Fxilipenses 4:1-23
4 Adx yakhthẽꞌjweꞌsxtxi yajkxteꞌ, wala weçxa yujaꞌ, Dxus yuweꞌs jiyuçxa jxpubamée ũsteꞌ. Açaꞌ iꞌkweꞌsxtxi wala peeygãhna neeweꞌweꞌth: Dxusna peçxkanamée çxhãçxha yajkxna meswe.
2 Ewodia vxiteꞌ Síntike txãaweꞌsxaꞌ eꞌzíi Dxusaꞌs ũuste jxpaꞌgaçxa fxiꞌzeççxaꞌ, puiimée fxiꞌzekahnthu neeweꞌweꞌ.
3 Saꞌ txãa eꞌz uꞌytxiꞌs yuꞌkxpejkahn idxna neeweꞌweçthu, adx yakh mjĩi puꞌçxna uꞌjusag naa paꞌga. Txãa eꞌz uꞌyweꞌsxaꞌ nyafxíiaꞌ adx yakh Dxus yuweꞌs wala ptaꞌsx puꞌçxtxi, Klemente vxiteꞌ adx yakh mjĩi puꞌçxsaweꞌsx yãꞌjçxa. Açaꞌ txãaweꞌsx yaseꞌ fxiꞌjni yãꞌj ũstaꞌ bagaçxte yuhwa uuwaꞌjmée ĩtxĩ fxiꞌzewaꞌj librute.
4 Dxusna çxhãçxha yajkxna fxiꞌzeççxaꞌ, weçx weçxa yajkxna mfxiꞌzewe. Iꞌkweꞌsxtxi peena neeweꞌweçthu, weçx weçxa fxiꞌzekahn.
5 Kxah maawa iꞌkweꞌsx ew yũuna fxiꞌzeniꞌs jiyukahn, iꞌkweꞌsxaꞌ Dxus yakh ew fxiꞌzewaꞌj yuuçxáꞌs paꞌpçxuna meswe, Kristo kĩiwaꞌjaꞌ ãjaçyãꞌjaꞌ naa paꞌga.
6 Weh yuhwa nxusmée, wejxwa Dxusçxáana neeweꞌwena meswe. Kĩh peejxçxawa, txãꞌsna jxuka mpẽjxwe weçxana.
7 Txãꞌwẽ yũuteꞌ, Dxusaꞌ ũsuna ũuste wẽt yaakxwaꞌj seenaꞌ walasaꞌs. Açaꞌ ũuste wẽt yaakxwaꞌjaꞌs jxpaꞌgateꞌ, wala yuh weçxa yujaꞌ. Txãꞌwẽ Dxus ũsni ũuste wẽt yaakxniꞌs ew ãate ptaꞌsxyaꞌ yaꞌãjaꞌçmeꞌ, txãꞌwẽ seenaꞌ walasa paꞌga. Txãa wẽt yaakxwaꞌjaꞌs jxpaꞌgasayãꞌjaꞌ, Kristo Jesus yakh wẽtçxáa yajkxna fxiꞌzeneꞌkwe.
Dxus dxiꞌpte ew fxiꞌzewaꞌjçxáꞌs yajkxna fxiꞌzeni
8 Yakhthẽꞌjweꞌsx naꞌwẽ yajkxna fxiꞌzekahn neeweꞌweçxa nmeh nvxiituçthu: kĩjkĩhwa iꞌkweꞌsx ũuste suwwaꞌjsamée ew Dxus dxiꞌpte kaafxiꞌzeꞌjwaꞌjsa yuuçxáꞌs mpaꞌpçxuwe, ĩsxiimée isasaçxáꞌs weꞌwena, ewçxáa yũuna kĩhtewa jxpubamée.
9 Adx kaapiyaꞌjnitx ũusuh jxuka jxpaꞌgaçxa ũsçxaꞌ txãatxiꞌ kxtey yuuna mfxiꞌzewe. Adx maꞌwẽ jxkaahçxaꞌ kiꞌ maꞌwẽneꞌtka yũuna fxiꞌze txãatxiꞌ txãꞌwẽy myũuwe. Açaꞌ iꞌkweꞌsx ũuste wẽt yaakxwaꞌjaꞌs ũssa Dxusaꞌ iꞌkweꞌsx yakh nes yuuna.
