Hebreos 3:1-19
3 Yakhthẽꞌjweꞌsx iꞌkweꞌsxaꞌ Dxus paꞌyanisa iꞌkwe yuu txãa jĩi yuuwaꞌjsa, txãa paꞌga wala ew mjiyuwe Kristo Jesusaꞌs. Txãꞌ Dxus kaahnisaꞌ, pkalsaweꞌsx paꞌgate Dxus tasxte weꞌwewaꞌjsa, saꞌ Dxus yakh kweꞌsx fxiꞌzewaꞌjaꞌs ptaꞌsxsaꞌ.
2 Jesusaꞌ kĩhtewa jxuka kxtey yuuk maꞌwẽ yũuwaꞌjaꞌs neꞌ Dxus jxkaah txãꞌsaꞌ jxuka. Moiseswa maꞌwẽga Dxus luuçxtxi jxpeꞌjwaꞌjaꞌs jxuka kxtey yuu, txãꞌwẽyku Jesuswa kxtey yuu.
3 Nawa Jesusçxáa Moiseste thaakwe jxtuhthesaꞌ, maꞌwẽga yat namuçxáa jxtuhthe yuꞌ açaꞌ yatte selpiisáa yuꞌ jxtuhthe meek yuꞌ, txãꞌwẽy Jesusçxáa jxtuhthesaꞌ.
4 Yataꞌs kimçxáawa txahte yujk yat yuuna paꞌjaꞌ, nawa namu yuꞌ Dxusaꞌ.
5 Moisesaꞌ selpiisaaçxáaçxawa txãꞌwẽk kĩhte yuhwa peejxmée jxuka kxtey yuu Dxus luuçxtxi jxpeꞌjna, nawa txajx selpiini yuꞌ eꞌsu Dxus kĩh yũuyaꞌwatewa txãatx kaajiyuꞌjsaçxáak yuꞌ.
6 Naapkaçxhaꞌ Kristoꞌ selpiisamée Dxus Nçxiꞌk yuuk yuꞌ, txãasa Dxus luuçxaꞌ kweꞌsxthaꞌw txãatx kĩhte yuhwa peejxmée jxpeꞌjwaꞌjsaꞌ, kweꞌsx yuu uu entepkaçx txutemée txãꞌs yuuçxáa weçxana fxiꞌzete yuꞌ.
Dxus luuçx, Dxus tasxte jxkaasena ũswaꞌj
7 Txãa paꞌga txãa yakhçxáa fxiꞌzewaꞌjaꞌs naꞌwẽk ptaꞌsxiꞌ Dxus Espirituꞌ:
Ãçxh Dxus weꞌweniꞌs wẽseꞌjyãꞌjçxaꞌ,
8 Iꞌkweꞌsx ũuste waꞌl yaakxnuwe. Iꞌkweꞌsx yaçgaweꞌsxwa naꞌwẽtx waꞌlna ũsuꞌ txãꞌwẽ yũunuwe.
Txãꞌwẽ waꞌlçxa txãaweꞌsxaꞌ Dxusaꞌs kvxissatx naꞌwẽ yuu nasa uꞌpnimée kiwete.
9 Iꞌkweꞌsx yaçgaweꞌsxaꞌ kxtee ũsçxaꞌ,
Txakwe kuarenta anxupkaçx txãaweꞌsxtxi adx kĩjkĩhtewa ew yũuna puꞌçxniꞌs uyçxawa,
Adxaꞌs waꞌltxi.
10 Txãa paꞌgath txãa nasa yakh wẽt fxiꞌzeyaꞌ ãjameeçxa naꞌjĩna weꞌwe:
Adx kaapiyaꞌjniꞌs waꞌlçxa, txãaweꞌsx ũuste jxpubanaçxáatx fxiꞌzeꞌ.
11 Açaꞌ txãꞌwẽ yũupaꞌga, txãaweꞌsxaꞌ adx yakh jxkaasena ũswaꞌthe uꞌkameetxna jĩnath jurãy jĩꞌk.
12 Txãa paꞌga, yakhthẽꞌjweꞌsx, wala mpaꞌyajkxwe, txãꞌwẽ Dxus weꞌweniꞌ weh yuhwa isameesana sũhna ewmée yajkxçxa Dxus ĩtxisa tasxu txuteeyaꞌmée.
13 Txãꞌwẽ yũumée, jweeíiçxáa çxhãçxha yaakxwaꞌjaꞌs een isa puutx puꞌçxna mfxiꞌzewe, kxah iꞌkweꞌsxtxiꞌ maa yuhtxwa pkalaꞌ kaypubaꞌjmeena, açaꞌ iꞌkweꞌsx ũuste ewmée yaakxwaꞌjaꞌs jiꞌphumeeneꞌkwe.
14 Nyafxíiwa maꞌwẽtkaꞌw Kristo yakh jxpubamée fxiꞌze txãꞌwẽesa nmeh entepkaçx fxiꞌzeçxaꞌ, txãa yakh ũswaꞌjaꞌs jiꞌphuꞌnjaꞌw.
15 Txãꞌwẽ waꞌlkahmen naꞌwẽk weꞌweꞌ:
Ãçxh Dxus weꞌweniꞌs wẽseꞌjyãꞌjçxaꞌ,
Iꞌkweꞌsx ũuste waꞌl yaakxnuwe. Iꞌkweꞌsx yaçgaweꞌsxwa naꞌwẽtx waꞌlna ũsuꞌ txãꞌwẽ yũunuwe jĩꞌk.
16 ¿Kimta txãꞌwẽ Dxus yuweꞌs wẽseꞌjçxawa eꞌsu yãꞌjaꞌ waꞌlna ũsuꞌ? Egipto kiwejũ Moises kutxiꞌkh txãaweꞌsx jxukaysatx txãꞌwẽ yũu.
17 Dxusaꞌ ¿kim yakhga kuarenta anxupkaçx pxũuskwete fxiꞌzena ũsuꞌ? Pkalte wetepaꞌga nasa uꞌpnimée kiwete uutx txãaweꞌsx yakhku txãꞌwẽ pxũuskwete fxiꞌzena ũsuꞌ.
18 Dxusaꞌ ¿kimtxiga txãꞌwẽ adx yakh jxkaasena ũsyaꞌ uꞌkameetxna jĩna weꞌwe? Nwẽeseꞌjsameetxku txãꞌjĩna weꞌwe.
19 Dxus weꞌweniꞌs nwẽeseꞌjmeeçxaꞌ, uꞌkayaꞌ ãjameetaꞌ txãꞌsaꞌ ãçxhaꞌ jiyuthaꞌw.
