Hechos 13:1-52
13 Antiokía çxhabte pkhaakhena ũssa yakh ũsuꞌtx Dxus yuwe ptaꞌsxsa vxiteꞌ Dxus leyaꞌs jiisawa: Bernabé, vxiteꞌ khũçx Simon jĩnisa, vxiteꞌ Lucio Cirene çxhabuweꞌsx, vxiteꞌ Manaén Galileate jxkaahsa Herodes yakh ih walaasáa, vxiteꞌ Sauloꞌ.
2 Txãaweꞌsxaꞌ teeçx enteꞌ Dxusna selpiina yũunaana ũsteꞌ, Dxus Espirituꞌ naꞌwẽk weꞌwe:
—Saulo Bernabé yakh mkaahwe adxaꞌs selpikahn, txãaweꞌsxaꞌ adx paꞌyanisataꞌ mjĩiwaꞌjsa jĩk.
3 Txajũꞌ yũunaana jxãꞌjçxaꞌ, txãaweꞌsx dxikthesu peekizeçxa Dxusna neeweꞌwenaꞌ kaahtx.
Bernabeweꞌsxaꞌ Çxipre kiwete Dxus yuweꞌs ptaꞌsxni
4 Dxus Espiritu kaatheꞌ, Bernabé Sauloweꞌsxaꞌ Seleucia çxhabna uꞌjçxa txajũꞌ barkote khẽeçxa ĩkh pxãhte Çxipre kiwentxi uꞌj.
5 Txãa kiwete Salamina çxhabte paꞌjçxaꞌ, judiuweꞌsx pkhaakheni yat-su Dxus yuweꞌs ptaꞌsxyaꞌ takhtxi. Saꞌ Juan Markosnawa iipeꞌjtx yuꞌ puꞌçxwaꞌjsa.
6 Çxipre kiweꞌs pekũhna jxãꞌjaççxaꞌ, Pafxos çxhabtetx paꞌj. Saꞌ kxteꞌ teeçx judiu dxijxuusáa Barjesus yaasesaꞌstxi uy. Txãa piçthẽꞌjaꞌ wala ĩsxiisa yuꞌk Dxus yuwe ptaꞌsxsath jĩna ĩsxiina.
7 Txãa dxijxuusáꞌ kxte neꞌjweꞌsx wala jiisa Sergio Paulo tasxte mjĩisak yuꞌ. Txãa neꞌjweꞌsxaꞌ Dxus yuweꞌs wẽseꞌj wẽeçxa Bernabeweꞌsxtxi paꞌyak.
8 Nawa txãa dxijxuusáa Elimasaꞌ Bernabeweꞌsxtxiꞌ kweꞌweꞌj wẽemeꞌ, neꞌjweꞌsxaꞌ Dxus yuweꞌs jiyukahmen.
9 Txãꞌwẽ yũuteꞌ, Dxus Espirituꞌs ũuste jxuka jiꞌphsa Saulo Pablo yaasesaꞌ dxijxuusáa dxiꞌpte ũusçxa thegçxaꞌ, naꞌjĩk:
10 —Ĩsxiina fxiꞌzesa, ewmeesa, eçxthẽꞌj luuçx, ewsa yuꞌsaꞌ jxuka ahçena fxiꞌzesa ¿mjĩitega Dxus yuwe ewsaꞌs yupmée fxiꞌzeꞌçmée?
11 Txãa paꞌga Dxusaꞌ idxaꞌs ãçxhíi kastigaĩna, açaꞌ uyyaꞌ ãjamée fxiꞌzeneꞌga naa ensuꞌ jĩçpkaçxhaꞌ, txãa dudtey uyyaꞌ ãjameeçxaꞌ maaçxáatxwa pakwek puꞌkisçxa peꞌjna uꞌkhan.
12 Txajũꞌ kxte neꞌjweꞌsxaꞌ txãꞌwẽ yũuniꞌs uyçxaꞌ, Jesus kaapiyaꞌjniꞌs isa yuhna sũhna ũuste jxpaꞌgak.
Pabloweꞌsx Pisidia kiwesu pekũhni
13 Pablo vxiteꞌ txãa yakh piꞌkxna uꞌjusa yãꞌjçxa barkote khẽeçxa Pafxos çxhabu kasehtx Panfxilia kiwete Perge çxhabte paꞌjyaꞌ. Nawa Juan Markos yuꞌ Perge çxhabte paꞌjçxaçxáa kiꞌ sxawedku Jerusalennay.
