Apocalipsis 22:1-21
22 Txajũꞌ Dxus angelaꞌ teeçx yuꞌwala seenaꞌ zhiçxkwe çxihme atesaꞌs ptaꞌsxku, bagaçxte yuhwa uumée kaafxiꞌzeꞌjwaꞌjsaꞌs. Saꞌ txãa yuꞌaꞌ Dxus jxkaahna ũsni vxiteꞌ Piisxakuẽ jĩnisa txãaweꞌsx jxkaahna ũsnijũk kasehna ũsuꞌ.
2 Çxhabte klxiikhun walasa pxãhte vxiteꞌ yuꞌwala pukate puutx pdxiꞌp fxtũutasx buçxaçxa walaana kãhtx, bagaçxte yuhwa uumée kaafxiꞌzeꞌjwaꞌjsa. Saꞌ txãa fxtũutasxaꞌ aꞌte iisak yũnna nes yuꞌ, txãasak anxuteꞌ doce weces yũnuꞌ, naapkaçxhaꞌ eç yuꞌ yuꞌçek selpiꞌ maa kiwejũ nasatxwa jxuka.
3 Kxteeaꞌ ewmeesa yuꞌ kĩh yuhwamée yuuna. Txãa çxhabteꞌ Dxus vxiteꞌ Piisxakuẽ jĩnisa txãaweꞌsx jxkaahna ũsutxna, naapkaçxhaꞌ txãaweꞌsxtxi selpisaaweꞌsxaꞌ weçxana neeweꞌwena nes yuutxna.
4 Kxteeaꞌ Dxus yakh pdxiꞌpuçxa puutx uyyaꞌ ãjãtxna, saꞌ Dxus yaseꞌs txãaweꞌsx dxikthesu jiꞌphsa yuutxna.
5 Kxteeaꞌ çxhiꞌdxwaꞌj enmée yuuna, açaꞌ kxtee fxiꞌzesaꞌ pkiꞌtawaꞌjwa peejimeetxna, saꞌ sek kweethniwa peejimeena, txãa paꞌgatey eenaꞌ kweethsaꞌ Dxusíiçxáꞌ. Açaꞌ kxtee ũssaꞌ bagaçxtewa weçxana nes yuutxna.
Jesukristo kĩiwaꞌj en utxa ũsaꞌ
6 Txajũꞌ Dxus angelaꞌ adxaꞌs naꞌjĩnak weꞌwe:
—Naꞌwẽ ptaꞌsxnisaꞌ isa kxtey yuuwaꞌjsataꞌ, açaꞌ txãatxiꞌs isasa yuhtxna sũhna waꞌlmée jxpaꞌgawaꞌjaꞌ. Txãa paꞌgatey nyafxíi txajx yuweꞌs ptaꞌsxsaweꞌsxtxi kaaũusutheꞌkh txãa Dxus íiçxáak ãçxwa txajx angelaꞌs kaah, naꞌwẽ kĩhwa yũuyaꞌwaꞌ jwee yuꞌ jxthẽeyuumée txãatx kaajiyuꞌkhan ãçxh naa ensu selpisaaweꞌsxtxi.
7 Txajũꞌ Jesus weꞌweçxaꞌ:
—Txaçxmey yuweꞌnja, açaꞌ naa librute Dxus yuweꞌs fxiꞌjni ũstaꞌ txãatx kxtey yũusaꞌ seenaꞌ weçxana neeyũutxna jĩꞌk.
8 Juan yaasesa adxaꞌ txãꞌwẽsatxthu uyna wẽseꞌjna yuu. Saꞌ txãꞌwẽ uyna wẽseꞌjçxaꞌ, Dxus angel kaavxyaꞌjaꞌkh txajx tasxte peejxũkweth neeweꞌweyaꞌ.
9 Nawa txãa yuꞌ naꞌwẽk weꞌwe adxaꞌs:
—Adxaꞌs peejxũkwenu. Adxaꞌ idx naꞌwẽysaíiçxáath, iidx yakhthẽꞌjweꞌsxwa maꞌwẽta Dxus yuweꞌs ptaꞌsxna fxiꞌzeꞌ txãꞌwẽsath, vxiteꞌ Dxus librute fxiꞌjni ũsaꞌ txãꞌsna kxtey yuusaweꞌsx naꞌwẽysaíiçxáath Dxusna selpisáa. Açaꞌ wejxwa Dxusnaçxáa mneeweꞌwe jĩꞌk.
10 Txajũꞌ kiꞌ weꞌwek naꞌjĩna:
—Naa librute Dxus yuweꞌs fxiꞌjni ũsaꞌ txãꞌsaꞌ ptaꞌsxmée yuꞌ yuunu. Txãꞌwẽmeꞌ kxtee weꞌwenisa kxtey yuuwaꞌj en ãjxaꞌwaꞌ.