Fxiliposweꞌsx Pabloꞌs ofxreda peesni
10 Iꞌkweꞌsxaꞌ adxaꞌs kiꞌ yaakxpaꞌga adxaꞌ wala weçxaꞌth. Nyafxíꞌ peçxkananeꞌkwe sũhçxa txãꞌjĩꞌçmeeth. Txãꞌwẽ peçxkanameeçxawa puꞌçxyaꞌçxáa neꞌkwe ãjãmée ũsuꞌ sũjũꞌth.
11 Kĩhwa jiꞌphmée peejiinath ũsuꞌ jĩçxa txãꞌjĩꞌçmeeth. Txãa paꞌgatey adxaꞌ piyath kĩjkuẽ jiꞌphuni yakhçxáawa weçxana fxiꞌzeyaꞌ.
12 Kĩh yuhwa jiꞌphmée fxiꞌzeniꞌs jiith, saꞌ wala jiꞌph fxiꞌzeniꞌswa jiith. Txik ũswaꞌj maꞌk yuu meeçxaꞌ wẽena fxiꞌzewaꞌj maꞌk yuu nawa maꞌwẽ fxiꞌzewaꞌj en paꞌthewa maa sũhmée ũsyaꞌth piya. Kĩhwa pejiimaꞌth pejiimeemaꞌth nawa txãꞌwẽ fxiꞌzewaꞌjaꞌs jxuka piyath.
13 Txãa paꞌgatey naa kiwete makwe wala thẽysa nxussa paꞌthewa, Kristo yuuçxáak puꞌçxna nes yuꞌ, çxhãçxha kaafxiꞌzeꞌjna.
14 Makwe txãꞌwẽtewa, iꞌkweꞌsxaꞌ ew iꞌkwe yũu, adx peejiina fxiꞌzeniꞌs puꞌçxna.
15 Adx nyafxçxah Macedoniasu Dxus yuweꞌs ptaꞌsxyaꞌ uꞌjweçteꞌ, adxaꞌs kim yuhwa puꞌçxmeetewa, iꞌkweꞌsx yuuçxáa iꞌkwe adx peejiniꞌs puꞌçxna kaah, adxaꞌ iꞌkweꞌsxtxi kaapiyaꞌth Dxus yakh fxiꞌzewaꞌjaꞌs naa paꞌga.
16 Saꞌ adx Tesalonikate nee ũsiyna iꞌkweꞌsxaꞌ kiꞌ vxyuu kaajiꞌkwe adx peejiniꞌs puꞌçxna.
17 Txãꞌwẽ adxna kĩhçxáawa peesteꞌ, txãꞌsna jxpaꞌgawaꞌjçxáꞌs yajkxna fxiꞌzeꞌçmeeth, wejxwa txãꞌwẽ yũupaꞌga Dxusaꞌ jweeíiçxáa wala peesuna iꞌkweꞌsxtxiꞌs sũhnaçxáath yaakiꞌ.
18 Epafxrodito yakh vxyuu kaakhwe txãaçxáa adx peejinite jxthaakweyãꞌjaꞌ. Txãa peesyaꞌ kaahnisaꞌ Dxus dxiꞌpte iiméh wala ewsa yuꞌk, Dxusaꞌs weçxana peesnisa neꞌ yuꞌ naa paꞌga.
19 Açaꞌ adx Dxusaꞌ iꞌkweꞌsx kĩh peejiina ũstewa, jxuka ũsuna pejiikahmén, txãa paꞌgatey Kristo Jesusaꞌs jxpaꞌganijũꞌ Dxus jĩi yuꞌsaꞌ kĩh yuhwa peejxmée jxukak yaꞌjypaꞌgaꞌ.
20 Txãa paꞌga kweꞌsx Tata cielute ũssaꞌs weçxana nes yuuwaꞌjaꞌ bagaçxtewa.
Dxus luuçx jxukaysatx yuwe weçxaa kaahni
21 Dxus luuçx jxukaysatx yuwe mweeçxawe, Kristo Jesus yakh fxiꞌzesaweꞌsxtxi. Txãꞌwẽy adx yakh ũssa yakhthẽꞌjweꞌsxwa yuwe weçxaa kajaꞌtx.
22 Saꞌ Dxus luuçx Cesar tasxte selpiina ũssawa jxukaysa yuwe weçxaa kajaꞌtx.
23 Kweꞌsxtxi jxpeꞌjsa Jesukristoꞌ iꞌkweꞌsxtxiꞌ puꞌçxhina ewçxáa kaafxiꞌzeꞌjna.
