Fxilipenses 1:1-30
1 Jesukristoꞌs selpisáa Pablo vxiteꞌ Timoteo kweꞌsxthaꞌw naa kartaꞌs fxiꞌjçxa kajaꞌ Dxus luuçx Kristo Jesus yakh fxiꞌzesaweꞌsxtxi, Fxilipos çxhabte ũssa yakhthẽꞌjweꞌsx vxiteꞌ dxuus yatte jxkaahsaweꞌsx vxiteꞌ kxtee mjĩi puꞌçxsa jxukaysatx weçxana.
2 Iꞌkweꞌsxtxiꞌ Dxusaꞌ puꞌçxhina vxiteꞌ kweꞌsxtxi jxpeꞌjsa Jesukristowa, txãa paꞌga Dxus yakhçxáa mfxiꞌzewe.
Dxus yakh fxiꞌzesaweꞌsx paꞌgate Pablo Dxus yakh puutx weꞌweni
3 Bagaçxtewa iꞌkweꞌsxtxi yaakx iisath Dxusaꞌs weçxaꞌ.
4 Saꞌ iꞌkweꞌsx jxukaysa paꞌgate bagaçxtewa wala weçxana Dxus yakh puutx weꞌweꞌth.
5 Txãa paꞌgatey jaꞌdaçxah mjĩisathaꞌw Dxus yuweꞌs ptaꞌsxna nyafxiitey takhçxa ãçxpkaçx.
6 Açaꞌ naꞌwẽ iꞌkweꞌsx ew fxiꞌzewaꞌjaꞌs Dxusaꞌ iꞌkweꞌsxtxi puꞌçxyaꞌ takhku naꞌ Jesukristo naa kiwete sxawedna kĩhpkaçx puꞌçxna nes yuuna txãꞌwẽ yũuwaꞌjaꞌs ew jiith.
7 Adxaꞌ Dxus yuweꞌs ptaꞌsxpaꞌgaçxáa ãçxhaꞌ karcelte ũsthu. Nawa khuẽs tasxte paꞌyamaꞌtx pẽjxyaꞌ nawa Dxus yuwe ewsa yujaꞌ jĩna ptaꞌsxna nes yuꞌnja, txãꞌwẽy iꞌkweꞌsxwa tuutheꞌj puꞌçxna ũsiꞌkwe. Txãa paꞌga adxaꞌ iꞌkweꞌsxtxi iiméh wala peeygãhna jxukaysatx peçxkanamée yajkxna fxiꞌzeteꞌ, wala weçxa yujaꞌ.
8 Jesukristowa maꞌwẽga peeygãh txãꞌwẽy adxwa iꞌkweꞌsxtxi jxukaysatx iiméh wala peeygãaniꞌs Dxusaꞌ jiiaꞌ.
9 Txãasath iꞌkweꞌsx paꞌgate Dxus yakh puutx weꞌwena pẽyiꞌ peeygãawaꞌjaꞌs jweeíiçxáa wala jiꞌphuçxa maꞌwẽ fxiꞌzewaꞌjaꞌswa wala ew jii kĩhte yuhwa jxpubakahmén,
10 kxah maa ewsatewa jiyuçxa txãꞌsçxáa txhitxhçxa Dxus dxiꞌpte ew fxiꞌzeyaꞌ ãjãneꞌkwe. Açaꞌ txãꞌwẽ fxiꞌzeçxaꞌ. Kristo kĩi enteꞌ weh yuhwa yuuwe meesa yuuneꞌkwe.
11 Txãꞌwẽ yuukahn Jesukristoꞌ jweeíiçxáa wala puꞌçxhina, iꞌkweꞌsx ew yũuna fxiꞌzeteꞌ Dxusaꞌ jweeíiçxáa tuutheꞌjni yuukahn.
Adx ĩtxĩ fxiꞌzeniꞌ jxuka Kristo jĩi yuuçxáꞌ
12 Yakhthẽꞌjweꞌsx jiyukahn ptaꞌsxyaꞌwath: adxaꞌs naꞌwẽ karcelte ũswaꞌj en paꞌkh nawa txãa yuꞌ jweeíiçxáa Dxus yuweꞌs tuutheꞌkhanku txãꞌwẽ yuu.
13 Txãa paꞌga soldau jxukaysa maawa jxuka jiitaꞌ Kristoꞌs selpiipaꞌgaçxáa preesu ũstewa.
14 Açaꞌ adxaꞌ txãꞌwẽ preesu ũsçxawa Dxus yuweꞌs ũukhmée ptaꞌsxiçte jiyuçxaꞌ, maa yakhthẽꞌjweꞌsxwa txãꞌwẽy ũukhmeetx Dxusaꞌs jweeíiçxáa çxhãçxha yajkxna ptaꞌsxiꞌ.
15 1:15-16 Maaíi yuꞌ adxaꞌs açeyajkxçxatx Kristo kaapiyaꞌjniꞌs ptaꞌsxiꞌ, adxaꞌ preesu yãꞌj ũsteꞌ, jweeíiçxáa kxũusuꞌj wẽeçxa.
