Efxesios 5:1-33
5 Iꞌkweꞌsxaꞌ Dxus luuçx yãꞌjiꞌkwe naꞌ txãa naꞌwẽy fxiꞌzeyaꞌ mpaꞌpçxuwe.
2 Puutx yaꞌpeeygãhna mfxiꞌzewe, txãꞌwẽ yũukahníiçxáak Kristowa kweꞌsxtxi peeygãhçxa Dxus dxiꞌpte peekíi yaꞌdukhçxa piisxakuẽ naꞌwẽ ikhni yuu.
3 Txãa paꞌga iꞌkweꞌsxaꞌ Dxus jĩiyãꞌjçxaꞌ, ptamsa maꞌtx yuu meeçxaꞌ ptamsamée maꞌtx yuu nawa kazx yuuna fxiꞌzeniꞌs jxuka nvxihtçxa ũusteçxáa yuhwa yaakxwaꞌj jiꞌphmeeiꞌkwe. Saꞌ Dxus yuꞌs yajkxmée jiꞌphu wẽeniçxáꞌs yaakxwaꞌj jiꞌphmeeiꞌkwe. Kĩhwa kazxsa yuꞌsaꞌ kxsuswaꞌjçxáa yuhwa jiꞌphmeeiꞌkwe.
4 Thaampaꞌ yũuni kĩh yuhwa seelpimeesa yuꞌsaꞌ txãꞌwẽ weꞌwena fxiꞌzewaꞌjmeꞌ, wejxwa Dxusaꞌsçxáa weçxana fxiꞌzewaꞌjaꞌ.
5 Iꞌkweꞌsxaꞌ jii yãꞌjiꞌkwe: Dxus yuꞌsaꞌ yajkxmée jiꞌphu wẽeniçxáꞌs yajkxna fxiꞌzesa (txãꞌwẽ jiꞌphu wẽeniçxáꞌs yajkxteꞌ, txãꞌsçxáanak dxus naꞌwẽ yaakxwaꞌj kasejeꞌ), kazx pkal yũuna fxiꞌzesa, kĩhwa kazxsaçxáꞌs kxtey yuuna fxiꞌzesa, txãꞌwẽ yũusaꞌ Dxus Kristo yakh jxkaahna ũsnite uꞌkayaꞌ ãjameetxna.
6 Txãa paꞌga txãꞌwẽ pkal kazxsate fxiꞌzewaꞌjaꞌs kaapiyaꞌjniꞌs mpaꞌyajkxwe. Txãꞌwẽmeꞌ txãa paꞌgaíiçxáa Dxus kastigo seenaꞌsa yujaꞌ Dxus jxkaahniꞌs nwẽeseꞌjmée fxiꞌzesaweꞌsx jĩi.
7 Txãaweꞌsx yakh jaꞌda ewmée yũuna fxiꞌzenuwe.
8 Nyafxiiaꞌ iꞌkweꞌsxaꞌ jxpubana ũsçxaꞌ, çxhiꞌdxte naꞌwẽiꞌkwe fxiꞌzesa yuꞌ. Nawa ãçxhaꞌ Kristoꞌs ũuste jxpaꞌganijũꞌ eenaꞌte ũsiꞌkwe. Txãa paꞌga peena yuꞌ jxpubamée eenaꞌteçxáa mfxiꞌzewe Kristo nweꞌwenijũyãꞌjaꞌ.
9 Eenaꞌte fxiꞌzeççxaꞌ, puutx peeygãhna isasaçxáꞌs weꞌwena fxiꞌzewaꞌjaꞌ, Dxus dxiꞌpte jxpubamée.
10 Naasáa Kristo jxthãasniçxáꞌs kxtey yuuyaꞌ mpaꞌpçxuwe.
11 Jxpubana çxhiꞌdxte ũssa yakh jaꞌda ewmée yũuna fxiꞌzenuwe, wejx yuuwa txãꞌwẽ yũusatxiꞌ mkaapiyaꞌjwe ewmée yũukahmen.
12 Txãꞌwẽmeꞌ, paaçte txãaweꞌsx ewmée yũuna fxiꞌzeniꞌs ãate weꞌwewẽete thaame yujaꞌ.
13 Nawa txãaweꞌsx ewmée kazx yũuna fxiꞌzeniꞌs thaamemée ãate weꞌwewaꞌjaꞌ, kxah kĩh yuhwa paaçtemée jxuka ãateçxaçxáa kaavxyaꞌjaꞌjni yuuna.
14 Txãꞌsna weꞌweçxak naꞌjĩꞌ:
Jxpaꞌyakxmeeg fxiꞌzeꞌ, miiyajkx.
Saꞌ pkalte uuníi naꞌwẽ fxiꞌzenijũ mkaaseh,
Açaꞌ Kristoꞌ eenaꞌte kaafxiꞌzeꞌjena jĩꞌk.
