Hechos 15:1-41
15 Txãa eꞌsuꞌ Judeajuweꞌsx judiu Antiokía çxhabte paꞌjçxa kxteeweꞌsxtxi naꞌwẽtx kaapiyaꞌjna ũsuꞌ: Yaꞌcirkuncidãywaꞌj jiꞌphiꞌkwe Moises jxkaahniꞌs kxtey yuuna. Txãꞌwẽ yũumeeçxaꞌ, ewte neeyũuyaꞌ ãjameeneꞌkwe jĩna.
2 Açaꞌ txãꞌwẽ kaapiyaꞌtheꞌ, Pabloweꞌsxaꞌ wala juunaꞌ puutx weꞌwetx txãꞌwẽ ptaꞌsxsa yakh. Txajũꞌ kxte pkhaakhena ũssa yakhthẽꞌjweꞌsxaꞌ Pabloweꞌsxtxi vxite kaapiꞌkiꞌjçxa Jerusalenna kaahtx Jesus jxkaahnisaweꞌsx vxiteꞌ anciano kxteeweꞌsx yakh txãa yuweꞌs paapẽjxna puutx weꞌwekahn.
3 Antiokía çxhabte pkhaakhesa yakhthẽꞌjweꞌsx kaatheꞌ, Fxenicia Samaria kiwesu skhẽwnatx uꞌj, judiu jiꞌjmée vxite nasawa Dxus yuweꞌs jxpaꞌgaçxa nyafxíi jxpubana fxiꞌzeniꞌs nvxihttxi jĩna ptaꞌsxna. Açaꞌ kxsũ yakhthẽꞌjweꞌsxaꞌ wala weçxatx txãꞌwẽ jiyuçxaꞌ.
4 Pabloweꞌsx Jerusalente paꞌtheꞌ, kxte pkhaakhena ũssa vxiteꞌ Jesus jxkaahnisaweꞌsx ancianoweꞌsx yãꞌjçxa jxpaꞌgatx. Açaꞌ Pabloweꞌsxaꞌ jxuka ptaꞌsxtxi txãꞌwẽ judiu jiꞌjmée vxite nasatxwa Dxusaꞌ ewte neeyũuwaꞌjaꞌs ũsku jĩna.
5 Nawa maaíi yuꞌ kxte ũssa fxariseoweꞌsx Jesus kaapiyaꞌjniꞌs jxpaꞌgasaçxawa naꞌwẽtx weꞌwe yujuçxa: Judiu jiꞌjmée vxite nasa ãçxh uꞌse Dxus yuweꞌs jxpaꞌgasaweꞌsxtxiꞌ cirkuncidãyçxa, Moises jxkaahni leyaꞌs jxuka nwẽeseꞌkhan jxkaathe yuuna jĩtx.
6 Txajũꞌ Jesus jxkaahnisa vxiteꞌ ancianoweꞌsx yakh pkhaakheçxa txãa yuweꞌs pheuꞌjyaꞌ puutx weꞌwetx.
7 Txãꞌwẽ wala txaçx txãa yuweꞌs puutx weꞌwenijũꞌ, Pedroꞌ kiiteçxa naꞌwẽk weꞌwe:
—Yakhthẽꞌjweꞌsx, iꞌkweꞌsxaꞌ jii iꞌkwe Dxusaꞌ adxaꞌs txhitxhku txajx yuwe ewte nvxiitwaꞌjsaꞌs ptaꞌsxkahn judiu jiꞌjmée vxite nasatxwa, kxah txãaweꞌsxwa jiyukahn.
8 Dxusaꞌ jiiaꞌ maaçxah nwẽeseꞌjwaꞌjsatewa, txãasa íik vxite nasawa txãꞌsna nwẽeseꞌjwaꞌjsa yuutxiꞌs txajx Espirituꞌs ũs, kweꞌsxtxiwa maꞌwẽga txajx Espirituꞌs ũs txãꞌwẽy.
9 Dxusaꞌ maa yuhtxwa nasa fxiisataꞌ sũjuꞌçmeꞌ kweꞌsx yakh vxite nasa yakh. Txãasaíiçxáak vxite nasaçxawa Jesusaꞌs yaakxsa yuutxiꞌs txãaweꞌsx pkaltxiꞌ peltunãy.
10 Dxus txãꞌwẽ yũuçxa nweꞌwenisatxiꞌs ¿kĩjxaꞌkwe iꞌkweꞌsxaꞌ jweeíiçxáa thẽysaꞌs yuutxana jxkaah wẽjeꞌ? Txãa thẽysaꞌs kweꞌsx yaçgaweꞌsx yuhwa kxtey yuuyaꞌ ãjameetaꞌ, açaꞌ kweꞌsx yuꞌ wejxthaꞌw ãjãmée.
