Hechos 16:1-40
16 Pablo Silas yakh Derbe Listra çxhabsu paꞌjçxa kxte puutx uytxi Jesukristoꞌs jxpaꞌgasa Timoteo yaasesa yakh. Txajx njĩꞌjaꞌ Jesukristoꞌs jxpaꞌgasa judiu jiꞌthewa, Timoteo ney yuꞌ judiu jiꞌjmée griegok yuꞌ.
2 Listra Ikonio çxhabsu uꞌpsa yakhthẽꞌjweꞌsx maawa jxukatx txãa Timoteoꞌs wala tuutheꞌjeꞌ.
3 Txajũꞌ Pabloꞌ txãa Timoteoꞌs peꞌjçxa uꞌjyaꞌk yajkx, saꞌ kaacirkuncidaĩꞌkh txãꞌwẽ griego nçxiꞌkaꞌ jĩna kxsũ judiuweꞌsx açeweꞌwekahmén.
4 Saꞌ Jerusalente Jesus jxkaahnisa vxiteꞌ ancianoweꞌsx fxiꞌjni kartaꞌs jxukatx ptaꞌsxna uꞌjweꞌ maa çxhabsuwa yakhthẽꞌjweꞌsxtxi.
5 Txãꞌwẽ jiyuçxaꞌ, kxsũ pkhaakhesaweꞌsxaꞌ jweeíiçxáatx çxhãçxha Dxus yakh fxiꞌzeꞌ, açaꞌ nasa yuꞌ een isatx pehnana uꞌjweꞌ Jesus kaapiyaꞌjniꞌs nwẽeseꞌjna.
Pablo ksxaꞌwte teeçx piçthẽꞌj Macedoniajũweꞌsx piꞌkxni
6 Txajũꞌ Pabloweꞌsxaꞌ Fxrigia Galaciasutx ktejkana uꞌj, Dxus Espirituꞌ Asia kiwesu jwee yuꞌ Dxus yuweꞌs kaaptaꞌsxiꞌjmeꞌ naa paꞌga.
7 Saꞌ Misia kiwete utxa kũhçxaꞌ, Bitinia kiwen uꞌjweꞌnjaꞌw sũhtewa, Espirituꞌ uꞌkhaahmeꞌ.
8 Txãꞌwẽ yũuyãꞌtheꞌ, Misia kiwen teehwed uꞌjçxa, Troas çxhabtetx paꞌj ĩkh wala pukate.
9 Kxte ũsçxak Pabloꞌ teeçx kuste ksxaꞌw teeçx piçthẽꞌj Macedoniateweꞌsx naꞌwẽ pxthaa weꞌwena ũste: Macedoniate ktejkaçxa, kweꞌsxtxi myuh puꞌçxyaꞌ jĩna.
10 Pablo ksxaꞌwte txãꞌwẽ paꞌya yãꞌtheꞌ, Macedonia kiwen uꞌjyaꞌ pheuꞌthaꞌw, kweꞌsxtxiꞌ Dxus txãꞌwẽ kajaçna Macedoniateweꞌsxtxi txajx yuwe ewte nvxiitwaꞌjsaꞌs ptaꞌsxyaꞌ sũhçxa.
Pablo Silas yakh Fxilipos çxhabte kxuuphni
11 Troas çxhabuh barkote khẽeçxa uꞌthaꞌw ĩkh pxãhte Samotracia kiwen. Saꞌ vxite kuskuskhẽꞌ Neapolis çxhabte paꞌthaꞌw.
12 Txajũ kiꞌ uꞌjçxaꞌ, Fxilipos çxhabte paꞌjçxa maz en ũsuꞌthaꞌw. Txãa çxhabaꞌ romanoweꞌsx iiyamunisa wala jxtuhthesa yuꞌk Macedonia kiwete.
13 Teeçx jxkaase enteꞌ çxhab eka kasehthaꞌw yuꞌwala pukate Dxus yakh puutx weꞌweyaꞌ pkhaakhenite, saꞌ Dxus yuweꞌs ptaꞌsxthaꞌw kxte uꞌy pkhaakhesatx.