14 Pabloweꞌsxaꞌ Perge çxhabu kasehçxa Pisidia kiwete Antiokía çxhabnatx uꞌj. Kxte paꞌjçxaꞌ, jxkaase ensuꞌ judiuweꞌsx pkhaakheni yatte uꞌkatx.
15 Açaꞌ pkhaakheni yatte npiiçthẽꞌjaꞌ Dxus ley vxiteꞌ Dxus yuwe ptaꞌsxsa fxiꞌjniꞌs lẽeyna jxãꞌjçxaꞌ, naꞌwẽtx weꞌwe:
—Yakhthẽꞌjweꞌsx, kĩh weꞌwewaꞌj jiꞌphçxaꞌ, myuꞌkxpehwe nasatx ãçxhíi jĩteꞌ,
16 Pabloꞌ kiitenaꞌwa kuseju sxuunaꞌ yuuwaꞌjaꞌs ptaꞌsxnaꞌwa weꞌwek:
—Israel jiꞌjweꞌsx, vxite nasawa Dxusna nwẽeseꞌjsa, jxpaꞌyakx mwẽeseꞌjwe:
17 Israelweꞌsx Dxusaꞌ kweꞌsx yaçgaweꞌsxtxi txhitxhçxa wala kpeenaꞌkh Egipto kiwete nee ũsiyna, saꞌ txãa kiwejũ kutxiꞌkh kĩhwa seenaꞌsa kaavxyaꞌjaꞌjçxa.
18 Dxusaꞌ nasa uꞌpnimée kiwete kuarenta anxu wantãyku nasa ãhmée yũuna fxiꞌzeꞌçtewa.
19 Saꞌ Kanaan kiwete nasatx jxuka ivxiituk txãa kiweꞌs kweꞌsx yaçgaweꞌsxtxi ũsyaꞌ.
20 Txajũꞌ kuatrocientos cinkwenta anxu ãhpkaçx jxkaahwaꞌjsa jiꞌphmée kweꞌsxtxi thegwaꞌjsa khuẽsçxáak nvxiht, Dxus yuwe ptaꞌsxsa Samwel entepkaçx.
21 Txajũtx txãaweꞌsxíi pẽjx teeçx jxkaahwaꞌjsa, açaꞌ Dxusaꞌ ũsku kuarenta anxu jxkaahwaꞌjsa Cis nçxiꞌk Saul yaasesaꞌs. Txãa piçthẽꞌjaꞌ Benjamin jiꞌkh yuꞌ.
22 Txãa eꞌsuꞌ Dxusíi Saulaꞌs jxkaahnijũ kutxiꞌjçxa, Davxidaꞌsku jxkaahwaꞌjsa kiꞌp. Saꞌ naꞌwẽk weꞌwe: Isaí nçxiꞌk Davxid yuuçxáa adx jxkaahniꞌs kxtey yuuwaꞌjsa uythu txãꞌ adx wedxnisaꞌ jĩk.
23 Jesusaꞌ Davxid jiꞌtheweꞌsxku yuꞌ, açaꞌ txãꞌsnak Dxusaꞌ nvxiht Israelweꞌsxtxi nweꞌwewaꞌjsa, nyafxiitey Dxusaꞌ maꞌwẽneꞌ ũsyaꞌ neeyũu txãꞌsaꞌ kxtey yuuk.
24 Jesus paꞌjmeyna Juanaꞌ Israel nasa jxukaysatx ptaꞌsxku: Iꞌkweꞌsx pkaltxi jxuka nvxihtçxa Dxus tasxte misxawedwe yuꞌte yaꞌbautisãyna jĩna.
25 Saꞌ Juanaꞌ txajx uu en utxaaçteꞌ, naꞌwẽk weꞌwe: Adxaꞌ iꞌkweꞌsx ũythasuꞌiꞌkwe txãameeth. Adx eꞌste teeçx yujaꞌ txajx pelgatxi wesçxáa yuhnawa adxaꞌ khihbxaꞌ selpimeesath jĩk.
