Hebreos 13:1-25
13 Teeçxsa naꞌwẽçxah puutx peeygãhna fxiꞌzewaꞌjaꞌs peçxkananuwe.
2 Iꞌkweꞌsx yat-su paꞌjsatx weçxana mpaꞌgawe. Txãꞌwẽ yũusaꞌ maaíiaꞌ angelesweꞌsx yuhtxwa jiyunimeete jxpaꞌgaꞌta.
3 Preesu ũssatx peeygãhna mfxiꞌzewe, iꞌkweꞌsx yuu preesu ũssa naꞌwẽ yajkxna. Pkxuuni fxiꞌzesatxwa peeygãhna mfxiꞌzewe, kweꞌsxwa kakwe jiꞌpthaꞌw naꞌ naa kiwete txãꞌwẽy pkxuuni yuuwaꞌjsathaꞌw sũhna miiyajkxwe.
4 Kabaçxa fxiꞌzeniꞌ wala yuh ewsaꞌ, txãa paꞌga kabamey yuꞌ pkal yũunuwe. Saꞌ kabayãꞌjçxaꞌ, vxitesa yakh pkal yũuna fxiꞌzewaꞌjmeꞌ. Txãꞌwẽmeꞌ, Dxusaꞌ kastigaĩna txãꞌwẽ pkal yũusatxiꞌ.
5 Vxyuçxáꞌs yajkxna fxiꞌzewaꞌjmeꞌ. Maꞌwẽkuẽ jiꞌphuni yakhçxáawa wẽt mfxiꞌzewe, txãa paꞌgatey Dxus weꞌweçxaꞌ: Bagaçxte yuhwa iꞌkweꞌsxçxáa yuutxiꞌsaꞌ nvxihtmeꞌnja jĩꞌk.
6 Txãa paꞌga txãa yuuçxáꞌs piꞌkiga, kxtey pasyujuna sũhna naꞌjĩna:
Dxusaꞌ kĩhtewa jxuka txãa yuuçxáak puꞌçxhiꞌ,
Txãa paꞌga weh yuhwa ũukhmeꞌnja naa kiwete nasa ewmée yũusatxiꞌ.
7 Dxus yuwe ptaꞌsxsa iꞌkweꞌsxtxi jxpeꞌjsatx miiyajkxwe: Txãaweꞌsx maꞌwẽ neꞌta Dxusaꞌs yajkxna fxiꞌze txãꞌwẽy mfxiꞌzewe.
8 Jesukristoꞌ bagaçxte yuhwa yuꞌpthehsameꞌ. Nyafxíiwa maꞌwẽsaga yuꞌ, saꞌ ãçxwa txãaíiçxáꞌ, saꞌ bagaçxtewa txãaíiçxáa nes yuuwaꞌjsaꞌ.
9 Txãa paꞌga iꞌkweꞌsxaꞌ fxiy kaapiyaꞌjniꞌs nwẽeseꞌjna fxiꞌzenuwe, wejxwa Dxus peeygãaniçxáꞌs ũuste jxpaꞌgaçxa çxhãçxha fxiꞌzeni ewsaꞌ, açaꞌ ũꞌnisu jxkaahnisaꞌ bagaçxte yuhwa selpiwaꞌjsameꞌ txãꞌwẽsatx nwẽeseꞌjsaweꞌsxtxiꞌs.
10 Iꞌkweꞌsxaꞌ ew miiyajkxwe altal jiꞌpthaꞌw txãꞌsaꞌ. Txãa altalteweꞌsxaꞌs ũꞌweꞌçmeetaꞌ kxtee selpisaaweꞌsxaꞌ.
11 Pkalsaweꞌsx juꞌgu weꞌwe puꞌçxsa judiuꞌ tajkx ikhnisa eeaꞌs Dxus yuuçxáa ũsni jĩnitek txajxaꞌ jxũna uꞌjweꞌ jxukaysa pkaltxi peltunãyni yuukahn, nawa takx kakwe yuutxiꞌsaꞌ txajũ jxũna uꞌjçxa ekajutx kabuꞌ.
12 Jesuswa txãꞌwẽyku çxhab ekaju kasehçxa uuna ũsuꞌ, txajx eeju nasaa pkaltxiꞌ jxuka peltunãyyaꞌ.
13 Txãa paꞌga kweꞌsxwa Dxusna neeweꞌwena ũsni yat nyafxiiweꞌsxaꞌs nvxihtçxa, Jesus yakh fxiꞌzeyaꞌ kasejega, txãawa maꞌwẽga pxthaa yuu txãꞌwẽy yaaçeni yuuyaꞌ.