16 —
17 Naapkaçxhaꞌ vxiteꞌ adxaꞌs puꞌçxna ew yajkxçxatx txãꞌwẽ yũꞌ. Adx yuꞌ preesu ũsçxawa Dxus yuwe yuꞌsaꞌ ũukhmée ptaꞌsxna ũstewa jiiçxatx txãaweꞌsxwa ũukhmée ew yũꞌ.
18 Adxaꞌs açeyaakxsa maꞌk yuu khĩmeeçxaꞌ açeyaakxsamée maꞌk yuu nawa Kristo kaapiyaꞌjniꞌs maatxwa ptaꞌsxniçxáa ewna. Txãa paꞌgath adxaꞌ weçxáꞌ.
19 Adx paꞌgate iꞌkweꞌsxaꞌ Dxus yakh puutx weꞌwena ũsneꞌkwe, naapkaçxhaꞌ Dxus Espirituwa puꞌçxteꞌ, preesu ũsçxawa ew kasejeꞌnja sũhnath wala weçxáꞌ.
20 Txãa paꞌga makwe preesu ũsçxawa weh yuhwa thaamemée, wejxwa Kristo yuuçxáꞌs ãate tuutheꞌj wẽeth. Nyafxíiwa maꞌwẽtka tuutheꞌjeꞌ ãçxwa txãꞌwẽyçxáa yuꞌnja. Txãa paꞌga makwe adx uumaꞌth meeçxaꞌ uumeemaꞌth nawa Kristoꞌ tuutheꞌjni nes yuuna.
21 Txãa paꞌgatey naa kiwete adx ĩtxĩ fxiꞌzenisaꞌ jxuka Kristo jĩi yuuçxáꞌ, saꞌ uuçxaꞌ Kristo yakh ũsyaꞌ uꞌjwaꞌjsath.
22 Txãa paꞌga maꞌsna txhitxh wẽeçxawa ãjaꞌçmeeth, txãꞌwẽ naa kiwete nee fxiꞌzeꞌççxaꞌ, Kristona selpiina ũsteꞌ, wala ewsaíiçxáꞌ naa paꞌga.
23 Açaꞌ txãa eꞌzsatx txhitxhwaꞌjaꞌ adx yakhaꞌ thẽyaꞌ. Kiꞌkinteꞌ uuni wejx ewna Kristo yakh ũsyaꞌ uꞌjni sũhnath yaakiꞌ.
24 Nawa naa kiwete nee ĩtxĩ fxiꞌzeni wejx jxthaakwe peejxaꞌ iꞌkweꞌsxtxi puꞌçxna ũswaꞌj.
25 Txãa paꞌga naa kiwete nee uumey iꞌkweꞌsxtxi puꞌçxna ũswaꞌj jiꞌphíiçxáath, Dxus yakh çxhãçxha fxiꞌzekahn.
26 Açaꞌ iꞌkweꞌsxaꞌ naꞌwẽ adxaꞌs nee ũs jxthãasuꞌiꞌkwe açaꞌ Dxus puꞌçxteꞌ paꞌjaꞌnja, Kristo Jesusaꞌs weçxawaꞌjaꞌs jiꞌphukahn.
27 Kristo kaapiyaꞌjniçxáꞌs kxtey yuuna mfxiꞌzewe. Açaꞌ bagaçxteçxáawa adx thegyaꞌ paꞌjmaꞌth meeçxaꞌ paꞌjmeemaꞌth nawa Dxusçxáꞌs çxhãçxha yajkxna teeçxsa naꞌwẽçxah jxukaysa Dxus yuweꞌs ptaꞌsxna paꞌpçxuna ũstaꞌ jĩniçxáꞌs jiyu wẽeth.
28 Saꞌ açesaweꞌsxtxi maꞌwẽ yuhwa ũukhmée mfxiꞌzewe. Txãaweꞌsxaꞌ jxukate vxituwaꞌjsaçxah txãꞌwẽ açetxna, naapkaçxhaꞌ iꞌkweꞌsx ũukhmée fxiꞌzesaꞌ Dxus nweꞌwenisaçxah txãꞌwẽ ũukhmeeneꞌkwe.
29 Txãa paꞌga Kristoꞌs jxpaꞌgasa yãꞌjaꞌ Dxus yakh wẽt fxiꞌzewaꞌjaꞌsçxáa weçxana jxpaꞌgamée, Kristoꞌs selpiipaꞌga naa kiwete thẽyte nxuste fxiꞌzewaꞌjaꞌswa weçxana jxpaꞌgawaꞌjaꞌ.
30 Adxwa maꞌwẽtka açeni fxiꞌze nyafxíꞌ, saꞌ ãçxwa txãꞌwẽyçxáa açeni ũsthu txãꞌsaꞌ jii iꞌkwe, açaꞌ iꞌkweꞌsxwa txãꞌwẽy adx yakh jaꞌdaçxah yahçena ũsiꞌkwe.
