Fxilipenses 2:1-30
2 Iꞌkweꞌsxtxi naꞌwẽth yuꞌkxpejeꞌ: Kristo peeygãanisa Dxus Espirituꞌs ũuste jiꞌphdxihçxaꞌ, txajx kvxiisxaꞌjni kçxhãaçxhaꞌjni mfxiꞌzewe,
2 teeçxsa naꞌwẽçxah puutx yaꞌpeeygãhna, teeçxsa naꞌwẽçxaçxáa yajkxna. Açaꞌ txãꞌwẽ fxiꞌzeçtaꞌ jĩniꞌs jiyuçxaꞌ, adxaꞌ wala weçxaꞌnja.
3 Iiwejçx yajkxna peekx wẽt fxiꞌzewaꞌjçxáꞌs yaakxwaꞌjmeꞌ, wejxwa iiwejçx yajkxmée vxitesatx jxthaakwe tuhthesaꞌ sũhna txãaweꞌsxtxi ewçxáa yũuna mfxiꞌzewe.
4 Txãꞌwẽ peekx wẽt fxiꞌzewaꞌjçxáꞌs yajkxmée, wejxwa vxitesatx puꞌçxna mfxiꞌzewe ew fxiꞌzewaꞌjaꞌs txãaweꞌsxwa jiyukahn.
5 Kristoꞌ naꞌwẽk yũuyaꞌ yajkx txãꞌsna iꞌkweꞌsx mjiꞌphuwe:
6 Kristoꞌ Dxusíiçxáak yuꞌ, nawa Dxus txakwe seenaꞌ wala jxtuhthesath sũhwaꞌj yuꞌsaꞌ jiꞌphumée,
7 txãꞌwẽ yaakxwaꞌjaꞌs jxuka nvxihtçxa kweꞌsx ãhmeekwesa naꞌwẽ yuuçxak selpiiyaꞌ yajkx.
8 Txãasak ãhmeekwesa naꞌwẽ yuuna paꞌjçxa nxus nxus kluuste uuwaꞌjaꞌswa jiꞌphu, Dxusna nwẽeseꞌjçxa.
9 Txãꞌwẽ yũupaꞌgak Dxusaꞌ cielun peꞌjna uꞌjçxa maatewa jxthaakwe tuhthesa vxitçxa kiꞌp jxkaahwaꞌjsa.
10 Açaꞌ cielute ũssa vxiteꞌ naa kiwete ũssa vxiteꞌ mtee mteeweꞌsxwa jxuka Jesus tasxteçxaçxáa peejxũkweçxa
11 naꞌjĩtxna: Jesukristo yuuçxáa maatewa jxthaakwe jxkaahwaꞌjsaꞌ jĩna Dxusaꞌs weçxaatxna.
Dxusaꞌs jiisaꞌ naa kiwete eenaꞌ kweethna fxiꞌzewaꞌjaꞌ
12 Adx yakhthẽꞌjweꞌsx yaakxnisatx naꞌwẽth yuꞌkxpejeꞌ: iꞌkweꞌsx yakh adx kxtee ũsçxa kaapiyaꞌjniꞌs waꞌlmée iꞌkwe jxuka kxtey nwẽeseꞌjeꞌ. Txãasa ãçxhaꞌ jweeíiçxáa çxhãçxha Dxusaꞌs yajkxna meswe, jxpubamée fxiꞌzewaꞌjaꞌs paꞌpçxuna, makwe adx yuꞌ jxuꞌthe ũstewa.
13 Txãa paꞌgatey txãꞌwẽ ew yũuna fxiꞌzewaꞌjaꞌs Dxusku kaaũusutheꞌjeꞌ, txajx jxthãasniꞌs kxtey yuuna fxiꞌzekahn.
14 Kĩhtewa jxuka ewçxáa myũuwe nuyweꞌwena puiimée.
15 Txãꞌwẽ ewçxáa yũuteꞌ, kim yuhwa iꞌkweꞌsxtxi yuuwesa ewmeesataꞌ jĩyaꞌ ãjãmeetxna, wejxwa Dxus luuçx yuh yuꞌtaꞌ yuuwemeesa jĩnaçxáa weꞌwetxna, makwe naa kiwete nasa ewmeesa ksxavxyte ũstewa. Açaꞌ iꞌkweꞌsxaꞌ eenaꞌ kweethsa naꞌwẽ mfxiꞌzewe txãaweꞌsx ksxavxyte,
16 Dxus yuwe ĩtxĩ kaafxiꞌzeꞌjwaꞌjaꞌs mtee mteewa ptaꞌsxna. Açaꞌ naa kiwete Kristo kĩhteꞌ, adxaꞌ kxulmeetka paꞌpçxuna mjĩi sũhna wẽt wẽt yaakiꞌnja iꞌkweꞌsx txãꞌwẽ ew yũuna fxiꞌzepaꞌga.
