Efxesios 2:1-22
2 Dxusaꞌ Kristoꞌswa maꞌwẽga ĩtxi vxit, txãꞌwẽyku iꞌkweꞌsxtxiwa ĩtxi vxit. Txãꞌwẽmeꞌ, nyafxiiaꞌ iꞌkweꞌsxaꞌ pkalpaꞌga Dxus dxiꞌpte uuníi naꞌwẽ yãꞌjiꞌkwe ũs yuꞌ.
2 Txãasaiꞌkwe txagaçxtey yuꞌ eçxthẽꞌj naa kiwete jxkaahni yuuçxáꞌs nwẽeseꞌjna ũsuꞌ. Dxusaꞌs nwẽeseꞌjyaꞌ waꞌlsa yuutxiꞌs eçxthẽꞌjaꞌ jweeíiçxáak kwaꞌluꞌjuꞌ, açaꞌ txãꞌsnaiꞌkwe nwẽeseꞌjsa yuꞌ.
3 Iꞌkweꞌsxçxáamée, kweꞌsxwa nyafxiiaꞌ txãꞌwẽçxaçxáathaꞌw fxiꞌzesa yuꞌ jxukaysa, ewmée yaakxniçxáꞌs jxuka kxtey yuuna. Txãa paꞌga Dxus kastigo seenaꞌsaꞌs jxpaꞌgawaꞌjsathaꞌw yuꞌ maawa jxukaysa.
4 Nawa txãꞌwẽ pkalpaꞌga Dxus dxiꞌpte uuníi naꞌwẽ yãꞌj ũstewa, Dxusaꞌ kweꞌsxtxi iiméh wala ew yũuk peeygãhçxa.
5 Txãasak Kristoꞌswa maꞌwẽga uuniijũwa ĩtxi vxit, txãꞌwẽy kweꞌsxtxiwa ĩtxi vxit. Kĩhte yuhwa seelpimeesaçxawa, Dxus peeygãapaꞌga yuuçxáaiꞌkwe nweꞌwenisa yuu.
6 Dxusaꞌ Kristoꞌswa maꞌwẽga uuniijũwa ĩtxi vxit, txãꞌwẽy kweꞌsxtxiwa ĩtxi vxitçxak cielute Kristo yakh kaykaçxiꞌj.
7 Nawa kweꞌsxtxi txajx peeygãani txakwe seenaꞌ walasaꞌs naa eꞌsuꞌ ãate kaavxyaꞌjaꞌjyaꞌk txãꞌwẽ yũu kweꞌsx txakwe wala ãhmeekwetewa, naasáa Kristo paꞌga yuuçxáa.
8 Txãa paꞌga iꞌkweꞌsxaꞌ kĩhte yuhwa seelpimeesaçxawa, naasáa Dxus peeygãhçxa nweꞌwenisaçxáa iꞌkwe, txãꞌwẽ Kristoꞌs ũusuh jxuka yaakxpaꞌga. Dxus nweꞌweniꞌs iꞌkweꞌsx kakweju ew yũuna fxiꞌzeçxa uymeeiꞌkwe, txãꞌsaꞌ Dxusku pees peeygãhçxa.
9 Dxus nweꞌweniꞌs kakweju ew yũuna fxiꞌzeçxa yaꞌjypaꞌgaꞌçmeꞌ naa paꞌga maa yuhwa iiwejçx yaakxwaꞌj jiꞌphmeetaꞌ.
10 Txãa paꞌgatey kweꞌsx uꞌse yuꞌpthehwaꞌjaꞌs Dxus pheuꞌjçxa nvxiitnisathaꞌw, ewçxáa yũuna Kristo Jesus jxpeꞌjni fxiꞌzewaꞌjsa. Txãꞌwẽ yũuna fxiꞌzewaꞌjaꞌs Dxusaꞌ nyafxiiteyku pheuꞌjçxa nvxiht, txãꞌwẽ yuuçxáa yũuna fxiꞌzekahn.
Dxus tasxte paꞌjwaꞌjaꞌs jiꞌphuni
11 Iꞌkweꞌsxaꞌ nyafxiiaꞌ maꞌwẽsakwe yuꞌ txãꞌsna miiyajkxwe: iꞌkweꞌsxaꞌ judiu jiꞌjmeeiꞌkwe yuꞌ, açaꞌ judiuweꞌsxaꞌ iꞌkweꞌsxtxiꞌs Dxus txhitxnimeesataꞌ jĩnatx weꞌweꞌ.
