Hebreos 7:1-28
7 Naa Melkisedekhaꞌ Salem çxhabte jxkaahsak yuꞌ, nawa txãaíiçxáa pkalsaweꞌsx juꞌgu weꞌwe puꞌçxsak yuꞌ. Açaꞌ teeçx enteꞌ Abrahanaꞌ gweçxate puiina ũsçxaꞌ, naa kiwete jxkaahsa ewmeesatx knayçxa sxawedna paꞌjaçteꞌ, Melkisedekhaꞌ puꞌthegyaꞌ kasehçxa bedicion akhteꞌ,
2 Abrahanaꞌ diesmo dukhku makweneꞌ dukhwaꞌj jiꞌphuꞌ txãa yuꞌs jxuka. (Hebreo yuweteꞌ Melkisedek jĩnisaꞌ Ew Jxkaahsa jĩnisaꞌ, açaꞌ Salem jĩnisaꞌ wẽt fxiꞌzeni jĩnisak yuꞌ. Txãasa Melkisedekhaꞌ wẽt fxiꞌzenite ew jxkaahsaꞌ jĩnisaꞌ.)
3 Saꞌ txajx ney txajx njĩꞌj txajx yaçgaweꞌsx txãatxiꞌs yaꞌjiyuꞌçmeꞌ, txajx upxhni en txajx uuni txãꞌwẽsaçxa yuhtxwa. Txãasa Dxus Nçxiꞌk pkalsaweꞌsx juꞌgu weꞌwe puꞌçxna nes yuusa naꞌwẽysak yuꞌ Melkisedekhaꞌ.
4 Ãçxhaꞌ ew mjiyuwe: Melkisedekhaꞌ iiméh wala jxtuhthesa yuꞌk. Txajíik kweꞌsx yaçgaweꞌsx Abrahan yuhwa diesmoꞌs txãꞌsna dukh gweçxate puiiçxa txajx jĩitxiꞌs kiꞌ kusaꞌjniꞌs.
5 Moises leyaꞌ naasáa Levxi jiꞌj yuuçxáatxku jxkaajaꞌ txãaweꞌsx nweꞌsx diesmotx jxpaꞌgawaꞌjsa.
6 Txãꞌwẽtewa, Melkisedekhaꞌ Levxi jiꞌjmeeçxawa Abrahan dukhni diesmoꞌs jxpaꞌgak, saꞌ Abrahanaꞌ makwe Dxus txhitxhnisatewa Melkisedekhaꞌ bedekĩyku.
7 Bedekĩysaꞌ bedekĩynisate jxthaakwe walasaꞌ txãꞌsaꞌ txãꞌwẽmeꞌ jĩyaꞌ ãjameetxna kim yuhwa.
8 Ãçxh naa ensu kweꞌsx pweꞌsx dukhni diesmoꞌs jxpaꞌgasaꞌ nasa uuwaꞌjsaçxáataꞌ. Nawa Dxus librute Melkisedekhaꞌs weꞌweçxaꞌ: Bagaçxte yuhwa uumée ĩtxi ũssa jĩna weꞌweç naꞌwẽk ptaꞌsxiꞌ:
9 Levxi jiꞌjweꞌsx jxukaysa naꞌwẽ diesmoꞌs jxpaꞌgaꞌtx txãaweꞌsxwa diesmoꞌs dukhsatx yuu Melkisedekna. Ew jiyute yuꞌ, txãaweꞌsx jxukaysa paꞌgate Abrahanku dukh.
10 Txãꞌwẽk yuu jĩkahníi Abrahanaꞌ Melkisedek yakh puutx uyçxa diesmoꞌs dukheçteꞌ, Levxi jiꞌj yuuwaꞌjsaꞌ Abrahan kakweju kasehmeytxi yuꞌ.
11 Ley nvxiitnisa Aaron jiꞌj levxiweꞌsxçxáa txãꞌwẽ nasa pkalsatx Dxus tasxte kuutxaꞌjyaꞌ ãjawaçaꞌ, vxite kaahwaꞌj peejxmeeneꞌ yuꞌ, Melkisedekwa maꞌwẽga Aaron jiꞌtheweꞌsxmée yuꞌ txãꞌwẽysa.
12 Txãꞌwẽ pkalsaweꞌsx juꞌgu weꞌwe puꞌçxsa levxiweꞌsxtxi kutxiꞌjçxaꞌ, leynawa phuꞌseꞌjwaꞌjaꞌ.
13 Naꞌwẽ vxite kaahwaꞌjaꞌs weꞌweꞌk txãꞌ kweꞌsxtxi jxpeꞌjsa Jesukristoꞌs weꞌweçxak txãꞌjĩꞌ. Jesukristoꞌ Israel nweꞌsxçxawa, Aaron jiꞌtheweꞌsx meek yuꞌ.
14 Judá jiꞌtheweꞌsxku yuꞌ txãꞌsaꞌ ew jiithaꞌw. Açaꞌ Judá jiꞌtheweꞌsxaꞌ kim yuhwa pkalsaweꞌsx juꞌgu weꞌwe puꞌçxwaꞌjaꞌs jiꞌphmeetaꞌ. Txajíik Moisesaꞌ txãꞌwẽ yũuwaꞌjaꞌs Judá jiꞌtheweꞌsxtxiꞌ maa yuhtxwa kxsusmée.