11 Açaꞌ txãa en ãanijuyãꞌjaꞌ, ptaꞌsxniꞌs nwẽeseꞌjsamée yuꞌ jweeíiçxáa ewmée kazx yuuna fxiꞌzetxna, naapkaçxhaꞌ ptaꞌsxniꞌs nwẽeseꞌjsaꞌ jweeíiçxáa Dxus yakh txutemée çxhãçxha fxiꞌzetxna.
12 Txajũꞌ Jesus kiꞌ weꞌweçxaꞌ:
—Txaçxmey yuuyujuꞌnja. Saꞌ teeçxsa naꞌwẽçxah kĩh yũuna fxiꞌzesatewa txãꞌwẽ fxiꞌzepaꞌga deweniꞌs jxũçxa yuweꞌnja.
13 Adxaꞌ naa kiwe meetey ũsyãꞌth yuꞌ, saꞌ bagaçxtewa nes yuuwaꞌjsath. Adxthu nyafxte ũsyaꞌ takh, saꞌ jxuka skhẽwtewa adx íiçxáa neeyũuwaꞌjsath pçuwaꞌjsamée.
14 Maawa athni ropaꞌs yaateçxa jiꞌphsa yakhaꞌ wala yuh weçxa yujaꞌ, Dxus çxhabte vxitxte uꞌkaçxa kxtee fxtũutasx bagaçxte yuhwa uumée kaafxiꞌzeꞌjwaꞌjsaꞌs ũꞌyaꞌ uꞌkasa yakhaꞌ.
15 Nawa kazx ewmeesaweꞌsx, dxijxuuna fxiꞌzesa, kazx pkal yũuna fxiꞌzesa, nasa ikhsa, Dxus ĩtxĩmeesatx neeweꞌwesa, kĩhtewa jxuka ĩsxĩiwaꞌjçxáꞌs yajkxna fxiꞌzesa txãꞌwẽ yũusaweꞌsxaꞌ uꞌkayaꞌ ãjãmeeçxa ekaju neeyũutxna.
16 Jesus kiꞌ weꞌweçxaꞌ: Adxaꞌ adx tasxte selpisáa angelaꞌs kaath, Dxus luuçxweꞌsxtxi txãꞌwẽsaꞌs jxuka ptaꞌsxkahn. Adxaꞌ nyafxteweꞌsxthu, saꞌ jxkaahsa Davxid jiꞌthe kasehsath. Saꞌ khikhiiçte estrelxa zhiçxkwe eenaꞌ kweethsath jĩꞌk.
17 Açaꞌ Dxus Espiritu vxiteꞌ Piisxakuẽ jĩnisa nyuu txãaweꞌsxaꞌ piꞌkiꞌtx:
—Myuh jĩna.
Açaꞌ txãꞌwẽ piꞌkxniꞌs wẽseꞌjsaꞌ jweeju mpaꞌyawe. Açaꞌ yũꞌwẽesaꞌ utxaaçxa mpaꞌgawe yuꞌ bagaçxteçxáa yuhwa uuwaꞌjmeete kaafxiꞌzeꞌjsaꞌs, kĩh yuhwa vxyuu paꞌgamée.
18 Dxus yuwe naa librute fxiꞌjni ũsaꞌ txãꞌsna nwẽeseꞌjsa jxukaysatx adxaꞌ naꞌwẽth yuꞌkxpejeꞌ: Dxus yuwe naa librute fxiꞌjni ũsaꞌ txãate kĩhçxáawa yutxawáatxna açaꞌ txãꞌwẽ yũusatxiꞌs naꞌwẽ naa librute kastigo fxiꞌjni ũstaꞌ txãatx jxpaꞌgawaꞌj vxituna Dxusaꞌ.
19 Meeçxawa Dxus yuwe naa librute fxiꞌjni ũsaꞌ txãꞌsna kĩhçxáawa ivxiituwáatxna açaꞌ txãꞌwẽ yũusatxiꞌs Dxusaꞌ puuçmeena txãa fxtũutasx bagaçxte yuhwa uumée kaafxiꞌzeꞌjwaꞌjsaꞌs. Saꞌ naꞌwẽ ptaꞌsxna fxiꞌjni yuuk txãa çxhabtewa kaꞌgaꞌjmeena.
20 Txãꞌwẽ yũuwaꞌjsaꞌ naꞌjĩꞌk:
—Txaçxmey yuuyujuꞌnja jĩteꞌ, passaꞌ:
—Txãꞌjĩwaççxáawa, wẽt yuuna. Nawa dud myuh, Jesus.
21 Kweꞌsxtxi jxpeꞌjsa Jesukristoꞌ iꞌkweꞌsx jxukaysatx puꞌçxhina.
