Fxilipenses 3:1-21
3 Ãçxhaꞌ, yakhthẽꞌjweꞌsx, Dxus yakh weçxana mfxiꞌzewe. Nyafxíi neeweꞌwena fxiꞌth txãꞌwẽyçxáa ãçxwa neeweꞌweçthu, iꞌkweꞌsxtxiꞌ selpiwaꞌjsaꞌ naa paꞌga.
2 Nasa ewmeesa kaypubaꞌjna fxiꞌzesatxiꞌs mpaꞌyajkxwe, peekx kakweteweꞌsxaꞌs spẽꞌthsatx.
3 Ew jiyute yuꞌ, Dxusaꞌs ũusuh jxuka yajkxçxa neeweꞌwesa kweꞌsx txãꞌwẽ Dxus luuçx cirkuncidãynisathaꞌw. Txãa paꞌgatey Kristo Jesus jĩi yãꞌthaꞌw sũhçxa weçxanathaꞌw fxiꞌzeꞌ naa paꞌga. Saꞌ kweꞌsx ãjãni kakwekhẽweꞌsxaꞌs weeçx yajkxna fxiꞌzeꞌçmeethaꞌw.
4 Txãatx yaakx wẽewaç yuꞌ, adxwa weeçx yajkxyaꞌ ãjaꞌnja, kimtewa jxthaakwesath naa paꞌga.
5 Adx ãaga yuuni oçxo en yuuçpkaçxhaꞌ, cirkuncidãynisath. Saꞌ Israel nasath, Benjamin jiꞌth. Saꞌ mama tutxhu kasejíi hebreo nweꞌsxthu yuꞌ, tataweꞌsxaꞌ judiutx yuꞌ txãa paꞌga. Khĩçxawa adxaꞌ fxariseoth yuꞌ, judiuweꞌsx ley maꞌwẽ jxkaathewa jxuka kxteythu yuuna fxiꞌzesa yuꞌ.
6 Txãasath ley kaapiyaꞌjniꞌs nwẽeseꞌjna Kristo nasatxiꞌs ikhyaꞌ pakwéꞌ, Dxusna selpiiçthu sũhçxa. Açaꞌ adxaꞌs kim yuhwa ley jxkaahniꞌs kxtey yuumeꞌ jĩyaꞌ ãjãmeetxna.
7 Nyafxíi yuꞌ txãꞌwẽsaꞌ adx yakhaꞌ seenaꞌ yuh wala ewsa yuꞌtx. Nawa ãçxhaꞌ Kristoꞌs jxpaꞌganijũꞌ txãꞌwẽsaꞌ kĩhte yuhwa seelpimeetx yuuna paꞌj.
8 Ãçxhaꞌ Kristo Jesusna ew jiyuwaꞌj wejx jxthaakwe wala ewsaꞌ, naa paꞌga txãꞌwẽsatxiꞌ jxuka nvxihtçxath fxiꞌzeꞌ. Kristoçxáꞌs selpiina fxiꞌze wẽeçxa kĩjkĩhnawa jxuka nvxihtthu seelpimeesatxiꞌs, txãa yakh yuuçxáa fxiꞌzeyaꞌ.
9 Txãꞌwẽ ley jxkaahniꞌs kxtey nwẽeseꞌjçxa ew fxiꞌzewaꞌjaꞌs jiꞌphumeeth. Txãꞌwẽ ew fxiꞌzewaꞌjaꞌs Dxusku ũs, Kristoꞌs ũusuh jxuka yaakxpaꞌga.
10 Txãasa Kristo yuuçxáꞌs ew jiyuçxa txãa maꞌwẽneꞌ uuçxa kiꞌ ĩtxĩ yuu txãꞌwẽy yuu wẽeth. Saꞌ txãa naꞌwẽy pxthaa yuuçxa uuwaꞌjnawa jiꞌphuçxa,
11 uuniijũwa kiꞌ ĩtxĩ yuꞌnja sũjũꞌth.
