Hechos 19:1-41
19 Apolosaꞌ Korinto çxhabte ũspkaçxhaꞌ, Pabloꞌ yaçkhẽy pekũhni kiwesu paꞌjna uꞌjçxa Efxeso çxhabtek paꞌj. Kxteaꞌ Jesukristoꞌs iiwẽseꞌjsa yakh puutx uyçxaꞌ,
2 naꞌwẽk pẽjx:
—Iꞌkweꞌsxaꞌ Jesukristoꞌs jiyunijũꞌ ¿Dxus Espirituꞌs jxpaꞌgakweꞌ? jĩteꞌ, naꞌwẽtx pas:
—Dxus Espirituꞌs naa kiwete kaahnik yuu jĩniçxáa yuhnawa iiwẽseꞌjmeethaꞌw kweꞌsxaꞌ.
3 Txajũꞌ Pabloꞌ pẽjxku:
—Iꞌkweꞌsxaꞌ ¿kĩh yũuyaꞌ sũhçxakwe yaꞌbautisãy? jĩteꞌ, txãaweꞌsx pasçxaꞌ:
—Juan ptaꞌsxçxaꞌ: Yaꞌbautisãywaꞌjaꞌ jĩk aççxáathaꞌw yaꞌbautisãy jĩtx.
4 Txajũꞌ Pabloꞌ naꞌwẽk ptaꞌsx:
—Juanaꞌ yuꞌte bautisãyku pkaltxi nvxihtçxa peena yuꞌ pkalte fxiꞌzemeeneꞌkwe, Dxus tasxuh yuusa Kristo adx eꞌste yujaꞌ txãꞌsna jxpaꞌgayaꞌ jĩçxa bautisãysak yuꞌ jĩteꞌ,
5 txãaweꞌsxaꞌ yaꞌbautisãytxi Jesusaꞌs nwẽeseꞌjyaꞌ sũhçxa.
6 Txajũꞌ Pabloꞌ txãaweꞌsx dxikthesu peekizeçxa Dxusaꞌs neeweꞌweteꞌ, Dxus Espirituꞌ txãaweꞌsx ũuste khẽek. Açaꞌ vxite yuweju weꞌweyaꞌ ãjawaꞌjaꞌs jxpaꞌgatx, saꞌ Dxus kĩh yũuyaꞌwatewa dxiikhẽy ptaꞌsxyaꞌ ãjatx.
7 Txãꞌwẽ yũusaꞌ doce piçthẽꞌjtx yuꞌ.
8 Pabloꞌ kxte ũsçxaꞌ judiuweꞌsx pkhaakheni yatna uꞌjna nesku yuꞌ tekh aꞌtepkaçx. Saꞌ nasatx ewku kaajiyuꞌjuꞌ Dxus jxkaahwaꞌj enaꞌs.
9 Nawa vxite yuꞌ txãꞌwẽ ptaꞌsxniꞌs wẽseꞌj wẽemeeçxa, açeweꞌwetx nasaa ksxavxyte. Açaꞌ Pabloꞌ txãaweꞌsx tasxuh txuteeçxa Jesukristoꞌs jxpaꞌgasaweꞌsxtxi peꞌjna uꞌkh Tiranno kaapiyaꞌjni yatna, saꞌ kxteꞌ een isak ptaꞌsxiꞌ eꞌz anxupkaçx.
10 Açaꞌ Asia kiwesu uꞌpsa jxukaysa jiyutx judiu vxiteꞌ judiumeesawa Jesus kaapiyaꞌjniꞌs.
11 Txajũꞌ Dxus puꞌçxteꞌ, Pabloꞌ nuykatxhiꞌk kĩh weete ãçaꞌsatxwa jxuka.
12 Txãꞌwẽ yũuyãꞌtheꞌ, Pablo ropa meeçxaꞌ panxwelo kĩhçxáanawa jxũna uꞌjweꞌtx ãçaꞌsaweꞌsx jxaꞌdxkahn. Açaꞌ txãꞌs jxaꞌdxçxaçxáa kĩh weejuwa katxhiꞌtx, txãꞌwẽy eçxwa txãaweꞌsx ũusuh kasejeꞌtx.
13 Txãꞌwẽ yũuteꞌ, judiuweꞌsx dxijxuuçxa eçxtxi nasaa ũusuh kutxiꞌjsaweꞌsxwa Jesus yaseꞌs kxsusçxa eçxtxi kutxiꞌjyaꞌ naꞌwẽtx weꞌweꞌ:
—Pablo kxsusnisa Jesus yasete jxkaajaçthu kasejkahn jĩnatx weꞌweꞌ.
