Hebreos 2:1-18
2 Txãa paꞌga wala jxpaꞌyakxwaꞌj jiꞌpthaꞌw, naꞌwẽ Dxus Nçxiꞌk yuu kweꞌsxtxi weꞌwete yuwe ewsaꞌs wẽseꞌthaꞌw txãajũ txuteeyaꞌmée.
2 Dxus yuweꞌs angelesweꞌsxçxáa ptaꞌsxni yuhwa ĩsxiini yuumée kxteyku yuu. Txãa paꞌgaíiçxáatx nwẽeseꞌjmée pkalte wetesaweꞌsxaꞌ kastigãyni yuu txãaweꞌsx ãhmée yũupaꞌga.
3 Txãaçxáa yuhwa kxteyku yuu, açaꞌ kweꞌsx ewte neeyũuwaꞌj txakwe walasaꞌs Dxus Nçxiꞌk Kristo txajx yuweju yuuk ptaꞌsx txãꞌsaꞌ jxpaꞌyakxmeeçxaꞌ, ¿maꞌwẽ Dxus kastigo seenaꞌsajũ iyukxthaꞌw? Açaꞌ Kristo ptaꞌsxniꞌs nyafxte wẽseꞌjsaweꞌsxaꞌ kweꞌsxtxitx ptaꞌsx, isasa yujaꞌ jĩna.
4 Txãaweꞌsxçxáa isasa yujaꞌ jĩmeetaꞌ, Dxus yuuk isasa yuhna sũhna jiyukahn kim yuhwa ãjanimeesaꞌs kaavxyaꞌjaꞌj. Saꞌ Dxus Espiritu puꞌçxte kĩhte yuhwa sxiigmée selpiina fxiꞌzewaꞌjtx ũsku teeçxsa naꞌwẽçxah, txajx ũs wẽeni yuꞌs jxuka.
Jesukristoꞌ kweꞌsx yakh pxakhsa naꞌwẽk yuu
5 Naꞌwẽ Kristoçxaçxáꞌs nwẽeseꞌjwaꞌj en paꞌjana jĩꞌthaꞌw txãa ente jxkaahwaꞌjaꞌs angelesweꞌsxtxi nvxihtmeꞌ Dxusaꞌ.
6 Txãꞌwẽ meek yuꞌ txajíiçxáak naꞌjĩna teeçx ajkhẽ ptaꞌsxiꞌ Dxus librute:
Nasaꞌ ¿maꞌwẽsana açga txãꞌsaꞌ peeygãjaꞌ?
Nasa pçuwaꞌjsaçxáꞌs ¿kĩjxaꞌga txakwe wala paꞌpçxuna yaakiꞌ?
7 Nasaꞌs maz en yuꞌ angelesweꞌsxte ãhmeekwesa naꞌwẽg nvxiht,
Nawa jxthaakwe walasa yuuwaꞌj vxitçxag nvxiht,
Txãꞌwẽ yũuçxa iidx vxitnitxiꞌ txãaçxaçxáa jxkaajxaꞌ ãjawaꞌjaꞌs ũsgu.
8 Kĩhwa jxuka txãaçxaçxáꞌs nwẽeseꞌjwaꞌjaꞌs vxitgu jĩꞌk. Dxusaꞌ txãꞌwẽ jxuka txãaçxaçxáꞌs nwẽeseꞌjwaꞌjaꞌs vxit yãꞌjçxaꞌ, kĩh yuhwa nwẽeseꞌjwaꞌjsamée yuꞌ nvxihtmeꞌ. Txãꞌwẽtewa ãçxpkaçx txãaçxaçxáꞌs kĩhwa jxuka nwẽeseꞌjni yuꞌs iiuymeethaꞌw.
9 Naꞌwẽ maz en yuꞌ angelesweꞌsxte ãhmeekwesa vxitku txãꞌ Jesusaꞌ txãꞌsnak Dxusaꞌ kweꞌsx jxukaysa paꞌgate uuwaꞌjsa vxit. Nawa ãçxhaꞌ Dxus pukate uꞌpaꞌ, txãaçxaçxáa jxkaahwaꞌjsa yuuçxa txãꞌwẽ pxthaa yuuçxa uupaꞌga.
