Apocalipsis 20:1-15
20 Txãa eꞌsuꞌ Dxus angel cielujũ kĩjaçte uythu, kafx iiméh seenaꞌ dxiisateweꞌsx lxavxiꞌs atçxa, vxiteꞌ çam kadena walasaꞌsku jiꞌph yuꞌ.
2 Saꞌ txãa angelaꞌ eçxthẽꞌjaꞌs tudku mil anxu ãhpkaçx. Txãꞌ txãniitey ul weeswée Satanasku yaase yuꞌ.
3 Txãꞌwẽ yũuçxa kafx seenaꞌ dxiisate kxuuphçxa vxitxte yuꞌ selxok kiꞌp, maa kiweteweꞌsxtxiwa peena yuꞌ ĩsxĩiyaꞌ kasejkahmén mil ãnu ãhpkaçx. Txãa mil anxu ãhteꞌ, txhweteni yuuna txaçxmeeçxáawa.
4 Txajũꞌ jxkaahna ũsnisatxthu uy, açaꞌ kxsũ yuꞌ kastigãyyaꞌ ãjãwaꞌjsatx kaçxçxa uꞌpuꞌ. Vxiteꞌ Jesus kaapiyaꞌjniꞌs nwẽeseꞌjçxa Dxus yuweꞌs ptaꞌsxna fxiꞌzepaꞌga dxiktheꞌs spẽꞌthçxa ikhni yuutx txãaweꞌsxtxiwa uythu. Txãaweꞌsxaꞌ eçx seenaꞌ kazxsa vxiteꞌ txãa eçx naꞌwẽysa piisani yuuk txãꞌsna neeweꞌwesameetx yuꞌ, saꞌ txãa eçx iisawaꞌjniꞌs dxikthesu meeçxawa kusesuçxáa yuhwa kaakiꞌpuꞌjsameetx yuꞌ. Txãaweꞌsxaꞌ kiꞌ ĩtxĩ yuuçxa mil anxutx jxkaahna ũsuꞌ Kristo yakh jaꞌdaçxah.
5 Txãaweꞌsxaꞌ uuçxawa kiꞌ ĩtxĩ yuusaataꞌ nyafxte, nawa vxite uusaaweꞌsx yuꞌ ĩtxĩ yuumeetaꞌ txãa mil anxu skhẽwpkaçx.
6 Dxus yakh yuuçxáa fxiꞌzeçxa uuniijũwa txãaweꞌsx khuẽꞌy nyafxte ĩtxĩ yuusáa yakhaꞌ seenaꞌ yuh weçxa yujaꞌ. Txãaweꞌsxaꞌ bagaçxte yuhwa Dxus yakh puutx uywaꞌjmeete yuꞌ uꞌjmeetxna. Txãa paꞌga txãaweꞌsxaꞌ mil anxupkaçx jxkaahna ũsutxna, Dxus vxiteꞌ Kristo txãaweꞌsx tasxte selpiina.
7 Mil anxu skhẽwniijũꞌ eçxthẽꞌjaꞌ tudnijũ txhweteni yuuna,
8 saꞌ ĩsxĩina kaypubaꞌjyaꞌ kasejena naa kiweteweꞌsxtxi jxuka, Gog vxiteꞌ Magog txãaweꞌsxtxi. Txãꞌwẽ yũuçxa puiiyaꞌ pkhakhena Magogweꞌsx nasatx. Txãaweꞌsxaꞌ iiméh seenaꞌ kuhtaꞌ kwetmuse naꞌwẽ.
9 Txãasatx kiwe makwetewa jxuka ãhçxáa kxaaduu Dxus luuçxtxi vxiteꞌ Dxus peeygãani çxhabnawa. Naapkaçxhaꞌ Dxusaꞌ cielujũ ipx kaahçxa txãaweꞌsxtxiꞌ jxuka kabku.
10 Saꞌ eçxthẽꞌj ĩsxĩisaꞌs ipx wala asufxre yakh behna ũsuꞌk kxteek akhni yuu, naꞌwẽ eçx kazxsa Kristoꞌs açesa vxiteꞌ Dxus yuwe ptaꞌsxsa naꞌwẽy yuuçxa kaypubaꞌkh txãaweꞌsxtxi akhni yuutx kxtee. Kxteeaꞌ en maꞌk yuu kus maꞌk yuu nawa bagaçxteçxáa yuhwa kaasewaꞌjmée çxhavxyna nes yuutxna.
Kastigãywaꞌjaꞌs ptaꞌsxyaꞌ kuutxaꞌjni
11 Txajũꞌ jxkaahna uꞌpni çxihmesa seenaꞌ walasaꞌsthu uy, vxiteꞌ kxtee kaçxçxa uꞌpsaꞌs. Txajx yafxju thegniteçxáa kiwe vxiteꞌ cielu wantaĩmeeçxa jxuka vxitutx, saꞌ peena yuꞌ vxyaameetaꞌ.
12 Txajũꞌ uusaaweꞌsxtxi uythu, walasa maꞌk yuu leꞌçxkwesa maꞌk yuu nawa jxuka Dxus tasxte yujuçxa ũste. Açaꞌ librutx phadenitx yuu, vxiteꞌ bagaçxte yuhwa uuwaꞌjmée ĩtxĩ fxiꞌzewaꞌj libru yãꞌjçxa. Txajũꞌ uusaaweꞌsxtxi Dxus tasxte kuutxaꞌjnitx yuu, txãaweꞌsx maꞌwẽ yũuna fxiꞌzesatewa librute maꞌwẽneꞌ fxiꞌjni ũsuꞌ kxtee thegçxa kastigãywaꞌjaꞌs ptaꞌsxyaꞌ.
13 Yuꞌkhẽ khẽeçxa uusaawa ĩtxĩ yuuçxa kiitetx, naapkaçxhaꞌ kiwe dxiiga pedanisawa ĩtxĩ yuuçxa kiitetx. Açaꞌ jxukaysatx teeçxsa naꞌwẽçxah maꞌwẽ yũuna fxiꞌzesatewa ptaꞌsxçxa kastigãywaꞌjtx yuu.
14 Txajũꞌ uu en vxiteꞌ uusaaweꞌsx yãꞌjçxa infxierno ipx walate akhnitx yuu. Txãa infxierno ipx walate khẽenijũꞌ bagaçxte yuhwa Dxus yakh peena yuꞌ puutx uywaꞌjmeꞌ.
15 Açaꞌ kxteetx akhni yuu bagaçxte yuhwa uuwaꞌjmée ĩtxĩ fxiꞌzewaꞌj librute txãaweꞌsx yasetx fxiꞌjnimeesatxiꞌs.
