Hebreos 11:1-40
11 Dxusaꞌs ũuste yaakxsaꞌ yafxju ãate yuꞌ uymeeçxawa, ũuste yuꞌ jiik yaꞌfxiꞌzeꞌ kxtey yuuyujuna sũhna ũythasna.
2 Kweꞌsx yaçgaweꞌsxaꞌ txãꞌwẽ yaakxwaꞌjaꞌs jiꞌphutx, txãasatx Dxus dxiꞌpte ew fxiꞌzesa yuu.
3 Saꞌ kweꞌsxwa txãꞌwẽy yaakxwaꞌjaꞌs jiꞌpthaꞌw, txãasathaꞌw ãçxh naꞌwẽ kiwe ũsaꞌ txãꞌsaꞌ Dxusaꞌ txajx weꞌweni yakhçxáa vxitneꞌ nyafxíi yuꞌ kĩhwa meetewa sũjuꞌ.
4 Abelaꞌ tajkx ikhçxa kabteꞌ, Dxusaꞌ weçxayujuna sũhna ũuste jiiçxak txãꞌwẽ yũu, Kain jĩite thaakwe ewsa. Açaꞌ txãꞌwẽ yũunisaꞌ Dxus yakhaꞌ ewsaneꞌ yuꞌ naa paꞌga Dxusaꞌ jxpaꞌgak. Açaꞌ Abel yuꞌ uuniꞌ, nawa Abelaꞌ txãꞌwẽk Dxusaꞌs ũuste jxpubamée yajkx jĩni yuꞌ ãçxpaꞌjwa ũsaꞌ.
5 Enokwa txãꞌwẽ Dxusaꞌs ũuste ew jiiçxa Dxus yakhçxáa fxiꞌzepaꞌga, uumey peꞌjna uꞌjnik yuu cielun. Txãa paꞌga peena yuꞌ uymeetaꞌ, txãꞌsaꞌ Dxusku peꞌjna uꞌj txãa paꞌga. Açaꞌ Dxus librute Enokhaꞌs weꞌweçxaꞌ: Nyafxíi uumey Dxus yakh weçxanak fxiꞌzeꞌ jĩꞌk.
6 Nawa ũuste Dxusaꞌs yuuçxáa yaakxwaꞌjaꞌs jiꞌphmeeteꞌ, Dxus yakh weçxana fxiꞌzeyaꞌ yaꞌãjaꞌçmeꞌ, txãa paꞌga txajx tasxte utxaasaꞌ Dxusaꞌ ũsna saꞌ txãꞌsna pakweteꞌ, nweꞌwena sũhwaꞌjaꞌs ũuste jiꞌphuwaꞌjaꞌ.
7 Noewa txãꞌwẽy Dxus weꞌweniꞌ kxtey yuuyujuna sũhwaꞌjaꞌs ũuste jiik yuꞌ. Txãasak kastigo nus paꞌjyujuna sũhçxa Dxus jxkaahniꞌs nwẽeseꞌjçxa barkoꞌs vxit, txajx yatteweꞌsxtxi jxuka nweꞌweyaꞌ. Saꞌ Dxusaꞌ kxtey yuuyujuna sũhwaꞌjaꞌs ũuste jiꞌphupaꞌga, Dxusaꞌ kxtey yuuteꞌ, naa kiweteweꞌsxaꞌ yaꞌkastigãytxi açaꞌ Dxusaꞌ Noeaꞌs ewsaꞌ jĩnak weꞌwe.
8 Abrahanwa txãꞌwẽy Dxusaꞌ kxtey yuuyujuna sũhwaꞌjaꞌs ũuste jiiçxak, Dxus kiwe ũsyaꞌ paꞌyateꞌ, nwẽeseꞌjçxa kasehna uꞌj, nawa mtee paꞌjwaꞌjaꞌsçxáa yuhwa jiimeek yuꞌ.
9 Txãꞌwẽ Abrahanaꞌ Dxus kiwe ũsyaꞌ neeyũuneꞌ txãꞌsaꞌ bagaçxteçxáawa kxtey yuuyujuna sũhwaꞌjaꞌs ũuste jiiçxak maa sũhmée txagaçxhíi yuꞌ paꞌjsa naꞌwẽçxáa tultu txahçxa fxiꞌzena ũsuꞌ. Açaꞌ Isaak, Jakob txãaweꞌsxwa txãa kiweꞌs jxpaꞌgawaꞌjsaçxawa, txãꞌwẽyçxáatx paꞌjsa naꞌwẽ fxiꞌzena ũsuꞌ.
