Apocalipsis 2:1-29
2 Dxus luuçx Efxeso çxhabteweꞌsxtxi jxpeꞌjsa Dxus angelaꞌs mfxiꞌj naꞌjĩna: Paçu kuseju siete estrelxatx atçxa siete bela txaahnisa vxyuu behçxaçxáataꞌ txãa ksxavxysu uꞌjusa weꞌweçxaꞌ naꞌjĩꞌk:
2 Dxus dxiꞌpte iꞌkweꞌsx maꞌwẽ fxiꞌzesatewa jxuka jiith. Wala yuh çxhãçxha mjĩina wantãyna fxiꞌzesa iꞌkwe, saꞌ ewmeesa yuutxiꞌsaꞌ jxpaꞌgaꞌçmée iꞌkwe. Txãꞌwẽ Jesus jxkaahnisathaꞌw jĩna paꞌjsaweꞌsxtxiꞌsaꞌ jxpaꞌgamée kimtewa ew jiyuyaꞌ yuwe paapẽyiꞌiꞌkwe, saꞌ txãꞌwẽ yũuçxaꞌ Jesus jxkaahnisamée ĩsxĩisatewa jiyuꞌiꞌkwe.
3 Wahtxmée adxna selpiipaꞌga wala pxthaa yuuna wantãyna mjĩiwaꞌj jiꞌphuꞌiꞌkwe txãꞌwẽ yũuniꞌs adxaꞌ jiith.
4 Nawa iꞌkweꞌsx ãhmée yũuniꞌs weꞌwewaꞌj jiꞌpthu. Nyafxíi naꞌwẽ iꞌkwe wala peeygãawaꞌjaꞌs jiꞌphuꞌ txãa yuꞌsaꞌ ãçxhaꞌ jiꞌphmée iꞌkwe.
5 Txãa paꞌga kĩhteneꞌkwe jxpuba txãa pkalaꞌs nvxihtçxa Dxus tasxte misxawedwe, saꞌ nyafxíi maꞌwẽneꞌkwe peeygãasa yuꞌ txãꞌwẽy myũuwe. Txãꞌwẽ yũumeeteꞌ, tud yuweꞌnja iꞌkweꞌsxtxi kastigãyyaꞌ, saꞌ iꞌkweꞌsx ksxavxyu bela txaahniꞌs jxũna uꞌjçxa vxite ahte txajaꞌnja, pkaltxi nvxihtçxa Dxus tasxte sxawedmeeteꞌ.
6 Txãꞌwẽçxawa naꞌwẽ yũuwaꞌj yuꞌsaꞌ ew iꞌkwe yũꞌ. Nikolaitaweꞌsx fxiꞌzeni yuꞌsaꞌ açeꞌiꞌkwe txãꞌwẽsa yuꞌsaꞌ adxwa açeꞌth.
7 Kxtey nwẽeseꞌjwaꞌjsa ũsçxaꞌ, mwẽeseꞌjwe Dxus Espirituꞌ naꞌwẽk weꞌweꞌ Dxus luuçxtxi: Dxus ũsnite fxtũu tasx ũsaꞌ bagaçxte yuhwa peejxmée yũnna nes yuusa txãꞌ uumée kaafxiꞌzeꞌjsaꞌ. Txãꞌsaꞌ puuçuꞌnja ewmeesa yuꞌsaꞌ nwẽeseꞌjmée jxuka knaysaweꞌsxtxiꞌsaꞌ jĩꞌk.
Esmirna çxhabteweꞌsxtxi ptaꞌsxni
8 Dxus luuçx Esmirna çxhabteweꞌsxtxi jxpeꞌjsa Dxus angelaꞌs naꞌjĩna mfxiꞌj: Naa kiwe meetey ũsyãꞌkh yuꞌ saꞌ bagaçxtewa nes yuuwaꞌjsa uuçxa kiꞌ ĩtxĩ yuuk txãꞌ naꞌjĩꞌk:
9 Dxus dxiꞌpte iꞌkweꞌsx maꞌwẽ fxiꞌzesatewa jxuka jiith. Iꞌkweꞌsx pxthaa yuuna kĩhwa jiꞌphmée fxiꞌzeni txãꞌwẽ yũuniꞌs jiith. (Nawa ew yajkxte yuꞌ wala jiꞌphsa iꞌkwe.) Saꞌ Dxus luuçx meeçxawa Dxus luuçxthaꞌw jĩna weeçx weꞌwesatxwa jiith. Nawa txãꞌwẽ yũusaꞌ eçxthẽꞌj nasa yuuçxáataꞌ.
