Hechos 17:1-34
17 Pablo Silas yakh Anfxípolis Apolonia çxhabsu ktejkana uꞌjçxa, Tesalónika çxhabtetx paꞌj judiuweꞌsx pkhaakheni yatte.
2 Pabloꞌ jxkaase ensuꞌ tekh kiꞌsupkaçxku Dxus libru maꞌwẽneꞌ weꞌweꞌ txãꞌsna kaapiyaꞌjna ũsuꞌ judiuweꞌsx pkhaakheni yatte.
3 Saꞌ ãatek ptaꞌsx:
—Dxus tasxuh yuusaꞌ wala pxthaa yuuçxa uuçxawa kiꞌ ĩtxi yuuwaꞌjsak yuꞌ, açaꞌ adx iꞌkweꞌsxtxi ptaꞌsxiꞌth Jesus jĩna txãaíik Dxus tasxuh yuusa Kristo yuꞌ.
4 Txajũꞌ judiuweꞌsx maaíi yuꞌ txãꞌwẽ Jesusaꞌ Dxus tasxuh yuusa Kristo yuh yuꞌneꞌ sũhçxa Pabloweꞌsx juꞌgutx yuu. Txãꞌwẽy wala kuh griego Dxusna nwẽeseꞌjsawa utxaatx, vxiteꞌ uꞌywa wala kuh utxaatx jxtuhthesaweꞌsx.
5 Txãꞌwẽ yũuteꞌ, vxite judiuweꞌsx Pablo ptaꞌsxniꞌs açesa yuꞌ wala ũusaçxaçxa nasa ewmeesatx pkhakhçxa çxhabte wala seenaꞌ ksuusuꞌtx kuçx yuuna. Saꞌ Jasón yatte Pabloweꞌsxtxi pakweyaꞌ uꞌjtx txajũ kutxiꞌjçxa nasaa ksxavxyte dukhyaꞌ.
6 Nawa txãaweꞌsxtxi uymeeçxaꞌ, Jasón vxiteꞌ yakhthẽꞌjweꞌsx kxte ũssaçxáatxwa wezxna uꞌjçxa çxhabte khuẽs tasxte kuutxaꞌjçxa naꞌwẽtx wẽesxu:
—Txãa nasa naa kiweꞌs jxuka kaypubaꞌjsaweꞌsx aytewa paꞌtha,
7 açaꞌ Jasonaꞌ txajx yattega jxpaꞌga. Txãaweꞌsxaꞌ jxukaysa açeꞌtx Romate jxkaahsa leyaꞌs, txãꞌwẽ vxite jxkaahsa Jesus yaasesa ũsaꞌ jĩçxa.
8 Txãꞌjĩna weꞌweteꞌ, khuẽsweꞌsx nasa jxukaysa wala seenaꞌ sustxi.
9 Nawa Jasón vxiteꞌ txãa yakh ũssaweꞌsxtxi vxyu kusaꞌjçxaçxáa txhweetetx.
Pablo Silas yakh Bereate paꞌjni
10 Kxte yakhthẽꞌjweꞌsxaꞌ txãa kustey wala dud kaahtx Pabloweꞌsxtxiꞌ Berea çxhabna. Kxte paꞌjnaꞌwa uꞌjtx judiuweꞌsx pkhaakheni yatna.
11 Kxte judiuweꞌsxaꞌ wala ew yuꞌtx Tesalonikateweꞌsx naꞌwẽmée. Dxus yuweꞌs wala weçxana jxpaꞌgaçxa, een isatx Dxus librute pakwéꞌ Pabloweꞌsx ptaꞌsxni isa dxihtewa jiyuyaꞌ.
12 Txãꞌwẽ kxteeweꞌsx wala kuhsa jiyutx Pablo ptaꞌsxniꞌ isa yuh yuꞌga sũhna, vxiteꞌ uꞌy griego jxtuhthesa petx piçthẽꞌj yãꞌjçxa.
