Hebreos 10:1-39
10 Moises leyaꞌ naasáa thaakwe ewsa vxyaayaꞌ ũsuꞌtx txãatx kaajiyuꞌjsaçxáatx yuꞌ txãꞌ isa ewsa yãꞌj yuꞌçmeetaꞌ, txãasa naꞌwẽ Dxus tasxte utxaayaꞌ aanxu isa tajkx ikhna nestxi yuꞌ txãaweꞌsxtxiꞌ pkal jiꞌphmeesa vxit-yaꞌ bagaçxteçxáa yuhwa ãjawaꞌjsa meek yuꞌ leyaꞌ.
2 Txãa leyaꞌ nasatx pkal jiꞌphmeesa vxit-yaꞌ ãjasaawaçaꞌ, naꞌwẽ pkalpaꞌga maazkuẽe uswa tajkx ikhna nestxi yuꞌ txãꞌwẽ yũuna nes yuuwaꞌj peejxmeeneꞌ yuꞌ. Txãa paꞌgatey pkalpaꞌga tee dxiꞌj tajkx ikhçxa kabnijũyãꞌj yuꞌ, pkalsathaꞌw sũhwaꞌj peena yuꞌ ũusuthemeena.
3 Nawa txãꞌwẽ yũupkaçxte, aanxu isa pkalsathaꞌw sũhna nesku yaꞌyũꞌ,
4 txãa tajkx ikhnisa klaa ee vxiteꞌ kapla ee txãꞌwẽsaꞌ pkaltxi khukhuꞌçmeetaꞌ naa paꞌga.
5 Txãa paꞌgak Kristo naa kiwete paꞌjaççxaꞌ, naꞌjĩna weꞌwe Dxusaꞌs:
Tajkx ikhçxa kabniꞌs jxpaꞌgameeçxa, adx kakwe yakh uuwaꞌjaꞌsgu vxit.
6 Pkaltxi khukhyaꞌ tajkx ikhçxa kabnisatx weçxaꞌçmeeg.
7 Txahth naꞌjĩ: Dxus, iidx jxthãasniçxáꞌs kxtey yuuyaꞌ yuhth,
Adx fxiꞌzewaꞌjaꞌs maꞌwẽ fxiꞌjni ũsna txãꞌsaꞌ kxtey yuuyaꞌ jĩk.
8 Naꞌwẽ Kristo weꞌweçxaꞌ: Pkaltxi khukhyaꞌ tajkx ikhçxa kabnisatxiꞌs weçxaꞌçmeeg, (txãꞌwẽ yũuwaꞌjaꞌs makwe ley jxkaahnisatewa),
9 txãa paꞌga: Dxus, iidx jxthãasniçxáꞌs kxtey yuuyaꞌ yuhth jĩk Kristoꞌ. Isa ew jiyute yuꞌ, naa tajkx ikhna ũsniꞌs ivxiituçxa, txãa paꞌgate vxite uuwaꞌjsath nvxiituꞌ jĩçxaneꞌ txãꞌjĩꞌ.
10 Jesukristoꞌ Dxus jxthãasniꞌs kxtey yuuçxa txajx kakweꞌs peekíi yaꞌdukhçxa kluuste uuk jxukaysa paꞌgate tee dxiꞌjçxáa. Txãa paꞌgak Dxusaꞌ kweꞌsxtxiꞌs txãa jĩi vxit.
11 Pkalsaweꞌsx juꞌgu weꞌwe puꞌçxsa judiuweꞌsxaꞌ txãꞌwẽ yuh een isa maazkuẽe uswa tajkx ikhçxa altalte kabna nestxi yuꞌ jxkaasewaꞌjmée, makwe txãꞌwẽ yũunisaꞌ bagaçxte yuhwa pkaltxiꞌ khukhwaꞌjsameetewa.
12 Nawa Jesukristoꞌ pkalpaꞌga tee dxiꞌj yuuçxáa kluuste uuni yakhçxáa jxuka jxãꞌjnik yuu txãaçxáa bagaçxtewa selpiwaꞌjsa. Txãasak cielute Dxus pukate kaçx.
13 Saꞌ ãçxhaꞌ kxtee ũsaꞌ, txãꞌsna açesa jxukaysa txãꞌsçxaçxáana nwẽeseꞌjwaꞌjaꞌs Dxus vxitna jxãꞌphkaçx.
14 Txãa paꞌgatey tee dxiꞌj kluuste uuníi yakhçxáa jxuka jxãꞌjnik yuu txajx nasa yuuwaꞌjsaweꞌsx jĩi bagaçxtewa selpiwaꞌjsa.
