Hechos 18:1-28
18 Txãa eꞌsuꞌ, Pabloꞌ Atenasuh kasehçxa Korinto çxhabnak uꞌj.
2 Kxteꞌ teeçx judiu Akila yaasesa yakhku puutx uy, Ponto kiwejuweꞌsx. Akila txajx nyu Priscila yãꞌjçxa uꞌseçxáa Italiaju paꞌjçxatx kxte ũsuꞌ, Romate jxkaahsa Klaudioꞌ judiuweꞌsxtxi txajũ jxuka kutxiꞌphaꞌga. Açaꞌ Pabloꞌ txãaweꞌsx yatna uꞌjçxa Akilaweꞌsx yattek yuju.
3 Txãaweꞌsx naꞌwẽy tultu kaççxak txweyna fxiꞌzesa yuꞌ, txãasak kxte neeyũu txãaweꞌsx yakh mjĩina.
4 Saꞌ jxkaase ensuꞌ judiuweꞌsx pkhaakheni yatna uꞌjçxa, kxte judiuweꞌsx vxiteꞌ judiumeesatxwa Dxus yuweꞌs ptaꞌsxiꞌk Dxus jĩi knayyaꞌ.
5 Silas Timoteo yakh Macedonia kiweju paꞌtheꞌ, Pabloꞌ vxite mjĩiaꞌs nvxihtçxa, Dxus yuwe ptaꞌsxwaꞌthe yuuçxáak yuju een isa, Jesusaꞌ Dxus tasxuh yuusa Kristo yuh yuꞌk jĩna judiuweꞌsxtxi kaajiyuꞌjna.
6 Nawa txãaweꞌsxaꞌ txãꞌwẽ ptaꞌsxniꞌs jxpeejxmeethaꞌw jĩçxa ahçena weeçxwaꞌjaꞌs uytxi. Açaꞌ Pabloꞌ:
—Adxaꞌ yuuwemeeth, iꞌkweꞌsxtxi ptaꞌsx yãꞌth. Açaꞌ yuuwesaꞌ iꞌkweꞌsxiꞌkwe peekx uuwaꞌjaꞌs pakwena ũspaꞌga jĩna txajx athni ropaꞌs yaꞌtatak. Saꞌ txãꞌwẽ yũupaꞌga ãçxhaꞌ uꞌjweçthu judiu jiꞌjmée vxite nasatx ptaꞌsxyaꞌ jĩk.
7 Txãꞌjĩnaꞌwa judiuweꞌsx pkhaakheni yatuh kasehnaꞌwa, teeçx piçthẽꞌj Justo yaasesa yatnak uꞌj, judiuweꞌsx pkhaakheni yat pukateyçxáa. Txãa piçthẽꞌjaꞌ Dxusna neeweꞌwena fxiꞌzesak yuꞌ.
8 Txajũꞌ judiuweꞌsx pkhaakheni yatteweꞌsx npiiçthẽꞌjsa Krispoꞌ txajx ũuste Jesusaꞌs nwẽeseꞌjyaꞌ yajkxku petx txajx yatteweꞌsx yãꞌjçxa jxuka. Txãꞌwẽy Korintoteweꞌsxwa wala kuhsa Kristoꞌs jiyuçxa ũuste jxpaꞌgatx yuꞌte yaꞌbautisãyna.
9 Txãa eꞌsuꞌ Jesusaꞌ teeçx kuste naꞌjĩnak vxyaaçxa weꞌwe Pabloꞌs:
—Weh yuhwa ũukhmée Dxus yuweꞌs mpeetaꞌsx. Txãꞌwẽmeꞌ, naa çxhabte adxna nwẽeseꞌjwaꞌjsa wala ũs íiçxáataꞌ.
10 Txãa paꞌga adxaꞌ idx yakh piꞌkxna ũsthu, açaꞌ kim yuhwa idxaꞌs ikhyaꞌ yuꞌ ãjameetxna.
11 Txãꞌjĩyãꞌtheꞌ, Pabloꞌ Korinto çxhabte txãaweꞌsx ksxavxyte Dxus yuweꞌs kaapiyaꞌjna ũsuꞌk anxu y medio ãhpkaçx.
12 Nawa Akaya kiwete neꞌjweꞌsx Galión ensuꞌ judiuweꞌsxaꞌ Pabloꞌs ahçeçxa khuẽs tasxte jxũna uꞌjtx.
13 Saꞌ naꞌjĩnatx ptaꞌsx neꞌjweꞌsxaꞌs:
—Dxusaꞌs nwẽeseꞌjwaꞌjaꞌs ley jxkaajaꞌk txãa jxkaahnijũ kasehçxa Dxusaꞌs fxiy nwẽeseꞌjwaꞌjaꞌsku kaapiyaꞌjaꞌ naa piçthẽꞌjaꞌ jĩteꞌ,
14 Pablo pasyaꞌwagaçxhaꞌ, neꞌjweꞌsx Galión khuẽꞌy judiuweꞌsxtxi weꞌwek:
—Yuwe ewmeesaꞌs adxaꞌs pãatxhĩꞌkheçwaçaꞌ, puꞌçxhiwáꞌnja iꞌkweꞌsx pãatxhĩꞌkhniꞌs.