14 Kweꞌsxaꞌ nyafxíi ũsni yataꞌs nvxihtçxa, çxhab bagaçxte yuhwa pçuwaꞌjsamée ũsna txãꞌsna pakwena ũsthaꞌw, naa kiweteꞌ bagaçxte yuhwa pçuwaꞌjsamée çxhab jiꞌphmeethaꞌw naa paꞌga.
15 Txãa paꞌga Dxusaꞌs tuutheꞌjna nes yuuwaꞌj jiꞌpthaꞌw Jesukristoꞌs piꞌkxçxa bagaçxtewa. Dxusaꞌs weçxana tajkx ikhçxa kabupkaçxte, kweꞌsx ũusuh jxuka yajkxçxa txajx yaseꞌs kxsusna weçxana nes yuuwaꞌj jiꞌpthaꞌw.
16 Txãꞌwẽ yũusaꞌ kĩhçxáawa iꞌkweꞌsx jiꞌphuniꞌs vxitesatx jxtxuhdena fxiꞌzewaꞌjaꞌs peçxkananuwe, txãa paꞌgatey txãꞌwẽ yũuniꞌsku Dxusaꞌ weçxáꞌ.
17 Saꞌ iꞌkweꞌsxtxi kaapiyaꞌjna jxpeꞌjsatxiꞌs kxtey yuuna mwẽeseꞌjwe, txãa paꞌgatey txãaweꞌsxaꞌ iꞌkweꞌsx ũustxi vxituweꞌsxte thegsataꞌ. Txãaweꞌsxaꞌ cielute Dxus tasxte utxaaçxa ptaꞌsxwaꞌj jiꞌphtaꞌ, txãasatx txãꞌwẽ yũꞌ. Açaꞌ txãaweꞌsx mjĩiniꞌs weeçxsa naꞌwẽ yuunuwe, ewçxáa yũuwaꞌjaꞌs mpaꞌpçxuwe. Txãꞌwẽ yũumeeteꞌ, txãaweꞌsx mjĩiniꞌ iꞌkweꞌsxtxiꞌs kĩhte yuhwa selpiimeena.
18 Kĩhtewa ewçxáa fxiꞌze wẽeçxa bagaçxte yuhwa pkalte yuꞌ fxiꞌzesameethaꞌw, naa paꞌga kweꞌsx paꞌgate Dxus yakh mpuutxweꞌwewe.
19 Iꞌkweꞌsxtxiꞌs Dxus yakh puutx weꞌwe jxpiꞌkiꞌth, kxah Dxusaꞌ adxaꞌs txaçxmeyna kiꞌ kaasxweduꞌjuna iꞌkweꞌsx yakh ũsyaꞌ.
Yuwe weçxaa kaahni
20 Jesukristoꞌ iiméh ew txajx nasatx jxpeꞌjsa yuꞌk, txajx eek txãꞌwẽ uꞌse puutx weꞌweni bagaçxte yuhwa yuꞌpthehwaꞌjmeꞌs vxitçxa nvxiitniꞌs kxtey kxũꞌjuꞌjwaꞌjsa yuu.
21 Saꞌ Jesukristo uutewa kiꞌ ĩtxi vxit-sa Dxusaꞌ iꞌkweꞌsxtxiꞌs kĩhte yuhwa peejxmée ewçxáa kaafxiꞌzeꞌjena, txajx jxthãasniꞌs kxtey yuukahn. Saꞌ txãꞌ iꞌkweꞌsxtxi maꞌwẽ yuuweçxtewa kxtey yuuna, Jesukristo puꞌçxte txajx dxiꞌpte ew yũusa yuꞌs. Jesukristo yuuçxáa bagaçxtewa jxtuhthesa yuuna.
22 Yakhthẽꞌjweꞌsxtxi neeweꞌweꞌth, waꞌlmée jxpaꞌgakahn maz yuwe jxuꞌjmeekuẽ yuꞌkxpehna fxiꞌjniꞌs.
23 Saꞌ ptaꞌsxiçthu kweꞌsx yakhthẽꞌj Timoteoꞌ karceluh txhweteni yãꞌj ũsaꞌ, saꞌ dud wáa paꞌjana, açaꞌ peꞌjçxa yuweꞌnja iꞌkweꞌsxtxi puutx uyyaꞌ yuhçxaꞌ.
24 Dxuus yatte iꞌkweꞌsxtxi jxpeꞌjsaweꞌsxtxiꞌ jxukaysatx yuwe meen weçxawe, saꞌ Dxus yakh fxiꞌzesaweꞌsxtxiwa txãꞌwẽy. Italiajũweꞌsxwa yuwe weçxaa kajaꞌtx.
25 Iꞌkweꞌsx jxukaysatx Dxusaꞌ puꞌçxna nes yuuna.