15 Txãꞌwẽ Kristo tee dxiꞌj kluuste uuniçxáa bagaçxtewa selpiwaꞌjsateíiçxáak Dxus Espirituwa naꞌjĩna weꞌwe:
16 Txãa en skhẽwniijũꞌ naꞌwẽ yũuyaꞌ puutx weꞌweꞌnja jĩꞌk Dxusaꞌ:
Adx jxkaahnitxiꞌs txãaweꞌsx ũuste kxuꞌakheꞌjeꞌnja peçxkanakahmén.
17 Saꞌ txãꞌwẽ yũunijũꞌ, txãaweꞌsx ewmée yũuna fxiꞌzeni pkaltxiꞌs bagaçxteçxáa yuhwa yajkxmeꞌnja jĩꞌk.
18 Txãꞌwẽ pkaltxiꞌs jxuka peltunãynijũyãꞌjaꞌ, peena yuꞌ pkalpaꞌga tajkx ikhçxa kabna ũswaꞌj peejxmeꞌ.
Dxus tasxte utxaawaꞌjaꞌs jiꞌpthaꞌw
19 Txãa paꞌga, yakhthẽꞌjweꞌsx, ãçxhaꞌ kĩh pkal yuhwamée Dxus yuuçxáa ũsnite uꞌkawaꞌjaꞌs jiꞌpthaꞌw, txãꞌwẽ Jesukristoꞌ ee pkawçxa
20 Dxus tasxte uꞌkawaꞌj dxiꞌj uꞌsesaꞌs phaadek. Kxtee Dxus ũsniteꞌ kim yuhwa uꞌkakahmén txudenik ũsuꞌ, nawa txãa yuuk kluuste uuçxa kxtee txudeniꞌs phaade kweꞌsx uꞌkakahn.
21 Txãasa Jesusaꞌ Dxus tasxte weꞌwe puꞌçxna ũsaꞌ Dxus luuçx jxukaysa juꞌgu.
22 Txãa paꞌga Kristoꞌ puꞌçxyujuna sũhna ũusuh jxuka yajkxçxa Dxus tasxte ũukhmée utxaaga, txãa paꞌgatey Kristoꞌ kweꞌsx ũuste pkaltxiꞌ jxuka yaatek, açaꞌ kweꞌsx kakwewa bautismote akhnik yuu, yuuwemeesathaꞌw sũhnaçxáa yaakxkahn.
23 Ãçxhaꞌ Dxus tasxte utxaawaꞌjaꞌs jiiyãꞌthaꞌw naꞌ Dxus yakh txutemée txãa yakh yuuçxáa çxhãçxha fxiꞌzega. Txãa paꞌgatey Dxusaꞌ kweꞌsxtxi bagaçxte yuhwa pçumée ĩtxi fxiꞌzewaꞌjaꞌs ũsyaꞌ puutx weꞌwek txãꞌsaꞌ kxtey yuuna.
24 Saꞌ ew yũuna peeygãhna fxiꞌzewaꞌjaꞌs jiꞌphuyaꞌ puutx yaꞌpuꞌçxhiga kxteeçxah.
25 Vxite naꞌwẽtx kweꞌsx pkhaakheçte paꞌjaꞌçmée txãꞌwẽ yũumée, wejxwa teeçxsa naꞌwẽçxah kxteeçxah puutx kçxhãaçxhaꞌjna fxiꞌzega, naꞌwẽ Kristo kĩiwaꞌj enwa utxaaçyãꞌjaꞌ naa paꞌga.
26 Txãꞌwẽ ewsaꞌs ãate ptaꞌsxni wala ew jiiçxa txãꞌsaꞌ ahçena txuteꞌnjaꞌw, açaꞌ txãꞌwẽ yũusaꞌs peena yuꞌ peltunãywaꞌjmée yuuna.
27 Naasáa iiméh seenaꞌ ũukhũukhsaçxáak ũythasuꞌ, Dxus kastigo ipx seenaꞌsa jxuka ivxiituwaꞌjsa Dxusna açesaweꞌsxtxi.
28 Maꞌwẽga Moises leyçxáa yuhwa txãꞌsna nwẽeseꞌjsameetxiꞌ eꞌz meeçxawa tekh nasa txãꞌwẽ yũuniꞌs jiisatx pẽjxçxa isa dxihteꞌ, peeygãawaꞌjmée ikhwaꞌjçxáꞌs vxituꞌ.