13 Nawa judiu Tesalonikateweꞌsxaꞌ txãꞌwẽ Pabloꞌ Dxus yuweꞌs ptaꞌsxna ũsaꞌ Bereate jĩniꞌs jiyuçxaꞌ, Berea çxhabna uꞌjçxa kxte nasatx wala seenaꞌ kaaũusçxaꞌjtx.
14 Açaꞌ kxte yakhthẽꞌjweꞌsxaꞌ jwee yuꞌ kaajxthẽeyuꞌjmée Pabloꞌs kaahtx Atenas dxiꞌj. Naasáa Silas Timoteo txãaweꞌsxçxáatx neeyũu Bereate.
15 Pablo yakh piꞌkxna uꞌjsaweꞌsxaꞌ Atenas çxhabna paꞌjtx uꞌj. Saꞌ kiꞌ Bereate sxawedna paꞌjçxaꞌ, Pabloꞌ iꞌkweꞌsxtxi wala dud yuukaakh txãa yakh ũsyaꞌ jĩnatx ptaꞌsx Silasweꞌsxtxiꞌ.
Atenas çxhabte Pablo paꞌjni
16 Pabloꞌ Atenas çxhabte Silas Timoteo txãaweꞌsxtxi ũythasna ũsçxaꞌ, wala kuh yajkxna fxiꞌzeꞌk txãa çxhabaꞌ naa kiwete dxus ĩtximeesaçxaçxáatxku txakwe wala jiꞌph yuꞌ naa paꞌga.
17 Txãasak judiuweꞌsx pkhaakheni yatte judiuweꞌsx yakh vxiteꞌ judiumeeçxawa Dxusaꞌs yaakxsaweꞌsx yakh puutx weꞌweꞌ, saꞌ çxhab pxãhsuwa een isak weꞌweꞌ Dxus ĩtximeesatx neeweꞌwesaweꞌsx yakh.
18 Txajũꞌ kxte epikúreo kaapiyaꞌjniꞌs piyana ũssaweꞌsx vxiteꞌ estóiko kaapiyaꞌjniꞌs piyana ũssaweꞌsx piçthẽꞌjaꞌ Pablo yakh puutx weꞌwetx, naapkaçxhaꞌ maaíi yuꞌ naꞌjĩnatx weꞌweꞌ txãaweꞌsx pweꞌsx:
—Naa thẽꞌjaꞌ ¿kĩjkiꞌk txakwe wala weꞌweꞌ? jĩꞌtx. Naapkaçxhaꞌ vxite weꞌweçxaꞌ:
—Dxus jiyunimeesatx kxsusnak ptaꞌsxiꞌ jĩꞌtx.
Pabloꞌ Jesus uuçxa kiꞌ ĩtxĩ yuuniꞌs ptaꞌsxpaꞌgatx txãꞌjĩna weꞌweꞌ.
19 Txajũꞌ Pabloꞌs teeçx ahte Areópago yaasesate peꞌjna uꞌjçxa paapẽjxtxi:
—Kweꞌsxtxi meen peetaꞌsx naꞌwẽ yuwe uꞌsesa ptaꞌsxiꞌg txãꞌsaꞌ jiyu wẽethaꞌw.
20 Naꞌwẽ kĩhwa fxiysa ptaꞌsxiꞌg txãꞌsaꞌ ew ãate mkaajiyuꞌj jĩna.
21 Txãꞌwẽ Atenasteweꞌsxaꞌ jxukaysa pkhaakheçxa kĩhwa uꞌse kaapiyaꞌjniꞌs wẽseꞌjna puutx paapẽjxnaçxáa fxiꞌzesatx yuꞌ, açaꞌ vxite kiwejuweꞌsx Atenaste uꞌp-yaꞌ paꞌjsawa txãꞌwẽytxi yuꞌ.
22 Txajũꞌ Pabloꞌ Areópagote txãaweꞌsx ksxavxyte yujuçxa weꞌwek:
—Atenasteweꞌsx iꞌkweꞌsxaꞌ dxusaꞌs wala yaakxsaneꞌkwe sũjuꞌth.
