Hebreos 9:1-28
9 Dxus puutx weꞌwenisa nyafxiiweꞌsxaꞌ jxkaahni jiꞌphuk Dxusna neeweꞌwena kxtey nwẽeseꞌkhan dxuus yat naa kiweteweꞌsxçxáaçxawa.
2 9:2-4 Txãa yataꞌ eꞌz jwedku txudeni yuꞌ: nyafxte uꞌkana kũunisate Dxusna neeweꞌwena ũsni jĩnisatetx bela txaahnisa vxiteꞌ pan ãsxni mesa vxyuu bee altal incienso kabnisa txãꞌwẽsa ũsuꞌ. Açaꞌ eꞌste txudenisateꞌ kim yuhwa uꞌkanimeesa naasáa Dxus yuuçxáa ũsni jĩnisak yuꞌ. Kxteeaꞌ kaja vxyuu behçxaçxáꞌs jxuka skadnisak ũsuꞌ. Txãa kaja dxiite yuꞌ teeçx vxyuu bee jaçxu maná jiꞌphsa, vxiteꞌ Aaron khaabu yeꞌçxku txãa, vxiteꞌ Dxus jxkaahni kwet taplate fxiꞌjni yuuk txãatx jxaawni ũsuꞌ kaja dxiite.
3 —
4 —
5 Txãa vxyuu bee kaja kajkwete yuꞌ Dxus angel naꞌwẽysatx piisaçxa txaahni ũsuꞌ, Dxusaꞌ ayte nesku yuꞌ jĩna kaajiyuꞌjsataꞌ. Saꞌ txãaweꞌsx fxuu kuꞌtaju jxukatx aphna ũsuꞌ, naꞌwẽ pkalpaꞌga tajkx ikhçxa txãa eeaꞌs jxũna kũhçxa txajaꞌtx txãꞌsna. Nawa txãꞌwẽsatx ew ãate ptaꞌsxwaꞌj en jiꞌphmeeth ãçxhíi yuꞌ.
6 Saꞌ txãa yatte txãꞌwẽ pheuꞌjni nyafxte uꞌkana kũunite yuꞌ pkalsa juꞌgu weꞌwe puꞌçxsaweꞌsxaꞌ uꞌkana nestxi yuꞌ, maꞌwẽ yũuwaꞌjaꞌswa kxtey yuuna.
7 Nawa vxite ahte eꞌste yuꞌ txãaweꞌsx npiiçthẽꞌj teeçxçxáak uꞌkaꞌ, anxute tee dxiꞌjçxáa. Saꞌ kxtee uꞌkaççxaꞌ, perdon pẽjxyaꞌ takx eeaꞌs jxũçxak uꞌkaꞌ, peekx pkalpaꞌga vxiteꞌ nasaa pkalpaꞌga jĩi yãꞌjçxa.
8 Txãꞌwẽ nyafxte uꞌkanisa Dxusna neeweꞌwena ũsni jĩnisaꞌ selpiina nesku yuꞌ Dxusaꞌs neeweꞌwewaꞌj. Nawa vxite ahte Dxus yuuçxáa ũsni jĩnite uꞌkawaꞌj dxiꞌj yuꞌ phatemeyku yuꞌ txãꞌwẽk Dxus Espirituꞌ kaajiyuꞌjuꞌ.
9 Kĩhwa jxuka txãꞌwẽ yũunisaꞌ ãçxh naa ensuweꞌsxaꞌs kaajiyuꞌjsaçxáak yuꞌ. Kxtee tajkx ikhçxa Dxusna weçxana kabnisaꞌ txãaweꞌsx pkaltxi khukhyaꞌ ãjawaꞌjsameꞌ.
10 Txãꞌwẽ yũunisaꞌ Dxus yuꞌpthehpkaçxçxáatx selpiwaꞌjsa yuꞌ, txãasatx kajkwekhẽ ãakhẽweꞌsxaꞌsçxáa jxkaajaꞌ ũꞌnisu, tudxnisu, kakwete ate fxiꞌzewaꞌj txãꞌwẽsatx.
