Apocalipsis 9:1-21
9 Txajũꞌ Dxus angel tahçteweꞌsxwa txajx trompetaꞌs tujkak, naapkaçxhaꞌ uythu cieluju estrelxa naa kiwete weteeçte. Açaꞌ txãa wetesa estrelxaꞌs lxavxiꞌs ũsnik yuu, kafx seenaꞌ dxiisateweꞌsxna.
2 Txajũꞌ txãa kafx seenaꞌ dxiisaꞌs phadek, naapkaçxhaꞌ orno walate ah naꞌwẽk kaseh, saꞌ txãa ajaꞌ jxuka nuyçxhiꞌdxku sekna vxiteꞌ ẽesu jxuka.
3 Txãa ahte yuꞌ khãꞌsxtxi kaseh naa kiwete jxuka fxuhna. Açaꞌ txãa khãꞌsx yuꞌ yãjayaꞌ ãjãwaꞌjsatx yuꞌ, usmitx maꞌwẽta aka yãjaꞌ txãꞌwẽ.
4 Nawa naa kiwete fxtũ tasx, jxũth tasx çẽysa yuꞌsaꞌ kĩh yuhnawa suwwaꞌjsameetx yuꞌ, naasáa Dxus selxoꞌs dxikthesu maa yuhwa jiꞌphmeesaçxaçxáꞌstxi yãjawaꞌjsa yuꞌ.
5 Nawa nasatx ikhwaꞌjsa yuꞌ yuꞌçmeetaꞌ, naasáa tahç aꞌte ãhpkaçx seenaꞌ wala kaakaꞌjwaꞌjsaçxáatx yuꞌ. Saꞌ txãa akasa yuꞌ usmitx yãjani naꞌwẽ seenaꞌ aka yuuwaꞌjsatx yuꞌ.
6 Txãa ensuꞌ nasaꞌ uuwaꞌjaꞌs pakweçxawa, uymeetxna. Makwe uuwaꞌjaꞌs pakwetewa, txãaweꞌsxtxiꞌ uu en paꞌjmeena.
7 Txãa khãꞌsxaꞌ jibatx gweçxate puiiyaꞌ uꞌjweççxa pheuꞌjnisa naꞌwẽtx yuꞌ. Dxikthesu yuꞌ vxyuu bee korona naꞌwẽsatx jiꞌphuꞌ, saꞌ dxiꞌpaꞌ nasaa dxiꞌp naꞌwẽtx yuꞌ.
8 Uꞌy naꞌwẽtx yaꞌiidxkhas yuꞌ, saꞌ txãaweꞌsx kiꞌthaꞌ león kiꞌth naꞌwẽsatx jiꞌphuꞌ.
9 Txãaweꞌsx kakwe yuꞌ çam naꞌwẽsaçxaçxáꞌstxi yaꞌiiphuph yuꞌ, saꞌ txãaweꞌsx fxujaçte susni yuꞌ kaçxetilxa jiba wezxnisa kuhsa uꞌjweççxa maꞌwẽ susukx txãꞌwẽtx susuꞌ.
10 Saꞌ txãaweꞌsx mez yuꞌ usmitx mez naꞌwẽtx yãjawaꞌj jiꞌphuꞌ, nasatx yãjaçxa tahç aꞌte uta kaakaꞌjwaꞌjsa.
11 Txãa khãꞌsxaꞌ teeçx neꞌjweꞌsx jiꞌphuꞌtx, kafx seenaꞌ dxiite ũssa. Txãa neꞌjweꞌsxaꞌ hebreo yuwete yuꞌ Abadonku yaase yuꞌ, saꞌ griego yuweteꞌ Apolionku yaase yuꞌ meeçxawa Ivxiitusa jĩnisa.
12 Txajũꞌ Juan weꞌweçxaꞌ:
—Nyafxte seenaꞌ ũukhũukhsa yuꞌ skhẽwku, nawa eꞌzíi peejxtaꞌ jĩꞌk.
13 Txajũꞌ Dxus angel seisteweꞌsxwa txajx trompetaꞌs tujkak, naapkaçxhaꞌ Dxus tasxte vxyuu bee altal pahz vxiçsu weꞌweni pthũusek.
14 Saꞌ Dxus angel seisteweꞌsx trompeta jiꞌphuꞌk txãꞌsaꞌ naꞌjĩnak jxkaahni yuu:
—Pahz angelesweꞌsx tudni ũstaꞌ Eufxrates yuꞌwala pukate txãaweꞌsxtxiꞌ mitxhwete jĩna.
15 Txajũꞌ txãa angelesweꞌsxtxiꞌsaꞌ txhwetenitx yuu, nasa naa kiweteweꞌsxtxi puupxãhn ãatuw ikhkahn. Txãꞌwẽ yũuwaꞌjsa neꞌta pheuꞌjni ũsuꞌ, kĩh ora, maa ente, kĩh aꞌte, maa anxute txãꞌwẽ yuuwaꞌjsaçxawa txãa en ãhteweꞌsx.
16 Txajũꞌ txãa jiba seenaꞌsu aꞌjsatx jiyuth. Txãaweꞌsxaꞌ seenaꞌ wala kuh yuꞌtx, dos cientos milxones.
17 Naꞌwẽ jiba seenaꞌsatx uythu, açaꞌ txãa jibate aꞌjsa yuꞌ puiiwaꞌj txãaweꞌsx peçxusu yaꞌphuphnisa jiꞌphuꞌtx tekh jwed, teeçxsaꞌ beh, vxiteꞌ çẽy, vxiteꞌ lemsa. Açaꞌ jiba yuꞌ león naꞌwẽtx yaꞌiidxiktheh yuꞌ, saꞌ yuwesu yuꞌ ipx vxiteꞌ ah vxiteꞌ asufxre txãꞌwẽsatx kasehna ũsuꞌ.
18 Açaꞌ naa kiwete nasa puupxãhn ãatuwtxi uu, txãꞌwẽ jiba yuwesu tekh jwed kasehçxa ikhpaꞌga.
19 Txãa jibaꞌ yuweju vxiteꞌ mezuhtx ewmée yũuwaꞌjaꞌs jiꞌphuꞌ. Txãaweꞌsx mezaꞌ ul naꞌwẽtx yuꞌ dxikthé jiꞌph, txãasatx txãaju ikhyaꞌ ãjãꞌ.
20 Nawa txãa ewmeesa vxyaatx txãate uusaamée nasa yuꞌ txãaweꞌsx ewmée yũuna fxiꞌzeniꞌs nvxihtmeetaꞌ. Eçxthẽꞌj jxkaahniꞌswa peçxkanamée nwẽeseꞌjna nestxi yuꞌ. Saꞌ vxyuu beh, vxyuu çxihme, çam, kwet, fxtũ, txãatxtxi nasa naꞌwẽ piisaçxa neeweꞌwena nes yuꞌ. Txãa piisanisaꞌ uysaawameetaꞌ, saꞌ wẽseꞌjsawameetaꞌ, uꞌjuyaꞌwa ãjaꞌçmeetaꞌ.
21 Saꞌ ikhna fxiꞌzeniꞌswa nvxihtmeetaꞌ, saꞌ dxijxuuna, kazx pkal yuuna, pesweena txãꞌwẽ yũunisatxwa nvxihtmeetaꞌ.