26 Yakhthẽꞌjweꞌsx Abrahan jiꞌj, vxite nasawa Dxusna nwẽeseꞌjsa iꞌkweꞌsx ewte neeyũuwaꞌjaꞌs ptaꞌsxnik yuu.
27 Nawa Jerusalente ũssa vxiteꞌ txãaweꞌsx npiiçthẽꞌjsawa jiyumeetaꞌ Jesusaꞌ kimtewa. Saꞌ Dxus yuwe ptaꞌsxsa fxiꞌjniꞌswa jiyumeetaꞌ pkhaakheni yat-su jxkaase een isa lẽeyçxawa. Saꞌ txãaweꞌsxíiçxáa Jesusaꞌs ewmeete nvxihtçxaꞌ, Dxus yuwe ptaꞌsxsa fxiꞌjni txãaweꞌsx lẽeyniꞌs kxtey yuutx.
28 Txãꞌwẽ Jesus ewmée yũuniꞌs uymeeçxawa Pilatoꞌs yuwe ũstxi Jesusaꞌs kiikheꞌkhan.
29 Txajũꞌ Dxus librute maꞌwẽneꞌ fxiꞌjni ũsuꞌ txãꞌsaꞌ jxuka kxtey yuuçxaꞌ, Jesusaꞌs kluusu spajkxçxa pedaatx.
30 Nawa Dxusaꞌ uuniijũ kiꞌ ĩtxi vxitku.
31 Açaꞌ Jesusaꞌ wala kuh en vxyaak Galileajuweꞌsx Jerusalenna piꞌkxna yuusatx. Txãasa txãaweꞌsxaꞌ Jesus kimtewa ptaꞌsxsataꞌ.
32 Txãa paꞌga kweꞌsxwa iꞌkweꞌsxtxi ptaꞌsxiçthaꞌw nyafxiitey kweꞌsx yaçgaweꞌsxtxi Dxusaꞌ ũsyaꞌ neeyũuk txãꞌsna.
33 Kweꞌsxaꞌ yaçgaweꞌsx jiꞌthaꞌw, txãa paꞌgak Dxusaꞌ txajx ũsyaꞌ neeyũuniꞌs kweꞌsx yakh kxtey yuuçxa, Jesusaꞌs uuniijũwa ĩtxi vxit, salmo doste naꞌwẽ fxiꞌjni ũsaꞌ txãꞌwẽy: Idxaꞌ adx nçxiꞌkgu. Açaꞌ idxaꞌs uuniijũwa ĩtxi vxitthu ãçxhaꞌ jĩk.
34 Uuteꞌ txãa kakweꞌ suweekahmen ĩtxi yuuwaꞌjaꞌs Dxusaꞌ ptaꞌsxku txajx librute naꞌjĩna: Iꞌkweꞌsxtxi peeygãawaꞌjaꞌs Davxid yakh puutx weꞌweth txãꞌsaꞌ kxtey yuꞌnja jĩk.
35 Txãasak salmo vxite ajkhẽwa naꞌjĩꞌ: Idxna selpisáa peeygãanisa kakweꞌs nvxihtmeeneꞌga suweeweꞌsxte jĩꞌk.
36 Txãꞌwẽ weꞌweniꞌ isa kxtey yuuyujk. Txajíik Davxidaꞌ txãn ensuꞌ Dxus jxkaahniꞌs kxtey yuuçxa eꞌsuꞌ uuk, açaꞌ txajx kakweꞌs yaçgaweꞌsx pedaniitey pedaateꞌ, txajx kakweꞌ kxtee jxuka pçuuk.
37 Nawa Dxusaꞌ Jesusaꞌs uuniijũwa ĩtxi vxitku, açaꞌ txãa kakweꞌ pçuumeꞌ.
38 Ãçxhaꞌ yakhthẽꞌjweꞌsx iꞌkweꞌsxaꞌ mjiyuwe: Iꞌkweꞌsx pkaltxi peltunãywaꞌjaꞌs ptaꞌsxiꞌthaꞌw, nawa peltunãywaꞌjsaꞌ Jesus yuuçxáꞌ.
39 Nyafxíi Moises leyaꞌs nwẽeseꞌjçxawa, perdonaꞌs uymeeiꞌkwe. Nawa Jesusna yajkxçxa nwẽeseꞌjçxaꞌ, perdonaꞌs uyuuneꞌkwe maawa.
