Hechos 11:1-30
11 Jesus jxkaahnisa vxiteꞌ yakhthẽꞌjweꞌsx Dxus yakh fxiꞌzesa Judea kiwete ũssaꞌ jiyutx txãꞌwẽ judiu jiꞌjmée vxite nasawa Dxus yuweꞌs jxpaꞌgatx jĩniꞌs.
2 Saꞌ Pedro Jerusalen çxhabte sxawedna paꞌtheꞌ, kxte judiu cirkuncidãynisaweꞌsxaꞌ ũusçxaweꞌwetx Pedroꞌs naꞌjĩna:
3 —¿Kĩjxaꞌga judiumée vxite nasa tasxsu uꞌjçxa txãaweꞌsx yakh pkhaakheçxa ũꞌweꞌ?
4 Txajũꞌ Pedroꞌ ptaꞌsxku maꞌwẽ yũuniꞌswa jxuka:
5 —Adxaꞌ Jope çxhabte Dxus yakh puutx weꞌwena uꞌpçxa uythu tela wala naꞌwẽsa puutx pahz vxiçte tudçxa ẽe walakhẽ kaahni kĩjk adx tasxte paꞌj.
6 Açaꞌ ew thegteꞌ, dxiite yuꞌ niimal yuꞌkh eçx, ul, vxiçxakwe kazxsak jiꞌph yuꞌ.
7 Txajũꞌ naꞌjĩniꞌsthu wẽseꞌj: Pedro, kiiteçxa ikhçxa mẽꞌ jĩteꞌ,
8 naꞌwẽth pas: Adxaꞌ bagaçxte yuhwa naꞌwẽ niimal kazxsa yuutxiꞌ ũꞌwaꞌjsameeth.
9 Txajũꞌ kiꞌ pthũusek cieluju weꞌweni: Dxus yaatenisatxiꞌ idxaꞌ kazxsataꞌ jĩwaꞌj jiꞌphmeeg jĩk.
10 Txãꞌwẽ tekh uswa vxyaaçxak ẽe walate kiꞌ puꞌkisni yuu.
11 Naapkaçxhaꞌ Cesareaju kaahnisa tekh piçthẽꞌj paꞌjtx adxaꞌs pakwena.
12 Açaꞌ Dxus Espirituꞌ adxaꞌs uꞌkhaakh txãaweꞌsx yakh waꞌlmée. Txajũꞌ Jope çxhabteweꞌsx seis yakhthẽꞌjweꞌsx yakh uꞌjçxaꞌ jxukaysa Kornelio yatte uꞌkathaꞌw.
13 Açaꞌ txãa piçthẽꞌjaꞌ ptaꞌsxku Dxus angel vxyaaçxa naꞌwẽ weꞌweniꞌs: Jope çxhabna Simon Pedro yaasesaꞌs paꞌyayaꞌ mkaah.
14 Açaꞌ txãa paꞌjçxa ptaꞌsxina iidx yatte jxukaysaweꞌsx Dxus yakh fxiꞌzewaꞌjaꞌs.
15 Txãꞌwẽ ptaꞌsxteꞌ, adx weꞌweçpkaçxhaꞌ, Dxus Espirituꞌ txãaweꞌsx kakwete kĩjk, kweꞌsx kakwetewa maꞌwẽga nyafxíi kĩh txãꞌwẽy.
16 Txajũꞌ yajkxthu kweꞌsxtxi jxpeꞌjsa Jesukristo naꞌwẽ weꞌweniꞌs: Juanaꞌ yuꞌteçxáak akhna bautisaĩꞌ. Nawa iꞌkweꞌsxaꞌ Dxus Espiritute yuu bautisãyni yuuneꞌkwe jĩniꞌs.
17 Kweꞌsxaꞌ Jesukristoꞌs nwẽeseꞌphaꞌga Dxusaꞌ maꞌwẽga txajx Espirituꞌs ũs, txãꞌwẽyku txãaweꞌsxtxiwa ũs. Açaꞌ adxaꞌ ¿maꞌwẽ yũuçxa Dxus wedxniꞌs waꞌlna ũsukiꞌth?