11 Nawa ãçxhaꞌ pkalsa juꞌgu weꞌwe puꞌçxsa thaakwe ewsa ũythasnisa paꞌkh txãꞌ Kristoꞌ. Saꞌ txajx yujuniꞌ nasaa vxitnisa naa kiweteweꞌsxmée, cielute iiméh ewsate uꞌkaçxa kxtee pkalsa juꞌgu weꞌwe puꞌçxna selpiina ũsaꞌ.
12 Saꞌ Kristoꞌ Dxus yuuçxáa ũsnite kĩh pkal yuhwa meetek uꞌka. Nawa txãꞌ kapla ee vxiteꞌ klaa luuçx ee txãꞌwẽsatx jxũçxa Dxus tasxte uꞌkameꞌ. Txajx ee yuunak pkawçxa uꞌka tee dxiꞌj yuuçxáa. Nawa jxukaysa bagaçxteçxáa yuhwa vxitumée ewte neeyũuwaꞌjaꞌs vxit-yaꞌk txãꞌwẽ yũu.
13 Naꞌwẽ klaa ee kapla ee vxiteꞌ klaa luuçxaꞌs altalte kabnisa khuuç txãꞌwẽsatx nasaa kakwekhẽ pẽꞌçhuçteꞌ, ãakhẽ kazx pẽetheniꞌs yaatesaa dxihteꞌ,
14 Kristo ee yuꞌ wejx thaakwe yaateyaꞌ ãjawaꞌjsana. Txãꞌwẽ yaateyaꞌ ãjakahníi, Dxus Espiritu pçuwaꞌjmeesa puꞌçxte Kristoꞌ peekíi yaꞌdukhçxa kĩh pkal yuhwa jiꞌphmeek txajx eeaꞌs pkaw pkalsa paꞌgate. Txãasa txajx eeaꞌ kweꞌsx ewmée ũus yaakxni dxiiteweꞌsxaꞌs khukhwaꞌjsaꞌ, Dxus ĩtxisaꞌs selpiiyaꞌ ãjakahn.
15 Dxusaꞌ kweꞌsxtxi nweꞌwewaꞌjaꞌs uꞌse puutx weꞌwek txãꞌsna Jesukristoꞌ kxtey yuuna ũsaꞌ, naꞌwẽ nyafxte Dxus puutx weꞌwek txãꞌsna nwẽeseꞌjmeeçxa pkalte wetethaꞌw txãa pkalwa peltunãynik yuu Kristo uupaꞌga. Txah Jesukristo nweꞌwenisaweꞌsxaꞌ jxpaꞌgayaꞌ ãjatxna Dxus jĩi bagaçxteçxáa yuhwa pçuwaꞌjsamée kweꞌsx jĩiçxaçxáa yuuwaꞌjaꞌs nvxihtku txãꞌsna.
16 Nawa naꞌwẽsaꞌs miiyajkxwe: Adx uuteꞌ, adx jiꞌphuniꞌs idx uweeneꞌga jĩna puutx weꞌweçxa eçte fxiꞌjçxa nvxiitnisaꞌ, selpiiyujuna.
