Hebreos 12:1-29
12 Dxusaꞌ puꞌçxhina sũhwaꞌjaꞌs ũuste yaakxsaweꞌsx nakwe wala kuh ũstaꞌ açaꞌ kweꞌsxaꞌ txãaweꞌsx ksxavxyte ũsthaꞌw. Txãa paꞌga pkal kaypubaꞌjwaꞌjsaꞌs nvxihtna, kĩhwa Dxus yakh fxiꞌzewaꞌjaꞌs suwwaꞌjsa yuꞌsaꞌ jxuka nvxihtçxa, makwe thẽytewa Dxus yakh yuuçxáa fxiꞌzega, uu entepkaçx.
2 Jesukristo yuuçxáꞌs puꞌvxitumée yajkxna fxiꞌzega, txãa paꞌgatey txãa yuuçxáak Dxusaꞌ puꞌçxhina sũhwaꞌjaꞌs ũsuꞌ, saꞌ txãa yuuçxáak Dxusna yaakxni jxuka kxtey yuuna paꞌphkaçx puꞌçxhiꞌ. Txãꞌwẽ yũuyaꞌk Jesusaꞌ thaamewaꞌj yuꞌsaꞌ yajkxmée kluuste uu, txakwe wala nxusnxustewa. Txãa paꞌgatey pxthaa yuuni en skhẽwniijũꞌ wẽt weçxana ũswaꞌjaꞌs jiik yuꞌ, txãasak cielute Dxus ũsni pukate kaçx.
3 Jesusaꞌ nakwe wala pxthaa yuuk pkalsaweꞌsx kusete txãꞌsna iꞌkweꞌsxaꞌ yajkxçxa txãa naꞌwẽy nxuswaꞌj en paꞌthewa Dxus tasxu txutemée mfxiꞌzewe.
4 Iꞌkweꞌsxaꞌ pkalaꞌs nvxihtçxa Dxus yakh fxiꞌzepaꞌga iiméh seenaꞌ nxusnxus uuwaꞌj yuꞌsaꞌ jiꞌphumey iꞌkwe.
5 Saꞌ txakwe dud yuꞌ peçxkanawaꞌjmeena Dxusaꞌ txajx luuçxtxiꞌs naꞌwẽk yuꞌkxpejeꞌ txãꞌsna:
Dxus yuꞌkxpehna kastigãyniꞌs açenu, adx nçxiꞌk,
Saꞌ juunaꞌ weꞌweteꞌ, nxusna ũusçxanu.
6 Txãa paꞌgatey Dxusaꞌ txajx peeygãanisatxiꞌs yuꞌkxpejeꞌk ew fxiꞌzekahn,
Saꞌ txajx luuçx yuutxiꞌs jxukaysatxku kastigaĩꞌ jĩꞌk Dxus libruteꞌ.
7 Iꞌkweꞌsxaꞌ kastigãyniꞌs mwantaĩwe, txãa paꞌgatey Dxusaꞌ iꞌkweꞌsxtxiꞌ txajx luuçx naꞌwẽk jxpeꞌjeꞌ. Miiyajkxwe: ¿Maa luuçxçxáꞌ ney yuꞌkxpehna kastigãynimeesa ũstxmanx?
8 Dxusaꞌ txajx luuçx yuutxiꞌs jxukaysatxku yuꞌkxpehna kastigaĩꞌ, nawa iꞌkweꞌsxaꞌ yuꞌkxpehna kastigãynimeesa yuuçxaꞌ, txajx luuçxmée vxitesate luuçxçxa txãꞌwẽ yuuneꞌkwe.
9 Kweꞌsx leꞌçxkuẽyteꞌ, naa kiwete kweꞌsx tata yuꞌkxpehteꞌ, kxtey nwẽeseꞌjeꞌthaꞌw naꞌ ãçxhaꞌ wejx thaakwe ew nwẽeseꞌjwaꞌj jiꞌpthaꞌw kweꞌsx Tata cieluteweꞌsxaꞌs. Txãꞌwẽ nwẽeseꞌjçxaꞌ, pçumée ĩtxi fxiꞌzewaꞌjaꞌs jiꞌphuꞌnjaꞌw.
10 Naa kiwete kweꞌsx tataweꞌsxaꞌ txãaweꞌsx ũuste maꞌwẽneꞌ wejx ew ũusutheꞌ yuꞌkxpehna jxpeꞌjwaꞌjaꞌs txãꞌwẽytxi yũuna jxpeꞌjeꞌ, naa kiwete txaçxmée fxiꞌzewaꞌjaꞌsçxáawa. Nawa Dxusaꞌ kweꞌsxtxi iiméh wala selpiwaꞌjaꞌs kaapiyaꞌjnak yuꞌkxpejeꞌ, txãawa maꞌwẽ pkal jiꞌphmeena txãꞌwẽy yuukahn.
11 Ãçxh kastigãy íina yuꞌ wala yuh akataꞌ, txãa paꞌgathaꞌw jxpaꞌgayaꞌ waꞌluꞌ. Nawa txãa kastigoꞌs jxpaꞌgaçxa ew fxiꞌzeyaꞌ piyateꞌ, wala yuh ewsaꞌ, jxpubamée weçxanak yaꞌfxiꞌzeꞌ naa paꞌga.
Dxus weꞌweniꞌs weeçxyaꞌmée mpaꞌyajkxwe
12 Txãa paꞌga waꞌlmée çxhãçxha miiyajkxwe, ewmeete fxiꞌzena ũsçxawa txãajũ mkaasehwe.
13 Txãꞌwẽ yũuçxaꞌ, dxiꞌj ewsaju peena yuꞌ jxpubameeneꞌkwe.
14 Jxukaysa yakh ew fxiꞌzewaꞌjçxáꞌs paꞌpçxuna meswe, pkalte fxiꞌzemée. Txãꞌwẽ pkalte fxiꞌzeçxaꞌ, kim yuhwa Dxusaꞌs uyyaꞌ ãjameena.