14 Açaꞌ kxte pkhaakhesa teeçxsaꞌ Lidiak yaase yuꞌ, Tiatira çxhabuweꞌsx, tela zhiçxkwesatx txweysáa. Txãa uꞌyaꞌ Dxusna nwẽeseꞌjsak txãꞌwẽ Pablo ptaꞌsxniꞌs wẽseꞌjna uꞌpuꞌ. Açaꞌ Dxusaꞌ txajx ũuste kaajiyuꞌkh Pablo ptaꞌsxniꞌs.
15 Txajũꞌ txajx yatteweꞌsx yãꞌjçxa jxuka yuꞌte yaꞌbautisãyçxaꞌ, naꞌjĩnak kweꞌsxtxi pxthaa weꞌwena piꞌkx:
—Ũꞌkweꞌ Dxus yakh fxiꞌzewaꞌjsate iꞌkweꞌsxaꞌ ew jiiçxaꞌ, ũꞌkwe yatte myuhwe dejxaꞌ jĩçxa ãadxijimeeçxa peꞌjna uꞌkh.
16 Teeçx ente nyafxíi ũsnitey uꞌjweççxaꞌ, puutx uythaꞌw teeçx knaꞌsaꞌs eçxthẽꞌj txajx ũuste kaajiyuꞌthe ptaꞌsxna uꞌjusa yakh. Txãa knaꞌsaꞌ patron jxpeꞌjnisa kuꞌga yuꞌ, saꞌ patronweꞌsxtxi wala vxyu kaaknayuꞌjuꞌkuꞌga txãꞌwẽ kĩhnawa ũuste jiyuçxa nasatx ptaꞌsxna.
17 Txãa knaꞌsaꞌ kweꞌsx eꞌstey yuweꞌk Pabloꞌs naꞌwẽ sus weꞌwena:
—Naa piçthẽꞌjweꞌsxaꞌ cielute Dxusna selpisaataꞌ, txãasatx iꞌkweꞌsxtxiꞌ ptaꞌsxiꞌ ewte uꞌjwaꞌj dxiꞌjaꞌs jĩna.
18 Maz enwa txãꞌwẽ yũuteꞌ, nmehteꞌ Pabloꞌ kuçxçxa naꞌwẽk weꞌwe txãa knaꞌsa ũuste uꞌpsa eçxthẽꞌjaꞌs:
—Jesukristo jxkaahniꞌs nwẽeseꞌjçxa, txãa knaꞌsa ũusuh mkaaseh jĩçpkaçxhaꞌ, eçxthẽꞌjaꞌ kasejk.
19 Nawa patronweꞌsxaꞌ txãa knaꞌsa paꞌgaçxáa vxyu knayna fxiꞌzeniꞌs ivxiituyãꞌjçxaꞌ, Pabloweꞌsxtxi uweçxa çxhab pxãhte jxũna uꞌjçxa
20 kxte khuẽsweꞌsxtxi naꞌjĩnatx pãatxhĩꞌkh:
—Naa piçthẽꞌj judiuweꞌsxaꞌ wala kuçx yuuna ũstaꞌ kweꞌsx çxhabte.
21 Kĩhwa kweꞌsxtxi selpiwaꞌjmeesaçxáanatx kaapiyaꞌjaꞌ, açaꞌ txãꞌsaꞌ kxtey yuuyaꞌ ãjãmeꞌnjaꞌw, kweꞌsxaꞌ romano nasathaꞌw naa paꞌga jĩteꞌ,
22 nasaꞌ wala ũusaçxana ahçetx. Açaꞌ khuẽsweꞌsxaꞌ Pabloweꞌsxtxi ksũupiꞌjçxa peçxuukwe kaahtx.
23 Txãꞌwẽ wala pkxuuçxaꞌ, karcelte ktxaajaꞌjçxa kxte thegna ũssaꞌs wala jxpaꞌyakx theg kaatheꞌ,
24 kxte thegsaꞌ karcel dxiite jwee dxiiju peꞌjna uꞌjçxa telte çxidatx seꞌwçxak kiꞌp.
25 Nawa Pabloweꞌsx kuspxãh Dxus yakh puutx weꞌwena memna uꞌpteꞌ, vxite preesuꞌ wẽseꞌjna uꞌppkaçxhaꞌ,
26 ehd seenaꞌ çxhãçxha uꞌtheꞌ, karcel vxitxaꞌ jxuka phaatetx, açaꞌ preesu tudni kadenawa çxuktetetx.
