Efxesios 6:1-24
6 Kristoꞌs jiiyãꞌjsaꞌ luuçxweꞌsx iꞌkweꞌsx neyweꞌsxtxi nwẽeseꞌjna mfxiꞌzewe, Kristoꞌ txãꞌwẽk jxkaajaꞌ naa paꞌga.
2 Txãꞌwẽ kxtey nwẽeseꞌjsatxiꞌs Dxusaꞌ wala txaçx kaafxiꞌzeꞌjyaꞌ neeyũuk txãꞌsaꞌ Moises leyte naꞌjĩna ptaꞌsxna fxiꞌjçxa nvxiitni ũsaꞌ: Peekx neyweꞌsxtxi nwẽeseꞌjçxaꞌ,
3 wala ew fxiꞌzeneꞌga naa kiwete wala txaçx jĩꞌk.
4 Neyweꞌsxwa iꞌkweꞌsx luuçxtxi zhiçxkwe ewçxáa miipeꞌjwe, Kristoꞌs jiyuwaꞌjaꞌsçxáa kaapiyaꞌjna.
5 Selpisaaweꞌsxwa naa kiwete iꞌkweꞌsx patronweꞌsxtxi waꞌlmée mwẽeseꞌjwe, Kristo yuꞌs nwẽeseꞌjeꞌç naꞌwẽ yajkxna.
6 Patronweꞌsx thegna ũsteçxáa txãꞌwẽ kxtey yuuwaꞌjmeꞌ, wejxwa Kristoꞌs nwẽeseꞌjeꞌç naꞌwẽ yajkxna kxtey yuuwaꞌjaꞌ, ũuste weçxana.
7 Iꞌkweꞌsx mjĩiaꞌs waꞌl yajkxmée Kristoꞌs selpiiçthu sũhna ew mjĩiwaꞌjaꞌ, nasatx selpiiçthu sũhmée.
8 Iꞌkweꞌsxaꞌ jiiyãꞌjiꞌkwe patron jiꞌphsa maꞌk yuu patron jiꞌphmeesa maꞌk yuu nawa txãꞌwẽ yũusatxiꞌ Dxus dewewaꞌjsaꞌ teeçxsa naꞌwẽçxah maꞌwẽ mjĩisatewa.
9 Patronweꞌsxwa iꞌkweꞌsxtxi selpisaatx juunaꞌ yũumée miipeꞌjwe, txãa paꞌgatey jii iꞌkwe selpisaaweꞌsx vxiteꞌ patronweꞌsxwa jxukaysa Kristo cielute ũssa teeçx yuuçxáana nwẽeseꞌjsaiꞌkwe. Txãa paꞌgatey Kristo dxiꞌpteꞌ maa yuhwa thaakwe walasa meetaꞌ.
Ewmeesaꞌs deewewaꞌjaꞌs jxpaꞌgani
10 Ãçxhaꞌ, yakhthẽꞌjweꞌsx, çxhãçxha mfxiꞌzewe Kristo yakh txutemée, açaꞌ txãꞌ puꞌçxna nes yuuna bagaçxtewa kçxhãaçxhaꞌjna.
11 Txãa paꞌgatey ewmeesa yakh puiiwaꞌjaꞌs Dxusaꞌ jxuka ũsku, açaꞌ txãa yakh puiiçxaꞌ, eçxthẽꞌj ewmée yũunite wetemeeneꞌkwe.
12 Txãꞌwẽmeꞌ, naa kiwete nasaa pweꞌsx yakh puiina ũsmeethaꞌw. Naa kiwete eçxthẽꞌj maꞌwẽ seenaꞌ ewmée kazx txãaçxaçxáa jxkaahna ũsna txãa yakh kweꞌsxaꞌ pdxiꞌpuçxa puiina ũsthaꞌw.