17 Txãasath ũukhmée mjĩꞌ, makwe adx ĩtxĩ fxiꞌzeniꞌs ivxiituwaꞌj maꞌk yuu iꞌkweꞌsx paꞌgate Dxusna selpiipaꞌga, nawa txãꞌsaꞌ ũukhmée weçxana kxtey yuuyaꞌ ũsthu. Txãꞌwẽ adx weçxaniꞌsthu iꞌkweꞌsx jxukaysatx ptaꞌsxiꞌ,
18 adx naꞌwẽy ũukhmée weçxana ũskahn.
Timoteo vxiteꞌ Epafxrodito yakh kaahni
19 Iꞌkweꞌsx maꞌwẽ fxiꞌzena ũstewa jiyuçxa weçxana ũsyaꞌ, Dxus puꞌçxteꞌ Timoteoꞌs dud kajaꞌnja iꞌkweꞌsxtxi thegyaꞌ sũjuꞌth.
20 Txãꞌwẽmeꞌ, adx naꞌwẽy iꞌkweꞌsx paꞌgate paꞌpçxusa vxite yuꞌ jiꞌphmeeth.
21 Vxite yuꞌ ũsçxawa, peekx wẽt fxiꞌzewaꞌjçxáꞌstxi yaakiꞌ, Kristo Jesus jxthãasni yuꞌsaꞌ yajkxmée.
22 Nawa Timoteoꞌ txãꞌwẽ yuꞌçmeꞌ. Iꞌkweꞌsxaꞌ jiiyãꞌjiꞌkwe maꞌwẽga wala selpíi Dxus yuweꞌs adx yakh ptaꞌsx puꞌçxna, peekx luuçx maꞌwẽ neyaꞌs puꞌçxhikx txãꞌwẽk yũu.
23 Txãa paꞌga adxaꞌs kĩh yũuyaꞌwatewa jiyunaꞌwa, Timoteoꞌs dud kajaꞌnja iꞌkweꞌsxtxi ptaꞌsxyaꞌ.
24 Meeçxaꞌ adx yuu iꞌkweꞌsxtxi thegyaꞌ yuhwaçaꞌ, sũhçxa Dxusçxáꞌsthu neeweꞌweꞌ.
25 Yakhthẽꞌj Epafxroditoꞌs iꞌkweꞌsxaꞌ kaahneꞌkwe adx peejinitx ktũꞌseꞌjçxa açaꞌ ayte ũsaꞌ, adxaꞌs puꞌçxna pxthaa yuuna. Açaꞌ txãꞌswa kajaꞌnja sũjũꞌth.
26 Txãꞌwẽ txajx ãçãꞌniꞌs iꞌkweꞌsxwa jiyutx jĩniꞌs wẽsẽꞌjçxaꞌ, txãꞌ iꞌkweꞌsx yakh wala puutx uy wẽjeꞌk, txãasak wala kuh yaakiꞌ.
27 Isa ãçãꞌna weteçxaꞌ, uuwaꞌtheçxáa yãꞌkh ũsuꞌ. Nawa Dxusaꞌ txãꞌsaꞌ puꞌçxku. Saꞌ txãꞌsçxáana puꞌçxmée, adxnawa txãꞌwẽyku puꞌçx, naꞌwẽ nxusna ũsthu txãate jxthaakwe nxussa paꞌkhamén.
28 Txãa paꞌga txãꞌsaꞌ dud kajaꞌnja sũjuꞌth, txãa yakh iꞌkweꞌsx puutx uyçxaꞌ weçxana ũskahn. Açaꞌ iꞌkweꞌsx weçxana ũsteꞌ, adxwa nxusmée weçxana ũsuꞌnja.
29 Txãa yakhthẽꞌjaꞌs wala weçxana mpaꞌgawe, saꞌ txãa naꞌwẽysatxiꞌs bagaçxtewa mpeeygãhwe.
30 Txãa yakhthẽꞌjaꞌ Kristoꞌs selpiipaꞌgaçxáa txajx ĩtxĩ fxiꞌzeniꞌs ivxiituꞌdxijk, txãꞌwẽ iꞌkweꞌsx yuꞌ adxaꞌs puꞌçxyaꞌ ãjãmeetewa, txãa yuꞌ adxaꞌs selpiina ũsçxak txãꞌwẽ uꞌdxih.