10 Kĩjkĩhnawa jxuka vxit-sa Dxusku txajx luuçx yuuwaꞌjsa yuutxiꞌ jxuka nweꞌweçxa txajx tasxte nuypaꞌjyaꞌ Jesukristoꞌs pxthaa yuuçxa uuwaꞌj vxit, kĩhte yuhwa sxiigmée nweꞌwesa yuukahn.
11 Txãꞌwẽ pkaltxi peltunãynisa vxiteꞌ pkaltxi peltunãysa txãa yakh eꞌzsaꞌ teeçx Neyteweꞌsxçxaçxáataꞌ txãa Neyaꞌ Dxusaꞌ. Txãꞌwẽ teeçx Neyteweꞌsxçxáa neꞌtkaꞌw, txãa paꞌgak Dxus Nçxiꞌkaꞌ kweꞌsxtxiꞌs thaamemée Adx nyakh jĩna weꞌweꞌ.
12 Txãꞌsnak Dxus librute naꞌjĩꞌ:
Idx maꞌwẽsatewa adx nyakhweꞌsxtxi ptaꞌsxiꞌnja,
Saꞌ adx nyakhweꞌsx ksxavxyte idxaꞌs weçxana tuutheꞌjeꞌnja jĩꞌk.
13 Saꞌ vxite ajkhẽwa naꞌwẽk weꞌweꞌ:
Adxaꞌ Dxusçxáana yajkxna fxiꞌzeꞌnja.
Saꞌ kiꞌkin weꞌweçxaꞌ:
Dxus ũsni luuçx ayte ũstaꞌ txãa yakh ayte ũsthu jĩꞌk.
14 Nasawa pxakhsa jĩnisaꞌ maazkuẽeçxawa kxazíi teeçx ney kakwe petx ee jxpaꞌgaçxa yuuçxáatx pxakhsa yuꞌ, txãa paꞌgak Jesuswa pxakhsa yuuyaꞌ nasaa kakweꞌs jxpaꞌga uuyaꞌ ãjayaꞌ. Txãꞌwẽ yũuçxak kluuste uuçxa uuwaꞌj vxit-saꞌs knay. Txãꞌwẽ nasatx uuwaꞌj vxit-saꞌ eçxthẽꞌkh yuꞌ.
15 Txãꞌwẽ yũuçxak Jesusaꞌ jxukaysatx nweꞌwe bagaçxtewa uuwaꞌjaꞌs ũukhna yuuçxáa fxiꞌzenijũ.
16 Txãꞌ angelesweꞌsxtxi puꞌçxyaꞌ kĩhmeꞌ, wejxwa nasa Abrahan jiꞌjtxku puꞌçxyaꞌ kĩh.
17 Txãꞌwẽ nasatx puꞌçxyaꞌ ãjayaꞌk kweꞌsx naꞌwẽsa yuu kĩhtewa jxuka. Txãasak nyakh naꞌwẽ yuuna paꞌjçxa kweꞌsxtxi peeygãawaꞌjaꞌs jiꞌphuçxa pkalsaweꞌsx paꞌgate Dxus tasxte weꞌwewaꞌjsa yuu. Saꞌ nasaa pkaltxi jxuka peltunãyyaꞌk pxthaa yuuçxa uuwaꞌj jiꞌphuna ũsuꞌ.
18 Txãꞌwẽ nasaa kakweꞌs jxpaꞌgaçxak pkalte kweꞌsx çxhãçxhamée fxiꞌzeniꞌs jxuka jiyu. Txãasa ãçxhaꞌ pkalte çxhãçxhamée fxiꞌzesatxiꞌs kĩhte yuhwa sxiigmée nweꞌweyaꞌ ãjawaꞌjsaꞌ.
