Hechos 14:1-28
14 Pabloweꞌsxaꞌ Ikonio çxhabte paꞌjçxaꞌ, judiuweꞌsx pkhaakheni yatte uꞌkaçxa, Dxus yuwe zhiçxkwesaꞌs ptaꞌsxteꞌ, wala jxpaꞌgatx judiuweꞌsx vxiteꞌ judiuweꞌsxmeesawa.
2 Nawa judiuweꞌsx Jesus kaapiyaꞌjniꞌs açesa yuꞌ judiu jiꞌjmée vxite nasatx ewmée yuꞌtxweꞌweçxa yakhthẽꞌjweꞌsxtxi açeyaakxwaꞌjaꞌs vxittxi.
3 Txãꞌwẽ açepaꞌgaíiçxáatx Pabloweꞌsxaꞌ jweeíiçxáa kxte txaçx ũsuꞌ, Dxusaꞌ puꞌçxhina sũhna ũukhmée ptaꞌsxna. Açaꞌ Pabloweꞌsx txãꞌwẽ Dxus peeygãaniꞌs ptaꞌsxteꞌ, Dxusaꞌ kxte nasa wẽseꞌjsa yuutxiꞌ ewku kaajiyuꞌj Pabloweꞌsxtxi kĩhwa seenaꞌsaꞌs kaavxyaꞌjaꞌjyaꞌ ãjawaꞌjaꞌs ũsçxa.
4 Açaꞌ txãa çxhabteweꞌsxaꞌ txuteetx, vxiteꞌ judiu açesaweꞌsx juꞌgu, vxiteꞌ Pabloweꞌsx juꞌgu.
5 Txajũꞌ judiuweꞌsx vxiteꞌ judiuweꞌsxmeesawa khuẽsweꞌsx yakh puutx weꞌwetx Pabloweꞌsxtxi wẽesxuna kwet wãatatahçxa ikhyaꞌ.
6 Nawa Pabloweꞌsx jiyuçxaꞌ, ũphna uꞌjtx Likaonia kiwete Listra Derbe çxhabna kxsũ jxuka pekũhçxa
7 Dxus yuwe ewte nvxiitwaꞌjsaꞌs ptaꞌsxyaꞌ.
Listra çxhabte Pabloꞌs kwet wãatatahçxa ikh wẽeni
8 Saꞌ Listra çxhabte paꞌtheꞌ, kxteꞌ teeçx piçthẽꞌj çxida ãçaꞌsak uꞌpuꞌ. Txãꞌ upxhíi txãꞌwẽ yãꞌkh yuꞌ, saꞌ bagaçxte yuhwa uꞌjuyaꞌ ãjasameek yuꞌ.
9 Txãa piçthẽꞌjaꞌ Pablo ptaꞌsxniꞌsku wẽseꞌjna uꞌpuꞌ. Açaꞌ Pabloꞌ txajx dxiꞌpte thegçxaꞌ jiyuk nuykatxhina sũhniꞌs.
10 Saꞌ susku weꞌwe:
—Kuꞌle myuju jĩna. Naapkaçxhaꞌ txãa piçthẽꞌjaꞌ ũphçxa yujunaꞌwa ew yãꞌkh uꞌjuyaꞌ ãja.
11 Pablo txãꞌwẽ yũuniꞌs nasa uyçxaꞌ, naꞌwẽtx Likaonia yuweju weyna weꞌwe:
—¡Nasa naꞌwẽ yuuçxa dxusweꞌsx kweꞌsx tasxte kĩhtx! jĩçxaꞌ,
12 Bernabeaꞌs Jupiter jĩnatx kxsusuꞌ, saꞌ Pabloꞌs Merkurio jĩnatx weꞌweꞌ, wejx thaakwe weꞌwesa yuupaꞌga.
13 Txãaweꞌsx dxus Jupiter jĩꞌtx txãꞌsna neeweꞌwena ũsni yataꞌ çxhab peekuꞌthek ũsuꞌ, açaꞌ kxte selpisáa sacerdoteꞌ kla jxũna paꞌkh kite zhiçxkwesa khyũꞌjũꞌjçxa. Açaꞌ nasaꞌ Pabloweꞌsxtxi weçxana peejxũkweçxa neeweꞌweyaꞌwatx yuꞌ txãa klatx ikhna.
