Hechos 12:1-25
12 Txãn ensuꞌ jxkaahsa Herodesaꞌ pkxuuyaꞌ yajkxku Dxus yakh fxiꞌzesatx.
2 Saꞌ kçxilxuh kiikheꞌkh Juan nyakh Jakoboꞌs.
3 Txãꞌwẽ yũuteꞌ Jakoboweꞌsxtxi açesa judiuweꞌsxaꞌ weçxatx jxkaahsa Herodesaꞌs, açaꞌ Pedronawa preesuꞌkhaakh kiikheꞌjyaꞌ. Pan lewadura jiꞌphmée ũꞌwaꞌj fxiesta entek txãꞌwẽ yũu.
4 Herodesaꞌ Pedroꞌs preesu tudçxaꞌ karcelte ktxaajaꞌkh. Kuste pahz us yuꞌpthehna peꞌtewaꞌjsa soldau txajk, yuꞌptheh iisa pahz pahz yujukahn. Paskua fxiesta en skhẽwte nasaa ksxavxyte kutxiꞌjyaꞌ sũhçxak txãꞌwẽ yũu.
5 Açaꞌ Pedroꞌ karcelte wala ew yupni ũsuꞌk, nawa Dxus yakh fxiꞌzesaweꞌsx yuꞌ Dxus yakh puꞌvxituméetx puutx weꞌwena ũsuꞌ Pedro paꞌgate.
Dxusaꞌ Pedroꞌs karceluh kutxiꞌjni
6 Herodesaꞌ Pedroꞌs nasaa ksxavxyte kutxiꞌjwaꞌj en ãjaçteꞌ, txãa kuste Pedroꞌ dejk eꞌz soldau pxãhte, eꞌz kadenaju tudni. Naapkaçxhaꞌ vxite eꞌz soldau yuꞌ karcel vxitxtetx yupna ũsuꞌ.
7 Txãa dudte Dxus angel vxyaaçxáa yuuteꞌ, karcelte jxuka eenaꞌk kweeth. Txajũꞌ angelaꞌ naꞌjĩnak tuꞌkakana Pedroꞌs fxĩtx:
—Dud yuh mkiite jĩçpkaçxhaꞌ, çam kadenaꞌ çxukwetetx Pedro kuseju.
8 Açaꞌ kiꞌ weꞌwek txãa angelaꞌ:
—Iidx jxtudniꞌs yaꞌjytudçxa, pelgatxiꞌs mpaath jĩteꞌ, Pedroꞌ txãꞌwẽy yũuk. Txajũꞌ txãa angelaꞌ kiꞌ weꞌwek:
—Atxhaꞌs jxkaaççxa myuh adx eꞌstey jĩteꞌ,
9 Pedroꞌ angel eꞌstey kasejk, isa angelaꞌ eka kutxiꞌjiçtewa ksxaꞌwnawáa ũsneꞌtka sũhnaçxáa yajkxna.
10 Nawa nyafx vxitxte soldau yupna ũsnite skhẽwçxaꞌ, eꞌste vxitxte soldau yupna ũsnitewa skhẽwtxi. Saꞌ eka kasehwaꞌj çam vxitxte sẽjeçpkaçxhaꞌ, txãa vxitxaꞌ peekxçxáa phaatek. Açaꞌ kasehçxa uꞌjtx klxiikhunsu. Txajũꞌ angelaꞌ Pedroçxáana nvxihtçxa uꞌkh.
11 Txajũꞌ Pedroꞌ naasũjk: Ksxaꞌwnimeega yuꞌ, isa Dxusneꞌ txajx angelaꞌs kaah Herodes kuseju adxaꞌs nweꞌweyaꞌ, vxiteꞌ judiuweꞌsxwa nakwe wala ewmée yũuyaꞌ ũythasuꞌtx txãaju nweꞌwekahn sũhnak yajkx.
12 Pedroꞌ txãꞌwẽ ew jiyuçxaꞌ uꞌkh Juan Markos njĩꞌj Maria yatna. Kxteꞌ wala kuh pkhaakheçxa Pedro paꞌgate Dxusaꞌs neeweꞌwenatx ũsuꞌ.
