Efxesios 1:1-23
1 Adxaꞌ Jesukristo jxkaahnisa Pablo yaaseth, txãꞌwẽte selpiwaꞌjsa Dxus nvxiitnisa. Txãa paꞌga Dxus luuçx Efxeso çxhabteweꞌsx jĩi naa kartaꞌs fxiꞌjçxa kajaçthu, Kristo Jesusaꞌs nwẽeseꞌjna fxiꞌzesaweꞌsxtxi weçxana.
2 Iꞌkweꞌsxtxiꞌ Dxusaꞌ puꞌçxhina vxiteꞌ kweꞌsxtxi jxpeꞌjsa Jesukristowa, txãa paꞌga Dxus yakhçxáa mfxiꞌzewe.
Kristo jĩi yuupaꞌga Dxus iiméh wala puꞌçxni
3 Kweꞌsxtxi jxpeꞌjsa Jesukristo Tataꞌs wala yuh weçxawaꞌj jiꞌpthaꞌw. Kweꞌsxaꞌ Kristo yakh utxaapaꞌga kĩh yuhwa peejxmée jxukak txajx dxiꞌpte jxpubamée fxiꞌzewaꞌjaꞌs nvxiht cieluteweꞌsx yuuwaꞌjaꞌs.
4 Txãasa íik naa kiwe meetey Dxusaꞌ kweꞌsxtxiꞌ txhitxh, kĩh pkal yuhwa jiꞌphmée Kristo naꞌwẽysa yuukahn.
5 Kweꞌsxaꞌ kĩhte yuhwa seelpimeesatewa Dxusaꞌ naasáa peeygãhçxa yuuçxáak Jesukristo nweꞌweteꞌ, kweꞌsx txajx luuçx yuuwaꞌjaꞌs dxiikhẽy vxitçxa nvxiht.
6 Txãꞌwẽ peeygãapaꞌga Dxusaꞌs bagaçxtewa weçxana yuuçxáa tuutheꞌjwaꞌj jiꞌpthaꞌw, txajx Nçxiꞌk Jesukristo nweꞌwepaꞌga.
7 Txãa Jesukristok kweꞌsxtxiꞌ nweꞌwe txajx eeju kweꞌsx pkaltxi jxuka peltunãyçxa. Nawa Dxusaꞌ kweꞌsxtxi wala peeygãhçxa yuuçxáak txãꞌwẽ yuuwaꞌjaꞌs vxit.
8 Txãꞌwẽy Dxusaꞌ kweꞌsxtxiꞌ kĩhte yuhwa peejxmée jxuka ãate kaajiyuꞌkh.
9 Nyafxiitey kim yuhwa jiyunimeete maꞌwẽ yuuwaꞌjaꞌs neꞌ vxitçxa jiꞌphuꞌ txãꞌsnak kweꞌsxtxi kaajiyuꞌj.
10 Txãa yuꞌ naꞌwẽk yuꞌ: cielute ũssa vxiteꞌ naa kiweteweꞌsx yãꞌjçxa jxuka Kristoçxaçxáꞌs nwẽeseꞌjwaꞌjaꞌ, açaꞌ txãꞌwẽ yũuwaꞌj en ãhteꞌ, jxuka kxtey yuuna.
11 Dxus jĩi yuꞌsaꞌ jxuka jxpaꞌgawaꞌjaꞌs Dxusaꞌ nyafxiitey neꞌ pheuꞌjçxa nvxiht Kristo nweꞌwenisaweꞌsx jĩi. Naa paꞌga Kristo nweꞌwenisaꞌ jxpaꞌgawaꞌjsathaꞌw Dxus pheuꞌjçxa nvxiitni yuꞌ jxuka.
12 Kweꞌsx txãꞌwẽ yũuwaꞌjaꞌsku Dxusaꞌ pheuꞌjçxa nvxiht, Kristoꞌs nyafxte neeweꞌwesa kweꞌsx txãꞌwẽ Dxus ew yũupaꞌga weçxaakahn.
