Apocalipsis 21:1-27
21 Txãa eꞌsuꞌ cielu uꞌsesa vxiteꞌ kiwewa uꞌsesath uy. Txãꞌwẽ yuukahníi nyafxiitey cielu vxiteꞌ kiwewa nyafxiiteyweꞌsxaꞌ skhẽwniitx yuu, açaꞌ kĩh mar yuhwa meek yuu.
2 Juan yaasesa adxaꞌ uythu Dxus çxhab Jerusalen uꞌsesa txãꞌwẽ Dxus tasxu cielujũ kĩjaçte. Txãa çxhabaꞌ seenaꞌ ew pheuꞌjni yuꞌk, novxia iimiꞌyaꞌ pheuꞌjçxa ũythãsna ũs naꞌwẽ.
3 Saꞌ cielujũ sus naꞌjĩna weꞌweni wẽseꞌth:
—Mtheg, ãçxhaꞌ Dxusaꞌ nasaa ksxavxyte ũsaꞌ txãaweꞌsx yakh fxiꞌzeyaꞌ, açaꞌ nasaꞌ Dxus jĩi yuutxna. Dxusaꞌ txãaweꞌsx Dxus yuuyaꞌ txãaweꞌsx yakh fxiꞌzena.
4 Txãasa Dxusaꞌ kĩh nxusniijũwa jxuka nweꞌwena, açaꞌ peena yuꞌ uuwaꞌjmée yuuna. Ũꞌnewaꞌj enwa paꞌjmeena, nxus weꞌwewaꞌjwa paꞌjmeena, akasawa paꞌjmeena, txãa paꞌgatey nyafxíi fxiꞌzeni enaꞌ skhẽwku jĩꞌk.
5 Txajũꞌ jxkaahnite kaçxçxa uꞌpsaꞌ naꞌjĩꞌk:
—Mtheg, kĩhtxwa jxuka yuꞌpthehçxa uꞌseçxaçxáath vxit jxuka jĩçxaꞌ, kiꞌ naꞌwẽk weꞌwe:
—Naꞌwẽ weꞌwenisatxiꞌ mfxiꞌj, txãa paꞌgatey txãꞌ isa kxtey yuuwaꞌjsataꞌ jĩçxaꞌ,
6 kiꞌ weꞌwek:
—Adx weꞌweniꞌ jxuka kxtey yuunik yuu. Adxaꞌ naa kiwe meetey ũsyãꞌth yuꞌ, saꞌ bagaçxtewa nes yuuwaꞌjsath pçuwaꞌjsamée. Açaꞌ maawa yũꞌwẽesaꞌs kĩh yuhwa vxyuu paꞌgamée ũsuꞌnja yuꞌ bagaçxte yuhwa uumée kaafxiꞌzeꞌjwaꞌjsana.
7 Maawa ewmeesa yuꞌsaꞌ nwẽeseꞌjmée jxuka knaysaweꞌsxaꞌ kĩhwa Dxus jĩi yuꞌsaꞌ jxuka txãaweꞌsxçxaçxáa jxpaꞌgatxna. Açaꞌ adxaꞌ txãaweꞌsx Dxus yuꞌnja, naapkaçxhaꞌ txãaweꞌsxaꞌ adx luuçx yuutxna.
8 Nawa maa nasawa Dxusaꞌs çxhãçxha yaakxsamée yãꞌjaꞌ yaꞌskaçxa fxiꞌzesa, kĩhtewa kazxçxáa yũuna fxiꞌzesa, nasa ikhsa, kazx pkal yũuna fxiꞌzesa, dxijxuuna fxiꞌzesa, Dxus ĩtxĩmeesatx neeweꞌwesa, ĩsxĩisa txãaweꞌsxaꞌ infxierno ipx wala asufxre yakh behna ũsaꞌ kxtee khẽeyaꞌ uꞌjwaꞌj jiꞌphutxna, bagaçxte yuhwa Dxus yakh peena yuꞌ puutx uyyaꞌmée.
Jerusalen uꞌsesaꞌs uyni
9 Txajũꞌ Dxus angel sietesaweꞌsx naꞌwẽ Dxus kastigo nmeh sietesatx jiꞌphuꞌtx siete kopate txãa sietesaweꞌsx teeçxsaꞌ kũhçxa naꞌwẽk weꞌwe:
—Myuh thegyaꞌ, ptaꞌsxyaꞌwath Piisxakuẽ jĩnisa nyuu yuuwaꞌjsaꞌs jĩꞌk.
10 Naapkaçxhaꞌ Dxus Espiritu aphniith yuu, açaꞌ Dxus angelaꞌ peꞌjna uꞌkh, teeçx thãꞌj vxiç seenaꞌ wala ẽete. Saꞌ kxtee kãhçxaꞌ, kaavxyaꞌjaꞌkh Jerusalen çxhab wala Dxus tasxu cielujũ kĩisaꞌs.
11 Txãa çxhabaꞌ zhiçxkwe zmeenaꞌk kweethna ũsuꞌ, Dxus kweethniju. Saꞌ txãa zmeenaꞌ kweethnisa yuꞌ kwet iiméh zhiçxkwe kwentetesa naꞌwẽk yuꞌ.
12 Saꞌ txãa çxhab peekuꞌj yuꞌ kwetçxaçxáak uphni yuꞌ, wala ẽete jxuꞌj umnisa, saꞌ doce vxitxku jiꞌphuꞌ. Saꞌ txãa vxitx iisa teeçx angeltxi ũsuꞌ. Txãa vxitxsu yuꞌ Israel jiꞌj docesaweꞌsx yasetx fxiꞌjnitx uꞌpuꞌ.