15 Nawa iꞌkweꞌsx pweꞌsx fxiꞌzeni leyçxáꞌ açaꞌ txãꞌsaꞌ iꞌkweꞌsx pweꞌsx mpheuꞌjwe. Adxaꞌ txãasuꞌ thegu jiꞌphmeeth jĩçxa,
16 txajũ eka kutxiꞌkh.
17 Açaꞌ judiuweꞌsx pkhaakheni yatte npiiçthẽꞌjsa Sostenesaꞌs uweçxa, pãpatx griegoweꞌsx jxukaysa neꞌjweꞌsx dxiꞌpte. Nawa Galionaꞌ kuçx maꞌjĩmeꞌ.
Pablo Dxus yuweꞌs ptaꞌsxyaꞌ kiꞌ kasejk naa yakhaꞌ tekh us
18 Txãꞌwẽtewa, Pabloꞌ wala kuh en ũsuꞌk kxte. Txãa eꞌsuk kxte yakhthẽꞌjweꞌsxçxáatx nvxihtçxa, Siria kiwen uꞌjwaꞌj jiꞌphu barkote khẽeçxa Priscila Akila yãꞌjçxa. Txãa dxiꞌj uꞌjweççxaꞌ, Cenkrea çxhabte paꞌjçxa barkote khẽemey txajx dxkhasaꞌs jxuka ktxiidxiꞌk. Dxus yakh yuuçxáa fxiꞌzewaꞌjaꞌs Dxus yakh puutx weꞌwenak txãꞌwẽ yũu.
19 Txajũꞌ Efxeso çxhabte paꞌjçxaꞌ, Pabloꞌ Priscila Akilaweꞌsxtxi nvxihtnaꞌwa, judiuweꞌsx pkhaakheni yatna uꞌkh, kxte judiuweꞌsxtxi Dxus yuweꞌs kaajiyuꞌjyaꞌ.
20 Açaꞌ txãaweꞌsxaꞌ wala pxthaa weꞌwetx kuh en ũskahn. Nawa Pabloꞌ kxtey yuumée,
21 txajũ kiꞌ kasejk naꞌjĩçxa:
—Jerusalente fxiesta uꞌpuyaꞌwaꞌ kxte ũswaꞌj jiꞌpthu. Nawa kiꞌ sxaweduꞌnja iꞌkweꞌsxtxi thegyaꞌ, Dxus maꞌwẽ jxthãasteꞌ jĩna weꞌweçxa, Efxeso çxhabuh barkote khẽeçxa uꞌkh.
22 Saꞌ Cesarea çxhabte paꞌjçxaꞌ, Jerusalennak uꞌj kxte pkhaakhesaweꞌsxtxi weçxayaꞌ. Txajũꞌ Antiokía çxhabnak uꞌj.
23 Kxte maz en ũsçxaçxáa, txajũ kiꞌ kasejk Galacia Fxrigia kiwesu nyafxíi ptaꞌsxnisu jxuka pekũjxaꞌ, Dxus yakh fxiꞌzesaweꞌsxtxi kçxhãaçxhaꞌjna.
Efxeso çxhabte Apolos Dxus yuweꞌs ptaꞌsxni
24 Txãa ensuꞌ teeçx judiu Apolos yaasesa Alejadría çxhabuweꞌsx paꞌkh Efxeso çxhabte, Dxus libru Moises fxiꞌjniꞌs ew jiisa kaapiyaꞌjyaꞌ sxiigmeesa.
25 Saꞌ Jesukristo kimtewa ptaꞌsxni jiik yuꞌ, txãasak Juan yuꞌte bautisãyniçxáana jiiçxawa txajx jiyuni yuꞌsaꞌ jxpubamée kaapiyaꞌjaꞌ.
26 Apolosaꞌ judiuweꞌsx pkhaakheni yatte uꞌkaçxa sxiigmeek ptaꞌsxiꞌ. Açaꞌ Priscila Akilaweꞌsx jiyuçxaꞌ, txãa Apolos txãꞌsçxáa fxii peꞌjna uꞌjçxa, jweeíiçxáatx ew ptaꞌsx Jesukristo yakh fxiꞌzewaꞌjaꞌs jxuka.
27 Açaꞌ Apolosaꞌ Akaya kiwen uꞌjweçteꞌ, yakhthẽꞌjweꞌsxaꞌ uꞌjwaꞌjaꞌs puꞌçxçxa teeçx karta fxiꞌjtx Akayate yakhthẽꞌjweꞌsx waꞌlmée jxpaꞌgakahn. Txãꞌwẽ Akayate paꞌjçxaꞌ, wala puꞌçxku Dxus peeygãhçxa nweꞌwenisatx naꞌwẽ yũuna:
28 Jesusaꞌ Dxus tasxuh yuusa Kristo yuh yuꞌk, iꞌkweꞌsx ũythasni txãꞌsna iꞌkwe judiuweꞌsx jxpuba jĩnak ptaꞌsxiꞌ, Dxus librute maꞌwẽ fxiꞌjni ũsna txãa yakh kaajaꞌdaꞌjna.
