Apocalipsis 7:1-17
7 Txãa eꞌsuꞌ pahz angelesweꞌsxtxith uy, txãaweꞌsxaꞌ naa kiwe peekuꞌthe puutx pahz ahtetx yujuçxa ũsuꞌ, naa kiwete pahz ajũ wejxa kasehsatx kaꞌgaꞌjmée yupna, naa kiwete, marte, yuꞌkhsu mtee yuhwa wejxakahmen.
2 Saꞌ vxite angel uythu txãa yuꞌ sek kãani juꞌguk yuh yuꞌ, Dxus ĩtxĩsa selxoꞌs atçxa. Txãa Dxus angelaꞌ susku weꞌwe pahz angelesweꞌsx ũsuꞌtx naa kiwe vxiteꞌ mar txãatx suwwaꞌjsatx naꞌjĩna:
3 —Naa kiwe, mar, yuꞌkh mtee yuhwa ãçxhíi yuꞌ suwnuwe, Dxusna selpisaaweꞌsx dxikthesu kweꞌsx iisawaꞌjmeyna yuꞌ jĩꞌk.
4 Txajũꞌ wẽseꞌth Israelita jiꞌjweꞌsx iisawaꞌjnisa jxuka yuꞌ ciento kuarenta y kuatro miltxi yuꞌ.
5 Judá jiꞌj, doce mil; Rubén jiꞌj, doce mil; Gad jiꞌj, doce mil;
6 Aser jiꞌj, doce mil; Nefxtalí jiꞌj, doce mil; Manasés jiꞌj, doce mil;
7 Simeón jiꞌj, doce mil; Levxí jiꞌj, doce mil; Isakar jiꞌj, doce mil;
8 Zabulón jiꞌj, doce mil; José jiꞌj, doce mil; Benjamín jiꞌj, doce mil; txãaweꞌsxtxi jxukaçxah yuꞌ txazkuẽe yuꞌ.
Maa nasawa Dxus nweꞌwenisaweꞌsx
9 Txãa eꞌsuꞌ kiꞌ thegçxaꞌ nasa iiméh wala kuh uythu. Txãaweꞌsxaꞌ maa nasa maꞌwẽsa majũweꞌsxwa jxukatx yuꞌ, yuwe fxiyfxiyçxah weꞌwesa. Saꞌ Piisxakuẽ jĩnisa jxkaahna uꞌpni peekuꞌjsutx yujuçxa ũsuꞌ. Txãaweꞌsxtxiꞌ kim yuhwa isayaꞌ ãjãmeetaꞌ, iiméh wala kuh yuꞌtx txãa paꞌga. Saꞌ ropa çxihmesa athçxa kusesu yuꞌ lamus eçnatx yaat yuꞌ.
10 Txãaweꞌsx jxukaysa naꞌjĩnatx sus weꞌweꞌ:
Kweꞌsx Dxus jxkaahna uꞌpaꞌ vxiteꞌ Piisxakuẽ jĩnisa txãaweꞌsx yuuçxáatx ewte neeyũuwaꞌjaꞌs ũs jĩꞌtx.
11 Açaꞌ Dxus jxkaahna ũsni peekuꞌjsu vxiteꞌ Dxus luuçxtxi jxkaahsaweꞌsx peekuꞌjsu vxiteꞌ Dxus vxitni ĩtxĩsa pahz ũsuꞌtx txãa peekuꞌjsu angelesweꞌsx yujuçxa ũssaꞌ jxkaahna ũsni juꞌgu kiwete paꞌj kĩiçhuçxa Dxusaꞌs naꞌjĩnatx neeweꞌweꞌ:
12 Weçxana tuutheꞌjwaꞌjaꞌ kweꞌsx Dxusaꞌs.
Txãaçxáa kĩhtewa jxuka jiisaꞌ.
Txãꞌ bagaçxtewa çxhãçxhasa jxtuhthe jxkaajxaꞌ ãjãwaꞌjsaꞌ jĩꞌtx.
13 Txajũꞌ Dxus luuçxtxi jxkaahsa teeçxsaꞌ naꞌjĩnak adxaꞌs pẽjx:
—Naꞌwẽ ropa çxihme athçxa ũstaꞌ txãaweꞌsxaꞌ ¿kimtxna, saꞌ majũ yuusatxna? jĩteꞌ:
14 —Txãaweꞌsxtxiꞌ idxíiçxáa jiineꞌga jĩnath pas. Açaꞌ txãꞌ naꞌwẽk ptaꞌsx:
—Txãaweꞌsxaꞌ iiméh seenaꞌ wala nxuste skhẽwsaataꞌ, saꞌ txãaweꞌsx athni ropatxiꞌs thethçxa Piisxakuẽ jĩnisa ikhni yuuk txajx eete yaatesataꞌ.
15 Txãasa Dxus jxkaahna ũsni tasxte ũstaꞌ, en maꞌk yuu meeçxaꞌ kus maꞌk yuu nawa bagaçxtewa selpiina nes yuuwaꞌjsataꞌ. Açaꞌ kxtee jxkaahna uꞌpsa yakh ũssaꞌ kĩhte yuhwa peejxmée fxiꞌzetxna.
16 Txãa paꞌga txãaweꞌsxaꞌ ãçxhaꞌ pxthaa yuumeetxna wẽena yũꞌwẽena. Saꞌ sektewa çxhavxyna yaaçxana fxiꞌzemeetxna,
17 txãa paꞌgatey Piisxakuẽ jĩnisa jxkaahna ũsni ksxavxyte ũsaꞌ txajx jxpeꞌjni yuutxna. Saꞌ yuꞌ bagaçxte yuhwa pçuwaꞌjmeesaꞌs yusni yuutxna. Açaꞌ Dxusíi txãaweꞌsx ũꞌneni yafx yuꞌtxiꞌs khukhuna jĩꞌk.