18 Txajũꞌ Jerusalente ũssa yakhthẽꞌjweꞌsxaꞌ wẽseꞌjçxaꞌ, peena yuꞌ pasmée Dxusçxáanatx naꞌwẽ tuutheꞌj:
—Judiuweꞌsxmée vxite nasatxwa Dxusaꞌ ũsneꞌ pkaltxi nvxihtçxa Dxus tasxte pçuwaꞌjmée fxiꞌzewaꞌjaꞌs jĩnatx weçxáꞌ.
Antiokía çxhabte Dxus yakh fxiꞌzesaweꞌsx
19 Ãçxhaꞌ nyafxíi naꞌwẽ Estebanaꞌs ikhçxa vxite neeyũusáa yuutxiꞌ ahçeçxa pkxuuteꞌ, txãaweꞌsxaꞌ ũphna uꞌjçxaꞌ maaíi yuꞌ Fxenice kiwen, vxiteꞌ Çxipre kiwesu, vxiteꞌ Antiokía çxhabsu kxsũ paꞌjçxa vxite nasa yuutxiꞌ ptaꞌsxmée judiu jiꞌj pweꞌsx yuuçxáatx ptaꞌsxiꞌ Dxus yuwe uꞌsesaꞌs.
20 Nawa Dxus yakh fxiꞌzesa Çxipre vxiteꞌ Cirene kiwejuweꞌsx maaíi yuꞌ Antiokía çxhabte paꞌjçxaꞌ, judiuweꞌsxmeetxwa ptaꞌsxtxi Jesus kaapiyaꞌjni ewte fxiꞌzewaꞌjaꞌs.
21 Açaꞌ Dxus puꞌçxteꞌ, txãaweꞌsxaꞌ nyafxíi jxpubana fxiꞌzeniꞌs nvxihtçxa Jesus kaapiyaꞌjniꞌs nwẽeseꞌjtx.
22 Txãꞌwẽtx Dxusaꞌs nwẽeseꞌj jĩniꞌs Jerusalente pkhaakhena ũssaꞌ jiyuçxaꞌ, Bernabeaꞌs kaahtx Antiokía çxhabna.
23 Açaꞌ Bernabeaꞌ kxte paꞌjçxaꞌ wala weçxak Dxus txãꞌwẽ puꞌçxniꞌs uyçxa. Saꞌ jxukaytxi yuꞌkxpejk jxpubamée ew Dxus yakh fxiꞌzekahn.
24 Txãa paꞌgatey Bernabeaꞌ Dxus Espirituꞌs txajx ũuste jxuka jxpaꞌgaçxa Dxus yakh yuuçxáa fxiꞌzesak yuꞌ. Txajũꞌ nasatx wala yaꞌknayku Dxus jĩi.
25 Txãꞌwẽ yũuçxaꞌ, Bernabeaꞌ Tarso çxhabna Sauloꞌs peꞌjyaꞌ uꞌjçxaꞌ, Antiokía çxhabte nuypaꞌkh.
26 Saꞌ kxte teeçx anxutx pkhaakhena ũsuꞌ nasa maꞌwẽsatxwa jxuka kaapiyaꞌjna. Antiokíatetx nyafxçxah kristiano jĩna kxsusnisa yuu Kristoꞌs nwẽeseꞌjsaweꞌsxtxi.
27 Txãn ensuꞌ Dxus yuwe ptaꞌsxsaweꞌsx Jerusalenu yuusa paꞌjtx Antiokíate.
28 Teeçxsa Agabo yaasesaꞌ Dxus Espiritu kaajiyuꞌtheꞌ, yakhthẽꞌjweꞌsx ksxavxyte yujuçxa: Judiuweꞌsx kiwete jxuka wẽje en paꞌjana jĩnak ptaꞌsx. (Txãꞌwẽ ptaꞌsxniꞌ kxtey yuuk jxkaahsa Klaudio ente.)
29 Txãꞌwẽ wẽje en paꞌjana jĩniꞌs wẽseꞌjçxaꞌ, Dxus yakh fxiꞌzesa Antiokíateweꞌsxaꞌ txãaweꞌsx jiꞌphuni yakh puꞌçxyaꞌ yajkxtxi yakhthẽꞌjweꞌsx Judea kiweteweꞌsxtxi.
30 Txajũꞌ peeswaꞌjaꞌs pkhakhçxa kaahtx Bernabé Saulo yakh Judeate ancianoweꞌsxtxi dukhkahn.