29 Açaꞌ Dxus Nçxiꞌkaꞌs ahçeçxa weeçxina, saꞌ txajx eeaꞌs pkawçxa uuniꞌswa kĩhte yuhwa seelpimeesa naꞌwẽ weeçxina, saꞌ txãꞌwẽy Dxus Espiritu peeygãasaꞌswa açesaꞌ, wejx seenaꞌ kastigãyni yuꞌnjaꞌw sũhwaꞌjaꞌs mjiꞌphuwe, txãꞌwẽ Jesukristo eeaꞌ Dxus puutx weꞌweniꞌs kxtey yuuwaꞌjaꞌs vxitwaꞌjsaꞌ txãa eeíiçxáa iꞌkweꞌsx pkaltxiwa peltunãysaꞌ naꞌs txãꞌwẽ açepaꞌga.
30 Dxusaꞌ naꞌjĩnak weꞌwe txãꞌsaꞌ mpaꞌyajkxwe: Adxçxáa kastigãywaꞌjsath, txãꞌsaꞌ adx jiineꞌtka jĩꞌk. Saꞌ kiꞌ weꞌweçxaꞌ: Adx jxpeꞌjni nasatxiꞌs kastigaĩꞌnja jĩꞌk.
31 Txãa paꞌga seenaꞌ yuh ũukhũukhaꞌ, Dxus ĩtxisa kusete kastigãywaꞌj wetena paꞌtheꞌ.
32 Nawa txãꞌwẽ yũuyaꞌmée iꞌkweꞌsxaꞌ nyafxiitey fxiꞌzeniꞌs miiyajkxwe: nyafxçxah Dxus yuweꞌs jxpaꞌgaççxaꞌ, wala pxthaa yuuiꞌkwe txakwe wala thẽysa paꞌthewa.
33 Saꞌ iꞌkweꞌsx maaíiaꞌ wẽesxuna nasaa ksxavxyte pãpani iꞌkwe yuu, açaꞌ vxitewa txãꞌwẽy nxussaweꞌsx yakh jaꞌdaçxah nxussa iꞌkwe yuu.
34 Iꞌkweꞌsxaꞌ karcelte ũssaweꞌsx paꞌgate peeygãawaꞌjaꞌs jiꞌphuiꞌkwe, saꞌ iꞌkweꞌsx jiꞌphunitx kusaꞌjaçteꞌ, ũusaçxamée weçxanaiꞌkwe neeyũu. Cielute bagaçxteçxáa yuhwa pçuwaꞌjsamée thaakwe ewsaꞌs jiiçxaiꞌkwe txãꞌwẽ yũu.
35 Txãꞌwẽsaꞌs jiiyãꞌjçxaꞌ, peçxkananuwe, txãa paꞌgatey txãꞌwẽçxáa yajkxna fxiꞌzepaꞌga txãꞌwẽ seenaꞌ wala ewsaꞌs jxpaꞌgawaꞌjsaiꞌkwe.
36 Dxus jxthãasniꞌs kxtey yuuyaꞌ nxuswaꞌjaꞌs waꞌlmée jxpaꞌgawaꞌj jiꞌphiꞌkwe. Txãꞌwẽ yũuçxaꞌ, Dxus peesni seenaꞌ wala ewsaꞌs jxpaꞌganeꞌkwe.
37 Txãꞌwẽmeꞌ, Dxus librute naꞌwẽk weꞌweꞌ:
Wejx jxthẽeyuumée dud yuh kĩijana
Txãa kĩiwaꞌjsaꞌ txaçxhimeena.
38 Açaꞌ Dxusçxáana yajkxna fxiꞌzesaꞌ ewte neeyũuna.
Nawa txãꞌwẽ yũumée txuteeteꞌ, txãa yakhaꞌ wẽt fxiꞌzemeꞌnja jĩꞌk.
39 Nawa naꞌwẽ txuteeçxa vxituwaꞌthe ũstaꞌ txãateweꞌsxmeethaꞌw kweꞌsxaꞌ, wejxwa kweꞌsx ũus vxitukahmén Dxusaꞌsçxáa yajkxna fxiꞌzesateweꞌsxthaꞌw.
