Efxesios 4:1-32
4 Kristoꞌs selpiipaꞌga adxaꞌ preesu ũsthu, nawa iꞌkweꞌsxtxi neeweꞌweꞌth: maꞌwẽ fxiꞌzekahn neꞌ Dxusaꞌ iꞌkweꞌsxtxi txhitxh txãꞌsaꞌ kxtey yuuna meswe.
2 Dxus yakh fxiꞌzesayãꞌjaꞌ maa yuhwa iiwejçx yajkxmée wejxwa puutx yaꞌpeeygãhna ewçxáa yũuna mfxiꞌzewe.
3 Iꞌkweꞌsxaꞌ puutx ũusçxa yajkxna fxiꞌzemée, wejxwa kxteeçxah txutemée fxiꞌzewaꞌjçxáꞌs mpaꞌpçxuwe, Dxus Espirituꞌ kxteeçxah yuutxa yãꞌkh naa paꞌga.
4 Txãasa Kristo nweꞌwenisa yãꞌj yuꞌ, maꞌwẽsaçxawa kxteeçxah teeçxçxáak yuuna paꞌjaꞌ, saꞌ kxazíi Dxus Espiritu teeçxsaçxáꞌstxi jxukaysa jxpaꞌgaꞌ, saꞌ kxazíi teeçx ahte Dxus tasxteçxaçxáa paꞌjwaꞌjaꞌsku yaꞌũythasuꞌ,
5 txãa paꞌgatey jxukaysatx nweꞌwesaꞌ teeçxçxáꞌ, açaꞌ txãꞌsçxáanak jxukaysa yaꞌnwẽeseꞌjeꞌ. Saꞌ jxukaysa txãꞌsçxaçxáanak yajkxna bautismoꞌs yaꞌjypaꞌgaꞌ.
6 Saꞌ teeçx Dxusçxáa ũsaꞌ jxukaysate Tata txãꞌ maatewa puutejka walasaꞌ jxukaysatx jxkaahsa, saꞌ jxukaysa yakh ũsaꞌ.
7 Saꞌ teeçxçxáa vxitna paꞌjçxawa, Dxusna selpiiyaꞌ ãjawaꞌj yuꞌsaꞌ fxiyfxiyçxajk Kristoꞌ ũs teeçxsa naꞌwẽçxah.
8 Txãꞌwẽ yũuwaꞌjaꞌs weꞌweçxak Dxus librute naꞌjĩna fxiꞌjni yuu:
Ewmeesa kusejũ nweꞌweçxa cielun peꞌjna uꞌkh,
Saꞌ naa kiwete nasatxiꞌs ãjawaꞌjaꞌs ũsku jĩꞌk.
9 ¿Maꞌwẽçxaga txãꞌwẽ cielute tejkak jĩna weꞌwéꞌ? Kristoꞌ nyafxteꞌ uusaaweꞌsx ũsnite khuẽꞌy khẽeçxa txãajũk kiꞌ cielute tejka jĩçxak txãꞌjĩꞌ.
10 Txãꞌwẽ uusaaweꞌsx ũsnite khuẽꞌy khẽesa íiçxáak cielute iiméh ẽe walate kãhpkaçx tejka, mteewa txãaçxaçxáa jxuka thegna ũsyaꞌ ãjayaꞌ.
11 Txãꞌwẽ yũuçxak Dxusna selpiiyaꞌ fxiyfxiyçxah ãjawaꞌjaꞌs ũs jxukaysatx teeçxsa naꞌwẽçxah: maaíitxiꞌs txajx yuweꞌs nyafxte ptaꞌsxwaꞌjsak nvxiht; vxitetxiꞌs Dxus maꞌwẽ yũuyaꞌwatewa dxiikhẽy ptaꞌsxwaꞌjsak nvxiht; vxitetxiꞌs Dxus yuwe ptaꞌsxwaꞌjsak nvxiht; vxitetxiꞌs Dxus yuweꞌs kaapiyaꞌjna jxpeꞌjwaꞌjsak nvxiht.
12 Txajx nasatxiꞌ txãꞌwẽk mjĩiwaꞌjsa pheuꞌjçxa nvxiht, txãꞌwẽ Kristo nweꞌwenisa yuutxiꞌ jweeíiçxáa kxteeçxah çxhãçxha fxiꞌzewaꞌjaꞌs kaapiyaꞌkhanku txãꞌwẽ yũu.
13 Kxah jxukaysa Dxus Nçxiꞌkaꞌsçxaçxáa nwẽeseꞌjçxa txãꞌsaꞌ ew jiyuna jxãꞌjçxa kĩhte yuhwa jxpubamée ew fxiꞌzekahnku txãꞌwẽ kaapiyaꞌjçxa nvxiht.
14 Txajũ yũuçxaꞌ luuçx naꞌwẽ yuumeꞌnjaꞌw. Txãꞌwẽmeꞌ nasa ewmée yajkxçxa ĩsxiina ptaꞌsxnite thẽyméek wetena paꞌjçxa kxte jxpubana yaꞌfxiꞌzeꞌ.