15 Txãa paꞌga wala jxpaꞌyajkx fxiꞌzewaꞌjçxáꞌs dud mpaꞌpçxuwe, jiimeesa naꞌwẽ jxpaꞌyajkxmée yuꞌ fxiꞌzenuwe.
16 Txãꞌwẽmeꞌ naa ensuꞌ nxuswaꞌj ençxáa kasejeçaꞌ, naa paꞌga en ewsatxiꞌ ivxiitunuwe.
17 Iꞌkweꞌsxaꞌ jxpaꞌyajkxmée yuꞌ fxiꞌzemée, ewsaꞌs jiyuwaꞌjaꞌs mpaꞌpçxuwe, Kristo jxthãasniçxáꞌs ew jiyuyaꞌ.
18 Txãasa tũuna fxiꞌzenuwe. Txãꞌwẽmeꞌ, tũunisaꞌ vxituwaꞌthe peꞌjna uꞌjsaꞌ. Açaꞌ txãꞌwẽ yũumée wejxwa Dxus Espirituçxáꞌs ũuste jxuka jxpaꞌgaçxa,
19 iꞌkweꞌsx pweꞌsx jxukaysa Dxusaꞌsçxáa ũusuh jxuka yajkxna weçxana memna meswe.
20 Makwe wala thẽysa vxyaatewa, txãatxiꞌs nxusmée bagaçxtewa Dxusçxáana weçxana meswe, Jesukristoꞌs piꞌkxçxa.
Jxukaysa puutx yaꞌnwẽeseꞌjna fxiꞌzeni
21 Ãçxhaꞌ iꞌkweꞌsx pweꞌsx jxukaysa puutx yaꞌnwẽeseꞌjna mfxiꞌzewe, Dxusaꞌs yajkxna.
22 Nyuuaꞌ nmiꞌaꞌs nwẽeseꞌjwaꞌj jiꞌphaꞌ, Kristoꞌ txãꞌwẽk jxkaajaꞌ naa paꞌga.
23 Txãa paꞌgatey nmiꞌ txãꞌwẽ nyuuaꞌs thegna jxpeꞌjwaꞌjsaꞌ, Kristowa maꞌwẽga txajx nweꞌwenisatxiꞌs thegna jxpeꞌjeꞌ txãꞌwẽy. Açaꞌ Kristoꞌ ĩꞌneeçxáa thegna jxpeꞌjmée, vxitukahmen nweꞌwesaꞌ.
24 Açaꞌ Kristo nweꞌwenisawa maꞌwẽta Kristoꞌs nwẽeseꞌjeꞌ, txãꞌwẽy nyuuweꞌsxwa nwẽeseꞌjwaꞌj jiꞌphtaꞌ txãaweꞌsx nmiꞌtx kĩhtewa jxuka.
25 Ãçxhaꞌ nmiꞌaꞌ nyuuaꞌs peeygãawaꞌj jiꞌphaꞌ, Kristowa maꞌwẽga txajx nweꞌwenisatx peeygãhçxa txãaweꞌsx paꞌgate kluuste uu txãꞌwẽy.
26 Kristoꞌ txãꞌwẽk yuu txajx nweꞌwenisa nasatx kĩh pkal yuhwa jiꞌphmée jxuka yaatena paꞌjçxa,
27 txajx tasxte iiméh zhiçxkwe pheuꞌjni txãa yuuçxáꞌs selpiwaꞌjsa vxit-yaꞌk txãꞌwẽ yũu.
28 Nmiꞌaꞌ txãꞌwẽ peekx nyuuaꞌs peeygãawaꞌj jiꞌphaꞌ peekx kakweꞌswa maꞌwẽga yaꞌpeeygãjaꞌ txãꞌwẽy, txãa paꞌgatey nyuuaꞌ peekx kakweíiçxáꞌ naa paꞌga.
29 Kim yuhwa peekx kakweꞌs açeꞌçmeꞌ, wejxwa wala ew jxpaꞌyakiꞌk. Açaꞌ Kristowa txãꞌwẽyku txajx nasatxiꞌ wala ew jxpaꞌyakxna jxpeꞌjeꞌ.
30 Txãa paꞌgatey txãa jĩi yãꞌthaꞌw, txajx tasxte txuteeyaꞌmée utxasáa.
31 Txãꞌwẽyku yaꞌyuꞌ, ptamusawa peekx neyweꞌsxtxi nvxihtçxa nyuu yuuwaꞌjsa yakh yaꞌutxaꞌk txuteeyaꞌmée, açaꞌ eꞌzçxawa teeçxçxáak yuuna paꞌjaꞌ.
32 Ptamuuçxa fxiꞌzenisaꞌ Kristo txajx nweꞌwenisa kxteeçxah utxaaçxa teeçxçxáa yuuna paꞌjwaꞌjaꞌs kaajiyuꞌjnisaꞌ, açaꞌ txãꞌwẽ teeçxçxáa yuuna paꞌjwaꞌjaꞌs kim yuhwa jiimeetx yuꞌ txãꞌsnath ptaꞌsxiꞌ.
33 Açaꞌ ptamsayãꞌjaꞌ, teeçxsa naꞌwẽçxah peekx nyuutx peeygãhna fxiꞌzewaꞌjaꞌ, iꞌkweꞌsx kakwetx maꞌwẽkwe peeygãjaꞌ txãꞌwẽy. Açaꞌ nyuuaꞌ peekx nmiꞌaꞌs nwẽeseꞌjna fxiꞌzewaꞌjaꞌ.