13 Kxte kũhçxa vxitxte ukaꞌkateꞌ, teeçx luuçx uꞌy Rode yaasesak thegyaꞌ kaseh.
14 Nawa Pedro weꞌweniꞌs jiyuçxaꞌ, vxitxaꞌs phaademée weçxana kiꞌ sxawedku dxiigay wuwuuçxáa:
—Pedroꞌ vxitxte ũsaꞌ jĩna ptaꞌsxyaꞌ.
15 Açaꞌ naꞌjĩnatx weꞌwe:
—Luuku weꞌwena ũsiꞌçxa jĩtewa:
—Ĩsxiijaꞌçmeeth, isa yujaꞌ jĩteꞌ:
—Pedromée, txãa yakh piꞌkxna uꞌjusa angelçxáana jĩtx.
16 Txãꞌwẽtewa, Pedro yuꞌ vxitxte ukaꞌkana nesku yuꞌ. Açaꞌ vxitxaꞌs phaadeyaꞌ uꞌjçxaꞌ, Pedroꞌs uyçxa wala kuh yajkxtxi.
17 Nawa sxuunaꞌ yuukahn Pedroꞌ kuseju ptaꞌsxçxaꞌ, Dxus maꞌwẽ karceluh nweꞌweniꞌs jxuka ptaꞌsxku. Saꞌ:
—Jakobo vxiteꞌ kweꞌsx yakhthẽꞌjweꞌsxtxi mpeetaꞌsxwe txãꞌjĩnaꞌwa, txãa yuꞌ kasehna uꞌkh vxite ahte.
18 Kuskuuskhẽ khikhyniteꞌ, wala kuh yajkxna ũukhtxi soldauweꞌsxaꞌ txãꞌwẽ Pedro maꞌwẽ yũutewa jiyumeeçxa.
19 Txajũꞌ jxkaahsa Herodesaꞌ pakweyaꞌ kaakh, nawa uymeeteꞌ kxte karcelte thegsa soldautxku ikh kaah. Txãa eꞌsuçxáa Herodesaꞌ Judea kiweju kasehçxa Cesarea kiwetek uꞌpxaꞌ uꞌj.
Herodes uuníi
20 Herodesaꞌ wala puiina ũsuꞌk Tiro Sidón kiwete nasa yakh. Txãa paꞌgatx txãa nasaꞌ Herodes tasxte mjĩisa Blasto yaasesaꞌs vxyu dukhçxa txãa yakh uꞌj jxkaahsa tasxte utxaaçxa puiimée fxiꞌzewaꞌjaꞌs puutx weꞌweyaꞌ. Txãꞌwẽ yũumeeteꞌ, txãa nasaꞌ jxkaahsa kiwejuçxáatx ũꞌaꞌs jxpaꞌgana fxiꞌzesa yuꞌ.
21 Açaꞌ jxkaahsa Herodesaꞌ ptaꞌsxku kĩh ente txajx tasxte utxaawaꞌjaꞌswa. Saꞌ txãa en ãhteꞌ, Herodesaꞌ jxkaahsa athni ropatx athçxa txajx uꞌpnite kaçxçxa weꞌwek.
22 Txajũꞌ nasaꞌ naꞌjĩnatx weçxana sus weꞌwe:
—Naꞌwẽ weꞌwesaꞌ naa kiwete nasamée, Dxusaꞌ jĩçpkaçxhaꞌ,
23 txãa dudtey Dxus angelaꞌ akasa ũsku Herodesaꞌs, açaꞌ jxuka wes ũꞌteꞌ uuk, txãꞌwẽ nasaa weçxaniꞌs weçxana yaakxpaꞌga.
24 Nawa Dxus yuwe yuꞌ jweeíiçxáak walaana uꞌj mtee mteewa ptaꞌsxni.
25 Txajũꞌ Bernabé Sauloweꞌsxaꞌ mjĩiaꞌs jxãꞌjçxa Jerusalenuh kiꞌ sxawedtxi Juan Markosaꞌs peꞌjçxa.