15 Txãꞌwẽ jxpubamée, wejxwa isasaçxáꞌs weꞌwena peeygãawaꞌj yuuçxáꞌs yajkxçxa Kristo yakh jweeíiçxáa çxhãçxha fxiꞌzena uꞌjwaꞌj jiꞌpthaꞌw.
16 Açaꞌ maawa Kristo tasxte utxaaçxa jxukaysa kxteeçxah pkhaakheçxa puutx yaꞌkaapiyaꞌjna ew yũuna fxiꞌzeteꞌ, thẽyméek peeygãhna fxiꞌzewaꞌjaꞌ walaana uꞌjweꞌ.
Ewmée yaakxniꞌs jxuka yuꞌpthehni
17 Txãꞌwẽꞌ açaꞌ kxahth iꞌkweꞌsxtxi neeweꞌweꞌ, vxite nasa Dxusna jiimeesa naꞌwẽ fxiꞌzeweꞌsxte. Txãaweꞌsxaꞌ peekx ũus yaakxni seelpiwaꞌjmeesaçxáꞌstxi kxtey yuuna fxiꞌzeꞌ.
18 Txãꞌwẽ Dxusaꞌs jxpaꞌgayaꞌ waꞌlpaꞌga Dxus yakhmée ũsçxa ew eenaꞌ yaakxwaꞌj yuꞌsaꞌ jiꞌphmeetaꞌ.
19 Txãasatx txãaweꞌsxaꞌ thaame ũus yuꞌsaꞌ jiꞌphmée, pkal seenaꞌ kazxsateçxáa fxiꞌzeꞌ.
20 Nawa iꞌkweꞌsxtxiꞌ Kristoꞌ txãꞌwẽ fxiꞌze kaahmeꞌ.
21 Txãꞌsaꞌ iꞌkweꞌsxaꞌ peekx jiineꞌkwe Jesus kaapiyaꞌjni isasaꞌs wẽseꞌjsa dxihçxaꞌ,
22 nyafxíi ũus yaakxni ewmeeteçxáa kaafxiꞌzeꞌjsaꞌs nwẽeseꞌjmée jxuka nvxihtçxa,
23 ew ũus yaakxwaꞌjaꞌs kaapiyaꞌjni yakh mphuꞌseꞌjwe.
24 Kxah iꞌkweꞌsx ũuste ewsa yuuçxáa yuꞌpthehni yuuteꞌ, Dxus maꞌwẽneꞌ jxthãasuꞌ txãa yuuçxáana ãate kaavxyaꞌjaꞌjna fxiꞌzeneꞌkwe, Dxus dxiꞌpte kĩh pkal yuhwa jiꞌphmée.
25 Txãasa ãçxhaꞌ peena yuꞌ ĩsxiina fxiꞌzemée, wejxwa teeçxsa naꞌwẽçxah isasaçxáꞌs mweꞌwewe maa yakhwa, txãa paꞌgatey jxukaysa kxteeçxah teeçx jwedçxáa yuuna paꞌjsathaꞌw txãa jiꞌjçxaçxáateweꞌsx.
26 Mpaꞌyajkxwe, ũusçxani yakhçxáa yuꞌ fxiꞌzewaꞌjmeꞌ, ewmeete weteyaꞌmée. Txãa entey yaꞌmpeltunaĩwe.
27 Eçxthẽꞌjaꞌs weh yuhwa kaꞌgaꞌjnuwe.
28 Pesweesawa Dxusna jiyunijũyãꞌjaꞌ, pesweewaꞌjmeꞌ, wejxwa pesweemée kuseju mjĩiçxa vxite peejiina fxiꞌzesatxwa puꞌçxna fxiꞌzewaꞌjaꞌ.
29 Saꞌ kazx weꞌwenisa yuꞌ teeçx yuweçxáa yuhwa iꞌkweꞌsx yuweju kasehwaꞌjsameꞌ, wejxwa Dxus yakh fxiꞌzewaꞌj selpiwaꞌjsaçxáꞌs weꞌwewaꞌjaꞌ, kxah vxitesawa Dxus yakh fxiꞌzewaꞌjçxáꞌs piyaatxna.
30 Saꞌ Dxus Espirituꞌswa kxũusuꞌjnuwe, txãa paꞌgatey Dxus Espiritu íiçxáak iꞌkweꞌsxtxiꞌs Dxus jĩi vxitna paꞌjçxa nvxiht, Dxus tasxna uꞌjwaꞌj en ãhteweꞌsx.
31 Saꞌ ewmée yajkxna, ahçena, pxũuskwe yuute juunaꞌ weꞌwena, ũusaçxana maꞌwẽwa wẽesxuna fxiꞌzenijũ jxuka mtxuteewe.
32 Wejxwa puutx ewçxáa yũuna, teeçxsa naꞌwẽçxah puutx peeygãhna, puutx yaꞌpeltunãyna mfxiꞌzewe, Kristo kweꞌsxtxi nweꞌwete Dxuswa maꞌwẽga kweꞌsxtxi peltunãy txãꞌwẽy.
