Hechos 1:1-26
1 Jesusaꞌ nyafxte kĩhwa kaapiyaꞌjna kĩjkĩhwa ew yũuk cielute tejkapkaçx txãꞌsna, Teofxilo, idxna ptaꞌsxna adx libru nyafxte fxiꞌth.
2 Txãꞌ cielun uꞌjmey, piçthẽꞌjweꞌsxtxi txhitxhku jxkaajxaꞌ, saꞌ maꞌwẽçxah yũuwaꞌjaꞌswa kaapiyaꞌkh Dxus Espiritu puꞌçxte.
3 Saꞌ uuniijũ kiꞌ ĩtxi kiiteçxaꞌ, nyafxíi naꞌwẽyçxáak petx kakwe yãꞌjçxa txãaweꞌsxtxi vxyaana ũsuꞌ kuarenta entepkaçx. Txãꞌwẽ ĩtxi yuuyuhga sũhna ew jiyukahnku txãꞌwẽ vxyaana ũsuꞌ, saꞌ Dxus maꞌwẽ jxkaahwaꞌjaꞌswa ptaꞌsxnak ũsuꞌ.
4 Saꞌ cielun uꞌjyaꞌwaçxaꞌ, txajx txhitxhnisaweꞌsx yakh nee ũsíi, Jesusaꞌ neeweꞌwek Jerusalen çxhabuh uꞌjmée ũskahn naꞌjĩna:
—Mũythaswe, adx Tata kaajxaꞌ neeyũuk txãꞌs jxpaꞌgapkaçx, adx iꞌkweꞌsxtxi ptaꞌsxthu txãꞌsna.
5 Iꞌkweꞌsxaꞌ jii iꞌkwe Juanaꞌ naasáa yuꞌteçxáak akhna bautisaĩꞌ. Nawa iꞌkweꞌsxaꞌ Dxus Espiritute yuu bautisãyni yuuneꞌkwe jxukaysa jaꞌdaçxah txaçxmeyna jĩnak weꞌwe.
Jesus cielun sxawedni
6 Txajũꞌ Jesus txhitxhnisaweꞌsxaꞌ txãa yakh ũsçxaꞌ, paapẽjxtxi:
—Ãçxhaꞌ idx wáa naa ensu Israelweꞌsxtxi romanoweꞌsx kuseju nweꞌwewaꞌjsaneꞌga jĩteꞌ,
7 Jesus pasçxaꞌ:
—Iꞌkweꞌsxaꞌ jiyuwaꞌjsamée iꞌkwe Israelweꞌsxtxi nweꞌwewaꞌj en bagaçxtewa. Dxus kweꞌsx Tata yuuçxáa txãꞌwẽ yũuwaꞌj enaꞌs jiiaꞌ.
8 Nawa Dxus Espiritu kĩhteꞌ, txãa yuꞌs jxpaꞌgawaꞌjsa yujiꞌkwe, kĩhtewa jxuka ãjayaꞌ. Saꞌ txãꞌwẽ yũunijũ kasehçxa uꞌjweneꞌkwe adxaꞌs tuutheꞌjyaꞌ Jerusalente, Judea kiwesu, vxiteꞌ Samaria kiwesu mtee mtee maa kiwetewa jxuka jĩnak jxkaah.
9 Txãꞌwẽ weꞌwena jxãꞌjnijũ txaçxmeyna, txãaweꞌsx thegna ũsiyna Jesusaꞌ ẽete kiisnik yuu cielun peꞌjna uꞌjyaꞌ. Naapkaçxhaꞌ tãaph kũhçxa aphku, açaꞌ peena yuꞌ vxyaameꞌ.
10 Txãꞌwẽ Jesusaꞌs cielun peꞌjna uꞌjweçteꞌ, txãaweꞌsxaꞌ cielute pagayna ũsiyna, eꞌz piçthẽꞌj ropa çxihmesa athçxa txãaweꞌsx pukatetx vxyaa.
11 Txãꞌwẽ vxyaaçxaꞌ, naꞌwẽtx weꞌwe:
—Galileajuweꞌsx, ¿kĩh yuupaꞌga cielute pagayna ũskwe? Jesusaꞌ iꞌkweꞌsx ksxavxyuh maꞌwẽ cielun uꞌjweçtekwe uy, txãꞌwẽyçxáa kiꞌkin kĩijana txãaíiçxáa jĩnatx ptaꞌsx.
Judas paꞌgate Matias txhitxhni
12 Txajũꞌ thãꞌj Oliwos yaasesaju uꞌjtx Jerusalen çxhabna sxawedna. (Txãa Oliwos vxiçaꞌ Jerusalen utxak yuꞌ teeçx kilometroçxáak ãh jxuꞌj neeyũꞌ.)