14 Txãꞌwẽ yũusaꞌ sacerdote npiiçthẽꞌj Escewa nçxiꞌk sietesatx txãꞌwẽ yuꞌ.
15 Makwe txãꞌwẽ weꞌwetewa, eçxaꞌ naꞌwẽk pas:
—Jesusaꞌs jiith kimtewa, saꞌ Pabloꞌswa iiuythu. Nawa iꞌkweꞌsx yuutxiꞌ jiimeeth kimtewa.
16 Txãꞌjĩnaꞌwa txãa eçx iiyamunisa nasaꞌ jxkaahna weꞌwesaweꞌsx kakwete ãaphçxa, txãaweꞌsx athni ropatx sudena kpãꞌvxitna yũuteꞌ, txãaweꞌsxaꞌ ũphna uꞌjtx sũpxçxáa.
17 Txãꞌwẽ yũuniꞌs Efxeso çxhabte ũssa judiuweꞌsx vxiteꞌ judiumeesawa jiyuçxaꞌ Jesus yaseꞌs kxsusyaꞌ wala ũukhtxi, saꞌ Jesusaꞌs weçxanaçxáatx fxiꞌzeꞌ.
18 Txajũꞌ Pablo ptaꞌsxniꞌ ewsa yuhna sũhçxa maazkuẽesawa utxaatx txãaweꞌsx ewmée yũuna fxiꞌzeniꞌs ãate ptaꞌsxna.
19 Açaꞌ txãꞌwẽy dxijxuuna fxiꞌzesawa jxukay txãaweꞌsx libru ewmeesatx jxũna paꞌjçxaꞌ, jxukaysa dxiꞌpte kabtxi. Txãa libruꞌ jxukaçxah yuꞌ cinkwenta mil peso ãhtx paꞌgasa yuꞌ.
20 Txãꞌwẽ yũuteꞌ, Dxus yuweꞌ jweeíiçxáak çxhãçxha walaana uꞌj.
21 Txãa eꞌsuꞌ, Pabloꞌ Jerusalenna uꞌjweççxaꞌ, Macedonia Akaya kiwesu paꞌjna uꞌjyaꞌk yajkx. Saꞌ Jerusalenuh Roma çxhabnawa uꞌjweꞌnja sũhnak yajkx.
22 Txajũꞌ Macedonia kiwen kaakh txãꞌsna puꞌçxna uꞌjusa Timoteo vxiteꞌ Erasto txãaweꞌsx eꞌzsatx. Nawa txãa yuꞌ nee Asia kiwete ũsuꞌk maz en.
Efxeso çxhabte nasa ũusçxani
23 Txãn ensuꞌ wala seenaꞌ sustxi Dxus yuweꞌs ahçeçxaçxáa.
24 Txãa yuwe kiissa yuꞌ Demetrio vxyuu çxihmeꞌs dxus Diana ũsni yat naꞌwẽ pheuꞌjçxa txãa yakh mjĩisatx wala vxyu kaaknayuꞌjsak txãꞌwẽ yũu.
25 Saꞌ txãa yakh mjĩisa vxiteꞌ txãa naꞌwẽy pheuꞌjsatxwa jxuka pkhakhçxa naꞌjĩk:
—Iꞌkweꞌsxaꞌ jii iꞌkwe naꞌwẽ mjĩiçxaꞌ kĩh yuhwa peejxmeethaꞌw vxyu uyuꞌ.
26 Nawa iꞌkweꞌsxaꞌ iiwẽseꞌjneꞌkwe Pablo jĩnisaꞌ naa çxhab Efxesoteçxáamée, Asia kiwete msuuwa nasatxiꞌ jxuka txajx juꞌgu tuphiçaꞌ, txãꞌwẽ piçthẽꞌjweꞌsx pheuꞌjni dxusaꞌ ĩtximeesataꞌ jĩçxa.
27 Naꞌsaꞌ mpaꞌyajkxwe. Txãꞌwẽ yũumeeteꞌ, kweꞌsx mjĩiniçxáa vxitumée, dxus Diana ũsni yat txakwe wala jxtuhthesa yuu vxituna. Açaꞌ Asia kiweteweꞌsx jwee vxite kiweteweꞌsxwa dxus Diana txakwe zhiçxkwesaꞌs jwee yuꞌ nwẽeseꞌjmeetxna.
28 Txãꞌjĩna weꞌweteꞌ, wala ũusaçxaçxa naꞌjĩnatx sus weꞌwe:
—¡Efxeso çxhabte dxus Diana yuuçxáa maatewa jxthaakwe jxtuhthesaꞌ! jĩnatx sus.