10 Txãa paꞌgatey Abrahanaꞌ cielute Dxus vxitni çxhabaꞌs jxpaꞌgawaꞌjaꞌsku ũythasna ũsuꞌ, txãasak maa sũhmée fxiꞌzeꞌ.
11 Abrahanaꞌ txãꞌwẽ Dxus weꞌweniꞌ kxtey yuuyujuna sũhwaꞌjaꞌs jiꞌphupaꞌgak Saraꞌ txakwe wala thẽꞌkhwe luuçx jiꞌphuwaꞌjsamée yãꞌjçxawa, luuçx jiꞌphu.
12 Txãasak Abrahanaꞌ txajx jiꞌj iiméh wala kuh jiꞌphsa yuu, cielute estrelxa vxiteꞌ yuꞌpukasu kwetmusetx maꞌwẽga isate yaꞌãjaꞌçmée txãꞌwẽk kuh jiꞌphu, txakwe iiméh wala thẽꞌkhwe yãꞌjçxawa.
13 Naꞌwẽ Dxusna yaakxsa nakwe wala kuh kxsusthaꞌw txãaweꞌsxaꞌ Dxus ũsyaꞌ neeyũuk txãꞌsaꞌ jxpaꞌgamey uutx, txãasatx eꞌsu txaçxteçxáawa Dxusaꞌ kxtey yuuyujuna sũhna weçxana yaakiꞌ. Saꞌ txãaweꞌsxaꞌ naa kiwete tudteweꞌsxçxáa neꞌtkaꞌw jĩnatx weꞌwe.
14 Txãaweꞌsxaꞌ txãꞌwẽ weꞌweçxaꞌ ew jiyute yuꞌ, vxite ahte ũsyaꞌ uꞌjwaꞌjaꞌs pakwesáa neꞌta yuꞌ.
15 Txãaweꞌsxaꞌ maa kiweju yuusaaçxawa txãꞌsna yajkxna ũswaçaꞌ, txãa kiweníi sxawedwaꞌj neꞌta yuꞌ.
16 Nawa txãaweꞌsx ũswaꞌj thaakwe ewsaꞌs neꞌta pakwesáa yuꞌ cieluteweꞌsxna, txãasatx sxawedmée. Txãꞌwẽ sxawedmeetaꞌ txãa paꞌgak Dxusaꞌ thaameꞌçmée txãaweꞌsx Dxusthu jĩna yaꞌkxsuswaꞌjaꞌs, txãasa txãaweꞌsx ũswaꞌj pheuꞌjni jiꞌphaꞌ.
17 Abrahanaꞌ txajx nçxiꞌk Isaakhaꞌs ikhtewa Dxusaꞌ kiꞌ ĩtxi vxituna sũhwaꞌjaꞌs ũuste jiiçxak ikhyaꞌ jxũna uꞌj. Dxusaꞌ Abrahan kĩh yũutewa jiyuyaꞌ sũhçxa txajx nçxiꞌk teeçxçxáasaꞌs ikh kaathewa, waꞌlmée kxtey yuuyaꞌwak yuꞌ. Makwe Dxus txãa yakh puutx weꞌweçxaꞌ:
18 Iidx jiꞌj Isaakteweꞌsx txãꞌwẽ wala penatxna jĩna weꞌwetewa, ikhyaꞌwak yuꞌ.
19 Nawa Abrahanaꞌ txajx ũuste yuꞌ uutewa Dxusaꞌ kiꞌ ĩtxi vxituna sũhwaꞌjaꞌs jiꞌphuꞌk. Txãasa isa ew yajkxte yuꞌ, Abrahan nçxiꞌkaꞌ uusaaweꞌsx ksxavxyu kiꞌ ĩtxi yuusáa naꞌwẽsaꞌ.