17 Nawa txãꞌjĩna nvxiit-sa uuteçxáa txãa eçaꞌ selpiina. Txãꞌjĩna nvxiit-sa uumeyte yuꞌ, txãa eçaꞌ selpiꞌçmeꞌ.
18 Txajíik Dxusaꞌ nyafxíi puutx weꞌwena fxiꞌjçxa nvxiitnisaꞌswa ee pkawçxa nvxiht selpiina neeyũukahn.
19 Txãꞌsaꞌ naꞌwẽk yũu Moisesaꞌ: Nasa jxukaysatx ptaꞌsxku ley jxkaahni maꞌwẽtewa jxuka. Txãꞌwẽ yũuçxak khas beh vxiteꞌ ẽjxa kuꞌta yakh klaa luuçx ee vxiteꞌ kapla eete yuꞌ kaꞌdnisate akhçxa Dxus puutx weꞌwena fxiꞌjçxa nvxiitni eç kajkwesu pẽꞌçhuç. Saꞌ nasatxwa jxukaysatx txãꞌwẽyku yũu naꞌjĩna:
20 Dxusaꞌ naꞌwẽ iꞌkweꞌsxtxi jxkaahna puutx weꞌwena fxiꞌjçxa nvxihtku txãa eçaꞌ ãçxhaꞌ iꞌkweꞌsxtxi jxkaahna selpiiyaꞌ ãjana, ee pkawni yuupaꞌga jĩk.
21 Saꞌ Dxusna neeweꞌwena ũsni yat vxiteꞌ kxtee kĩhçxah neꞌta ũsuꞌ txãatxwa txãꞌwẽyku ee yakh pẽꞌçhuç Moisesaꞌ.
22 Ley weꞌweçxaꞌ: Kĩhnawa jxuka ee yakh yuuçxáa yaatewaꞌj yuuna, açaꞌ ee pkawmeete yuꞌ, pkalaꞌ peltunãynimée yuutxna jĩnak jxkaajaꞌ.
Kristo uuniꞌ pkaltxi jxuka khukhku
23 Txãꞌwẽ cielute maꞌwẽna txãꞌsna kaajiyuꞌjsa naa kiweteweꞌsxçxáa yuhtxwa yaatena ũswaꞌj peejxtxi yuꞌ, tajkx ikhçxa txãa ee yakh. Açaꞌ cielute ũswaꞌjsatx yaatewaꞌj yuꞌ wejxku thaakwe ewsa peejx yuꞌ, tajkx ikheꞌtx txãꞌwẽsamée.
24 Kristoꞌ naa kiwete nasaa txaahnisateçxáa uꞌkameꞌ. Txãꞌ cielute yuuk uꞌka, saꞌ ãçxhaꞌ kxtee Dxus tasxte kweꞌsx juꞌgu weꞌwe puꞌçxna ũsaꞌ, açaꞌ Dxusna neeweꞌwena ũsni yat naa kiweteweꞌsxaꞌ cielute maꞌwẽna txãꞌsna txãꞌwẽy piisanisaçxáak yuꞌ.
25 Pkalsaweꞌsx juꞌgu weꞌwe puꞌçxsa npiiçthẽꞌjsaꞌ aanxu isa tee dxiꞌjçxáak uꞌkaꞌ, Dxus yuuçxáa ũsni jĩnisate. Nawa peekx eemée, takx eeçxáꞌsku jxũçxa uꞌkaꞌ, kxtee pẽꞌçhuçyaꞌ. Nawa Kristoꞌ uuçxa kujus Dxus tasxte uꞌkameꞌ.
26 Txãꞌwẽ yũuwaçaꞌ, naa kiweꞌs vxitiyna aanxu isa uuna nesneꞌ yuuwaꞌjsa yuꞌ. Nawa txãꞌwẽ yũumée, Kristoꞌ tee dxiꞌj yuuçxáak kluuste uuyaꞌ vxyaa jxukaysa pkaltxi khukhyaꞌ.
27 Txãa paꞌgak nasatxwa tee dxiꞌjçxáa jxukaysatx uuwaꞌjsa vxitçxa txãa eꞌsuꞌ maꞌwẽsaçxawa Dxus tasxte paswaꞌj vxitni yuu,
28 txãꞌwẽy Kristowa tee dxiꞌj yuuçxáak kluuste uu maazkuẽesa pkaltxiwa jxuka khukhyaꞌ. Saꞌ txãa eꞌsuꞌ kiꞌ vxyaana, nawa pkaltxi khukhyaꞌ kiꞌ uuyaꞌmée, naasáa txãꞌsna ũythassatx peꞌjna uꞌjyaꞌçxáa txãꞌwẽ vxyaana.