29 Açaꞌ txãa çxhabteweꞌsx jxuka ũusaçxaçxa eꞌz piçthẽꞌj Macedoniajũweꞌsx Pabloꞌs piꞌkxna yuusa Gayo Aristarko txãaweꞌsxçxáatx uweçxa wezxna uꞌjtx çxhabte txãaweꞌsx ũsnite.
30 Pabloꞌ kxte uꞌka wẽek nasatx weꞌweyaꞌ. Nawa kxte yakhthẽꞌjweꞌsxaꞌ kaꞌgaꞌjmeetaꞌ.
31 Txãꞌwẽy Pablo namiku khuẽsweꞌsx jxtuhthesawa Pabloꞌs kuçx kxte uꞌkakaahmeetaꞌ.
32 Naapkaçxhaꞌ pkhaakhesa yuꞌ kĩjkĩhwa ũusçxa weꞌwena seenaꞌtx susna ũsuꞌ. Nawa kxte pkhaakhe puꞌçxsa jwee kuhsa yuꞌ jiimeetx yuꞌ kĩh yũupaꞌga txãꞌwẽ pkhaakhetewa.
33 Nawa kxte ũssa maaíi yuꞌ kĩh yũupaꞌga ũusaçxana ũstewa jiisaꞌ, teeçx piçthẽꞌj Alejandro yaasesaꞌs ptaꞌsxçxa nasaa ksxavxyte ukapajkxna nuykũhtx weꞌwewaꞌjsa. Açaꞌ txãa piçthẽꞌjaꞌ sxuunaꞌ yuuwaꞌjaꞌs kuseju ptaꞌsxçxa judiuweꞌsxaꞌ yuuwemeethaꞌw jĩna weꞌwe wẽek.
34 Nawa judiu íiçxáatewa jiyuçxaꞌ, jxukaysa kiꞌ sus weꞌwetx eꞌz ora ãhpkaçx naꞌjĩna:
—¡Efxeso çxhabte dxus Diana yuuçxáa maatewa jxthaakwe jxtuhthesaꞌ! jĩna.
35 Txajũꞌ çxhabte sekretarioꞌ pejka sxuunaꞌ vxitçxaꞌ naꞌjĩk:
—Efxesoteweꞌsx mwẽeseꞌjwe. Naa çxhabte nasaꞌ dxus Diana ũsni yataꞌs wala jxpaꞌyakx thegna vxiteꞌ Dianaꞌs piisanisa cieluju kĩjk txãꞌsnawa txãꞌwẽy ew jxpeꞌjwaꞌjsatewa jxuka jiitaꞌ maa kiweteweꞌsxwa.
36 Açaꞌ ¿maꞌwẽ yũuçxa txãꞌsaꞌ thegmée nvxiht-yaꞌ ãjatxki? Txãꞌwẽ yuꞌ yuumeetxna. Txãa paꞌga wejx kuh yajkxmée sxuunaꞌ myuuwe.
37 Txãa paꞌgatey eꞌz piçthẽꞌj iꞌkweꞌsx jxũna kũjiꞌkwe txãaweꞌsxaꞌ iꞌkweꞌsx dxus Dianaꞌs suwwameetaꞌ saꞌ açeweꞌwenawa ũsmeetaꞌ.
38 Meeçxaꞌ Demetrio vxiteꞌ txãa yakh mjĩisaweꞌsxçxáa maa yakh iipuiisaçxawa, pãatxhĩꞌkhwaꞌj jiꞌphtaꞌ, txãa paꞌgatey khuẽsweꞌsx ũstaꞌ, açaꞌ txãaweꞌsx tasxte pãatxhĩꞌkhyaꞌ uꞌjwetxna, kxah kaapdxiꞌpuꞌjçxa yuweꞌs pheuꞌjutxna kĩhteçxah yuuwesatewa.
39 Iꞌkweꞌsxaꞌ khuẽs tasxtemée iꞌkweꞌsx pweꞌsxçxáa puutx weꞌwewaꞌj jiꞌphçxawa, zhiçxkwe mpuutxweꞌwewe txãꞌwẽ susmée.
40 Naꞌwẽ ãçxh susni yuweꞌs gobiernoꞌ paapẽyiwáana açaꞌ seenaꞌ ewmeete neeyũuwaꞌthe ũsthaꞌw, kĩhwa yuuwemeete suspaꞌga.
41 Txãꞌwẽ weꞌweçxaꞌ, kaapçuꞌjuk txãa susniꞌs.
