Apocalipsis 8:1-13
8 Txajũꞌ txãa Piisxakuẽ jĩnisaꞌ vxite selxoꞌs sudek sieteteweꞌsxna. Naapkaçxhaꞌ cielute kĩh yuhwa susmée sxuunaꞌk yuu, media ora ãhpkaçx.
2 Txãꞌwẽ yũuni skhẽwniijũꞌ siete angelesweꞌsxtxi uythu Dxus tasxte yujuçxa ũste, açaꞌ txãaweꞌsxtxiꞌsaꞌ jxukaysatx tukani trompeta ũsnitx yuu.
3 Txãꞌwẽ yuuçpkaçxhaꞌ Dxus angel vxite kũjk vxyuu bee kopaꞌs atçxa, saꞌ altal tasxtek yuju. Açaꞌ seenaꞌ wala ũsni yuuk txãa vxyuu bee kopate abçxa kabwaꞌjaꞌs. Txãa yuꞌsaꞌ vxyuu bee altal ũsuꞌk jxkaahna ũsni tasxte kxtee kabwaꞌkh yuu, Dxus luuçx jxukaysaweꞌsx Dxus yakh puutx weꞌweçpkaçxhaꞌ kabkahn.
4 Açaꞌ Dxus angel txãꞌwẽ kabteꞌ, txãa ah yuꞌ Dxus tasxte paꞌkh tejka, Dxus luuçx jxukaysaweꞌsx Dxus yakh puutx weꞌweni yãꞌjçxa.
5 Txajũꞌ txãa Dxus angelaꞌ txãa vxyuu bee kopate utak çxhãꞌçxha ipx jiꞌphsaꞌs ãsx kxtee altalteweꞌsxna, saꞌ txãꞌwẽ yũuçxak kiwe kajkwesu ẽesu yahta. Açaꞌ txãꞌwẽ yuuçpkaçxhaꞌ, kpiꞌsx seenaꞌ kwehnena sus weꞌwena, ehdwa txãꞌwẽk seenaꞌ uꞌj.
Siete angelesweꞌsx trompetatx tujkayaꞌ yujuni
6 Txajũꞌ txãa siete angelesweꞌsxaꞌ trompetatx tujkayaꞌ yujutx.
7 Açaꞌ Dxus angel nyafxteweꞌsxaꞌ txajx trompetaꞌs tujkak, naapkaçxhaꞌ naa kiwete kwetuba ãsxku ee kaꞌdnisa vxiteꞌ ipx yãꞌjçxa. Açaꞌ naa kiwe pxãhn ãatuwku çxhavxy, yuꞌkhwa txãꞌwẽy jxuka.
8 Txajũꞌ Dxus angel eꞌzteweꞌsxwa txajx trompetaꞌs tujkak, naapkaçxhaꞌ thãꞌj vxiç wala naꞌwẽsa ipxçxaçxáak behna ũsuꞌ txãꞌsnak marte akhni yuu. Txãꞌwẽ yuuteꞌ, maraꞌ pxãhn ãatuwku eeçxaçxáa yuu.
9 Açaꞌ kxtee kĩhçxah neꞌta ĩtxĩsa ũsuꞌ txãa yuꞌ jxuka uutx mar eeçxaçxáa yuunisateweꞌsx yuꞌ. Açaꞌ barkowa pxãhn ãatuwtxi vxitu.
10 Txajũꞌ Dxus angel tekhteweꞌsxwa txajx trompetaꞌs tujkak, naapkaçxhaꞌ cieluju teeçx estrelxa seenaꞌ walasa wetek ipxçxaçxáa behna. Yuꞌwalasu vxiteꞌ yuꞌleꞌçxkuẽsuwa naa kiwete pxãhn ãatuwku pẽethehna wete.
11 Txãa estrelxaꞌ Seenaꞌ Yaasak yaase yuꞌ, açaꞌ naa kiwete pxãhn ãatuwtxi yuꞌaꞌ yaasaçxaçxáa yuu. Açaꞌ nasaꞌ seenaꞌ wala uutx, txãꞌwẽ yuꞌ yaasaçxaçxáa yuupaꞌga tudxyaꞌ ãjãmeeçxa.
12 Txajũꞌ Dxus angel pahzteweꞌsxwa txajx trompetaꞌs tujkak, naapkaçxhaꞌ sekwa puupxãhn ãatuwku kweethmée neeyũu. Açaꞌ aꞌte, estrelxawa txãꞌwẽyçxáatx puupxãhn ãatuw kweethmée neeyũu. Açaꞌ txãa suwenisa yuꞌ kweethmeetaꞌ. Açaꞌ en yuꞌ wejkuẽ yuuçxáak khikhyna neeyũu, naapkaçxhaꞌ kus yuꞌ jweeíiçxáak seenaꞌ çxhiꞌdxsa yuu.
13 Txajũꞌ thegçxaꞌ uythu Dxus angel cielusu fxuhna uꞌjweçte seenaꞌ sus weꞌwena naꞌjĩna:
—Dxus angel tekhsaweꞌsx trompetaꞌs tukani susuçpkaçxhaꞌ, seenaꞌ yuh ũukhũukhsa yuuna naa kiwete ũssa yakhaꞌ jĩꞌk.