14 Nawa Pabloweꞌsx jiyuçxaꞌ txãꞌwẽ yũute nxusçxa peekx athni ropatx sudenaꞌwa nasaa ksxavxyte kũhçxa naꞌjĩnatx sus weꞌwe:
15 —Iꞌkweꞌsxaꞌ ¿kĩjxaꞌkwe txãꞌwẽ yũꞌ? Kweꞌsxaꞌ nasa iꞌkweꞌsx naꞌwẽysa íiçxáathaꞌw. Saꞌ txãꞌwẽ yũuna fxiꞌzenisaꞌ seelpimeesaꞌ naa paꞌga nvxihtçxa Dxus ĩtxĩsa cieluꞌs pheuꞌkh, kiwe, ĩkh wala kxte kĩhçxah ũstxna txãatx jxuka txãꞌsnaçxáa selpiina neeweꞌwewaꞌjaꞌ jĩna ptaꞌsxyaꞌ yuusaçxáathaꞌw.
16 Txãa Dxusaꞌ nyafxíi ensuꞌ nasatxiꞌ nvxihtku maꞌwẽwa yũuna fxiꞌzekahn.
17 Nawa Dxus ũsyuhna sũjkahn kaajiyuꞌjna nesku yuꞌ, nus kaapaꞌjaꞌjna, uuthasxtxi ew kçxhãaçxhaꞌjna, ũꞌwaꞌjaꞌs peejxmée peesna, wẽt fxiꞌzewaꞌjaꞌswa ũsna jĩnak ptaꞌsx.
18 Txãꞌwẽ ptaꞌsxçxak wala thẽyçxáawa pejka nasatx knay, txãaweꞌsxtxi weçxana kla ikhna peejxũkwekahmen.
19 Txãa eꞌsuꞌ judiuweꞌsx Antiokía Ikonio çxhabuweꞌsx paꞌjçxa kxte nasatx ewmée yuꞌtxweꞌweçxa kwet wãatatahtx Pabloꞌs. Txãꞌwẽ yũuçxaꞌ, uuyãꞌjneꞌ sũhçxa wezxna uꞌjçxa çxhab ekahtx wãatãh.
20 Nawa kxteeweꞌsx Dxus yuweꞌs nwẽeseꞌjsa yuꞌ, Pabloꞌs thegyaꞌ uꞌtheꞌ, Pabloꞌ kiꞌ ũus jiꞌphuçxa kiiteçxa kiꞌ çxhabtey uꞌkak. Saꞌ vxite kuskuskhẽꞌ Bernabé yakh Derbe çxhabnatx uꞌj.
21 Derbe çxhabte paꞌjçxaꞌ, Dxus yuwe ewte nvxiitwaꞌjsaꞌs ptaꞌsxçxa nasatx wala knaytxi Dxus jĩi. Txãꞌwẽ yũuçxatx sxawed Listra, Ikonio, Antiokía çxhabsu iipaꞌj.
22 Txãa çxhabsu paꞌjçxaꞌ, Dxus yuweꞌs nwẽeseꞌjsatx wala yuꞌkxpehtx Dxus jxkaahna ũsnite uꞌka wẽeçxaꞌ Dxus yakh txutemée fxiꞌzewaꞌjaꞌ, makwe pxthaa nxuswaꞌj en paꞌthewa jĩna.
23 Saꞌ kxsũ pkhaakhena ũsnisu jxkaahwaꞌjsa ancianowa pakweçxa kiꞌptxi. Txãꞌwẽ yũuçxatx yũunaaçxa Dxus kusete neeweꞌweçxa nvxiht.
Pabloweꞌsx Antiokía çxhabnay kiꞌ sxawedni
24 Txajũ uꞌjçxaꞌ, Pisidia kiwesu skhẽwçxa Panfxilia kiwetetx paꞌj.
25 Txãa kiwete Perge çxhabte Dxus yuweꞌs ptaꞌsxçxa Atalia çxhabnatx uꞌj.
26 Txajũꞌ barkote khẽeçxa uꞌjtx Antiokía çxhabna, majũneꞌta Dxus kusete neeweꞌweçxa mjĩiyaꞌ kaahnisa yuu txãa çxhabnay.
27 Antiokía çxhabte paꞌjçxaꞌ, kxte pkhaakhena ũssa yakhthẽꞌjweꞌsxtxi ptaꞌsxtxi Dxus maꞌwẽneꞌ txãaweꞌsxtxi puꞌçxçxa judiu jiꞌjmée vxite nasatxwa Dxus yuweꞌs kaajiyuꞌj txãꞌsna.
28 Saꞌ Pabloweꞌsxaꞌ kxte wala txaçx ũsuꞌtx Dxus yuweꞌs nwẽeseꞌjsaweꞌsx yakh.