11 Txãꞌwẽ kweꞌsxaꞌ txãa thẽysaꞌs kxtey yũuyaꞌ ãjãmeetewa, Jesusaꞌ peeygãhçxa yuuçxáaneꞌ kweꞌsxtxiꞌ nweꞌwe sũjuꞌthaꞌw. Txãasaneꞌ vxite nasatxwa txãꞌwẽyçxáa nweꞌwe.
12 Pedro txãꞌwẽ weꞌweteꞌ, jxukaysa sxuunaꞌtx yuu, Pabloweꞌsx ptaꞌsxniꞌs wẽseꞌjyaꞌ. Açaꞌ txãaweꞌsxaꞌ ptaꞌsxtxi Dxusaꞌ txãꞌwẽk kim yuhwa ãjãnimeesaꞌs kaavxyaꞌjaꞌjyaꞌ ãjãwaꞌjaꞌs kweꞌsxtxi ũsçxa judiu jiꞌjmée vxite nasatxwa jxuka puꞌçx jĩna.
13 Txãaweꞌsx ptaꞌsxna jxãꞌtheꞌ, Jakobok weꞌwe:
—Yakhthẽꞌjweꞌsx, mwẽeseꞌjwe.
14 Simon Pedro naꞌwẽk ptaꞌsx judiu jiꞌjmée vxite nasatxwa Dxusaꞌ nyafxçxah peeygãhçxa txãaweꞌsxtxi txhitxhku txajx luuçx yuuwaꞌjsa.
15 Txãꞌwẽ yuuwaꞌjaꞌs Dxus yuwe ptaꞌsxsaweꞌsx fxiꞌjtx txãꞌ kxtey yuuk. Txãa fxiꞌjniꞌ naꞌjĩꞌk:
16 Txãꞌwẽ yũunijũ sxawedçxa, kiꞌ txajaꞌnja Davxid txaahni yat wetenisaꞌs.
Txãa wetenisaꞌs pheuꞌjçxa uꞌse vxitçxa nvxiituꞌnja.
17 Kxah maawa jxuka Dxusaꞌs pakweyaꞌ ãjatxna,
Maa kiwejuweꞌsxwa adxaꞌs jiyusa yuꞌ jxuka.
18 Txãꞌwẽ yũuwaꞌjaꞌs Dxusaꞌ nyafxíi enteyku txãꞌwẽ weꞌwena kaajiyuꞌj.
19 Txãa paꞌgath adxaꞌ naasũjuꞌ: Judiu jiꞌjmeeçxawa Dxusna nwẽeseꞌjyaꞌ pakwesaatxiꞌ kuçx kweꞌsx leytxi nwẽeseꞌjwaꞌjaꞌs jxkaahmée,
20 naasáa naꞌwẽ ptaꞌsxna fxiꞌtheçxáa ewna: Naa kiwega dxus ĩtximeesaꞌs weçxayaꞌ tajkx ikhni çxiçxaꞌs ũꞌwaꞌjmeꞌ. Saꞌ ptammeesa pkal yuuna fxiꞌzewaꞌjmeꞌ. Txãꞌwẽy tajkxnawa thukçxa ikhnisa çxiçxaꞌs ũꞌwaꞌjmeꞌ, eenawa ũꞌwaꞌjmeꞌ.
21 Txãꞌwẽ yũumeeteꞌ, Moises leyaꞌs nyafxíi enteytxi txãasu weꞌwena ptaꞌsxna yuhna ũsuꞌ çxhab iisa judiuweꞌsx pkhaakheni yat-su jxkaase ensu jĩk Jakoboꞌ.
22 Txajũꞌ Jesus jxkaahnisaweꞌsx vxiteꞌ ancianoweꞌsx kxtee ũssa jxukaysa puutx weꞌwetx Pabloweꞌsx yakh Antiokía çxhabna kaajxaꞌ. Saꞌ txhitxhtxi Judas Barsabás yaasesaꞌs vxiteꞌ Silas txãaweꞌsx wala jxtuhthesatx.
23 Txãaweꞌsx yakh karta naꞌjĩna fxiꞌjçxa kaahtx:
Jesus jxkaahnisaweꞌsx vxiteꞌ ancianoweꞌsx weçxana yuwe kajaçthaꞌw ayte ũssa yakhthẽꞌjweꞌsx jxukaysa yãꞌjçxa judiu jiꞌjmée vxite nasa Antiokíate ũssa iꞌkweꞌsxtxi, vxiteꞌ Siria Cilicia kiweteweꞌsxtxiwa.
24 Kweꞌsxaꞌ jiyuthaꞌw kweꞌsx yakh ũssa judiu maaíi yuꞌ kweꞌsx jxkaahmeetewa uꞌjçxa txãaweꞌsx kaapiyaꞌjni yakh iꞌkweꞌsxtxi kaypubaꞌjna ũsuꞌneꞌta Moises leyaꞌs nwẽeseꞌjçxa yaꞌcirkuncidaĩneꞌkwe jĩna.
