Apocalipsis 4:1-11
4 Txãa eꞌsuꞌ kiꞌ thegçxaꞌ uythu cielute vxitx phateçxa ũste. Açaꞌ nyafxíi weꞌweni naꞌwẽy weꞌweni kiꞌ wẽseꞌth trompetaꞌs seenaꞌ sus tukani, saꞌ naꞌjĩꞌk:
—Ay ẽete myuh, kxtee kaavxyaꞌjaꞌjyaꞌwath naa eꞌsu kĩhçxa yuuneꞌthewa txãatx.
2 Txãꞌjĩçpkaçxhaꞌ txãa dudtey Dxus Espiritu aphniith yuuna paꞌj, saꞌ uythu cielute jxkaahna ũsnisaꞌs.
3 Txãa jxkaahna ũsnite yuꞌ, teeçx kaçxçxa uꞌpuꞌk, saꞌ kxtee uꞌpsa yuꞌ iiméh seenaꞌ zhiçxkwe zmeenaꞌ kuh jwed khikhyna uꞌpuꞌk. Saꞌ txãa peekuꞌjsu yuꞌ kxthũus iiméh zhiçxkwe kweethna ũsuꞌk.
4 Txãa jxkaahna ũsni pukasu yuꞌ vxite jxkaahna ũsni weintikuatro ãhtx ũsuꞌ, açaꞌ kxsũ yuꞌ Dxus luuçxtxi jxkaahsa weintikuatrosatx uꞌpuꞌ, ropa çxihme athçxa dxikthesu yuꞌ vxyuu bee korona jiꞌphsa.
5 Txãa jxkaahna ũsnijũ yuꞌ, kpiꞌsx kweneni naꞌwẽsak kasehna ũsuꞌ seenaꞌ susna, saꞌ jxkaahna ũsni dxiꞌpte yuꞌ siete ipx pkiꞌtanitx behna ũsuꞌ txãa yuꞌ Dxus tasxte ũssa siete espiritusaweꞌsxtxi yuꞌ.
6 Txãa dxiꞌpteyçxáa mar naꞌwẽsak zhiçxkwe khikhyna ũsuꞌ.
Txãa jxkaahna ũsni pxãhsu vxiteꞌ peekuꞌjsu yuꞌ Dxus vxitnisa ĩtxĩsa pahztxi ũsuꞌ, kakwete jxuka yafxçxaçxáa jiꞌphsa.
7 Txãa pahzsa nyafxteweꞌsxaꞌ león naꞌwẽk yuꞌ. Eꞌsteweꞌsxaꞌ tulu naꞌwẽk yuꞌ. Tekhteweꞌsxaꞌ nasa naꞌwẽk dxiꞌp jiꞌphuꞌ. Açaꞌ pahzteweꞌsxaꞌ uh naꞌwẽk fxuusa yuꞌ.
8 Txãa Dxus vxitnisa pahzsaꞌ teeçxsa naꞌwẽçxah seis fxu kuꞌtatx jiꞌphuꞌ, saꞌ yafxçxaçxáa kakwete jxukatx jiꞌphsa yuꞌ. Txãaweꞌsxaꞌ kus maꞌk yuu en maꞌk yuu nawa bagaçxte yuhwa wahtxmeetx naꞌjĩna ũsuꞌ:
Dxus iiméh seenaꞌ walasa,
Kĩh pkal yuhwa jiꞌphmée iiméh seenaꞌ atesa,
Nyafxíiwa txãak yuꞌ, saꞌ ãçxwa txãaíiçxáꞌ,
Saꞌ txãaíiçxáa bagaçxtewa nes yuuna jĩnatx weꞌwena nes yuꞌ.
9 Saꞌ kxtee jxkaahna ũsnite kaçxçxa bagaçxteçxáa yuhwa uumée nes yuuwaꞌjsaꞌs Dxus vxitnisa txãꞌwẽ tuutheꞌjna weçxaaçpkaçxhaꞌ,
10 Dxus luuçxtxi jxkaahsa weintikuatrosaweꞌsxaꞌ bagaçxteçxáa yuhwa uumée nes yuuwaꞌjsa tasxte peejxũkweçxa txãaweꞌsx koronatx txajx tasxte kiꞌpçxa naꞌjĩnatx weçxana tuutheꞌjeꞌ:
11 Kweꞌsx Dxus idx yuuçxáa jxpaꞌgawaꞌjsag weçxana tuutheꞌjniꞌs,
Txãa paꞌgatey idxçxaçxáag kĩhnawa jxuka vxit,
Açaꞌ iidx peeygãhçxa takiꞌjnisaçxaçxáa ũstaꞌ jĩꞌtx.