20 Isaakwa Dxusaꞌ kxtey yuuna sũhwaꞌjaꞌs ũuste ew jiiçxak txajx nçxiꞌk Jakob Esau txãaweꞌsxtxiꞌ bedicion wala jxpaꞌganeꞌkwe jĩna weꞌwe.
21 Jakobwa Dxusaꞌ kxtey yuuna sũhwaꞌjaꞌs ũuste ew jiiçxak uuçyãꞌjçxaꞌ, José nçxiꞌktxi teeçxsa naꞌwẽçxah jxukaysatx wala bedekĩni yuuneꞌkwe jĩna weꞌwe, saꞌ Dxusaꞌs neeweꞌwek kĩiçhuçxa.
22 Josewa Dxus puꞌçxteꞌ Israelweꞌsxaꞌ Egipto kiwejũ kasejetxna sũhwaꞌjaꞌs ũuste ew jiiçxak, uuyaꞌwayãꞌjçxa txãaweꞌsxtxi neeweꞌwe txajx kakweꞌs mtee jxũna uꞌjçxa pedaawaꞌjaꞌswa.
23 Moises neyweꞌsxwa Dxusaꞌ nweꞌwena sũhwaꞌjaꞌs ũuste ew jiiçxatx tekh aꞌte uta Moisesaꞌs sũth, luuçxaꞌ wala zhiçxkwe yuꞌneꞌ txãa paꞌga. Makwe Egipto kiwete jxkaahsa yuꞌ ikh kaathewa ikhmeetaꞌ.
24 Moiseswa Dxusaꞌ puꞌçxhina sũhwaꞌjaꞌs ũuste ew jiiçxak, Egipto kiwete jxkaahsa niisa nçxiꞌk jĩna kxsusni yuuwaꞌj yuꞌsaꞌ waꞌl, walaana kãhçxaꞌ.
25 Saꞌ naa kiwete pkalte weçxana fxiꞌzepkaçxte, wejxwa ũukhmée Dxus txhitxhnisa yakh jaꞌdaçxah pkxuuni yuuwaꞌjaꞌsçxáak yajkx.
26 Txãa paꞌgatey cieluteweꞌsxaꞌs jxpaꞌgawaꞌjaꞌsçxáak yajkxçxa fxiꞌzena ũsuꞌ. Txãasak Egipto kiwete iiméh seenaꞌ wala jiꞌphuniꞌs yaakipkaçxte, Kristo naꞌwẽy yaaçeni pkxuuni fxiꞌzeniꞌs jiꞌphuyaꞌçxáa yajkx.
27 Dxus puꞌçxwaꞌjaꞌs ũuste ew jiiçxak Moisesaꞌ jxkaahsa ũusçxani yuꞌsaꞌ ũukhmée Egipto kiwejũ kasehna uꞌj, saꞌ Dxus tasxu leꞌçxkweçxáa yuhwa txuteméek fxiꞌze, Dxusaꞌ vxyaasameetewa yafxju uyna ũs naꞌwẽ yajkxna.
28 Dxusaꞌ nweꞌweyujuna sũhwaꞌjaꞌs ew ũuste jiiçxak Moisesaꞌ Paskua fxiestaꞌs vxitçxa eeaꞌs vxitxkhẽ sxũsx kaah, ikhwaꞌjsa angel sẽhçxawa Israelweꞌsx luuçx nthẽꞌjsa maa yuhtxwa ikhkahmen.
29 Israelweꞌsxwa Dxusaꞌ puꞌçxhina sũhwaꞌjaꞌs ũuste ew jii yuupaꞌgaçxáak, mar bejuy uykhẽwwaꞌj dxiꞌj phaate txãaweꞌsx uykhẽwkahn. Açaꞌ Egiptoweꞌsxwa txãꞌwẽy uykhẽuꞌnjaꞌw sũhçxawa txãaweꞌsxaꞌ ĩkhtee uutx yuꞌ afxihbte.
30 Dxusaꞌ puꞌçxhina sũhwaꞌjaꞌs ũuste ew jiiçxatx Israelweꞌsxaꞌ Dxus weꞌweniꞌs nwẽeseꞌjçxa txãꞌwẽ siete enpkaçx Jeriko çxhabte muralxa peekuꞌj tadxina ũsuꞌ, açaꞌ txãꞌwẽ nwẽeseꞌphaꞌgak muralxaꞌ wete.