25 Txãꞌwẽ yũupaꞌga kweꞌsx jxukaysa naꞌwẽ yũuyaꞌ puutx weꞌweçxa kweꞌsx yakh ũssatx txhitxhçxa iꞌkweꞌsxtxi thegyaꞌ kajaçthaꞌw kweꞌsx yakhthẽꞌj Pabloweꞌsx
26 naꞌwẽ nxus knaytxi kweꞌsxtxi jxpeꞌjsa Jesukristo kaapiyaꞌjniꞌs ptaꞌsxpaꞌga txãaweꞌsx yakh.
27 Açaꞌ kweꞌsx kaahni Judas vxiteꞌ Silas txãaweꞌsx paꞌjçxa iꞌkweꞌsxtxi ptaꞌsxitxna maꞌwẽ yũuwaꞌjaꞌswa ew ãate.
28 Iꞌkweꞌsxtxiꞌ jwee yuꞌ thaakwe jxkaahmée naꞌwẽçxáa yũuwaꞌjaꞌsku Dxus Espirituꞌ kweꞌsxtxi kaaũusutheꞌj:
29 Naa kiwega dxus ĩtxĩmeesaꞌs weçxayaꞌ tajkx ikhni çxiçxaꞌs ũꞌwaꞌjmeꞌ, eenawa ũꞌwaꞌjmeꞌ, tajkxnawa thukçxa ikhnisa çxiçxaꞌs ũꞌwaꞌjmeꞌ. Ptammeesa pkal yuuna fxiꞌzewaꞌjmeꞌ. Naꞌwẽ neeweꞌweꞌthaꞌw txãatx kxtey yuuteçxáa ewna. Dxus yakh txutemée mfxiꞌzewe.
30 Txãꞌwẽ kaatheꞌ, Silasweꞌsxaꞌ Antiokíate paꞌjçxa kxteeweꞌsx yakh pkhaakheçxa kartaꞌs dukhteꞌ,
31 txãa kartaꞌs lẽeyçxa wala weçxatx txãꞌwẽ zhiçxkwe yuꞌkxpehna fxiꞌjniꞌs uyçxa.
32 Txãa Silasweꞌsxaꞌ Dxus kĩh yũuyaꞌwatewa dxiikhẽy ptaꞌsxyaꞌ ãjasatx yuꞌ, txãasa kxte yakhthẽꞌjweꞌsxtxi yuꞌkxpehna wala kçxhãaçxhaꞌjtx.
33 Txãaweꞌsxaꞌ kxte maz en ũsçxa kiꞌ sxaweduuçteꞌ, kxte yakhthẽꞌjweꞌsxaꞌ yuwe wala weçxaa kaahna kaahtx kimneꞌta kaah txãaweꞌsx tasxnay.
34 Nawa Silas yuꞌ kxte neeyũuyaꞌk yajkx.
35 Txajũꞌ Pabloweꞌsxaꞌ Antiokíate Dxus yuweꞌs kaapiyaꞌjna nestxi yuu vxite yakhthẽꞌjweꞌsx yakh.
Pabloꞌ Bernabé yakh txuteeçxa Dxus yuweꞌs ptaꞌsxyaꞌ kiꞌ kasehni
36 Txãa eꞌsuꞌ Pabloꞌ Bernabeaꞌs naꞌjĩk:
—Yakhthẽꞌjweꞌsxtxi kiꞌ thegyaꞌ uꞌjwega maa çxhabsuçxah neꞌtkaꞌw Dxus yuweꞌs ptaꞌsx kxsũ jxuka, maꞌwẽ ũstewa uyyaꞌ jĩteꞌ,
37 Bernabeaꞌ Juan Markosna peꞌjçxak uꞌj wẽe.
38 Nawa Pablo yuꞌ peꞌjna uꞌjyaꞌ waꞌlku, txãꞌwẽ mjĩi puꞌçxna jxãꞌjmée Panfxiliajũçxáa sxawedsaꞌ sũhçxa.
39 Txajũꞌ puutx ũusçxa weꞌweçxa txuteetx. Bernabeaꞌ Juan Markosna peꞌjçxa Çxipre kiwenku uꞌj,
40 naapkaçxhaꞌ Pabloꞌ Silasnak txhitxh, txãa yakh uꞌjuwaꞌjsa. Açaꞌ kxte yakhthẽꞌjweꞌsxaꞌ txãaweꞌsxtxi Dxus kusete neeweꞌwena jxãꞌjaçpkaçxhaꞌ, kasehtx.
41 Saꞌ uꞌjçxa Siria Cilicia kiwesu yakhthẽꞌjweꞌsxtxi kçxhãaçxhaꞌjtx Dxus yuweꞌs ptaꞌsxna.
