Apocalipsis 3:1-22
3 Dxus luuçx Sardis çxhabteweꞌsxtxi jxpeꞌjsa Dxus angelaꞌs naꞌjĩna mfxiꞌj: Dxus tasxte ũssa sietesatx jxkaahsa txajx kusete yuꞌ siete estrelxatx atçxa ũssa naꞌjĩꞌk: Dxus dxiꞌpte iꞌkweꞌsx maꞌwẽ fxiꞌzesatewa jxuka jiith. Ĩtxĩ ũsthaꞌw jĩna jxtuhthe iꞌkwe fxiꞌzeꞌ, nawa uuníi naꞌwẽ ũsiꞌkwe.
2 Çxhãçxha fxiꞌzewaꞌjaꞌs miiyajkxwe. Txãꞌwẽmeꞌ, Dxus yakh fxiꞌzewaꞌj yuꞌsaꞌ kĩhnawa jxuka ivxiituwaꞌtheçxáa yãꞌj ũsiꞌkwe. Iiuythu Dxus dxiꞌpte iꞌkweꞌsxaꞌ ewmée iꞌkwe fxiꞌzeꞌ. Pkalaꞌs nvxihtçxa Dxus tasxte misxawedwe.
3 Saꞌ iꞌkweꞌsxtxi ew kaapiyaꞌjniꞌs yajkxçxa txãꞌs yuuçxáana kxtey yuuna mfxiꞌzewe. Txãꞌwẽ jxpaꞌyakxmeeteꞌ, adxaꞌ kus peswée naꞌwẽçxáa paꞌjaꞌnja iꞌkweꞌsx tasxte, kim yuhwa jiyunimeete.
4 Txãꞌwẽçxawa kxtee Sardis çxhabte maz nasa yuꞌ athni ropa khũuçxhiꞌjnimeesatx jiꞌphiꞌkwe, açaꞌ txãaweꞌsxaꞌ adx yakh fxiꞌzetxna ropa çxihmesa athçxa, txãaweꞌsxaꞌ txãꞌwẽ fxiꞌzewaꞌjsataꞌ.
5 Ewmeesa yuꞌsaꞌ nwẽeseꞌjmée kĩhtewa jxuka knaysaweꞌsxaꞌ ropa çxihmesa kaatheꞌjni yuutxna. Açaꞌ txãaweꞌsx yasetxiꞌs khukhmeꞌnja bagaçxte yuhwa uuwaꞌjmée ĩtxĩ fxiꞌzewaꞌj libruju, wejxwa txãaweꞌsx yasetxiꞌs ptaꞌsxna kaajiyuꞌjuꞌnja adx Tata vxiteꞌ txajx angelesweꞌsx dxiꞌpte.
6 Kxtey nwẽeseꞌjwaꞌjsa ũsçxaꞌ, Dxus Espirituꞌ naꞌwẽk weꞌweꞌ Dxus luuçxtxi txãꞌsna mwẽeseꞌjwe jĩꞌk.
Fxiladelfxia çxhabteweꞌsxtxi ptaꞌsxni
7 Dxus luuçx Fxiladelfxia çxhabteweꞌsxtxi jxpeꞌjsa Dxus angelaꞌs naꞌjĩna mfxiꞌj: Jxkaahsa Davxid lxavxiꞌs jiꞌphsa txãa phadeyãꞌtheꞌ, kim yuhwa aphaꞌçmeꞌ, saꞌ txãa aphteꞌ, kim yuhwa phadeꞌçmeꞌ txãꞌwẽ isasaꞌs ptaꞌsxsaꞌ naꞌjĩꞌk:
8 Dxus dxiꞌpte iꞌkweꞌsx maꞌwẽ fxiꞌzesatewa jxuka jiith. Iꞌkweꞌsx fxiꞌzewaꞌj dxiꞌjaꞌs phadeçxa nvxihtthu txãꞌsaꞌ kim yuhwa aphyaꞌ ãjãmeena. Iꞌkweꞌsxaꞌ Dxus dxiꞌpte açxamée iꞌkwe çxhãçxha fxiꞌzeꞌ, nawa adx ptaꞌsxni yuꞌsaꞌ kxtey yuuna ũsiꞌkwe adx yuꞌsaꞌ ahçemée.
9 Açaꞌ txãa paꞌga iꞌkweꞌsx tasxte peejxũkwekahn kajaꞌnja eçxthẽꞌj nasa judiumeeçxawa judiuthaꞌw jĩna ĩsxĩisaweꞌsxtxi, kxah txãaweꞌsxaꞌ jiyutxna adxaꞌ iꞌkweꞌsxtxiꞌs peeygãasatewa.
10 Kĩhtewa jxuka wantãywaꞌjaꞌs adx jxkaahniꞌs kxtey nwẽeseꞌjiꞌkwe, txãa paꞌga adxaꞌ jxaawuꞌnja iꞌkweꞌsxtxiꞌs naa kiwete jxukaysaweꞌsx maꞌwẽ yũutewa jiyuyaꞌ nxuswaꞌj en paꞌjana naa kiwe uta txãa ente.
