Efxesios 3:1-21
3 Txãꞌwẽ adxaꞌ Jesukristo kaapiyaꞌjniꞌs ptaꞌsxpaꞌga iꞌkweꞌsx judiu jiꞌjmeeçxawa Dxus yakh fxiꞌzewaꞌjaꞌs jiꞌphupaꞌga, preesu ũsçxawa, Dxus yakh puutx weꞌweꞌth.
2 Iꞌkweꞌsxaꞌ jiiyãꞌjneꞌkwe Dxusaꞌ iꞌkweꞌsxtxi peeygãhçxa adxnak neeweꞌwe iꞌkweꞌsxtxi kaapiyaꞌkhan.
3 Saꞌ iꞌkweꞌsxaꞌ judiuweꞌsx yakh utxaawaꞌjaꞌs kim yuhwa jiimeeneꞌta yuꞌ txãꞌsnak Dxusaꞌ adxaꞌs kaajiyuꞌj. Açaꞌ txãꞌsaꞌ iꞌkweꞌsxtxi nyafxíi ptaꞌsxna fxiꞌth walameekuẽ.
4 Txãꞌsaꞌ lẽeyçxaꞌ jiyuneꞌkwe kweꞌsxaꞌ judiuweꞌsx yakh utxaayaꞌ ãjawaꞌjaꞌsneꞌ Dxusaꞌ Pabloꞌs kaajiyuꞌj sũhna.
5 Txãꞌsnak nyafxíi enteyaꞌ kim yuhtxwa kaajiyuꞌjnimée ũsuꞌ, nawa ãçxhaꞌ Jesus jxkaahnisaweꞌsx vxiteꞌ Dxusna selpisaaweꞌsxtxi Dxusaꞌ kaajiyuꞌkh txajx Espiritu kaaũusutheꞌthe.
6 Txãꞌ naꞌwẽꞌ: Makwe judiu jiꞌjmeeçxawa Kristo nweꞌweniꞌs nwẽeseꞌphaꞌga yuuçxáa eꞌzíi kxteeçxah utxaaçxa teeçxçxáa yuuna paꞌjçxa, judiuweꞌsx yakh jaꞌda Dxus tasxte ũswaꞌjaꞌs jiꞌphutx, saꞌ Dxus ũsni Kristo jĩꞌs íiçxáa jxuka jxpaꞌgawaꞌjsataꞌ. Txãꞌwẽk kaajiyuꞌj.
7 Txãꞌwẽ yũuniꞌs ptaꞌsxwaꞌjsak Dxusaꞌ adxaꞌs nvxiht, txakwe wala ãhmeekwesatewa txãaíi adxaꞌs puꞌçxçxa.
8 Adxaꞌ Dxus yakh fxiꞌzesa maatewa jxthaakwe ãhmeekwesath. Nawa Dxusaꞌ adxaꞌsku nvxiht, Kristo nweꞌwenisa yuuçxáa kĩhtewa thaakwe ewsaꞌ txãꞌsna judiu jiꞌjmée vxite nasatx ptaꞌsxkahn.
9 Txãꞌwẽ kĩhnawa jxuka pheuꞌjsa Dxusaꞌ judiu jiꞌjmeetxwa nweꞌweçxa judiuweꞌsx yakh kxteeçxah yuutxayaꞌ ãjawaꞌjaꞌs txãniiteyku pheuꞌjçxa jiꞌphuꞌ kim yuhtxwa kaajiyuꞌjnimée txãꞌsna ãate ptaꞌsxwaꞌjsath nvxiitni yuu maatxwa jxukaysatx.
10 Dxusaꞌ maꞌwẽ yũuçxa nasa maꞌwẽsatxwa jxuka nweꞌweçxa kxteeçxah teeçxçxáa vxitna paꞌjniꞌs kaajiyuꞌjnik yuu, açaꞌ Dxus txãꞌwẽ yũuniꞌs ãçxhaꞌ Dxus yakh fxiꞌzesaweꞌsxaꞌ, ẽe walateweꞌsx, angeles maꞌwẽsawa jxuka jiyutxna.
11 Dxusaꞌ txãꞌwẽneꞌ nasatx nweꞌwewaꞌjaꞌs txãniitey pheuꞌjçxa jiꞌphuꞌ naa kiwe meetey txãꞌsaꞌ kxtey yuuk, Jesukristoꞌs naa kiwete kaahçxa.
12 Txãꞌwẽ Kristo nweꞌwepaꞌga ãçxhaꞌ Dxus tasxte ũukhmée paꞌjyaꞌ ãjathaꞌw, txãꞌwẽ ũukhmée utxaawaꞌjaꞌs Kristo íik kaaũusutheꞌjeꞌ naa paꞌga.
13 Txãa paꞌga adx iꞌkweꞌsx paꞌgate pxthaa yuuniꞌs nxusna yajkxmée, wejxwa Dxusaꞌsçxáa weçxana meswe.
Kristo peeygãani iiméh seenaꞌ walasa
14 Txãꞌwẽ Jesukristo Tataꞌ nweꞌwewaꞌjaꞌs pheuꞌjçxa kxtey yuupaꞌgath adxaꞌ txãꞌsaꞌ peejxũkweçxa weçxana neeweꞌweꞌ,
15 txãꞌsaꞌ maawa jxukatx Tata jĩna kxsusuꞌ Dxus luuçx naa kiweteweꞌsx maꞌtx yuu, cieluteweꞌsx maꞌtx yuu nawa jxukaysa.
16 Açaꞌ adxaꞌ Tataꞌs pẽyiꞌth, Dxus Espiritu iꞌkweꞌsxtxi puꞌçxna kĩhte yuhwa peejxmée çxhãçxha kaafxiꞌzeꞌkhan,
17 kxah iꞌkweꞌsx ũusuh jxuka yajkxteꞌ, Kristoꞌ iꞌkweꞌsx ũuste nes yuuna. Txãꞌwẽ yũuteꞌ, iꞌkweꞌsxaꞌ jxpubamée peeygãawaꞌjçxáꞌs wala jiꞌphuçxa
18 Dxus luuçx jxukaysa jiyuyaꞌ ãjaneꞌkwe, Kristo peeygãhçxa nweꞌwenisa iiméh seenaꞌ walasaꞌswa.
19 Txãa peeygãaniꞌ iiméh seenaꞌ walasaꞌ açaꞌ ¿kimçxaꞌ jiyuyaꞌ ãjamaꞌtx? Txãꞌwẽtewa iꞌkweꞌsx jiyukahn Dxusaꞌs pẽyiꞌth, kxah Dxusaꞌs ũusuh jxuka jiyuçxa txãa yakh yuuçxáa fxiꞌzeneꞌkwe.
20 Dxusaꞌs seenaꞌ yuh wala weçxaawaꞌjaꞌ. Txãꞌ kĩhtewa jxuka puꞌçxyaꞌ ãjawaꞌjsaꞌ, kweꞌsx makwe pẽjxtewa txãate jxthaakwe wala bagaçxtewa puꞌçxna nes yuuwaꞌjsaꞌ.
21 Txãa paꞌga Kristo nweꞌwenisa yãꞌj yuꞌ, Dxusaꞌs bagaçxtewa weçxana nes yuuwaꞌjaꞌ Kristo nweꞌwepaꞌga.