40 Mpaꞌyajkxwe, txãꞌwẽmeꞌ, nyafxíi Dxus yuwe ptaꞌsxsa naꞌwẽ weꞌwetx txãꞌ kxtey yuuweꞌsxtaꞌ:
41 Weeçxsaweꞌsx, mpaꞌyajkxwe. Iꞌkweꞌsx vxituwaꞌjaꞌs mũukhwe.
Txãꞌwẽmeꞌ, adxíi Dxusthu naꞌ,
Txãꞌwẽ yũuwaꞌj en ãhteꞌ, kĩhwa seenaꞌçxáa yuꞌnja.
Txãꞌwẽ yũuwaꞌjaꞌs ptaꞌsxtewa, iꞌkweꞌsxaꞌ jxpaꞌgameeneꞌkwe jĩnatx weꞌwe jĩk Pabloꞌ.
42 Txajũꞌ Pabloꞌ txãꞌwẽ ptaꞌsxçxaꞌ, txãa yakh piꞌkxna uꞌjusa yakh judiuweꞌsx pkhaakheni yatu kasejeçteꞌ, kxte ũssa judiu jiꞌjmeeçxawa Pabloweꞌsxtxi kiꞌ piꞌkxtxi vxite jxkaase ente txãꞌwẽy ptaꞌsxyaꞌ yuukahn.
43 Kxte pkhaakheni pçuuteꞌ, judiuweꞌsx wala kuhsa vxiteꞌ judiu jiꞌjmeeçxawa judiuweꞌsx kaapiyaꞌjniꞌs jxpaꞌgasa Dxus yuweꞌs wala ew nwẽeseꞌjçxaꞌ, Pabloweꞌsx kaapiyaꞌjniꞌs nwẽeseꞌjsatx yuu. Açaꞌ Pabloweꞌsxaꞌ wala yuꞌkxpehtx Dxus peeygãanite waꞌlmée fxiꞌzekahn.
44 Vxite kiꞌsu jxkaase enteꞌ, çxhabte nasa jxukay pkhaakhetx Dxus yuweꞌs wẽseꞌjyaꞌ.
45 Nawa txãꞌwẽ nasa wala pkhaakheteꞌ, kxte judiuweꞌsxaꞌ wala ũusaçxaçxa Pabloweꞌsxtxi açeweꞌwena wẽesxutx.
46 Txãꞌwẽtewa, Pabloweꞌsxaꞌ ũukhmeetx naꞌjĩna weꞌwe:
—Dxus yuweꞌs nyafxte iꞌkweꞌsx judiu jiꞌj khuẽꞌytxi ptaꞌsxwaꞌkh yuꞌ, kxahthaꞌw ptaꞌsx. Nawa jxpaꞌgameeyãꞌjiꞌkwe pçumée ĩtxi fxiꞌzewaꞌjaꞌs, açaꞌ ãçxhaꞌ uꞌjweçthaꞌw judiumée vxite nasatx ptaꞌsxyaꞌ.
47 Dxusaꞌ kweꞌsxtxi naꞌwẽk weꞌwena kaah:
Nasa ksxavxysu eenaꞌ kweethwaꞌjsath nvxiht iꞌkweꞌsxtxiꞌ,
Saꞌ txãꞌwẽy maa kiwetewa ewsaꞌs ptaꞌsxwaꞌjsa jĩk.
48 Açaꞌ judiu jiꞌjmée vxite nasa txãꞌjĩniꞌs wẽseꞌjçxaꞌ, Dxus yuweꞌ wala ewsa yuꞌga jĩna weçxaçxa maaçxahneꞌta bagaçxte yuhwa pçumée ĩtxi fxiꞌzewaꞌjsa yuꞌ txãa yuꞌ jxukay Dxus yuweꞌs jxpaꞌgatx.
49 Txãꞌwẽk Dxus yuweꞌs ptaꞌsxni yuu txãa kiwete jxuka.
50 Nawa txãa çxhabte judiuweꞌsxaꞌ nasa jxtuhthesa petx uꞌy yãꞌjçxa kxteeçxah puutx weꞌweçxa, Pabloweꞌsxtxi pkxuuyaꞌ yajkxtxi txãa kiwejũ kutxiꞌphkaçx.
51 Txãꞌwẽ yũuteꞌ, Pabloweꞌsxaꞌ txãaweꞌsx çxidate kiwe tuhdaꞌs sakweekweçxa uꞌjtx Ikonio çxhabna.
52 Nawa kxte nasa Dxus yuweꞌs nwẽeseꞌjsa yuꞌ, wala weçxana neeyũutx, Dxus Espirituꞌs ũuste jxpaꞌgaçxa.
