Hebreos 1:1-14
1 Dxusaꞌ txãniitey kweꞌsx yaçgaweꞌsxtxi maazkuẽe uswa weꞌwek fxiyfxiyçxah txajx yuwee ptaꞌsxsaweꞌsxtxi jxkaahçxa.
2 Saꞌ ãçxh naa nmeh ensuꞌ Dxusaꞌ kweꞌsxtxik weꞌwe txajx Nçxiꞌkaꞌs kaahçxa. Dxusaꞌ txajx Nçxiꞌkaꞌs jxkaahçxak naa kiwe kĩjkĩhnawa jxuka vxit. Txãꞌwẽ yũuçxak Dxusaꞌ txãatxiꞌs jxuka Nçxiꞌk kuseteçxaçxáa nvxiht.
3 Txãa Nçxiꞌk íik Ney zhiçxkwe zmeenaꞌ kweethnisa yuꞌ, saꞌ Dxus maꞌwẽsateꞌ leꞌçxkweçxáa yuhwa fxiysamée txãa íiçxáak yuꞌ. Saꞌ txãa íiçxáa naa kiwe maꞌk yuu nawa kĩjkĩhnawa jxuka ewçxáa kaafxiꞌzeꞌjna ũsaꞌ txajx weꞌweni yakhçxáa. Saꞌ txãa íiçxáa kweꞌsx pkaltxi yaateçxa Dxus pukate kaçxku cielute.
Dxus Nçxiꞌkaꞌ angelesweꞌsxte thaakwe walasaꞌ
4 Dxus Nçxiꞌkaꞌ angelesweꞌsxte thaakwek walasa yuꞌ, txãasak Ney ũsni yase jxpaꞌga maa angelesweꞌsxtewa thaakwe walasa.
5 Txãꞌwẽte íiçxáak Dxusaꞌ bagaçxte yuhwa angelesweꞌsxtxiꞌ maa yuhtxwa naꞌjĩna weꞌwemée:
Idxaꞌ adx Nçxiꞌkgu,
Txãa paꞌgath ĩtxi yuuwaꞌjaꞌs ãçxhaꞌ vxit jĩmeꞌ.
Saꞌ txãꞌwẽy maa angel yuhnawa naꞌwẽ weꞌwemeꞌ:
Adxaꞌ txajx Ney yuꞌnja,
Açaꞌ txãꞌ adx Nçxiꞌk yuuna jĩmeꞌ.
6 Nawa Dxusaꞌ txajx Nçxiꞌkaꞌs nyafxçxah naa kiwete nuykĩhçxaꞌ, naꞌwẽk weꞌwe:
Dxus angelesweꞌsx jxukaysa txãꞌsçxáana nwẽeseꞌjwaꞌj jiꞌphtaꞌ jĩnak jxkaah.
7 Saꞌ angelesweꞌsx fxiꞌzewaꞌjaꞌs yuꞌ naꞌwẽçxáak weꞌwe:
Angelesweꞌsxaꞌ wejxa naꞌwẽ vxyaawaꞌjsa vxitnisataꞌ,
Saꞌ Dxus jxkaahnitx selpiina ipx beesa naꞌwẽ vxyaana yuuwaꞌjsa vxitnisataꞌ jĩꞌk.
8 Nawa Nçxiꞌk fxiꞌzewaꞌjaꞌs weꞌweçxa yuꞌ naꞌjĩꞌk:
Dxus, iidx jxkaahna ũswaꞌjaꞌ bagaçxtewa nes yuuna,
Idxaꞌ ew yuuçxáa jxkaahna ũswaꞌjsag.
9 Saꞌ ewmeesa yuꞌsaꞌ jxpaꞌgamée, ewsa yuuçxáꞌsgu pakwe.
Txãa paꞌgak iidx Dxusaꞌ iidx wẽt fxiꞌzewaꞌjaꞌs iiméh wala pees,
Naa kiwete iidx nweꞌsxte jxthaakwe jĩꞌk.
10 Vxite ajkhẽꞌ naꞌjĩꞌk Dxus Nçxiꞌkaꞌs weꞌweçxaꞌ:
Idxgu kiweꞌs pheuꞌj nyafxte,
Saꞌ cieluwa iidx kuseju vxitnisataꞌ.
11 Nawa txãꞌwẽsaꞌ pçuutxna, naapkaçxhaꞌ idxaꞌ bagaçxtewa nes yuuneꞌga.
Kĩjkĩhwa jxuka ropa naꞌwẽçxáa ĩisxitxna.
12 Açaꞌ jxuka yuꞌpthehni yuutxna.
Nawa idx yuꞌ bagaçxtewa txãꞌwẽesa nes yuuneꞌga.
Iidx ĩtxi fxiꞌzeniꞌ bagaçxte yuhwa pçumeena jĩꞌk.
13 Nawa Dxusaꞌ maa angelesweꞌsx yuhtxwa txãꞌwẽ yuꞌ naꞌjĩna weꞌwemeꞌ bagaçxteçxáa yuhwa:
Adx pukate paçu juꞌgte mkaaçx,
Idxna açesa maatxwa jxuka idxçxaçxáana nwẽeseꞌjwaꞌjaꞌs vxitna jxãꞌphkaçx jĩmeꞌ.
14 Jxukay angelesweꞌsxaꞌ kweꞌsx naꞌwẽ kakwe jiꞌphmeesa naa kiwete maaçxah ewte neeyũuwaꞌjsa ũstxna txãaweꞌsxtxi puꞌçxyaꞌ kaahnisaçxáataꞌ.