15 Dxus peeygãhçxa nweꞌwenijũyãꞌjaꞌ, wala mpaꞌyajkxwe. Txãꞌwẽ jxpaꞌyajkxçxa yuuçxáa iꞌkweꞌsx maa yuhwa txãꞌwẽ vxitesatx kaypubaꞌjna ewmée yũusa yuumeeneꞌkwe.
16 Txãꞌwẽmeꞌ, maaíi yuꞌ ptammeesa kazx pkal yũuna fxiꞌzesa wáa yuuneꞌkwe kĩhwa ewsaꞌs weeçxna ahçena. Miiyajkxwe Esauaꞌ txãꞌwẽk ewsaꞌs weeçxsa yuu, teeçx ũꞌ plaatu paꞌgaçxáa peekx wẽt fxiꞌzewaꞌjaꞌs txweyku.
17 Iꞌkweꞌsxaꞌ peekx jiineꞌkwe Esauaꞌ txãꞌwẽ yũuni eꞌsuꞌ ney bedicionaꞌs kiꞌ jxpaꞌga wẽek, nawa ũsnimeek yuu. Açaꞌ wala nxusna ũꞌnek, nawa txajx txweyniꞌs maꞌwẽ yũuçxa yuhwa kiꞌ kaasxweduꞌjni yuumeꞌ.
18 Israelweꞌsxaꞌ Sinaí thãꞌj vxiçte utxaatx kxteꞌ ipx yuuçxáak seenaꞌ behna ũsuꞌ, saꞌ seenaꞌ yuh wala ũukhũukh çxhiꞌdxna ũsuꞌk kpiꞌsx weꞌweni naꞌwẽ susna.
19 Saꞌ korneta susni vxiteꞌ txãaweꞌsxtxi jxkaahna weꞌweniꞌs wala ũukhçxa jwee yuꞌ weꞌwe kaahmeetaꞌ.
20 Txãa jxkaahniꞌ naꞌwẽk yuꞌ: Maawa naa thãꞌthe teeçx çxidaçxáawa txajana txãꞌsaꞌ kwet wãatatahçxa meeçxawa weꞌthu yãjaçxa ikhwaꞌj yuuna, kĩh tajkx maꞌk yuu nawa jĩꞌk.
21 Seenaꞌ yuh ũukhũukhsaçxáa vxyaana ũsuꞌk, txajíiçxáak Moises yuhwa naꞌjĩ: Ũukhnite yayanaçxáa ũsthu jĩꞌk.
22 Nawa iꞌkweꞌsxaꞌ txãꞌwẽsateçxáamée thaakwe seenaꞌsa tasxte utxasáa iꞌkwe: Teeçx thãꞌj Sion yaasesate Dxus ĩtxisa ũsnite, cielute Jerusalen çxhabte, angelesweꞌsx iiméh seenaꞌ kuhsa pkhaakheçxa Dxusaꞌs tuutheꞌjsaweꞌsx tasxte,
23 Dxus luuçx cieluteweꞌsx tasxte, Dxus nweꞌwenisaweꞌsx tasxte, Dxus seenaꞌ juunaꞌ jxukaysatx jxkaahsa tasxte,
24 Dxus uꞌse puutx weꞌweçxa nvxiitniꞌs kxtey kxũꞌjuꞌjwaꞌjsa Jesus tasxte, Abel ee naꞌwẽsamée Jesus ee pkawnisaꞌ thaakwe ewsate txãꞌwẽsa tasxte utxasáa iꞌkwe.
25 Txãa paꞌga wala mpaꞌyajkxwe, kweꞌsxtxi weꞌwesa cielujuweꞌsxaꞌs weeçxyaꞌmée. Miiyajkxwe, Dxus jxkaahna weꞌweni Sinaíjũweꞌsxçxáꞌs weeçxçxawa iyumeetaꞌ, açaꞌ kweꞌsxaꞌ wejx iyuyaꞌ ãjameꞌnjaꞌw, cielujũ yuu weꞌweniꞌs nwẽeseꞌjyaꞌ waꞌlçxaꞌ.
26 Dxus Sinaí thãꞌj vxiçte weꞌweniꞌ naa kiweꞌs kẽeseꞌkh. Nawa ãçxhaꞌ txãꞌwẽçxáamée naꞌjĩꞌk: Kiꞌ peena thaakwe kẽeseꞌjeꞌnja nawa kiweçxáꞌsmée, petx cielu yãꞌjçxa kẽeseꞌjeꞌnja jĩꞌk.
27 Isa ew jiyute yuꞌ, kiꞌ peena thaakwe kẽeseꞌjeꞌnja jĩçxaꞌ, Dxus vxitnisa ẽsesa yuꞌ jxuka ũsxitxna, açaꞌ ẽsesaméeçxáa neeyũutxna jĩçxaneꞌ txãꞌjĩꞌ.
28 Nawa Dxus tasxte kweꞌsx ũswaꞌj yuꞌ kẽeseꞌjnimée yuuna. Txãa paꞌga Dxusaꞌs weçxana neeweꞌwega, txajx dxiꞌpte ew yuuçxáa yũuna.
29 Txãꞌwẽmeꞌ, kweꞌsx Dxusaꞌ jxuka ivxiituwaꞌjsaꞌ ipx naꞌwẽsa.