15 Aytek isa ew yaꞌjiyuꞌ leyaꞌswa phuꞌseꞌjwaꞌjaꞌs. Txãꞌwẽ phuꞌseꞌkhaníi pkalsaweꞌsx juꞌgu weꞌwe puꞌçxwaꞌjsaꞌ ley nvxiitnisamée, Melkisedek naꞌwẽsak yuꞌ.
16 Txãꞌ ley txhitxhçxa nvxiitnisamée, bagaçxteçxáa yuhwa pçumée ĩtxi fxiꞌzewaꞌjsak yuꞌ.
17 Txajíik Jesusaꞌs weꞌweçxa naꞌjĩ Dxusaꞌ:
Idxaꞌ bagaçxtewa pkalsaweꞌsx juꞌgu weꞌwe puꞌçxna nes yuuneꞌga,
Melkisedek naꞌwẽsa jĩꞌk.
18 7:18-19 Txajíik Moises leyaꞌ nasa pkalsatx Dxus tasxte kuutxaꞌjyaꞌ ãjamée maꞌwẽçxáa yuhwa, txãa paꞌgak txãa leyaꞌs phuꞌseꞌjni yuu. Açaꞌ ãçxhaꞌ txãa leyte jxthaakwe ewsa jiꞌpthaꞌw txãa yakhaꞌ Dxus tasxte utxaayaꞌ ãjaꞌthaꞌw.
19 —
20 Dxus tasxte kuutxaꞌjyaꞌ ãjawaꞌjaꞌs Dxusaꞌ nvxiituççxaꞌ juraĩmée yuꞌ nvxihtmeꞌ.
21 Dxus tasxte kuutxaꞌjyaꞌ ãjawaꞌjsa jĩnisa nyafxiiweꞌsxtxiꞌ Dxusaꞌ juraĩmeek nvxiht. Nawa Jesusaꞌs txãꞌwẽ yuuwaꞌjsa nvxiituççxaꞌ, jurãyçxak nvxiht. Txajíik Dxus librute naꞌjĩna weꞌweꞌ:
Idxaꞌ bagaçxtewa pkalsaweꞌsx juꞌgu weꞌwe puꞌçxna nes yuuneꞌga jĩnak Dxusaꞌ txajx weꞌweniꞌs jurãy naꞌ yuꞌpthehmeena.
22 Txãa paꞌga Jesusaꞌ jxthaakwe ew puutx weꞌweçxa nvxiitnisaꞌ.
23 Pkalsaweꞌsx juꞌgu weꞌwe puꞌçxsa nyafxiiweꞌsxaꞌ wala kuh yuꞌtx, txãa paꞌgatey uunatx uꞌjweꞌ. Txãasatx teeçxçxáa yuꞌ uꞌpxaꞌ ãjaꞌçmée.
24 Nawa Jesusaꞌ uuwaꞌjsameꞌ, txãasa pkalsaweꞌsx juꞌgu weꞌwe puꞌçxna ũswaꞌjaꞌs vxitetx nvxihtmeena.
25 Saꞌ txãꞌsna piꞌkxçxa Dxus tasxte utxaawaꞌjaꞌs pakwesáa yuutxiꞌs nweꞌweçxa, bagaçxte yuhwa vxituwaꞌjmeete nvxiht-yaꞌ ãjana, txãa paꞌgatey txãꞌ bagaçxte yuhwa uumée ĩtxi nes yuuwaꞌjsaꞌ, pkalsaweꞌsx juꞌgu weꞌwe puꞌçxna.
26 Pkalsaweꞌsx juꞌgu Dxus tasxte weꞌwe puꞌçxsaꞌ Jesus naꞌwẽsa ewsathaꞌw peejx yuꞌ. Txãꞌ kĩh pkal yuhwa jiꞌphmeesa, bagaçxte yuhwa ewmée yũuna fxiꞌzesamée, naa kiweteweꞌsx naꞌwẽsa meek yuꞌ. Txãasak Dxus pukate kãhpkaçx jxũna uꞌjnisa yuu.
27 Pkalsaweꞌsx juꞌgu weꞌwe puꞌçxwaꞌjsa nyafxiiweꞌsxaꞌ naꞌwẽtx een isa tajkx ikhçxa Dxus altalte kabuꞌ txãꞌwẽ yũuwaꞌjsa meek yuꞌ. Txãaweꞌsxaꞌ nyafxteꞌ peekx pkalpaꞌga khuẽꞌy txãꞌwẽ tajkx kabçxatx nasaa pkalpaꞌgawa txãꞌwẽy yũꞌ. Nawa Jesusaꞌ een isa txãꞌwẽ tajkx ikhmeꞌ, txãa yuuk uu tee dxiꞌjçxáa jxukaysa paꞌgate.
28 Pkalsaweꞌsx juꞌgu weꞌwe puꞌçxwaꞌjsatx Moises ley nvxiituççxaꞌ, naa kiwete nasa ãhmeekwesaçxáatxku nvxiituꞌ. Nawa ley skhẽwnite Dxus jurãyçxa txãꞌwẽ yũuwaꞌjsa nvxiituççxaꞌ, txajx Nçxiꞌk iiméh thaakwe ewsaꞌsku nvxiht bagaçxtewa nes yuuwaꞌjsa.
