Hechos 10:1-48
10 Cesarea çxhabte teeçx soldau kpiitan Kornelio yaasesa uꞌpuꞌk. Txãꞌ Italiajuweꞌsx soldautx jxkaahsak yuꞌ.
2 Txãa piçthẽꞌjaꞌ Dxusna weçxana fxiꞌzesak yuꞌ, txajx yatteweꞌsx jxukaysa yãꞌjçxa. Saꞌ Dxus yakh puꞌvxituméek puutx weꞌwena fxiꞌzeꞌ, txãꞌwẽy vxyuuwa wala puꞌçxhiꞌk judiuweꞌsxtxi.
3 Teeçx ente kusuçte las tresteꞌ Dxus angel txajx tasxte uꞌkaçxa naꞌjĩna weꞌweçtek uy:
—¡Kornelio! jĩna paꞌyateꞌ,
4 txãa piçthẽꞌjaꞌ wala ũukhna Dxus angelaꞌs thegçxaꞌ naꞌwẽk pas:
—¿Kĩh pẽjxga? jĩteꞌ, Dxus angel weꞌweçxaꞌ:
—Idxaꞌ txãꞌwẽ peejisaatx puꞌçxna Dxus yakh puꞌvxitumée puutx weꞌwena fxiꞌzeniꞌs Dxusaꞌ wẽseꞌkh.
5 Açaꞌ idxaꞌ Pedroꞌs peꞌjyaꞌ mkaah Jope çxhabna.
6 Txãa Pedroꞌ khaꞌtx weysáa Simon yatte paadehna ũsaꞌ ĩkh wala pukate. Açaꞌ Pedro paꞌjçxa ptaꞌsxina idx maꞌwẽ yũuwaꞌjaꞌswa jĩteꞌ,
7 txãa angel uꞌjweçpkaçxhaꞌ Kornelioꞌ eꞌz selpisáa vxiteꞌ teeçx soldau Dxus dxiꞌpte ew fxiꞌzesa txãaweꞌsxtxi paꞌyaçxa,
8 jxuka ptaꞌsxnaꞌwa Jope çxhabna kaakh.
9 Txãaweꞌsxaꞌ kuskuskhẽ Jope çxhabte utxaana paꞌjaçpkaçxhaꞌ, ẽepxãh yuuçteꞌ Pedroꞌ tejkak ẽe yat pwaꞌte Dxus yakh puutx weꞌweyaꞌ.
10 Saꞌ Pedroꞌ wala wẽek, açaꞌ txajx ũꞌwaꞌj pheuꞌjuçtxi yuꞌ.
11 Naapkaçxhaꞌ Pedroꞌ uyku cielukhẽ tela wala naꞌwẽsa puutx vxiçte tudçxa nuykĩjaçte.
12 Kxte yuꞌ niimal yuꞌkh eçx, ul, vxiçxakwe kazxsatx jxuka ãsxnisak jiꞌphuꞌ.
13 Txajũꞌ naꞌwẽ weꞌweniꞌsku wẽseꞌj:
—Pedro, kiiteçxa naa niimaltxiꞌ ikhçxa mẽꞌ jĩteꞌ,
14 Pedro pasçxaꞌ:
—Adxaꞌ bagaçxte yuhwa naꞌwẽ niimal kazxsa yuutxiꞌ ũꞌwaꞌjsameeth jĩk.
15 Açaꞌ kiꞌ weꞌweni wẽseꞌkh:
—Dxus yaatenisatxiꞌ idxaꞌ kazxsataꞌ jĩwaꞌj jiꞌphmeeg ãçxhaꞌ.
16 Txãꞌwẽ tekh uswa vxyaaçxak, txãa tela wala naꞌwẽsaꞌ kiꞌ cieluníi puꞌkisni yuu.
17 ¿Kĩh yũukahnkiꞌk txãꞌwẽ vxyaa? sũhna Pedro uꞌppkaçxhaꞌ, Kornelio kaahnisaꞌ paꞌjtx Simon yataꞌs paapẽjxna.
18 Saꞌ sustxi paꞌyana kũh:
—¿Naa yatte paadeesa Simon Pedro yaasesa ũsmeenáꞌ? jĩna.
19 Pedroꞌ txãꞌwẽ uyniꞌs ũus yajkxna uꞌpiyna, Dxus Espirituꞌ weꞌwek:
—Tekh piçthẽꞌj idxaꞌs paapẽjxna ũstaꞌ.
