Hebreos 4:1-16
4 Txãa paꞌga wala jxpaꞌyakiga. Txãꞌwẽmeꞌ, iꞌkweꞌsxwa maaíi yuꞌ ivxiituwáꞌkwe Dxus yakh jxkaasena ũswaꞌthe paꞌjwaꞌjaꞌs jiꞌphçxawa.
2 Txãaweꞌsxtxiwa maꞌwẽga jxkaasena ũswaꞌthe paꞌjwaꞌjaꞌs ptaꞌsxni yuu, txãꞌwẽy kweꞌsxtxiwa ptaꞌsxnik yuu Dxus yuwe ewte nvxiitwaꞌjaꞌs. Nawa txãaweꞌsxtxiꞌ txãa ptaꞌsxniꞌ selpiimeꞌ, Dxus yuweꞌ isa kxtey yuuwaꞌjsana sũhna ũusuh jxuka nwẽeseꞌjmeetaꞌ naa paꞌga.
3 Dxus weꞌweçxa: Adx yakh jxkaasena ũswaꞌthe uꞌkameetxna jĩna jurãyku. Nawa kweꞌsx yuꞌ pejka uꞌkawaꞌjsathaꞌw, Dxus yuweꞌ isa yuhna sũhnathaꞌw jxpaꞌgaçxa nwẽeseꞌj naa paꞌga. Naꞌwẽ adx yakh jxkaasena ũswaꞌj jĩna weꞌwek txãa yuꞌ nyafxiitey naa kiweꞌs vxitna jxãꞌjçxa jxkaasek, saꞌ ãçxpaꞌjwa jxkaasena ũsaꞌ kxte uꞌkawaꞌjaꞌs weꞌweçxak txãꞌjĩꞌ.
4 Txajx mjĩiaꞌs vxitna jxãꞌjçxa jxkaaseniꞌs Dxus librute naꞌjĩnak weꞌweꞌ:
Dxusaꞌ txajx mjĩiaꞌs jxuka jxãꞌjçxaꞌ, siete ensaꞌs jxkaasek jĩꞌk.
5 Saꞌ kxte txajx jxkaaseniꞌs weꞌweçxak:
Adx yakh jxkaaseyaꞌ uꞌkayaꞌ ãjameetxna jĩꞌ.
6 Makwe txãꞌwẽtewa, maaíi yuꞌ kxtee jxkaasena ũswaꞌthe uꞌkatxna. Nyafxiiweꞌsxaꞌ ewte neeyũuwaꞌjaꞌs ptaꞌsxte wẽseꞌjçxawa, Dxusaꞌs nwẽeseꞌjmeeçxa jxkaasena ũswaꞌthe uꞌkameetaꞌ.
7 Txãꞌwẽ yũuni en skhẽwniijũ wala txaçxtek Dxusaꞌ Davxidaꞌs naꞌjĩna kweꞌweꞌj:
Ãçxh Dxus weꞌweniꞌs wẽseꞌjyãꞌjçxaꞌ,
Waꞌlna nwẽeseꞌjmée yuꞌ yuunuwe jĩꞌk.
Txãa yuꞌ ãçxh naa ensuweꞌsxwa txãꞌwẽy yũuweꞌsxtek txãꞌjĩ.
8 Jxkaasewaꞌj jĩna weꞌweꞌk txãa jxkaasewaꞌjaꞌ Joswé enteweꞌsxwaçaꞌ, Dxusaꞌ eꞌsu txaçxte kiꞌ weꞌwewaꞌjmeeneꞌ yuꞌ ãçxh jĩna.
9 Txãa paꞌga jxkaasewaꞌj thaakwe ewsa nee ũsíiçxáꞌ Dxusaꞌs nwẽeseꞌjsaweꞌsx jĩi.
10 Txãa paꞌgatey Dxus yakh jxkaasewaꞌthe uꞌkasaꞌ txãaweꞌsx mjĩinijũ jxukatek jxkaaseꞌ, Dxuswa maꞌwẽga txajx mjĩiniꞌs jxãꞌjçxa jxukate jxkaase txãꞌwẽy.
11 Txãasa Dxus yakh jxkaasewaꞌthe uꞌkayaꞌ paꞌpçxuwaꞌj jiꞌpthaꞌw, Dxus weꞌweniꞌs nwẽeseꞌjmeetaꞌ txãaweꞌsx naꞌwẽ yũumée.
12 Txãꞌwẽmeꞌ, Dxus weꞌweniꞌ ĩtxisaꞌ, kĩhtewa jxuka seelpisa. Dxus weꞌweniꞌ kçxilx pdxiꞌp seenaꞌ zeksate jxthaakwe zeksaꞌ, txãasak ũus dxiite kĩh pkal jiꞌphtewa jxuka ãate kpajkxweꞌweꞌ. Saꞌ ũusteçxáa yaakxni kĩh yuhnawa paaçte nvxiituꞌçmeꞌ.
13 Dxus vxitnisaꞌ kĩh yuhwa txajx dxiꞌpte paaçte uynimeete yuꞌ neeyũumeetxna. Kĩjkĩhwa jxuka ãateçxaçxáa ũstaꞌ kweꞌsxtxi kastigãywaꞌjsa ũsaꞌ txajx dxiꞌpte.
Dxus tasxte pkalsaweꞌsx juꞌgu weꞌwe puꞌçxsaꞌ Jesusaꞌ
14 Dxus Nçxiꞌk Jesus txãꞌwẽ Dxus tasxte kweꞌsx pkalsaweꞌsx juꞌgu weꞌwe puꞌçxwaꞌjsa cielute uꞌkak, txãa paꞌga txajx tasxuh txutemée fxiꞌzega.
15 Txãa paꞌgatey cielute kweꞌsx juꞌgu yuusaꞌ txãa yuꞌ pkalte yuꞌ wetemeeçxawa, pkalte kweꞌsx çxhãçxhamée fxiꞌzeni yuꞌsaꞌ jxuka jiyuk, txãasa kweꞌsx ãhmeekwesatx jxuka peeygãhna puꞌçxwaꞌjsaꞌ.
16 Txãa paꞌga Dxus tasxte ũukhmée utxaaga, Dxus peeygãaniꞌs jiꞌphuçxa kweꞌsx thẽyte fxiꞌzenijũ nweꞌweni yuuyaꞌ kĩh entewa.