10 Pxthaa yuuwaꞌj paꞌjana txãꞌsaꞌ ũukhmeeneꞌkwe. Eçxthẽꞌjaꞌ iꞌkweꞌsx maaíitxiꞌs karcelte txajana, iꞌkweꞌsx jxukaysa maꞌwẽ yũutewa jiyuyaꞌ. Açaꞌ diez enpkaçx wala pxthaa yuuwaꞌj jiꞌphuneꞌkwe. Nawa Dxus yakh txutemée mfxiꞌzewe uu entepkaçx, açaꞌ adxaꞌ ĩtxĩ fxiꞌzewaꞌjaꞌs ũsuꞌnja txãꞌwẽ ew fxiꞌzepaꞌga.
11 Kxtey nwẽeseꞌjwaꞌjsa ũsçxaꞌ, mwẽeseꞌjwe Dxus Espirituꞌ naꞌwẽk weꞌweꞌ Dxus luuçxtxi: Ewmeesa yuꞌsaꞌ nwẽeseꞌjmée jxuka knaysaweꞌsxaꞌ Dxus yakh bagaçxte yuhwa peena yuꞌ puutx uywaꞌjmeete yuꞌ uꞌjmeetxna jĩꞌk.
Pérgamo çxhabteweꞌsxtxi ptaꞌsxni
12 Dxus luuçx Pérgamo çxhabteweꞌsxtxi jxpeꞌjsa Dxus angelaꞌs naꞌjĩna mfxiꞌj: Espada pdxiꞌp zeksaꞌs jiꞌphsaꞌ naꞌjĩꞌk:
13 Dxus dxiꞌpte iꞌkweꞌsx maꞌwẽ fxiꞌzesatewa jxuka jiith. Iꞌkweꞌsxaꞌ eçxthẽꞌj jxkaahna ũsni ksxavxyte ũsçxawa, adx tasxu yuꞌ txutemée iꞌkwe fxiꞌzeꞌ. Adx kaapiyaꞌjniꞌs ptaꞌsxsa Antipas nakwe wala seenaꞌ pxthaa iꞌkweꞌsx ksxavxyte ikhni yuuk txãa enteçxáa yuhwa ũukhçxa adx yaseꞌs kxsusmée yuꞌ yuumée iꞌkwe, kxteek eçxthẽꞌj ũsuꞌ nawa.
14 Txãꞌwẽtewa iꞌkweꞌsx ãhmée yũuniꞌs weꞌwewaꞌj jiꞌpthu: Balaan kaapiyaꞌjniꞌs nwẽeseꞌjsaweꞌsxtxi iꞌkweꞌsxaꞌ iipeꞌjiꞌkwe Pérgamo çxhabte. Txãa Balaanaꞌ Balakhaꞌs ewmeek yuꞌkxpeh Israelweꞌsxtxiꞌs kaypubaꞌkhan, txãasak Dxus ĩtxĩmeesatx weçxana tajkx ikhni çxiçxaꞌs ũꞌkaah, saꞌ pkal kazx yuuna fxiꞌzewaꞌjaꞌswa kaapiyaꞌkh.
15 Saꞌ Nikolaitaweꞌsx kaapiyaꞌjniꞌs nwẽeseꞌjsaweꞌsxtxiwa iipeꞌjiꞌkwe. Txãꞌwẽsa yuutxiꞌs adxaꞌ açeꞌth.
16 Txãa paꞌga pkalaꞌs nvxihtçxa Dxus tasxte misxawedwe. Txãꞌwẽmeꞌ adxaꞌ dud iꞌkweꞌsx tasxna yuhçxa, txãꞌwẽ ewmée fxiꞌzesaweꞌsxtxi kastigaĩꞌnja espada pdxiꞌp zeksa jiꞌpthu txãaju.
17 Kxtey nwẽeseꞌjwaꞌjsa ũsçxaꞌ, mwẽeseꞌjwe Dxus Espirituꞌ naꞌwẽk weꞌweꞌ Dxus luuçxtxi: Ewmeesa yuꞌsaꞌ nwẽeseꞌjmée jxuka knaysaweꞌsxtxiꞌs ũsuꞌnja maná ũꞌnisa jxaawni ũsaꞌ txãꞌsna. Saꞌ teeçx kwet çxihme ũsuꞌnja, saꞌ txãa kwette yuꞌ yase uꞌsesaꞌs fxiꞌjni yuuna kim yuhwa jiyunimeesa naasáa txãa kwetaꞌs jxpaꞌgasa yuuçxáa jiyuna jĩꞌk.
