Apocalipsis 6:1-17
6 Txajũꞌ uythu Piisxakuẽ jĩnisaꞌ siete selxo nyafxteweꞌsxaꞌs sudeçte, saꞌ wẽseꞌth Dxus vxitni ĩtxĩsa teeçxsaꞌ seenaꞌ sus naꞌjĩna:
—Yuhçxa mtheg jĩniꞌs.
2 Açaꞌ txãꞌwẽ wẽseꞌjçxaꞌ, thegçxa uythu teeçx jiba çxihmesaꞌs, kxtee aꞌjsa yuꞌ kusete ũpanisa arko yaasesaꞌsku jiꞌphuꞌ. Txajũꞌ txãꞌsaꞌ teeçx koronak ũsni yuu, açaꞌ txãa yuꞌ kĩhtewa jxuka puiiyaꞌ jiisak kaseh, mteewa puiiçxa knaywaꞌjsa.
3 Txajũꞌ Piisxakuẽ jĩnisaꞌ vxite selxoꞌs sudek eꞌsteweꞌsxna, açaꞌ wẽseꞌth Dxus vxitni ĩtxĩsa eꞌzsateweꞌsx naꞌjĩna:
—Mtheg jĩniꞌs.
4 Saꞌ uythu vxite jiba behsa kasejeçte, açaꞌ kxtee aꞌjsa yuꞌs jxkaahnik yuu, naa kiwete wẽt fxiꞌzeniꞌs ivxiitute nasaa pweꞌsx puutx ikhna uꞌkhan. Saꞌ teeçx espada walasak ũsni yuu.
5 Txajũꞌ Piisxakuẽ jĩnisaꞌ vxite selxoꞌs sudek tekhteweꞌsxna, açaꞌ wẽseꞌth Dxus vxitni ĩtxĩsa tekhsateweꞌsx naꞌjĩna:
—Mtheg jĩniꞌs. Açaꞌ uythu vxite jiba khũçxsaꞌs açaꞌ kxtee aꞌjsa yuꞌ kusete isanisa balansa yaasesaꞌsku jiꞌphuꞌ.
6 Saꞌ wẽseꞌth Dxus vxitni ĩtxĩsa ksxavxyu teeçx naꞌjĩna weꞌweniꞌs:
—Eꞌz libra skuutxhçxáana teen mjĩinite ãhpaꞌga txweywaꞌj yuuna, saꞌ seis libra cebadaꞌswa txakwey paꞌgate txweywaꞌj yuuna. Nawa aceite vxino txãꞌwẽsa yuutxiꞌsaꞌ ivxiitupuꞌn jĩꞌk.
7 Txajũꞌ Piisxakuẽ jĩnisaꞌ vxite selxoꞌs sudek pahzteweꞌsxna, açaꞌ wẽseꞌth Dxus vxitni ĩtxĩsa pahzsateweꞌsx naꞌjĩna:
—Mtheg jĩniꞌs.
8 Açaꞌ txãꞌwẽ wẽseꞌjçxaꞌ thegçxa uythu teeçx jiba seenaꞌ ũukhũukhsaꞌs, açaꞌ kxtee aꞌjsa yuꞌ Ikhsa jĩna kxsusni yasek jiꞌphuꞌ. Naapkaçxhaꞌ txãa eꞌsteꞌ uusaaweꞌsx yujuni jĩnisak vxyaa. Txãa jibate aꞌjsa yuꞌsaꞌ jxkaahnik yuu naa kiwete nasatx puupxãhn ãatuw ikhkahn gweçxa vxitçxa wẽjẽ kaapaꞌjaꞌjçxa weewa txãꞌwẽy kaapaꞌjaꞌjçxa yuꞌkh eçx juunaꞌsawa kaapenaꞌjçxa.
9 Txajũꞌ Piisxakuẽ jĩnisaꞌ vxite selxoꞌs sudek tahçteweꞌsxna. Açaꞌ Kristoꞌs selpiipaꞌga ikhni yuutx txãaweꞌsxçxaçxáa altal tasxte ũsteth uy.
10 Saꞌ txãaweꞌsxaꞌ naꞌjĩnatx sus weꞌweꞌ:
—Kweꞌsxtxi jxpeꞌjsa atesa idxaꞌ kĩhtewa kxtey yuusáa ¿makwe txaçx jxthẽeyuuyaꞌwaga, kweꞌsxtxi ahçeçxa ikhtxi txãaweꞌsxtxi kastigãyyaꞌ? jĩteꞌ,
11 pasçxaꞌ:
—Ãçxhíi yuꞌ ũuçxkwe uythãsna jxkaasena meswe, Kristoꞌs selpiipaꞌga iꞌkweꞌsx naꞌwẽy ikhni yuuwaꞌj peejxtaꞌ txãaweꞌsxtxi kxtey yuuna jxãꞌphkaçx jĩçxaꞌ, ropa çxihmesatx kaatheꞌjni yuu.
12 Txajũꞌ Piisxakuẽ jĩnisaꞌ vxite selxoꞌs sudek seisteweꞌsxna. Açaꞌ uythu seenaꞌ ehd uꞌjweçte sekaꞌ jxuka khũçx kãjk kweethmeepkaçx, aꞌtewa jxuka ee naꞌwẽk beh yuu.
13 Naapkaçxhaꞌ cielute estrelxaꞌ ũsxitx naa kiwete, fxtũ yũnwa maꞌwẽta wejxa çxhãçxha kẽeseꞌthe jxuka ũsxiꞌ txãꞌwẽtx yuu.
14 Açaꞌ cieluꞌ eç naꞌwẽ jxuka pelni yuuçxa vxyaameꞌ. Naapkaçxhaꞌ thãꞌj vxiç vxiteꞌ ĩkh pxãhsu kiwe uꞌpsa jxuka upenitx yuu ẽseꞌsete.
15 Açaꞌ naa kiwete jxkaahsaweꞌsxaꞌ wala ũukhçxa kiwe kafxsu vxiteꞌ kwet kafxsu jxuka jxsũuthtxi, walasaweꞌsx, jiꞌphsaweꞌsx, npiiçthẽꞌjweꞌsx, jxtuhthesaweꞌsx, vxiteꞌ patron kusete selpiina fxiꞌzesaweꞌsx vxiteꞌ patron jiꞌphmée wẽt fxiꞌzesaweꞌsx jxukatx txãꞌwẽ yũu.
16 Saꞌ txãꞌwẽ yũuçxa thãꞌj vxiç vxiteꞌ kwet penxatx naꞌjĩnatx weꞌweꞌ:
—Kweꞌsxtxi jxuka akaaçxçxa kaavxyaꞌjaꞌjnu naꞌwẽ jxkaahna uꞌpaꞌ txajx dxiꞌpte, vxiteꞌ Piisxakuẽ jĩnisa seenaꞌ yuh kastigãyyaꞌ ũsaꞌ txãꞌwẽsa dxiꞌpte.
17 Txãꞌwẽmeꞌ, txãꞌwẽ seenaꞌ kastigãywaꞌj en ãjk, açaꞌ ¿kim kxteꞌ wantãyyaꞌ ãjãkx? jĩꞌtx.
