Apocalipsis 5:1-14
5 Jxkaahna ũsnite kaçxçxa uꞌpsaꞌ paçu kuseju teeçx eç fxiꞌjnisa atçxa uꞌpteth uy. Txãa eç yuꞌ ekaju dxiiju jxuka fxiꞌjçxa wala ew pelçxa siete selxo yakhku aphni yuꞌ.
2 Saꞌ teeçx angel iiméh seenaꞌ çxhãçxhasa ũste uythu, txãa yuꞌ naꞌjĩnak paapẽyiꞌ sus weꞌwena:
—Txãa eç siete selxo yakh aphnisaꞌs ¿kim sudeçxa phadeyaꞌ ãjãkx? jĩꞌk.
3 Nawa cieluteweꞌsx, naa kiweteweꞌsx, naa kiwe dxiijuweꞌsx kimçxáa yuhwa txãa eçaꞌs phadeyaꞌ ãjãwaꞌjsameetx yuꞌ, saꞌ thegyaꞌçxáa yuhwa ãjãwaꞌjsameetx yuꞌ.
4 Txãꞌwẽ txãa eçaꞌs phadeçxa thegyaꞌçxáa yuhwa ãjãwaꞌjsamée yuupaꞌga, adxaꞌ wala ũꞌnena ũsuꞌth.
5 Açaꞌ kxtee jxkaahna ũssa teeçxsaꞌ naꞌjĩꞌk:
—Jwee yuꞌ ũꞌnenu. Teeçx ũsaꞌ Juda nweꞌsx, jxkaahsa Davxid jiꞌtheweꞌsx wala jxtuhthesa txãꞌ ewmeesaꞌs jxuka knayku, txãa siete selxotx sudeçxa eçaꞌs phadeyaꞌ ãjãyaꞌ jĩꞌk.
6 Txajũꞌ jxkaahna ũsni pxãhte vxiteꞌ Dxus vxitni ĩtxĩsa pahz ũsuꞌtx vxiteꞌ Dxus luuçxtxi jxkaahna ũssaweꞌsx txãꞌwẽsaweꞌsx ksxavxyte Piisxakuẽ naꞌwẽsa yujuçxa ũste uythu. Txãa yuꞌ kpãꞌvxitçxa ikhni snxalwa jiꞌphuꞌk, saꞌ siete kaaçxu siete yafxku jiꞌphuꞌ. Txãa siete yafx yuꞌ naꞌwẽ Dxus tasxte ũssa siete espiritutx naa kiwete jxuka kaahni yuutx txãatx yuꞌ.
7 Txajũꞌ txãa Piisxakuẽ jĩnisaꞌ uꞌjçxa jxpaꞌgak naꞌwẽ jxkaahna ũsnite uꞌpsaꞌ paçu kusete eç yaat yuꞌk txãa eçna.
8 Txajũꞌ txãa eçaꞌs jxpaꞌgaçpkaçxhaꞌ, Dxus vxitni pahz ĩtxĩsa vxiteꞌ Dxus luuçxtxi jxkaahsa weintikuatrosaweꞌsxaꞌ peejxũkwetx txãa Piisxakuẽ jĩnisa tasxte. Txãa jxkaahsaweꞌsxaꞌ teeçxsa naꞌwẽçxah tukani arpa jiꞌphuꞌtx, saꞌ vxyuu bee kopawa jiꞌphuꞌtx. Txãa vxyuu bee kopasũ yuꞌ dxuus yatte kabnisa inciensoçxaçxáꞌs uta abnisaꞌstxi jiꞌphuꞌ. Açaꞌ txãa yuꞌ Dxusaꞌs peçxkanamée puutx weꞌwena ũsni jĩnisak yuꞌ.
9 Saꞌ memtxi teeçx mem uꞌsesa naꞌjĩna:
Idxaꞌ txãa eçaꞌs jxpaꞌgaçxa selxotx sudeyaꞌ ãjãwaꞌjsag,
Txãa paꞌgatey ikhni yuuçxa iidx eeju kweꞌsxtxiꞌs weygu
Maa nasa maꞌwẽsa, yuwe maꞌwẽ weꞌwesa, mteeweꞌsxwa jxuka Dxus luuçx yuuyaꞌ ãjãkahn.
10 Saꞌ kweꞌsxtxiꞌs jxkaahwaꞌjsag vxitna paꞌj vxiteꞌ sacerdote kweꞌsx Dxus tasxteweꞌsx,
Açaꞌ naa kiwete jxkaajxaꞌ ãjãꞌnjaꞌw jĩꞌtx.
11 Txajũꞌ kiꞌ thegçxaꞌ wẽseꞌth angelesweꞌsx iiméh seenaꞌ kuhsa weꞌweniꞌs. Txãaweꞌsx yuꞌ jxkaahna ũsni peekuꞌjsu vxiteꞌ Dxus vxitni ĩtxĩsa vxiteꞌ Dxus luuçxtxi jxkaahna ũssaweꞌsx peekuꞌjsutx ũsuꞌ. Txãaweꞌsxaꞌ iiméh seenaꞌ wala kuh yuꞌtx.
12 Saꞌ naꞌjĩnatx sus weꞌweꞌ:
Piisxakuẽ naꞌwẽ ikhni yuunisaꞌs bagaçxtewa puꞌvxitumée weçxana tuutheꞌjna ũswaꞌjaꞌ.
Saꞌ txãaçxaçxáa jxuka jxpaꞌgawaꞌjsaꞌ, jxkaahsa yuuwaꞌj, wala seenaꞌ jiꞌphsa yuuwaꞌj.
Kĩhtewa jxuka jiisa, iiméh çxhãçxhasa txãꞌwẽ yuuwaꞌjsaꞌ jĩꞌtx.
13 Saꞌ Dxus takiꞌjni cieluteweꞌsx, naa kiweteweꞌsx, naa kiwe dxiijuweꞌsx, marteweꞌsx kxtee kĩhçxah ũstxna txãꞌwẽsa jxuka naꞌjĩna weꞌweniꞌswa wẽseꞌth:
Weçxana tuutheꞌjwaꞌjaꞌ jxkaahna ũsnite kaçxçxa uꞌpsaꞌs vxiteꞌ Piisxakuẽ naꞌwẽ ikhni yuuk txãꞌsna.
Saꞌ jxtuhthe jxkaajxaꞌ ãjãwaꞌjsaꞌ bagaçxtewa jĩꞌtx.
14 Açaꞌ txãꞌjĩçpkaçxhaꞌ, Dxus vxitni ĩtxĩsa pahzsaꞌ:
—Txãꞌwẽ kxtey yuuna jĩꞌtx. Naapkaçxhaꞌ Dxus luuçxtxi jxkaahsa weintikuatrosaweꞌsxaꞌ peejxũkweçxa weçxana tuutheꞌjeꞌtx bagaçxteçxáa yuhwa uumée nes yuuwaꞌjsaꞌs.