27 Txajũꞌ karcelte thegsa yajkxçxaꞌ, karcel vxitx jxuka phaateçxa ũste uyçxaꞌ, kçxilxaꞌs kutxiꞌjçxa peekíiçxáa yaꞌikhyaꞌwak yuꞌ, preesuꞌ jxuka kasehçxa uꞌjneꞌta sũhna ũukhçxa.
28 Açaꞌ Pabloꞌ naꞌwẽk weꞌwe:
—Txãꞌwẽ yũunu. Jxuka ũsthaꞌw ayte jĩteꞌ,
29 karcelte thegsaꞌ bela pkiꞌtaçxa ũukhna wuwuuçxáa kũhçxa, Pabloweꞌsx tasxte peejxũkwek.
30 Txajũꞌ Pabloweꞌsxtxi kutxiꞌjçxa naꞌwẽk pẽjx:
—Iꞌkweꞌsxaꞌ mpeetaꞌsxwe, ¿maꞌwẽ yũuçxa Dxusaꞌs uyuukiꞌth? jĩteꞌ,
31 Pabloweꞌsxaꞌ naꞌwẽtx ptaꞌsx:
—Kweꞌsxtxi jxpeꞌjsa Jesukristoꞌs jxpaꞌgaçxa yuuçxáa Dxus yakh fxiꞌzewaꞌjaꞌs uyuuneꞌga petx iidx yatteweꞌsx yãꞌjçxa jxuka.
32 Txajũꞌ Dxus yuweꞌs ptaꞌsxtxi txajx yatteweꞌsx jxukaysatx.
33 Saꞌ karcelte thegsaꞌ txãa kustey Pabloweꞌsx kpãꞌtx pkhiꞌkxnaꞌwa txajx yatteweꞌsx yãꞌjçxa jxukaysa yaꞌbautisãytxi.
34 Txajũꞌ txajx yatna peꞌjna uꞌjçxa puuçku, saꞌ wala weçxana ũsuꞌk Dxus yakh fxiꞌzewaꞌjaꞌs jiꞌphuthaꞌw jxukaysa jĩna.
35 Txajũꞌ khuẽsweꞌsxaꞌ kusíi policia kaahtx karcelte thegsa tasxna Pabloweꞌsxtxiꞌ txhweetekahn ptaꞌsxyaꞌ.
36 Açaꞌ karcelte thegsaꞌ ptaꞌsxku Pabloꞌs:
—Khuẽsweꞌsxaꞌ txhweetekaahtx iꞌkweꞌsxtxiꞌ. Açaꞌ kasehçxa ũukhmée meꞌjwe jĩteꞌ,
37 Pabloꞌ naꞌwẽk weꞌwe policiaweꞌsxtxi:
—Kweꞌsxaꞌ romano nasatewa ahçeçxa nasa jxuka uyna ũste pkxuuçxa karcelte kxuuphtxi, kĩh yũupaꞌga yuuwetewa txãꞌsaꞌ jiyumey. Saꞌ ãçxhaꞌ paaçte kim yuhwa jiyunimeete txhweeteꞌnjaꞌw ¿sũjuwáꞌnta? Txãꞌwẽ yũuyaꞌ yuꞌ ãjameetxna. Kweꞌsxtxi kutxiꞌjyaꞌ txãaweꞌsx yuu yuwetxna jĩteꞌ,
38 policiaweꞌsxaꞌ uꞌjçxa khuẽsweꞌsxtxi txãꞌwẽy ptaꞌsxteꞌ, txãaweꞌsxaꞌ wala ũukhtxi, Pabloweꞌsxaꞌ romano nasatewa jiyuçxaꞌ.
39 Txajũꞌ khuẽsweꞌsxaꞌ Pabloweꞌsx tasxna uꞌjçxa jxpubaneꞌtkaꞌw jĩna pxthaa weꞌweçxa karceluh kutxiꞌjçxa çxhabuh kaseh kaahtx.
40 Açaꞌ Pabloweꞌsxaꞌ karceluh kasehçxaꞌ, kxte çxhabte Lidia yatnatx uꞌj. Saꞌ ũukhmée meswe jĩna yakhthẽꞌjweꞌsxtxi kvxiisxaꞌjçxatx txajũ kaseh.
