Hebreos 6:1-20
6 Txãa paꞌga Kristo kaapiyaꞌjni nyafxte thẽymeekwesatx ptaꞌsxthaꞌw txãa yakhçxáa fxiꞌzemée, jweeíiçxáa wala piyana uꞌjwaꞌj jiꞌpthaꞌw, sxiigna fxiꞌzeyaꞌmée. Nyafxte kaapiyaꞌjnisa yakhçxáa yuꞌ fxiꞌzemeeyuuga. Txãꞌ naataꞌ: pkaltxi nvxihtçxa Dxus tasxte sxawedni, Dxusaꞌ ũsyuhna sũhna ũusuh jxuka yaakxni,
2 yuꞌte yaꞌbautisãyni, Dxusna selpiwaꞌjsatx txhitxhçxa Dxus kusete neeweꞌweni, kiꞌ ĩtxi yuuwaꞌjaꞌs kaapiyaꞌjni, Dxus kastigo iiméh seenaꞌte paꞌjwaꞌjaꞌs ptaꞌsxni, txãa nyafxte kaapiyaꞌjnisataꞌ.
3 Dxus puꞌçxteꞌ jweeíiçxáa piyana uꞌjweꞌnjaꞌw.
4 Txãꞌwẽmeꞌ, maawa Dxus yakh fxiꞌzewaꞌjaꞌs ew jiisa, Dxus peesku ewte neeyũuwaꞌjaꞌs txãꞌsnawa ew jiisa, Dxus Espirituꞌswa ũuste jxpaꞌgasa,
5 txãꞌwẽy Dxus yuwe ewsatewa jiisa, nmeh enteꞌ Kristoçxaçxáa jxkaahwaꞌjaꞌswa jiisa,
6 txãꞌwẽ kĩhtewa ew jiisa Dxus tasxuh txutesaatxiꞌ peena kaasxweduꞌj wẽete yaꞌãjaꞌçmeꞌ. Txãa paꞌgatey txãaweꞌsxaꞌ Dxus Nçxiꞌkaꞌs ew jiiçxawa ahçena weeçxçxa kluuskhẽ kiꞌ kiꞌpsa naꞌwẽ yuusaataꞌ naa paꞌgak yaꞌãjaꞌçmée.
7 Txãaweꞌsxtxiꞌ naꞌwẽthaꞌw kaajaꞌdaꞌjaꞌ: Kiwe mjĩinisaꞌ nus paꞌjni yuꞌaꞌs jxuka çxazxateꞌ, uuthasx ewsak kasejeꞌ, Dxus puꞌçxte mjĩisaweꞌsx jĩi.
8 Nawa ewsa kasehmée jxũth kĩhte yuhwa seelpimeesaçxáa buçxateꞌ, kiwe txãꞌwẽsaꞌs nmehteꞌ thegnimée yuuna. Txãꞌwẽy maawa Dxusaꞌs jiiçxa kiꞌ txutesáꞌ kĩhte yuhwa seelpimée, ivxiituni yuutxna.
Dxusaꞌ kxtey yuuna sũhniisak çxhãçxha kaafxiꞌzeꞌjeꞌ
9 Nawa iꞌkweꞌsx yuꞌ txãꞌwẽ yuumée, Dxus nweꞌwenijũyãꞌjaꞌ jweeíiçxáa wala ew yũuna fxiꞌzeneꞌkwe sũjuꞌth.
10 Iꞌkweꞌsx txãꞌwẽ ew yũuna yakhthẽꞌjweꞌsxtxi peeygãhna puꞌçxna ãate kaavxyaꞌjaꞌjna ãçxpkaçx txãꞌwẽ ew yũuna nes txãꞌwẽ iꞌkwe, naa paꞌga Dxusaꞌ iꞌkweꞌsx ew yũuniꞌs peçxkanameena.
11 Nawa adxaꞌ nmeh entepkaçx txãꞌwẽ kaavxyaꞌjaꞌjna paꞌpçxuna nesthu yũu jxthãasuꞌ teeçxsa naꞌwẽçxah. Txãꞌwẽ yũuçxaꞌ, kxulmée paꞌpçxusa yuuneꞌkwe.
12 Waꞌlwaꞌj yuꞌsaꞌ leꞌçxkwe yuhwa jiꞌphunuwe, yaçgayweꞌsxwa maꞌwẽta Dxusaꞌ kxtey yuuna sũhna ũusuh jxuka yajkxçxa Dxus peesniꞌs jxpaꞌga txãꞌwẽy myũuwe.
13 Miiyajkxwe, Dxusaꞌ Abrahanaꞌs puꞌçxwaꞌjaꞌs puutx weꞌweçxaꞌ peekx yaseꞌsíiçxáa kxsusna jurãyku, vxite txãate jxthaakwesa yuꞌ meek yuꞌ naa paꞌga.
14 Saꞌ naꞌjĩk: Isa, iidx jiꞌjtx wala nuypehnana idxaꞌs puꞌçxwaꞌjsath jĩnak jurãy.
15 Açaꞌ Abrahanaꞌ waꞌlmée ũythasçxaꞌ, jxpaꞌgak Dxus maꞌwẽneꞌ yũuyaꞌ neeyũu txãꞌsaꞌ jxuka.
16 Açaꞌ nasawa juraĩççxaꞌ, txãaweꞌsxte jxthaakwe walasaꞌs kxsusnatx juraĩꞌ, kxtey yuꞌnja jĩna. Txãꞌwẽ yũuteꞌ, ĩsxiimée kxtey yuuna sũhwaꞌjçxáak yaꞌjiꞌphuꞌ.
17 Txãa paꞌgak Dxuswa txãꞌwẽy jurãy: Adx puutx weꞌweniꞌs kxtey yuꞌnja jĩna. Dxusaꞌ txajx puutx weꞌweniꞌs leꞌçxkweçxáa yuhwa yuꞌpthehmée kxtey yuuyaꞌk ũsuꞌ, açaꞌ txãꞌsna jxpaꞌgawaꞌjsaꞌ kxtey yuuyujuna sũhnaçxáa ũskahnku txãꞌwẽ yũu.
18 Dxus jurãyniꞌ eꞌz jwedtxi yuꞌ: Kxtey yuꞌnja jĩna weꞌweni vxiteꞌ txajx yaseꞌs kxsusni. Txãa paꞌga txajx puutx weꞌweniꞌ yuꞌpthehmeetxna. Kxahthaꞌw Dxusaꞌ txajx puutx weꞌweniꞌs kxtey yuuyujuna Dxusna pakwesaatxiꞌs sũhna çxhãçxha yaakxwaꞌjaꞌs jiꞌphuꞌ.
19 Dxusaꞌ txajx puutx weꞌweniꞌs kxtey yuuna sũhnisak kweꞌsxtxiꞌs jxpubamée çxhãçxha kaafxiꞌzeꞌjeꞌ, txãa paꞌgatey kweꞌsxaꞌ cielute ũssa Dxus puutx weꞌweni kxtey yuuwaꞌjaꞌs jiiçxathaꞌw ũythasuꞌ naa paꞌga.
20 Jesusaꞌ cielute Dxus ũsnitek uꞌka, Dxus tasxte pkalsaweꞌsx juꞌgu weꞌwe puꞌçxçxa kweꞌsxtxi kxtee kaꞌgaꞌjyaꞌ. Txãꞌ Melkisedek naꞌwẽsak yuꞌ.