13 Jerusalente paꞌjçxaꞌ, txãaweꞌsx paadeeni ẽe yatte tejkatx Pedro, Jakobo, Juan, Adres, Fxelipe, Tomás, Bartolomé, Mateo, Jakobo Alfxeo nçxiꞌk, Simon kananista juꞌgusa, vxiteꞌ Judas Jakobo nyakh txãaweꞌsxtxi yuꞌ.
14 Txãaweꞌsxaꞌ kxteetx tahtatey pkhaakheꞌ Dxus yakh puutx weꞌweyaꞌ jxukaysa yakh, Jesus nyakhweꞌsx vxiteꞌ njĩꞌj Maria, txãꞌwẽy vxite uꞌyweꞌsx yãꞌjçxa.
15 Txãn ensuk Pedroꞌ kxtee pkhaakhesaweꞌsx ciento weinte ksxavxyte yujuçxa naꞌjĩ:
16 —Yakhthẽꞌjweꞌsx mjiyuwe: Judas ewmée yũuwaꞌjaꞌs Davxidaꞌ fxiꞌkh Dxus Espiritu kaaũusutheꞌjniꞌs Dxus librute txãꞌ kxtey yuuwaꞌjsa yuh yuꞌneꞌ. Txajíik Judasaꞌ Jesusaꞌs preesuꞌjwaꞌjsatx peꞌjna kũhçxa dukh.
17 Judasaꞌ kweꞌsx yakh uꞌjusak yuꞌ, txãasak kweꞌsx naꞌwẽy mjĩiwaꞌjsa yuꞌ.
18 Nawa Jesusaꞌs txweyni vxyuju kiwek wey, saꞌ kxteek tẽekhẽe dxiktheju sutenus wete, açaꞌ meetuꞌjaꞌ jxuka ubuk.
19 Txajũꞌ Jerusalenteweꞌsxaꞌ txãꞌwẽ yũuniꞌs jiyuçxaꞌ, txãa kiweꞌs Akéldama yasetx kiꞌp, txãaweꞌsx yuwete yuꞌ Ee pkawni kiwe jĩnik yuꞌ.
20 Judas uuwaꞌjaꞌs weꞌweçxak Salmo librute naꞌjĩꞌ:
Txãa yatte uꞌpwaꞌjsa kim yuhwa neeyũumeetxna,
Açaꞌ txajx yataꞌ namu jiꞌphmée peekx neeyũuna jĩꞌk.
Vxite ajkhẽwa naꞌwẽ fxiꞌjniꞌ:
Txajx mjĩiwaꞌjaꞌs vxite tee mjĩi jĩna fxiꞌjniꞌ.
21 Txãa paꞌga kweꞌsx ksxavxyte piçthẽꞌj ũstaꞌ kweꞌsxtxi jxpeꞌjsa Jesus makwe txaçxneꞌ kweꞌsx yakh ũsuꞌ txagaçxhíi txutemée piꞌkxna uꞌjusa.
22 Txãaweꞌsxaꞌ Jesusaꞌs Juan bautisãynijũjx uyyaꞌ takhçxa cielun uꞌphkaçx uysaataꞌ txãatx teeçx txhitxhiga, Jesus ĩtxi yuuniꞌs tuutheꞌjna kweꞌsx yakh fxiꞌzewaꞌjsa jĩk.
23 Txajũꞌ eꞌztxi pakweçxa kiꞌp, José Barsabás yaasesaꞌs txãꞌsna íiçxáa Justo jĩnatx kxsuusuꞌ, vxiteꞌ Matiasna.
24 Saꞌ naꞌwẽtx Dxus yakh puutx weꞌwe:
—Idxaꞌ maa maa nasa ũus yaakxniꞌswa jiig. Kweꞌsxtxi meen mkhiyuꞌj naa eꞌzsatx maaçxahtxga txhitxh,
25 Judas paꞌgateweꞌsx, naꞌwẽ Judas txajx mjĩiaꞌs nvxihtçxa vxituk txajx pkalpaꞌga txãa mjĩiaꞌs jxpaꞌgawaꞌjsa jĩnatx Dxus yakh puutx weꞌwe.
26 Txajũꞌ swerte kaahtx kiim yase kasehtewa jiyuyaꞌ, açaꞌ Matias yasek kaseh. Txajũjx Matiasaꞌ oncesaweꞌsx yakh utxaak piꞌkxna uꞌjuyaꞌ.