11 Txaçxmey sxaweduꞌnja. Ew fxiꞌzeniꞌs mpaꞌyajkxwe, kxah txãꞌwẽ fxiꞌzepaꞌga iꞌkweꞌsxtxi ũswaꞌj ũsaꞌ txãꞌsna kim yuhwa kusaꞌjmeena.
12 Ewmeesa yuꞌsaꞌ nwẽeseꞌjmée kĩhtewa jxuka knaysaweꞌsxtxiꞌs adx Dxus tasxteweꞌsx seenaꞌ çxhãçxhasa vxituꞌnja, açaꞌ bagaçxte yuhwa kasehmeetxna txãajũ. Saꞌ txãaweꞌsx kakwete fxiꞌjçxa kiꞌpuꞌnja adx Dxus yase vxiteꞌ adx Dxus yujuni çxhab yase Jerusalen uꞌsesa cieluteweꞌsx txãatx. Saꞌ adx yase uꞌsesaꞌswa txãaweꞌsx kakwete yuu fxiꞌjçxa kiꞌpuꞌnja.
13 Kxtey nwẽeseꞌjwaꞌjsa ũsçxaꞌ, Dxus Espirituꞌ naꞌwẽk weꞌweꞌ Dxus luuçxtxi txãꞌsna mwẽeseꞌjwe jĩꞌk.
Laodicea çxhabteweꞌsxtxi ptaꞌsxni
14 Dxus luuçx Laodicea çxhabteweꞌsxtxi jxpeꞌjsa Dxus angelaꞌs naꞌjĩna mfxiꞌj: Ĩsxĩisamée kĩhtewa jxuka isasaçxáꞌs weꞌwesa kĩh yuhwa meetey ũsyãꞌkh yuꞌ txãꞌ naꞌjĩꞌk:
15 Dxus dxiꞌpte iꞌkweꞌsx maꞌwẽ fxiꞌzesatewa adxaꞌ jxuka jiith. Dxusaꞌs ũusuh jxuka yaakxpaꞌgamée fxizewa meeiꞌkwe, saꞌ açxawa meeiꞌkwe. Txãꞌwẽ yãꞌjçxaꞌ, jxukate fxize yuuwaç wejx ewna, meeçxawa açxa yuuni ewna.
16 Nawa fxizewa meeiꞌkwe, saꞌ açxawamée wejkuẽçxáa bajxiꞌkwe, txãa paꞌga adx yuwejũ iꞌkweꞌsxtxi pugayaꞌwath.
17 Iꞌkweꞌsxaꞌ wala jiꞌphsaçxa kĩh yuhwa peejxmée wala ewçxáa fxiꞌzena ũsthaꞌw jĩꞌiꞌkwe. Nawa kĩh yuhwa jiꞌphmée sũpxçxáa uyyaꞌ ãjãmée nxuste wẽtmeete yuuçxáa fxiꞌzeni yuꞌsaꞌ jiyumée ũsiꞌkwe.
18 Txãa paꞌgath naꞌwẽ yuꞌkxpejeꞌ: Wala jiꞌphsa yuu wẽeçxaꞌ, adxaꞌsçxaçxáa mweywe vxyuu beh ew pheuꞌjnisa. Sũpxçxáa fxiꞌzeyaꞌmée athwaꞌj ropa çxihmesanawa mweywe. Saꞌ yafxteweꞌsx yuꞌçewa mweywe.
19 Adx peeygãanisatxiꞌs juunaꞌth weꞌwena yuꞌkxpejeꞌ jxukaysatx. Txãꞌwẽ Dxus yakh çxhãçxha fxiꞌzeyaꞌ, pkalaꞌs nvxihtçxa Dxus tasxte misxawedwe.
20 Mwẽeseꞌjwe, adxaꞌ vxitxte paꞌyana ũsthu. Açaꞌ maawa adx weꞌweniꞌs wẽseꞌjçxa kaꞌgaꞌtheꞌ, kxtee uꞌkaçxa txãa yakh fxiꞌzeꞌnja, açaꞌ txãawa adx yakh fxiꞌzena.
21 Ewmeesa yuꞌsaꞌ nwẽeseꞌjmée kĩhtewa jxuka knaysaweꞌsxtxiꞌs adx jxkaahna ũsnite ih ũswaꞌjsa vxituꞌnja, adxwa maꞌwẽtka ewmeesaꞌs nwẽeseꞌjmée jxuka knayçxa adx Tata jxkaahna ũsni pukate kaçx txãꞌwẽy.
22 Kxtey nwẽeseꞌjwaꞌjsa ũsçxaꞌ, Dxus Espirituꞌ naꞌwẽk weꞌweꞌ Dxus luuçxtxi txãꞌsna mwẽeseꞌjwe jĩꞌk.