13 Txãa paꞌga ewmeesa yakh puiiwaꞌj Dxus ũsniꞌs jxuka mpaꞌgawe, ewmeesa yakh pdxiꞌpuçxa ũukhmée çxhãçxha deeweyaꞌ. Txãꞌwẽ yũuçxaꞌ, ewmeesa maꞌwẽsaꞌswa iꞌkweꞌsx yuh knayuuneꞌkwe.
14 Txãasa ãçxhaꞌ ũukhmée çxhãçxha meswe, Dxus yuwe isasaçxáꞌs ũuste ew yuꞌakhçxa kxtey nwẽeseꞌjna. Ew yũuwaꞌj yuuçxáꞌs ũuste jxuka mjiꞌphuwe.
15 Saꞌ Dxus yuwe ewte nvxiitwaꞌjsaꞌs mteewa ptaꞌsxyaꞌ uꞌjyaꞌçxáa meswe.
16 Açaꞌ Dxusaꞌ kĩhtewa jxuka puꞌçxhina sũhwaꞌj yuuçxáꞌsaꞌ weh yuhwa peçxkananuwe. Txãꞌwẽ yaakxni yakhaꞌ eçxthẽꞌj makwe seenaꞌ yuuçtewa, jxuka knayuuneꞌkwe.
17 Dxus nweꞌwenijũyãꞌjaꞌ txãajũ weh yuhwa txutenuwe, saꞌ Dxus Espiritu kaapiyaꞌjni Dxus yuweꞌswa weh yuhwa peçxkananuwe.
18 Txãꞌwẽçxáa yũumée, Dxus Espirituꞌs piꞌkxçxa Dxus yakh yuuçxáa bagaçxtewa puutx weꞌwena meswe, çxhãçxha fxiꞌzewaꞌjaꞌs pẽjxna. Saꞌ Dxus yakh puutx weꞌwewaꞌjaꞌs bagaçxte yuhwa peçxkanamée meswe, Dxus luuçx jxukaysa paꞌgatewa Dxusaꞌs mneeweꞌwewe.
19 Saꞌ adx paꞌgatewa Dxusaꞌs neeweꞌwena meswe, kxah Kristoꞌs maꞌwẽ ũuste jxpaꞌgawaꞌjaꞌs kim yuhwa jiyunimeesaꞌs sxiigmée ptaꞌsxyaꞌ ãjakahn.
20 Txãꞌsna ptaꞌsxwaꞌjsa íiçxáak Dxusaꞌ adxaꞌs nvxiht, açaꞌ txãa paꞌga íiçxáa ãçxhaꞌ preesu ũsthu. Açaꞌ iꞌkweꞌsxaꞌ Dxusaꞌs neeweꞌwena meswe, txajx yuweꞌs ũukhmée ptaꞌsxkahn.
Yuwe weçxaa kaahni
21 6:21-22 Kweꞌsx yakhthẽꞌj Tíkiko bagaçxtewa Dxus yakh txutemée ptaꞌsx puꞌçxsa txãꞌsaꞌ kajaçthu, adx maꞌwẽneꞌtka fxiꞌzeꞌ txãꞌsaꞌ jxuka ptaꞌsxkahn. Açaꞌ adx maꞌwẽ fxiꞌzena kĩhçxah yũuna ũstewa jiyuçxaꞌ, iꞌkweꞌsx maaíi yuꞌ nxusna ũsçxawa çxhãçxha yaakineꞌkwe.
22 —
23 Dxus kweꞌsx Tata vxiteꞌ kweꞌsxtxi nweꞌwesa Jesukristo txãaweꞌsxaꞌ iꞌkweꞌsxtxi puꞌçxhitxna, kĩhtewa ewçxáa puutx yaꞌpeeygãhna Dxusaꞌs yuuçxáa yajkxna fxiꞌzekahn.
24 Saꞌ maawa kweꞌsxtxi nweꞌwesa Jesukristoꞌs yaakxsa yuutxiꞌs Dxusaꞌ puꞌçxhina jxukaysatx.