20 Açaꞌ kiiteçxa txãaweꞌsx yakh meꞌj kuh yajkxmée. Txãꞌwẽmeꞌ, txãaweꞌsxaꞌ adx kaahni yuhtaꞌ jĩteꞌ,
21 Pedro saꞌjçxa Kornelio kaahnisaweꞌsxtxi pẽjxku:
—¿Maꞌjĩyaꞌkwe yuwéꞌ? Iꞌkweꞌsx pakwenisaꞌ adxthu jĩteꞌ,
22 txãaweꞌsxaꞌ ptaꞌsxtxi:
—Soldau kpiitan Kornelio kaahni yuhthaꞌw. Txãa piçthẽꞌjaꞌ wala ew zhiçxkwe fxiꞌzeꞌk Dxusna nwẽeseꞌjna, açaꞌ txãꞌsaꞌ judiuweꞌsx jxukaysa wala wedxiꞌtx. Saꞌ teeçx enteꞌ Dxus angel vxyaaçxaꞌ idxaꞌs paꞌyakahn yuwe nvxihtga. Kxah Kornelioꞌ jiyuna kĩh ptaꞌsxwaꞌj jiꞌphneꞌga txãꞌsna.
23 Txãꞌjĩteꞌ, Pedroꞌ txajx deenite kaꞌgaꞌjçxa, kxte dehçxa kuskuskhẽꞌ Pedroꞌ uꞌkh txãaweꞌsx yakh, açaꞌ kxte Jope çxhabte yakhthẽꞌjweꞌsxwa uꞌjtx piꞌkxna.
24 Kuskuskhẽꞌ Cesarea çxhabte paꞌjtx, açaꞌ kxteꞌ Kornelioꞌ ũythasnak ũsuꞌ txajx nweꞌsx vxiteꞌ txajx namiku yakh pkhaakheçxa.
25 Pedro paꞌjaçpkaçxhaꞌ, Kornelioꞌ jxpaꞌgayaꞌ kasehçxa Pedro tasxte peejxũkwek weçxana.
26 Nawa Pedroꞌ puꞌkisçxa naꞌwẽk weꞌwe:
—Adxaꞌs peejxũkwenu. Adxaꞌ idx naꞌwẽysa íiçxáath jĩçxaꞌ,
27 Kornelio yakh puutx weꞌwena dxiite uꞌkaççxaꞌ, kxte yuꞌ wala kuh pkhaakheçxa ũstek uyna kũh.
28 Saꞌ Pedroꞌ naꞌjĩk:
—Iꞌkweꞌsxaꞌ jiineꞌkwe, judiuweꞌsxaꞌ pkhaakhena puutx weꞌwewaꞌjsameetaꞌ vxite nasa judiumeesa yakhaꞌ. Nawa Dxusaꞌ adxaꞌs ptaꞌsxçxaꞌ, kim yuhnawa açekaahmeꞌ.
29 Txãa paꞌgath paꞌyaçpkaçxhaꞌ, waꞌlmée yuwéꞌ. Ãçxhaꞌ adxaꞌs mpeetaꞌsxwe kĩyaꞌkwe yuukaah jĩteꞌ,
30 Kornelioꞌ ptaꞌsxku:
—Ãçxhaꞌ pahz en yuuçaꞌ naapkaçxhaꞌ naa oratey las treste naa yattey kĩhwa ũꞌmée Dxus yakhçxáa puutx weꞌwena uꞌpuꞌth. Naapkaçxhaꞌ teeçx piçthẽꞌj athni ropa kwentetesa jiꞌphsa vxyaak.
31 Saꞌ naꞌwẽk weꞌwe: Kornelio, idxaꞌ txãꞌwẽ peejisaatx puꞌçxna Dxus yakh puutx weꞌwena fxiꞌzeniꞌs Dxusaꞌ wẽseꞌkh.
32 Açaꞌ Jope çxhabna mkaah, Simon Pedro yaasesaꞌs peꞌjyaꞌ. Txãa Pedroꞌ khaꞌtx weysáa Simon yatte paadehna ũsaꞌ ĩkh wala pukate. Açaꞌ txãꞌ ayte paꞌjçxa puutx weꞌwena idx yakh jĩnak weꞌwe.
33 Txãꞌwẽ jxkaah yãꞌtheꞌ, jxthẽeyuumée pakweyaꞌ kaath. Açaꞌ weçx yuweꞌneꞌga. Ãçxhaꞌ ayte Dxus dxiꞌpte jxukaysa pkhaakheçxa ũsthaꞌw, saꞌ wẽseꞌjyaꞌwathaꞌw maꞌwẽneꞌ Dxus weꞌwekaah txãꞌsna.