13 Sek kãani juꞌgu tekh vxitxtxi uꞌpuꞌ. Sek khẽeni juꞌguwa tekh vxitxtxi uꞌpuꞌ. Saꞌ thakwe juꞌguwa tekh vxitxtxi uꞌpuꞌ, vxiteꞌ tasxu juꞌguwa kxaz vxitxíi.
14 Txãa çxhab peekuꞌj doce kwet kiꞌpçxa txãa kajkwesuk kwet uphni yuꞌ txãa iisa doce yasetx fxiꞌjni yuꞌ, naꞌwẽ Piisxakuẽ jĩnisa jxkaahnisa docesaweꞌsx yasetx.
15 Adx yakh weꞌwesa Dxus angelaꞌ jiꞌphuꞌk isani metro vxyuu behçxaçxáasa txãa çxhabaꞌs isawaꞌj, vxiteꞌ kxtee vxitx vxiteꞌ txãa kwet uph txãꞌwẽsatx isawaꞌj.
16 Çxhabaꞌ puutx txakhweçxaçxáak yuꞌ jxuꞌjyaꞌwa txakhuẽy, tapeyaꞌwa txakhuẽy. Açaꞌ Dxus angelaꞌ txãa çxhabaꞌs isani metro yakh isateꞌ, dos mil doscientos kilómetro jiꞌphuꞌk jxuꞌjyaꞌ txakhuẽy, tapeyaꞌwa txakhuẽy, khẽete ẽetewa txakhuẽy, puutx txakhweçxaçxáatx yuꞌ.
17 Txajũꞌ kwet uphaꞌsku isa, açaꞌ sesenta y kuatro metrok jiꞌphuꞌ khẽete ẽete. Kweꞌsx isani metro jiithaꞌw txãa yakhíiçxáak Dxus angelaꞌ isana ũsuꞌ.
18 Txãa uphaꞌ kwet jaspe yaasesa yakhçxaçxáak umni yuꞌ, açaꞌ çxhab yuꞌ vxyuu behçxaçxáak yuꞌ, txãasak seenaꞌ zhiçxkwe zmeenaꞌ vxyaꞌ.
19 Kwet uphaꞌs kaaçxidaꞌjnisa kwet yuutxiꞌsaꞌ kwet fxiyfxiy zhiçxkwesa yakhçxaçxáatx pheuꞌjni yuꞌ txãꞌ naataꞌ: nyafxteweꞌsxaꞌs, jaspe yaasesa yakh; eꞌsteweꞌsxaꞌs, safxiro yaasesa yakh; tekhteweꞌsxaꞌs ágata yaasesa yakh; pahzteweꞌsxaꞌs, esmeralda yaasesa yakh;
20 tahçteweꞌsxaꞌs, ónice yaasesa yakh; seisteweꞌsxaꞌs, kornalina yaasesa yakh; sieteteweꞌsxaꞌs, krisolita yaasesa yakh; oçxoteweꞌsxaꞌs, berilo yaasesa yakh; nweweteweꞌsxaꞌs, topacio yaasesa yakh; diezteweꞌsxaꞌs, krisoprasa yaasesa yakh; onceteweꞌsxaꞌs, jacinto yaasesa yakh; doceteweꞌsxaꞌs amatista yaasesa txãꞌwẽsa yakhtxi skadni yuꞌ.
21 Doce vxitxsa yuꞌ, perlaçxaçxáatx yuꞌ, teeçx perlaçxáa teeçx vxitxte ãjk yuꞌ. Açaꞌ çxhabte klxiikhun wala yuꞌ vxyuu behçxaçxáak yuꞌ, txãasak zhiçxkwe zmeenaꞌ vxyaana nes yuꞌ.
22 Kxteeaꞌ pkhaakheni dxuus yat uymeeth, txãa paꞌgatey kweꞌsx Dxus kĩhtewa jxuka ãjãsa txãa çxhabte jxuka ãhçxáak ũsuꞌ, Piisxakuẽ jĩnisawa txãꞌwẽy.
23 Txãa çxhabaꞌ sek, aꞌte, txãꞌwẽsa eenaꞌ kweethwaꞌjsa peejxmeek yuꞌ, txãa paꞌgatey Dxus zmeenaꞌ khikhyni yakhçxáa jxukak eenaꞌ kweetheꞌ, açaꞌ vxite zmeenaꞌ kweethsaꞌ Piisxakuẽ jĩnisaíiçxáak yuꞌ.
24 Maa kiweteweꞌsxwa Dxus nweꞌwenisaꞌ txãa çxhab eenaꞌ kweethnisu fxiꞌzetxna, açaꞌ maa jxkaahsaweꞌsxwa txãa çxhabaꞌs weçxana wala tuutheꞌjetxna.
25 Txãa çxhabte vxitxaꞌ maa enteçxáa yuhwa aphni yuumeena, txãa paꞌgatey çxhiꞌdxwaꞌj enwa mée yuuna.
26 Kxteeaꞌ wala yuh txãa çxhabaꞌs weçxana tuutheꞌjetxna maa kiwejũweꞌsxwa.
27 Nawa kazxsa yuꞌ kĩh yuhwa uꞌkameena, ahçena ĩsxĩisa kĩjkĩhwa ewmée yũusa. Naasáa Piisxakuẽ jĩnisa libru jiꞌphaꞌ txãa librute txãaweꞌsx yasetx fxiꞌjnisa yuuçxáa uꞌkatxna bagaçxte yuhwa uuwaꞌjmée ĩtxĩ fxiꞌzewaꞌjsa.