13 Açaꞌ iꞌkweꞌsxwa txãꞌwẽy Dxus yuwe ewte nvxiitwaꞌjsaꞌs wẽseꞌjçxa Kristo yakh fxiꞌzeyaꞌ utxaaçpkaçxhaꞌ, Dxus ũsni txajx Espirituꞌ iꞌkweꞌsx ũuste khẽek, Dxus kuseju peena yuꞌ txutekahmen.
14 Açaꞌ Dxus Espirituꞌs ũuste jiꞌphsaꞌ nmeh enteꞌ txajx nasatx jxukate nweꞌwena jxãꞌjnijũꞌ Dxus jĩi yuꞌsaꞌ kĩhnawa jxuka jxpaꞌgawaꞌjsaçxa txãꞌwẽ txajx Espirituꞌs jiꞌphsa yaꞌyuuna. Txãa paꞌga Dxus txakwe wala ew yũusaꞌs weçxawaꞌjaꞌ.
Dxus yakh jweeíiçxáa ew fxiꞌzewaꞌjaꞌs kaajiyuꞌkhan pẽyni
15 Txãa paꞌgath adxaꞌ txãꞌwẽ iꞌkweꞌsxaꞌ Kristo Jesus yakh jxpubameetx fxiꞌzeꞌ, saꞌ Dxus luuçx jxukaysaweꞌsxtxi peeygãjaꞌtx jĩniꞌs jiyuçxaꞌ,
16 bagaçxtewa Dxus yakh puutx weꞌwena weçxana nes yuꞌ.
17 Saꞌ kweꞌsxtxi nweꞌwesa Jesukristo Tata cieluteweꞌsxaꞌs pẽyiꞌth, txãa yakh jweeíiçxáa ew fxiꞌzewaꞌjaꞌs kaajiyuꞌkhan,
18 kxah iꞌkweꞌsxtxi kĩjxaꞌ nweꞌweçxawa ew kaajiyuꞌjuna. Saꞌ cielute Dxus jĩꞌs kĩhnawa jxuka jxpaꞌgawaꞌj jiꞌpthaꞌw txãꞌ seenaꞌ yuh wala zhiçxkwesaꞌ txãꞌsnawa jiyuneꞌkwe.
19 Saꞌ Dxus ãjanisa kweꞌsx ũustxi yuꞌpthehsaꞌ seenaꞌ yuh walasaꞌ txãꞌsnawa jiyuneꞌkwe.
20 Dxusaꞌ txãa ãjanisa yakh íiçxáak Kristoꞌs uuniijũwa kiꞌ ĩtxi vxitçxa cielute txajx pukate kaykaçxiꞌj.
21 Saꞌ Kristoꞌs cielute txajx pukate kaykaçxiꞌjçxak naa kiwete vxiteꞌ cielute maa maatewa jxthaakwe walasa vxitçxa jxkaahwaꞌjaꞌs ũs, naa ente maꞌk yuu meeçxaꞌ vxite ente maꞌk yuu nawa maatewa Kristoçxaçxáa jxthaakwe walasa yuukahn.
22 Dxusaꞌ txãꞌwẽ yũuçxak kĩjkĩhwa Kristoçxaçxáꞌs nwẽeseꞌjwaꞌjaꞌs vxitçxa txajx luuçx yuutxiꞌs Kristo yakh ih fxiꞌzewaꞌjsa vxit, txãaweꞌsx yuuçxáa maatewa puutejka wedxnisa txajx jxpeꞌjni yuukahn.
23 Txãa paꞌga Kristo jxpeꞌjnisaꞌ txãa yakh teeçxçxáa yuuna paꞌjçxa, txãa naꞌwẽysa íiçxáataꞌ, kĩh yuhwa jwee yuꞌ peejxmeesa.