Kornelio yatte Dxus yuweꞌs Pedro ptaꞌsxni
34 Txajũꞌ Pedroꞌ ptaꞌsxku:
—Ãçxhaꞌ jiyuth Dxusaꞌ kim yuhnawa ahçemée,
35 maa kiwejuweꞌsxçxawa txãꞌsna nwẽeseꞌjna ew yũuna fxiꞌzesa yuutxiꞌ jxpaꞌgaꞌçxáak.
36 Dxusaꞌ Israelweꞌsx jiꞌjtx yuwe kaakh Dxus yakh fxiꞌzewaꞌjaꞌs Jesukristo yuuçxáa ũsuna saꞌ txãaíiçxáa naa kiweteweꞌsx jxukaysatx jxkaajana jĩna.
37 Iꞌkweꞌsxaꞌ jiineꞌkwe naꞌwẽk yuu: Galileajũ takhçxa judiuweꞌsx kiwete jxuka tuutheꞌjnik yuu, Juan Dxus yuweꞌs ptaꞌsxçxa yuꞌte bautisãynijũ.
38 Dxusaꞌ Nasarethuweꞌsx Jesusaꞌs txajx Espirituꞌs ũsteꞌ, Jesusaꞌ kĩhtewa nuykatxhinak fxiꞌze eçxthẽꞌj kusete ũssatx. Dxusaꞌ txãa yakhku ũsuꞌ naa paꞌgak txãꞌwẽ yũu.
39 Jesusaꞌ txãꞌwẽ Judea kiwesu vxiteꞌ Jerusalente kĩhtewa ew yũuna fxiꞌzeniꞌs kweꞌsxaꞌ jxuka uysaathaꞌw. Txãꞌsaꞌ kluuskhẽ aꞌkxçxa ikhtxi.
40 Nawa Dxusaꞌ tekh ente kiꞌ ĩtxi vxitçxa kaavxyaꞌjaꞌkh kweꞌsxçxáatx, nasa jxukaysatx yuꞌ mée.
41 Dxusaꞌ maaçxahtxneꞌ kweꞌsxtxi txhitxh txãaçxáatxku vxyaa. Açaꞌ kweꞌsxaꞌ txãa yakh pkhaakhena ũꞌna fxiꞌzesathaꞌw uuçxa kiꞌ ĩtxi yuunijũ.
42 Txajũꞌ txãꞌ kweꞌsxtxi kaakh txajx yuweꞌs nasatx naꞌwẽ ptaꞌsxkahn: Dxusaꞌ txãa Jesusaꞌs txãaçxaçxáa kastigãywaꞌjsak vxitçxa kiꞌp naa kiwete ĩtxisa maꞌtx yuu uusáa maꞌtx yuu nawa jxukaysatx.
43 Txãꞌwẽy Dxus yuwe ptaꞌsxsaweꞌsxwa yaçkhẽy weꞌwetx Jesusaꞌ naꞌwẽ yũuwaꞌjsaꞌ jĩna: Maawa jxukay txãꞌs nwẽeseꞌjsaꞌ txãaweꞌsx pkaltxi peltunãyni yuutxna jĩnatx weꞌwe.
Judiu jiꞌjmeeçxawa Dxus Espirituꞌs jxpaꞌgani
44 Pedroꞌ txãꞌwẽ ptaꞌsxna ũsiyna, kxte wẽseꞌjna ũssaweꞌsx kakwete Dxus Espiritu kĩhteꞌ, jxukaysa jxpaꞌgatx.
45 Açaꞌ Jesusna nwẽeseꞌjsaweꞌsx judiu Pedro yakh yuusáꞌ wala kuh yajkxna neeyũutx txãꞌwẽ judiuweꞌsxmée vxite nasawa Dxus Espirituꞌs jxpaꞌgaçxa,
46 txãꞌwẽ vxite yuweju weꞌwena Dxusaꞌs tuutheꞌjna ũste.
47 Txajũꞌ Pedroꞌ naꞌjĩk:
—Naa nasawa kweꞌsx naꞌwẽy Dxus Espirituꞌs jxpaꞌga yãꞌtheꞌ, yuꞌte bautisãywaꞌjaꞌs ¿kimçxáꞌ yupxaꞌ ãjamaꞌk? jĩçxaꞌ,
48 yaꞌbautisãy kaakh Jesukristo yasete. Txajũꞌ Pedroꞌs neevxisxatx txãaweꞌsx yakh maz en kxtee ũskahn.