31 Rahabwa Dxusaꞌ nweꞌweyujuna sũhwaꞌjaꞌs ũuste ew jiiçxa, Israelweꞌsx eꞌzsa kxtee peetheguꞌjyaꞌ paꞌjsatx ewku jxpaꞌga. Txãa paꞌgak uumée, Dxusaꞌs nwẽeseꞌjsameeweꞌsx vxite yuꞌ uutewa.
32 ¿Kĩh jwee yuꞌ ptaꞌsxitka? En jiꞌphwaç yuꞌ ptaꞌsxwaꞌj yuꞌ walaíiçxáa ũsaꞌ, Gedeon, Barak, Sansón, Jefxté, Davxid, Samwel, Dxus yuwe ptaꞌsxsaweꞌsx txãaweꞌsxtxi weꞌwewaꞌj.
33 Txãaweꞌsxaꞌ Dxusaꞌ puꞌçxhina sũhwaꞌjaꞌs ũuste ew jiiçxatx maaíi yuꞌ gweçxate puiiçxa knay, vxiteꞌ ewtxi jxkaahna fxiꞌze, vxiteꞌ Dxus puꞌçxniꞌs jxpaꞌgatx, vxiteꞌ león yuwetxwa aphtxi,
34 vxiteꞌ seenaꞌ ipx walajuwa çxhavxymeetaꞌ, vxiteꞌ ikhsa kusejuwa iyutx, vxiteꞌ puiiyaꞌ çxhãçxhameekwetewa kçxhãaçxhaꞌjnisa yuuçxa, gweçxate iiméh kuhsatxwa knaytxi.
35 Naapkaçxhaꞌ uꞌyweꞌsxwa txãaweꞌsx luuçx uunisatx kiꞌ ĩtxi vxitni jxpaꞌgatx. Vxiteꞌ seenaꞌ wala pkxuuni yuuçxa uutx, kiꞌ ĩtxi yuuwaꞌjaꞌs jiꞌphuçxa thaakwe ewte fxiꞌzeyaꞌ sũhçxa, nweꞌwewaꞌj yuꞌsaꞌ jxthãasmeetaꞌ.
36 Naapkaçxhaꞌ vxiteꞌ weeçxna peçxujkweçxa çam kadenaju tudçxa karcelte txaahnitx yuu.
37 Vxiteꞌ kwet wãatatahçxa ikhnitx yuu. Maaíi yuꞌ pxãhsu pẽçnitx yuu. Vxiteꞌ iiméh seenaꞌ wala kxũusuꞌjni yuutx. Vxiteꞌ kçxilxuh ikhnitx yuu, naapkaçxhaꞌ vxiteꞌ ahçeçxa neeuni yat jiꞌphmeetx pekũhnaçxáa ũsuꞌ, kĩhwa jiꞌphmeeçxa piisxáa khaꞌtx kapla khaꞌtx txãꞌwẽsaçxáꞌs pãꞌçxçxa, nxuste pkxuunitx fxiꞌzena ũsuꞌ.
38 Txãꞌwẽ pkxuunisaweꞌsxaꞌ nasa uꞌpnimée kiwesuçxáatx fxiꞌzena ũsuꞌ yuꞌkhsu, kiwe kafxsu. (Nasa txãꞌwẽ Dxus yakh zhiçxkwe fxiꞌzesa yakhaꞌ naa kiweꞌ ũsweçxte yuuwa meena.)
39 Dxusaꞌ puꞌçxhina sũhwaꞌjaꞌs ũuste ew jiiçxa txãaweꞌsx jxukaysa txãꞌwẽ seenaꞌ yũuni yuuçxawa, Dxus ũsyaꞌ neeyũuk txãa yuꞌsaꞌ txagaçxhíi yuꞌ jxpaꞌgameetaꞌ,
40 txãa paꞌgatey Dxusaꞌ thaakwe ewsaneꞌ jiꞌphuꞌ ãçxh naa ensu kweꞌsx jĩi yãꞌjçxa. Açaꞌ txãaweꞌsxaꞌ kweꞌsx yakh jaꞌdaçxah jxpaꞌgawaꞌjsaçxatx txagaçxhíi yuꞌ jxpaꞌgamée.
