewa kaajiyuꞌjsataꞌ jĩꞌk.
Jiba çxihmete aꞌjçxa kasehsa
11 Txãa eꞌsuꞌ cielu phateçxa ũsteth uy, açaꞌ teeçx jiba çxihmesak vxyaa. Kxte aꞌjsa yuꞌ: Isasaçxáꞌs Kxtey Yuusáa jĩnak kxsusni yuꞌ, txãa paꞌgatey isasa yuꞌsaꞌ jxuka kxtey yuuna puiiçxa knayku naa paꞌga.
12 Saꞌ txajx yafx yuꞌ ipx beesa naꞌwẽk eenaꞌ kweetheꞌ. Dxikthete yuꞌ wala kuh korona jiꞌphuꞌk, saꞌ vxite yase fxiꞌjni jiꞌphuꞌk txãa yaseꞌs txãa yuuçxáak jiisa yuꞌ.
13 Txajx athni ropa yuꞌ eete akhnisaꞌsku jxaath yuꞌ. Saꞌ txãa yuꞌ Dxus maꞌwẽsatewa txãꞌsna kaajiyuꞌjsaꞌ jĩnisak yuꞌ.
14 Açaꞌ txãa yakh uꞌjsa yuꞌ cieluteweꞌsx jxukaysa jiba çxihmesatetx aꞌjçxa uꞌjweç yuꞌ, ropa ewsa çxihme atesaꞌs athçxa.
15 Saꞌ txajx yuwesu yuꞌ espada seenaꞌ zeksak sẽhna ũsuꞌ, txãa yakh maa kiweteweꞌsxtxiwa knaywaꞌjsa. Txãꞌwẽ yũuçxak maa kiwetewa jxuka juunaꞌ yuuna txãaçxaçxáa juunaꞌ jxkaahwaꞌjsa yuꞌ. Saꞌ ewmeesa yuutxiꞌs seenaꞌ kastigaĩna kxũusuꞌjna, uwatx kuꞌssawa maꞌwẽga seenaꞌ yũꞌ txãꞌwẽy yũuna Dxus kĩhtewa jxuka ãjãsa txãꞌwẽ seenaꞌ kastigaĩna.
16 Saꞌ txajx athni ropate vxiteꞌ jĩꞌbesu naꞌjĩna fxiꞌjnik jiꞌphuꞌ: Maa Jxkaahsatewa Jxthaakwe Jxtuhthesaꞌ, saꞌ Maatewa Jxthaakwe Çxhãçxhasaꞌ jĩna.
17 Txãa eꞌsuꞌ Dxus angel sekte yujuçxa ũsteth uy, txãꞌ naꞌjĩnak sus weꞌwe uuniisa çxiçxtxiꞌs ũꞌsa vxiçxakuẽtx:
—Jxukaysa pkhaakheçxa myuhwe ũꞌyaꞌ iꞌkweꞌsx ũꞌwaꞌj Dxus ũsku txãꞌs.
18 Saꞌ ũꞌweneꞌkwe uusaaweꞌsx çxiçx, jxkaahsaweꞌsx maꞌk yuu, npiiçthẽꞌjweꞌsx maꞌk yuu, nasa iiméh jxtuhthesa maꞌk yuu, jiba uuniisa maꞌk yuu, jibate aꞌjsa uusaaweꞌsx maꞌtx yuu, patron jiꞌphsa maꞌk yuu meeçxaꞌ patron jiꞌphmeesa maꞌk yuu, leꞌçxkwesa maꞌk yuu walasa maꞌk yuu nawa txãatx jxuka pkhakhçxa mẽꞌwe jĩnak weꞌwe.
19 Txajũꞌ uythu eçx seenaꞌ kazxsa vxiteꞌ naa kiwete jxkaahsaweꞌsx txajx nasa yãꞌjçxa jxukaysa pkhaakheçxa txãa jibate aꞌjsa yakh vxiteꞌ txajx nasa yãꞌjçxa pdxiꞌpuçxa puiiyaꞌ ũste.
20 Nawa eçx seenaꞌ kazxsa Kristoꞌs açeweꞌwesa vxiteꞌ eçx kazxsa Dxus yuwe ptaꞌsxsa naꞌwẽ kĩhwa kaavxyaꞌjaꞌjçxa kaypubaꞌjsa txãa yakh eꞌzíi tudnitx yuu, txãꞌwẽ Kristoꞌs açeweꞌwesa iisawaꞌjniꞌs kaakiꞌpuꞌjna eçx seenaꞌsa piisani yuuk txãꞌsnawa neeweꞌwekahn kaypubaꞌphaꞌga. Txajũꞌ txãa eꞌzíitx ipx wala asufxre yakh behna ũsaꞌ txkhẽe wãatãanitx yuu ĩtxĩtey.
21 Txajũꞌ jibate aꞌjsa yuwesu espada seenaꞌ zeksa sẽhna ũsuꞌk txãa espadaju ikhnitx yuu nasa ewmeesa yuutxiꞌs, açaꞌ uuniisa çxiçxtxiꞌs vxiçxakweꞌ txikpkaçxtxi ũꞌ.