12 Saꞌ txãa ensuꞌ judiuweꞌsx yakhmée fxiꞌzesa iꞌkwe yuꞌ, Kristoꞌs ũuste jiꞌphmeesa. Saꞌ iꞌkweꞌsxaꞌ Dxus puꞌçxwaꞌjaꞌswa jiꞌphmeesa iꞌkwe yuꞌ. Txãa paꞌga iꞌkwe bagaçxte yuhwa Dxus tasxte paꞌjwaꞌj yuꞌsaꞌ jiꞌphmeesa yuꞌ.
13 Makwe nyafxíi yuꞌ Dxus tasxte paꞌjwaꞌjaꞌs jiꞌphmeesaçxawa, ãçxhaꞌ Kristo Jesusaꞌs nwẽeseꞌjyaꞌ utxaapaꞌga, Dxus tasxte paꞌjwaꞌjaꞌs uyiꞌkwe, Kristoꞌ iꞌkweꞌsxtxi nweꞌweyaꞌ kluuste uupaꞌga.
14 Kristoꞌ txãꞌwẽ yũuçxak judiuweꞌsx judiu jiꞌjmeesatx ahçena fxiꞌzeniꞌs ivxiituçxa eꞌzsatx teeçx jwedçxáa vxitna paꞌj.
15 Saꞌ Moises leyaꞌswa kaapçuꞌjuꞌk, Kristo tasxteçxaçxáa utxaaçxa eꞌzsa puutx yahçemée kxteeçxah ih fxiꞌzekahn.
16 Kristoꞌ kluuste uuçxak eꞌzsatx kxteeçxah ih fxiꞌzewaꞌjaꞌs vxitçxa, Dxus yakh yuuwemeesa vxit.
17 Kristoꞌ kĩhçxaꞌ eꞌzíi Dxus yakh yuuwemée neeyũuwaꞌjaꞌs ptaꞌsxku, iꞌkweꞌsx Dxus tasxte paꞌjwaꞌjaꞌs jiꞌphmeesatxwa ptaꞌsxku, saꞌ judiuweꞌsx Dxus tasxte fxiꞌzesatxwa ptaꞌsxku.
18 Txãa paꞌga ãçxhaꞌ judiumthaꞌw yuu meeçxaꞌ judiumeemthaꞌw yuu nawa Dxus Espirituꞌs jxpaꞌgaçxa eꞌzíi Dxus tasxte paꞌjwaꞌjaꞌs jiꞌpthaꞌw.
19 Ãçxhaꞌ iꞌkweꞌsxaꞌ nasa ekajuweꞌsx meeiꞌkwe, Dxus luuçx yakh kxteeçxah utxaaçxa teeçx yatteweꞌsxçxáa iꞌkwe yuuna paꞌj jxukaysa txãa naꞌwẽsaçxaçxáa.
20 Txãꞌwẽ kxteeçxah utxaapaꞌga ew jiyute yuꞌ iꞌkweꞌsxaꞌ yat naꞌwẽsa iꞌkwe: yataꞌs nyafxteꞌ kwet yakhku yaꞌkaaçxidaꞌjaꞌ, açaꞌ txãa kaaçxidaꞌjnisa yuꞌ Jesukristoꞌ. Txãꞌwẽ yuuna mjĩiyaꞌ takhsaꞌ Dxusna selpisaaweꞌsx vxiteꞌ Jesus jxkaahnisaweꞌsxtxi yuꞌ.
21 Açaꞌ iꞌkweꞌsxaꞌ txãaweꞌsx kaaçxidaꞌjna takhni kajkwete yataꞌs ew pheuꞌjna umna uꞌjnisaiꞌkwe, teeçx yatçxáa yuuna kãhçxa Dxus yuuçxáꞌs selpiwaꞌjsa.
22 Txãa paꞌga iꞌkweꞌsxaꞌ Jesukristo yakh utxaaçxaꞌ, Dxus txhitxhnisa maa yakhwa kxteeçxah utxasáa iꞌkwe yuu, teeçx yatçxáa yuuna, txãa yatte Dxus ũswaꞌj yuuyaꞌ.