Dxus dxiꞌpte ewsa yuuna paꞌjwaꞌjaꞌs pakwena nes yuuni
12 Txãꞌwẽ Kristoꞌs jxuka jiiyãꞌth jĩꞌçmeeth, saꞌ Dxus dxiꞌpte ewsayãꞌth sũjuꞌçwameeth. Nawa txãꞌwẽ yũuwaꞌjaꞌs ãjãꞌnja sũhnaçxáath paꞌpçxuna nes yuꞌ. Kristo Jesusaꞌ adxaꞌs txãa jĩik vxitna paꞌj açaꞌ ãçxhaꞌ adxaꞌ Kristo jĩith sũhnaçxáath paꞌpçxuna fxiꞌzeꞌ.
13 Yakhthẽꞌjweꞌsxtxi naꞌjĩꞌth naꞌ: Kristoꞌs jiyuwaꞌj peejíiçxáath saꞌ Dxus dxiꞌpte ew fxiꞌzena paꞌjwaꞌj peejíiçxáꞌ sũjũꞌth. Açaꞌ txãatx kxtey yuu wẽeçxa naꞌwẽth yũꞌ: nyafxíi fxiꞌzeniꞌs peçxkanaçxa, naꞌwẽ jiyuna jxãꞌjwaꞌj ũstaꞌ txãaçxáatxthu wejx paꞌpçxuꞌ.
14 Txãatx jxuka ew jiyuna paꞌjçxaꞌ, Kristo Jesus tasxte ũsyaꞌ Dxus paꞌyak kxtee ũsuꞌnja sũjũꞌth.
15 Dxusaꞌs ewyãꞌj jiisaꞌ jxukaysa naꞌwẽ ptaꞌsxiꞌth txãꞌwẽçxaçxáa yaakxwaꞌj jiꞌpthaꞌw. Meeçxaꞌ jxpubawáꞌkwe nawa Dxusaꞌ ew ãate kaajiyuꞌjuna.
16 Naꞌwẽ Dxus yakh ew fxiꞌzewaꞌjaꞌs jiiyãꞌthaꞌw txãꞌsaꞌ peçxkanamée kxtey yuuna fxiꞌzewaꞌj jiꞌpthaꞌw.
17 Yakhthẽꞌjweꞌsx, adx naꞌwẽy mfxiꞌzewe. Iꞌkweꞌsxtxiwa maꞌwẽtkaꞌw kaapiyaꞌj txãꞌwẽy vxite yakhthẽꞌjwa ũstaꞌ ew fxiꞌzesa, açaꞌ txãaweꞌsx naꞌwẽy mfxiꞌzewe.
18 Wala kujus iiptaꞌsxyãꞌth, nawa kiꞌ peena ptaꞌsxiçthu ũꞌnena: maaíi yuꞌ Kristo kluuste uuniꞌs açesa ũstaꞌ.
19 Txãaweꞌsxaꞌ ũꞌwaꞌjaꞌs yuuçxáa dxus naꞌwẽ yajkxna fxiꞌzesataꞌ, saꞌ thaamewaꞌjaꞌs yaakipkaçxte thaampaꞌsu yuꞌ iiwejçx yaakxsaçxáataꞌ. Nawa nmehteꞌ jxuka ivxiituni yuutxna.
20 Naapkaçxhaꞌ kweꞌsx yuꞌ cielute ũswaꞌjsathaꞌw. Txãasa ũythasna ũsthaꞌw, kweꞌsxtxi nweꞌwesa Jesukristo cielujũ kĩijana sũhna.
21 Txãꞌ kweꞌsx kakwe seelpimeesaꞌs yuꞌpthehçxa, txajx kakwe naꞌwẽy ewsa vxituna, Kristoꞌ maꞌwẽ yũuwaꞌjaꞌswa jxuka ãjãwaꞌjsaꞌ naa paꞌga.
