Hebreos 5:1-14
5 Pkalsaweꞌsx juꞌgu weꞌwe puꞌçxwaꞌjsa txhitxhçxa naa kiwete nvxiitnisaꞌ txãa íiçxáa pkalpaꞌga tajkx ikhçxa Dxus altalte kabwaꞌjsaꞌ.
2 Pkalsaweꞌsx juꞌgu weꞌwe puꞌçxsaꞌ txãa íiwa pkalte nxuste fxiꞌzesaçxaꞌ, nxuste fxiꞌzeni maꞌwẽtewa jxuka jiiaꞌ. Txãasa jiimeekwesa vxituna fxiꞌzesatx wala peeygãhna juꞌgu yuuwaꞌjsaꞌ.
3 Saꞌ txãa íiwa ãhmeekwe pkalsaçxaꞌ, peekx pkalpaꞌgawa tajkx ikhçxa Dxus altalte kabwaꞌj jiꞌphuꞌk, vxitesa paꞌgatewa txãꞌwẽy.
4 Pkalsaweꞌsx juꞌgu weꞌwe puꞌçxwaꞌjsaꞌ nasaa pweꞌsxçxáa yajkxçxa kiꞌpnisa yuꞌçmeetaꞌ. Txãaweꞌsxtxiꞌ Dxusku txhitxhçxa nvxiituꞌ, Aaronwa maꞌwẽga Dxus txhitxhnisa yuu txãꞌwẽy.
5 Açaꞌ Kristowa txãꞌwẽy yũunisaíiçxáak yuu. Txãꞌ peekxçxáa yuꞌ pkalsaweꞌsx juꞌgu Dxus tasxte weꞌwesa yuumeꞌ. Txãꞌsaꞌ Dxusku txhitxhçxa nvxiht. Txajíik Dxus librutewa naꞌjĩꞌ:
Dxus weꞌweçxaꞌ:
Idxaꞌ adx Nçxiꞌkgu,
Txãa paꞌgath ĩtxi yuuwaꞌjaꞌs ãçxhaꞌ ũs jĩnak weꞌweꞌ.
6 Saꞌ vxite ajkhẽwa Dxus librute naꞌjĩnak weꞌweni yuu:
Idxaꞌ pkalsaweꞌsx juꞌgu Dxus tasxte weꞌwe puꞌçxwaꞌjsag bagaçxtewa,
Melkisedekwa maꞌwẽga yuu txãꞌwẽysa jĩꞌk.
7 Kristoꞌ naa kiwete ũsçxaꞌ, txajx uuwaꞌj en jxuka utxaaçteꞌ, Dxus nweꞌweyaꞌ ãjawaꞌjsa dxiꞌpte wala pxthaa sus neeweꞌwek ũꞌnena, açaꞌ Dxusaꞌ wẽseꞌkh txajx pxthaa weꞌweniꞌs.
8 Kristoꞌ makwe Dxus Nçxiꞌkçxawa, iiméh wala pxthaa yuuwaꞌjaꞌs jiyuçxa, nwẽeseꞌjwaꞌjaꞌswa piyak.
9 Txãꞌwẽ kĩh pxthaa yuunisatewa jxuka jiyuna jxãꞌjçxak, bagaçxtewa nweꞌwena nes yuuwaꞌjsa yuuna paꞌj jxukaysa nwẽeseꞌjsa yuutxiꞌs.
10 Txãꞌwẽ yũunijũk Dxusaꞌ pkalsaweꞌsx juꞌgu weꞌwe puꞌçxwaꞌjsa vxit, Melkisedek naꞌwẽysa.
Dxusaꞌs jiiçxa txajũ txuteeteꞌ ũukhũukhsaꞌ
11 Naꞌwẽ ptaꞌsxiꞌth txãꞌsaꞌ wala weꞌwewaꞌj jiꞌphíiçxáath, nawa iꞌkweꞌsxaꞌ jiyuyaꞌ ãjaꞌçmeeiꞌkwe, açaꞌ wala thẽyaꞌ ew ptaꞌsx wẽete yuꞌ.
12 Dxusaꞌs jiyuni txakwe txaçxteꞌ, iꞌkweꞌsx yuu kaapiyaꞌjsa yuupkaçxte, nee peejíiçxáa iꞌkwe Dxus kaapiyaꞌjni thẽymeekwesaꞌs kiꞌ peena ew ptaꞌsxwaꞌj. Iꞌkweꞌsxaꞌ luuçx naꞌwẽysaçxáa iꞌkwe, kĩh ũꞌaꞌswa ũꞌwepkaçxte, luuçx ũꞌni leçxiꞌsçxáa iꞌkwe ũꞌweꞌ.
13 Txãꞌwẽ leçxiçxáꞌs ũꞌsaꞌ luuçx leꞌçxkwe kçxuꞌçxuꞌjnisa naꞌwẽsaçxáataꞌ, txãasatx Dxus yakh ew fxiꞌzewaꞌj yuꞌsaꞌ jiyuꞌçmée.
14 Nawa thẽꞌjsa yãꞌjaꞌ thẽꞌjsa ũꞌnisatx jxpaꞌgawaꞌjaꞌ, kĩh ewsatxna vxiteꞌ kĩh ewmeesatxna nawa txãatx jxuka jiyuyaꞌ.