Tiatira çxhabteweꞌsxtxi ptaꞌsxni
18 Dxus luuçx Tiatira çxhabteweꞌsxtxi jxpeꞌjsa Dxus angelaꞌs naꞌjĩna mfxiꞌj: Dxus Nçxiꞌk yafx ipx beeni naꞌwẽsa jiꞌphsa txajx çxida çam naꞌwẽ kwentetesa jiꞌphsa naꞌjĩꞌk:
19 Dxus dxiꞌpte iꞌkweꞌsx maꞌwẽ fxiꞌzesatewa jxuka jiith. Iꞌkweꞌsx peeygãani, ũuste jxpubamée Dxusaꞌs yajkxna fxiꞌzeni, waꞌlmée selpiina fxiꞌzeni txãꞌwẽ yũuniꞌs jiith. Saꞌ nyafxíi meeçxaꞌ ãçxhaꞌ thaakwe mjĩina ũsiꞌkwe.
20 Nawa iꞌkweꞌsx ãhmée yũuniꞌs weꞌwewaꞌj jiꞌpthu: Txãa uꞌy Jezabelaꞌs maꞌjĩꞌçmée iꞌkwe, txãa uꞌyaꞌ Dxus kweꞌweꞌjniꞌsthu ptaꞌsxiꞌ jĩçxa adxna selpisaatx kaypubaꞌjaꞌkh pkal kazxsate kaafxiꞌzeꞌjna, saꞌ tajkx ikhçxa Dxus ĩtxĩmeesatx weçxawaꞌjaꞌ jĩnak kaapiyaꞌjaꞌ.
21 Adxaꞌ txãa uꞌyaꞌs en ũsthu txãa pkalaꞌs nvxihtçxa Dxus tasxte sxawedkahn. Nawa txãꞌwẽ yũuyaꞌ waꞌlçxa txãa pkal kazxsateyçxáak fxiꞌzeꞌ.
22 Txãa paꞌga adxaꞌ txãa uꞌyaꞌs kastigaĩꞌnja, açaꞌ txãa uꞌy kaapiyaꞌjniꞌs nvxihtmeeçxaꞌ, txãaweꞌsxwa seenaꞌ yuh pxthaa yuuwaꞌj jiꞌphutxna.
23 Saꞌ txãa uꞌy luuçxtxiꞌs ikheꞌnja. Txãꞌwẽ yũute Dxus luuçxaꞌ jxukaysa jiyutxna adxaꞌ txãaweꞌsx ũus dxiiju yaakxniꞌs jxuka jiyusatewa. Saꞌ iꞌkweꞌsx teeçxsa naꞌwẽçxah kĩh yũusatewa, kaꞌtuwa txãꞌwẽy yuꞌnja.
24 Nawa Tiatira çxhabte ũssa maawa txãa uꞌy kaapiyaꞌjniꞌs nwẽeseꞌjsamée vxiteꞌ naꞌwẽ eçxthẽꞌj kaapiyaꞌjni kim yuhwa jiyunimeesa jĩꞌtx txãꞌsnawa nwẽeseꞌjsameeweꞌsxaꞌ adx yuꞌkxpehwaꞌj peejxmeeiꞌkwe.
25 Nawa ew fxiꞌzewaꞌjaꞌs peçxkananuwe adx sxawedpkaçx.
26 Saꞌ ewmeesa yuꞌsaꞌ nwẽeseꞌjmée kĩhtewa jxuka knayçxa adx jxthãasniçxáꞌs nmeh entepkaçx kxtey yuuna fxiꞌzesa yuꞌsaꞌ nasa mteeweꞌsxtxiwa jxuka jxkaajxaꞌ ãjãwaꞌjaꞌs ũsuꞌnja,
27 adx Tatawa maꞌwẽga adx jxkaajxaꞌ ãjãwaꞌjaꞌs ũs txãꞌwẽy. Açaꞌ nasa jxukaysatx seenaꞌ yuh juunaꞌ yuuna jxkaajana, kiwee mitxh açxamée ewsaꞌs maꞌwẽga yaꞌuduꞌ txãꞌwẽyçxáa yuuni yuutxna.
28 Saꞌ khikhiiçte kãasa estrelxaꞌswa ũsuꞌnja.
29 Kxtey nwẽeseꞌjwaꞌjsa ũsçxaꞌ, Dxus Espirituꞌ naꞌwẽk weꞌweꞌ Dxus luuçxtxi txãꞌsna mwẽeseꞌjwe jĩꞌk.
