Hebreos 8:1-13
8 Naꞌwẽ pkalsaweꞌsx juꞌgu Dxus tasxte weꞌwe puꞌçxsa jĩꞌthaꞌw txãꞌ maatewa jxthaakwe ewsa cielute Dxus pukate kaçxçxa
2 pkalsaweꞌsx juꞌgu weꞌwe puꞌçxna ũsaꞌ Dxus ũsnite yuu uꞌkaçxa. Txãa Dxus ũsniꞌ nasaa txaahnisameꞌ, txãꞌsaꞌ Dxus yuuk txah.
3 Pkalsaweꞌsx juꞌgu weꞌwe puꞌçxna ũssa nyafxiiweꞌsxaꞌ pkalpaꞌga tajkx ikhçxa Dxus altalte kabna nes yuuwaꞌjsa jĩçxa nvxiitnisatx yuꞌ. Txãa paꞌgak Jesukristowa kĩhçxáawa nuykũuwaꞌj jiꞌphu.
4 Jesukristoꞌ naa kiwetee txãꞌwẽ pkalsaweꞌsx juꞌgu weꞌwe puꞌçxna ũswaꞌjaꞌs vxit wẽewaçaꞌ, ãjawaꞌjmeeneꞌ yuꞌ, txãꞌwẽ ãjakahmeníi Moises ley nvxiitnisatx ũs yuꞌ pkalsaweꞌsx juꞌgu weꞌwe puꞌçxsa.
5 Nawa naa kiwete txãꞌwẽ pkalsaweꞌsx juꞌgu weꞌwe puꞌçxsaꞌ naasáa cielute maꞌwẽçxah yũuwaꞌjna txãꞌsna kaajiyuꞌjniçxáꞌstxi selpiꞌ. Txãꞌwẽ cieluteweꞌsxaꞌs kaajiyuꞌjnisate íiçxáak Dxusna neeweꞌwena ũswaꞌj yat Moises txajaçteꞌ, Dxusaꞌ naꞌjĩna weꞌwe: Ew mtheg, saꞌ thãꞌj vxiçte adx maꞌwẽ kaavxyaꞌjaꞌtheꞌ, txãꞌwẽy yũuneꞌga jĩk.
6 Nawa Dxus tasxte kweꞌsx juꞌgu weꞌwe puꞌçxsa Jesukristo selpiiniꞌ thaakwe ewaꞌ, txãa paꞌgatey Dxus thaakwe ew puꞌçxwaꞌjaꞌs iiméh ew puutx weꞌwek txãꞌsna selpiina ũsaꞌ.
7 Nyafxíi puutx weꞌweniꞌ ew kasehwaçaꞌ, eꞌsu kiꞌ puutx weꞌwewaꞌj peejxmeeneꞌ yuꞌ.
8 Nawa txãꞌwẽ ew kasehpaꞌgamée, nasaꞌ ewmée fxiꞌzepaꞌga, Dxusaꞌ naꞌjĩk:
Israel vxiteꞌ Judá yakh adxaꞌ kiꞌ uꞌse puutx weꞌwewaꞌj en paꞌjana,
9 Egipto kiwejũ peeygãhna kutxiꞌjçxa iꞌkweꞌsx yaçgaweꞌsx yakh puutx weꞌweth txãꞌwẽmée yuuna.
Txãa enteꞌ adx puutx weꞌweniꞌs kxtey yuumeetaꞌ,
Txãa paꞌgath thegmée nvxiht.
10 Nawa txãa eꞌsuꞌ Israelweꞌsx yakh naꞌwẽ puutx weꞌweꞌnja jĩꞌk Dxusaꞌ:
Adx jxkaahnitxiꞌs txãaweꞌsxtxi kaajiyuꞌjçxa, ũuste fxiꞌjçxa nvxiituꞌnja.
Saꞌ adxaꞌ txãaweꞌsx Dxus yuꞌnja,
Açaꞌ txãaweꞌsxaꞌ adx jĩi yuutxna.
11 Dxusaꞌs jiyukahn teeçxsa naꞌwẽçxah kaapiyaꞌjwaꞌj jiꞌphumeetxna, txãaweꞌsx nweꞌsx vxiteꞌ txãaweꞌsx nyakhçxáa yuhtxwa,
Txãa paꞌgatey leꞌçxkwesa maꞌtx yuu meeçxaꞌ thẽꞌjsa maꞌtx yuu nawa thẽymée jiyuyaꞌ ãjatxna adxaꞌs.
12 Saꞌ txãaweꞌsx pkaltxi peltunãyçxa, peena yuꞌ bagaçxteçxáa yuhwa yajkxmeꞌnja txãaweꞌsx pkaltxiꞌs jĩꞌk.
13 Dxusaꞌ kiꞌ vxite uꞌse puutx weꞌwewaꞌj jiꞌpthu jĩçxaꞌ, yaçíiweꞌsxaꞌ selpiimeꞌ jĩçxaneꞌ txãꞌjĩꞌ. Açaꞌ selpimée yuuna paꞌjsaꞌ skhẽwwaꞌjsana.