23 Msuuwa iꞌkweꞌsx dxusaꞌs neeweꞌwenisu thegna uꞌjuçxaꞌ, uythu teeçx altalte naꞌwẽ fxiꞌjnisa: Jiyunimeesa Dxusaꞌ jĩnisa. Iꞌkweꞌsx naꞌwẽ jiyunimeesa dxus jĩna neeweꞌweneꞌkwe txãa Dxus jiyunimeesaꞌsthu adxaꞌ ãate kaajiyuꞌjuꞌ.
24 Txãa Dxusku naa kiweꞌs vxitçxa kxte kĩjkĩhçxah ũstxna txãatxwa jxuka vxit. Txãa paꞌga txãaíi namuꞌ naa kiwe, cielu yãꞌjçxa. Txãꞌ piçthẽꞌjweꞌsx txaahni yat-su ũsuꞌçmeꞌ.
25 Txãꞌ naa kiwete nasa puꞌçxni fxiꞌzewaꞌjsameꞌ. Txãaíik kweꞌsx jxukaysa ĩtxĩ fxiꞌzewaꞌjaꞌs ũs, kĩjkĩhnawa jxuka.
26 Saꞌ nasa maazkuẽesawa teeçx piçthẽꞌj jiꞌjçxaçxáa yuuwaꞌjaꞌs vxitçxa, msuuçxah uꞌpwaꞌjsatewa ptaꞌsxna enaꞌswa txuhdek nus paꞌjn kiꞌ sekna yuuwaꞌjaꞌs.
27 Dxusaꞌ ũsna sũhçxa pakweçxaꞌ thẽymée uykahnku txãꞌwẽ yũu. Açaꞌ Dxusaꞌs pakwete yuꞌ kweꞌsx yakh jxuꞌjmeete ũsaꞌ.
28 Kweꞌsxaꞌ Dxus ũste íiçxáathaꞌw ĩtxi ẽseꞌsena fxiꞌzeyaꞌ ãjaꞌ. Dxus ũste íitx iꞌkweꞌsx jiꞌj wala fxiꞌjyaꞌ jiisaweꞌsx naꞌwẽ weꞌwe: Dxus takiꞌnithaꞌw jĩna.
29 Txãꞌwẽ Dxus takiꞌniyãꞌjçxaꞌ, piçthẽꞌjweꞌsx ũus yajkxçxa nasa naꞌwẽ piisani ũstaꞌ vxyuu beh, vxyuu çxihme, kwet txãꞌwẽsaꞌ kweꞌsxtxi takiꞌsatxna sũhwaꞌj jiꞌphmeethaꞌw.
30 Dxusaꞌ nyafxíi ensuy yuꞌ maꞌjĩmeꞌ nasaꞌ jiimeeçxa maꞌwẽwa yũutewa. Nawa ãçxhaꞌ jxukaytxi jxkaajaꞌk pkaltxi nvxihtçxa Dxusaꞌsçxáa pakwekahn.
31 Txãꞌwẽmeꞌ, Dxusaꞌ teeçx ente naa kiwete yuuwesatx kastigãywaꞌjsa txhitxhku. Açaꞌ txãa txhitxhnisaꞌ kxtey yuuyujuna. Txãꞌwẽ yuuyaꞌ íiçxáak uuçxawa kiꞌ ĩtxi yuu.
32 Txãꞌwẽ uuçxawa kiꞌ ĩtxi yuuk jĩniꞌs wẽseꞌjçxaꞌ, maaíi yuꞌ weeçxtxi, naapkaçxhaꞌ vxite weꞌweçxaꞌ:
—Vxite enkhẽ kiꞌ ptaꞌsxineꞌga, txagaçx kiꞌ wẽseꞌjeꞌnjaꞌw jĩꞌtx.
33 Txãꞌjĩyãꞌtheꞌ, Pabloꞌ uꞌkh.
34 Nawa maaíi yuꞌ Pablo ptaꞌsxni isa yuhna sũhçxa txãa yakh utxaatx. Kxte utxaasaaweꞌsx teeçxsaꞌ Dionisio Areópagote pkhaakhesateweꞌsxku yuꞌ, saꞌ teeçx uꞌy Dámaris yaasesawa utxaak, vxite yãꞌjçxa.
